Morael el Obengkel a Dios, E Moridm a Ungil
Morael el Obengkel a Dios, E Moridm a Ungil
“Sel lolalem a cheluut e te mo meridm a chetau.”—HOSEA 8:7.
1. Ngmekerang e sebeched el merael el obengkel a Dios?
A OMERAEL el ngar er a kengaol el beluu a mo ungilbesul a lsekum a chad el medengelii a rael a omekrael er kid. Me ngrolel a llomeserreng a dorael el obengkel ngikaikid el chad er a bai di lekid el tang el merael. Ngar er a bebil er a rolel, e tiang a olecholt er a blekeradel el dengar er ngii. A Jehovah a ua bla lekengei el mo omekrael er kid er a chelsel tia el mekngit el beluulechad. Ngbai rolel a llomeserreng a dorael el obengkel er a bai di lekid el omtebechel a blekekled. Me kede mekerang a dorael el obengkel a Dios? Sel bo doltirakl er a ulekrael el lebeskid el oeak a Tekingel.
2. Ngerang a mo soadel el ngar er tia el suobel?
2 Sel mlo merek el suobel a milsaod er a okesiu el sibai el debetik er ngii er a babier er a Hosea er a 1 el mo er a 5 el klou el bliongel. El ua dulsaod er a uchei, sel okesiu el sibai a meskid a ngeseu me bo lsebeched el merael el obengkel a Dios. Chelechang, me bo domes a bebil er a meklou a ultutelel el tekoi er a 6 el mo er a 9 el klou el bliongel. Ngungil a domuchel el okiu a kekedeb el omesodel aika el eua el bliongel.
A Kekedeb el Omesodel
3. Ka mtelkib el mesaod aike el ngar er a Hosea er a 6 el mo er a 9 el bliongel.
3 A Jehovah a uldureklii a Hosea el mo omlaoch el mo er aike el teruich el klebliil el ngar er a diluches er a renged er a Israel. Sel renged el domekedong er ngii el kmo Efraim, el ngklel sel kot el mesisiich el kebliil, a mla mo cheroid er a Dios. A Hosea er a 6 el mo er a 9 el bliongel a olecholt el kmo a rechad a mlo diak lolengesenges er a Jehovah e ulemtok a tekoi ma telbiil e mirruul a mekngit. (Hosea 6:7) Te uluumerang a telbilir el obengkel a beluulechad er a bai losiik er a Jehovah. E le te millalem a mekngit ma uchul me te mo meridm a mekngit. Tiang a belkul a kmo a meringel el kerrekeriil a kmedang. Engdi a ulochel a Hosea a dirrek el ngar er ngii a ungil el chais er ngii. A rechad a mlo ulterekokl a rengrir el kmo ngsebechir el lmuut el mo er a Jehovah e ngii a mo chubteterir a lsekum te mo ouuchel a rengrir e obult el mo er ngii.
4. Ngera el ungil el osisechakl er a ulochel a Hosea a bo dosaod er ngii?
4 Ngsebeched el ngmai a lmuut el bebil er a ulekrael el ngosukid el mo merael el obengkel a Dios el ngar er aika el eua el bliongel er a ulochel a Hosea. Me bo dosaod aika el eua el ungil el osisechakl: (1) A mera el beltel a reng a mocholt el okiu a blekerdeled, el diak di letekinged e lemerekong; (2) a omelenget el lemerekong a diak lodeuir a rengul a Dios; (3) a Jehovah a mo mekngit a rengul sel bo lecheroid er ngii a rechedal; ma (4) bo doridm a ungil, e ngkired el melalem a ungil.
Ngmekera e Mocholt a Mera el Beltel a Reng
5. Ka mosaod er sel klou el tekoi er a Hosea 6:1-3.
5 A ulochel a Hosea a osisecheklid a betok el kirel a beltel a reng ma klechubechub. A Hosea 6:1-3 a melekoi el kmo: “Mei me deluut el mor a RUBAK. Ng mla tomellid e ngdi ngulterekokl el mo omekungil er kid; ng mla mengetechat er kid, e ngdi ng mo remenged a cheltechat er kid; ada ng diak? E a uriul er erul klebesei e ng mo omekngar er kid; e ongede er a klebesei e ng mo olutid er a smeched, me kede mo kiei el ngar medal. Mei me dolasem el mo medengelii a RUBAK. Ng ulterekokl el mer kid el di ua lulterekokl el kmo ng metetekakl a llomes. Ng ulterekokl el mer kid el ua chull sel le mei e ng ulterekokl el dikmesii a chutem.”
