Te Ouchais er a Ungil el Chais el Mo er a Remechad

“TE OBA tekoi er a klereng!” Seikid a mle tekingel a merreder er a blirir a remechuodel el ngar er a Navalcarnero, Madrid el beluu er a Sebangiol, er a losaod el kirir a Resioning er a Jehovah el mle oldingel er tir. Ngera uchul me ngmillekoi el uaisei?

A rebebil er a rechad el kiei er sel blai el Rosas del Camino a ngklel, a mechad a dingerir. Engdi, a Resioning a milsuub er a tekoi er a Sebangiol el Lousbech a Chim el Mengedecheduch, misei a uchul e ngmle sebechir el mo mengedecheduch er a rechad er sel blai. Ngike el merreder a chemat er a Resioning e le tir el kongei el ousbech a temir el olisechakl a mekreos el tekoi er a klereng el mo er tirke el ousbech a ngeso. Ngmla mes a ungil el blekeradel el mla duubech el mo er tirke el chad el ungil el chais er a Renged a uchul. Ma rechad el kiei er sel blai​—el ileakl el tirke el mechad ma remeiko—​a dirrek el dmeu a rengrir er a odngelir a Resioning.

A Eulogio, el kiei er sel blai el meiko e mechad, a mla mo mesuub er a Biblia el obengterir a Resioning er a Jehovah. A ta er a klebesei er sera losuub, e a ta el rubak a mlei e milsang ngike el Sioning a chelitakl el bla ldibechii tirka el chad er sel blai el ua olechotel a omereng el saul er tir. A dai er sel chelitakl a kmo “A Bo Desioning.” A telkib er sel chelitakl a kmo: “A klengar er tir a ungil e ultebechel, e dmeu a rengrir er a llomeserreng el mla er a Jehovah el mo er tir. Te di blechoel el oldingel a obliil e le tir el oumerang er a Jehovah.”

Nguaisei, tir el oumerang er a Jehovah a uchul ma rebetok el Sioning el ngar er a beluulechad el rokir a mla mo mesuub a tekoi el ousbech er a chim er a belurir. El oeak tiaikid el rolel e te ouchais el mo er a remechad a dingerir el kirel tia el ungil el chais er a omelatk el ngar er a chelsel a Biblia.