6-8. Ngerang a mle mekngit er a beltel a reng er a Israel?
6 Ngtechang a mengedecheduch aika el bades? A rebebil a melekoi el kmo aika el tekoi a llulekoi tirke el diak a klaumerang er tir el chad er a Israel el tir a ousbech a bderrir er a klechubechub er a Dios el leko te mla obult el mo er ngii. Engdi, a rekuk bebil a melekoi el kmo ngike el mengedecheduch a profet el Hosea, el olengit er rechad me lluut el mo er a Jehovah. Ma klou a ultutelel el ker a kmo, Tirke el chad er aike el teruich el klebliil er a renged er a Israel te liluut el mo er a Jehovah el olecholt er a mera el beltel a reng, ngdiak? A nger a kmo ngdiak. Okiu a Hosea e a Jehovah a melekoi el kmo: “Israel ma Juda, ak mekera er kemiu? A bltikerreng er kemiu el mer ngak a di mereched el mo dibus el ua chetechat a le tutau; ng ua nguches el nguemed er a dirk tutau.” (Hosea 6:4) Tiang a ochotii a mekngit el blekerdelir a rechedal a Dios er a klereng! A blekokeuii el bltikerreng a kmedu el mo diak—el ua nguches el nguemed sel lengasech a sils. A Jehovah a dimlak lolecholt er a klechubechub e le tirke el chad a dimlak lolecholt er a mera el beltel a reng. Me ngngerang a mle mondai?
7 A Israel a dimlak lemera el ouuchel er a rengul. A Hosea 7:14 a ouchais er a ngesechel a rengul a Jehovah el mo er a rechedal er a lolekoi el kmo: “Ng diak le merang er a rengrir a meluluuch er ngak, te bai omedechakl er tir er a bet er tir e oudellekulek.” A 16 el bades a melemolem el kmo: “Te di melemolem el mengeroid er tir er ngak e mor a Baal.” Tirka el chad a dimlak el sorir el lmuut el mo mengull er a Jehovah e le ngmle chetirir el melodech a blekerdelir me bo lsebechir el melisiich er a deleongel er tir ma Jehovah. Nguaisei, ngmle chetirir el merael el obengkel a Dios.
8 Ngmla er ngii a kuk ta er a mondai er a beltel a reng er a Israel. A rechad a millemolem el meruul a klengit, el ua cheleblad ma koad el chad ma omerechorech ma omengull el bleob e omak a deleuill el obengkel a bebil er a beluu. A Hosea 7:4 a omekesiu er tirka el chad el ua le “kleald el stob” e le ngibes er a klengit a di ngar er a rengrir. Me sel domes er choua tia el mekngit el blekeradel er a klereng er tirka el chad, e omomdasu e te redemelel a nguu a klechubechub? Ngkmal diak! A Hosea a ouchais er tirka el omtok el chad el kmo a Jehovah a “diak lobes a kngterir me ng mo omals er tir el kirel.” (Hosea 9:9) A klechubechub a kmal diak lebo er tir!
9. A tekingel a Hosea ngosisecheklid er a ngerang el kirel a beltel a reng ma klechubechub?
9 Sel donguiu er a tekingel a Hosea, e ngera kede suubii el kirel a beltel a reng ma klechubechub? Tia el uleklatk el mo er tirka el diak a klaumerang er tir el ngalek er a Israel a osisecheklid el kmo a lsekum ngsoad el ngmai a klungioled er a klechubechub er a Jehovah, e ngkired el ochotii a mera el beltel a reng el mla er a rengud. Me ngmekerang a dolecholt er choua itia el beltel a reng? A Jehovah a diak lemecheblad er a lengeled ma tekinged. A mera el beltel a reng a mocholt el okiu a omerelled. A lsekum ngsoal el nguu a klechubechub, e a chad el ngar er a klengit a kirel el chemoit a rokui el klengit el loruul e mo oltirakl er a ngar er a bab el llechul a Jehovah er a klengar er ngii.
A Omelenget e Merekong a Diak Lodeuir a Rengul a Jehovah
10, 11. A domes er a blekerdelel a Israel, ngera uchul ma omelenget el merekong a diak lodeuir a rengul a Jehovah?
10 Chelecha e me bo dosaod er a ongeru el suobel el sebechel el ngosukid el merael el obengkel a Jehovah. Ngii el suobel a kmo: A di omelenget e merekong a diak lodeuir a rengul a Dios. A Hosea 6:6 a kmo: “Sel kmal soak a blechoel bltikerreng er kemiu el diak el tengetengiu el charm. Ng bai soak a re chedak a bo lodengelkak, er a lolul a tenget el mer ngak.” Ka momes el kmo a Jehovah a soal a blekokeuii el bltikerreng—el blekeradel er a rengud—ma dirrek a klemedengei el kirel. Engdi ke locha mo melatk el kmo: ‘Ngera uchul me tia el bades a melekoi el kmo a Jehovah a diak ldeu a rengul er a “tengetengiu” ma “lolul a tenget?” Aikang ngdiak el tekoi el ngar er a Llach er a Moses?
11 Ngar er a eungel a Llach e ngmle kirir el melenget, engdi ngmla er ngii a klou el mondai er tirka el chedal a Hosea. Tirka el chad er a Israel a di uleldars a tengetengir el di kirel a ues. E a osisiu el taem, e te mirruul a klengit. El oeak a kngterir e te ullecholt el kmo ngdiak el ngar er a rengrir a blekokeuii el bltikerreng. Te dirrek el ullecholt el kmo te ultngeklii a klemedengei er a Dios e le tir el dimlak el oltirakl er ngii. A lsekum tirka el chad a dimlak lemelemalt a rengrir e dimlak loltirakl er a melemalt el rolel a klengar, e ngera ultutelel aike el mle tengetengir? A tengetengir a uleltuub er a Jehovah.
12. A Hosea 6:6 ngmesterir a rechad er a chelecha el taem a ngera el uleklatk?
12 A tekingel a Hosea omeklatk er a rebetok el chad el mo er a eklesia er a chelecha el taem. Te melenget el mo er a Dios el oeak a omengull er tir. Engdi a omengull er tir a diak a ngera el lerellii er a blekerdelir er a bek el sils. A choua itirika el chad te mera el odeuir a rengul a Dios a lsekum a rengrir a diak loldubech er tir el mo melai a mera el klemedengei el kirel e oltaut er aike el losuub sel lolekebai er tir er a klengit? Ngdiak el kirel a ngii di el chad el omdasu el kmo a omengull er tir a sebechel el odeuir a rengul a Dios. A Jehovah a diak lodeuir a rengul er a ngii di el chad el melasem el melai a kengei er ngii el oeak a omengull er a bai loltirakl er a Tekingel.—2 Timoteus 3:5.
13. Ngua ngera el omelenget a doruul er ngii, engdi ngera el tekoi a kired el melatk er ngii el kirel a klungel a ultutelel a tengetenged?
13 Kid el mera el Kristiano a medengei el kmo a omelenget el merekong a diak lodeuir a rengul a Dios. Ngdiak dolenget a charm el mo er a Jehovah, engdi kede “oldars a tenget el mora Dios, el tenget er chodanges, el rodech ra ngor lolecholt ra ngklel.” (Hebru 13:15) Me ngklou a ultutelel el diak bo deua rengalek er a Israel el mla er a klengit er a sils er a Hosea, el omdasu el kmo ngsebeched el melubet er a kngtid el oeak a tengetenged el mo er a Dios. Ka molatk er a chimo el ngeasek el ulemart er ngii e mla er a deleboes el omeruul. Ngmillekoi el kmo: “Ak ngilsechekl er a urerek er a berkel a klumech e le ak ulemdasu el kmo ngmo mertii a kngtik.” Tirke el chad er a Israel a mirruul er a osisiu el tekoi. Engdi, a lsekum a tengetenged er a odanges a lekengei er ngii a Jehovah e ngkirel el mera el ngar er a rengud e mo ungil a blekerdeled.
A Jehovah a Mekngit a Rengul Sel Lebo Lecheroid a Remesiungel
14. A ulochel a Hosea ngouchais er kid a ngerang el kirel a uldesuel a Dios?
14 Sel ongede el suobel el sebeched el subii er a Hosea er a 6 el mo er a 9 el klou el bliongel a mesaod el kirel a uldesuel a Jehovah el kirir a remesiungel sel bo lecheroid er ngii. A Jehovah a kmal betik a rengul er a rechedal me ngkmal dmeu a rengul el kirir tirke el obult er a kngterir. Engdi, a lsekum a rechedal a diak el sorir el obult e ngmesisiich el oukerekeriil er tir. E le Jehovah a kmal melatk er kid ma uchul me ngdmeu a rengul a bo leblak a rengud el merael el obengkel. A Psalm 149:4 a melekoi el kmo: “A RUBAK a dmeu a rengul er a re chedal.” Engdi, ngua ngerang a uldesuel a Dios a lsekum a rechedal a mo omtok er ngii?
15. Sel domes er a Hosea 6:7, e ngmle ua ngerang a blekerdelir a rechad er a Israel?
15 A Jehovah a millutk el mo er tirke el omtok el chad er a Israel er a lolekoi el kmo: “Ngdi ser a le ngar a Adam e te tilemellii a telbiil el krirellii ngak me tir, e mlo beot a rengrir er ngak.” (Hosea 6:7) A tekoi er a Hebru el ‘bleot el reng’ a dirrek el belkul a kmo ‘cheleblad.’ Ngar er a Malakai 2:10-16 e tia el osisiu el tekoi er a Hebru a melutk el mo er a mekngit el blekerdelir a rechad er a Israel el tillemall a telbilir ma rebecherir. A ta er a babier a melekoi el kirel tia el tekoi el ngar er a Hosea 6:7 el kmo “ngua teletelel a chebechiil el olecholt er a blekeradel er a chelsel a delongelir . . . Tia el blekeradel a ileakl el di kirel a delongelir el terung engdi sel bltikerreng a mla metemall.”
16, 17. (a) Ngmle ua ngerang a blekerdelir a rechad er a Israel el bedul a telbilel a Dios el mo er a renged er a Israel? (b) Ngerang a kired el melatk er ngii el kirel aike el tekoi el doruul?
16 A Jehovah a ulemes er a Israel el ua lebechil el loeak a telbiil. Me sera bo lomtok er tia el telbiil, e ngdi ua leblo er a laokreng. A Dios a mle ua ungil el bechiil el sechal, engdi a rechedal a chilitii!
17 E kid a kuk mekerang? A Dios a soal el medengei el kmo kede mo merael el obengkel ma lechub ngdiak. Ngdiak el soad el obes el kmo “a Dios a bltikerreng” ma ike el tekoi el doruul a ngar er ngii a lerellii er ngii. (1 Johanes 4:16) A lsekum kede mo oltirakl er a cheleuid el rael, e ngkmal mo mekngit a rengul a Jehovah e mo diak dodeuir a rengul. A bo dolatk er tiang e ngsebechel el omekerreu er kid me ngdiak demechetikaik er a orimel.
Ngmekera Doridm er a Ungil
18, 19. Ngera el omellach a debetik er ngii er a Hosea 8:7, e tia el omellach ngmlekerang el kirir a rengalek er a Israel?
18 Me bo dosaod er sel ongeua el suobel el sebeched el subii er a ulochel a Hosea—ngmekerang e ngmo sebeched el meridm er a ungil. A Hosea a millutk el mo er a mekngit el rael el lulekiu ngii a rechad er a Israel er a loluches el kmo: “Sel lolalem a cheluut e te mo meridm a chetau.” (Hosea 8:7) Ngar er tia el bades e kede metik er a omellach el ungil a bo dolatk er ngii: Ngar er ngii a klaisisiu er aike el tekoi el doruul er a chelechang ma ike el mo duubech er a ngar er a medad. Tia el omellach ngmilekerang e mlo klemerang el kirir a rechad er a Israel?
19 Tirka el chad er a Israel a ulemriid a mekngit el omeruul e le te meruul a klengit. Ngmle sebechir el melemolem el meruul a mekngit e diak loridm a mekngit? Ngkmal dimlak el sebechir el chemiis er a meringel el kerrekeriil. A Hosea 8:13 a melekoi el kmo: “Ng diak bo kubes a telucheklir, ak mo melseterir el kirel a kngterir.” E kede menguiu er a Hosea 9:17 el kmo: “A Dios er ngak a mo ikreterir ele ng dimlak lorrenges er ngii. Te di mo meleuaoch a beluu.” A Jehovah a mo oukerrekeriil er tir. Te ulemriid a mekngit, ma uchul e te mo meridm a mekngit. A kerrekerilel a Dios a mlo er tir er a 749 B.C.E. er sera lebo leblebaol er a beluu er a Asiria.
20. Aike el dilubech el mo er a rechad er a Israel ngosisecheklid a ngerang?
20 Tia el dilubech el mo er a rechad er a Israel a osisecheklid er a klemera el tekoi el kmo: Aike lebriid a chad, aikei a bo loridm. A tekingel a Dios a omeklatk er kid el kmo: “Lako mecheuid; e a Dios a diak le medenguul, le ikel le briid a chad, iaikei a bo loridm.” (Galatia 6:7) A lsekum kede omriid a mekngit, e kede mo meridm er a mekngit. El ua itiang, tirke el chad el oltirakl er a mekngit el rolel a klengar a mo meridm er a mekngit el blekeradel. Ngmo mekngit a ullebongel el kirel a chad el ngar er a klengit el diak lobult.
21. Ngmekera doridm er a ungil?
21 Me ngmekerang a doridm er a ungil? Tia el ker a sebeched el onger er ngii el ousbech er a kmal beot el okesiu. A lsekum a chad er a sers a soal el meridm er a kukau, ngmo melalem er a diokang? Ngkmal diak leuaisei! Ngkirel el dualem a dellomel el soal el mo meridm. Me ngdi osisiu, a lsekum e ngsoad el meridm er a ungil, e ngkired el omriid er a ungil. Ngsoam el melemolem el meridm er a ungil—el ungil el klengar er a chelechang el obengkel a omelatk er a diak a ullebengelel el klengar er a beches el beluulechad er a Dios? A lsekum nguaisei, kirem el melemolem el omriid er a ungil sel morael el obengkel a Dios e moltirakl er a llechul.
22. Ngera el tekoi a bla desubii er a Hosea er a 6 el mo er a 9 el klou el bliongel?
22 Ngar er a Hosea er a 6 el mo er a 9 el klou el bliongel, e kede mla suub a eua el tekoi el sebechel el ngosukid el mo merael el obengkel a Dios: (1) A mera el beltel a reng a mocholt el okiu a blekerdeled; (2) a di omelenget e merekong a diak lodeuir a rengul a Dios; (3) a Jehovah a mo mekngit a rengul sel bo lecheroid er ngii a rechedal; ma (4) doridm a ungil, e ngkired el omriid er a ungil. Aike el medechel el eim el meklou el bliongel er tia el babier ngmekerang e ngosukid el mo merael el obengkel a Dios?
Ngmekerang a Omonger?
• Ngmekerang a dolecholt er a mera el beltel a reng?
• Ngera uchul ma omelenget el merekong a diak lodeuir a rengul a Demad el ngar er a eanged?
• Ngua ngerang a uldesuel a Dios sel lebo lecheroid er ngii a rechedal?
• Ngerang a kired el omriid er ngii a lsekum ngsoad el meridm a ungil?
[Aike el Ker er a Suobel]
[Siasing er a 13 el llel]
A blekokeuii el bltikerreng er a Israel a mlo diak, el ua eabed a letutau
[Siasing er a 13 el llel]
A mekngit el blekerdelel a Israel a mle ua mekeald el stob
[Siasing er a 14 el llel]
Ngera uchul ma Jehovah a ulemtok er a tengetengir a rechedal?
[Siasing er a 15 el llel]
A bo doridm er a ungil, e ngkired el omriid er a ungil