A Omesodel a Kot el Babier er a Psalm
A Tekingel a Jehovah a Di Ngar
A Omesodel a Kot el Babier er a Psalm
NGERANG a kora ungil el ngakl el sebechel el mo dai er a babier er a Biblia el mui er ngii a odanges el mo er a Omebeled, el ngii a Jehovah el Dios? Ngdiak a ngakl el sebechel el mo ua Psalm, ma lechub e ng Chodanges. Tia el kot el kemanget el babier er a Biblia a ngar er ngii a kmal klebokel el delibech el chelitakl el omades a betok el klebokel el blekerdelel a Jehovah, ma ike el meklou el urerel ma olechotel a betok el ulaoch. Betok el chelitakl a olecholt aike el mla er a chelsel a rengrir a rechad el meluches el kirel a chelebulir. Aika el cheliteklir a melluches er a chelsel a bekord el ta el telael el rak, el omuchel er a taem er a profet el Moses el mo lmuut er sel uriul el taem er a leblebaol. Ma Moses ma David ma lmuut el bebil a milluches er ngii. Me ngike el ulemechobech aike el babier er a chelsel a mle priist el Esra.
A ngar er a mong, e a babier er a Psalm a lulemii er ngii el mo eim el chelitakl, ma lechub el bliongel: (1) Psalm 1-41; (2) Psalm 42-72; (3) Psalm 73-89; (4) Psalm 90-106; ma (5) Psalm 107-150. Tia el suobel a mo mesaod er sel kot el bliongel. Nguldekial a rokui el psalm, e di kldei er ngii el diak el uldimukl er tia el bliongel a lulluches er ngii a King el David er a Israel er a irechar. Tirke el milluches er a Psalm 1, ma 10, ma 33 a dimlak lemedung a ngklir.
“NGDIOS ER NGAK, E RISOIS ER NGAK”
A kot el psalm a kmo ngngeltengat a chad el semeriar er a llechul a Jehovah, e a ongerung a melutk el kirel a Renged. a Ngar er a chelsel tia el bliongel e a psalm a mui er a ongit el mo er a Dios. El ua ike el ngar er a Psalm 3-5, 7, 12, 13, ma 17 el ongit el kirel a osebechakl er a recherreuir. A Psalm 8 a meketeklii er sel klengarbab er a Jehovah ma chelitechetul a chad.
Ma losaod er a Jehovah el Ngike el omekerreu er a rechedal, e a David a milengitakl el kmo: “Ng Dios er ngak, e risois er ngak, el ngii a omertelek.” (Psalm 18:2) Ngar er a Psalm 19 e a Jehovah a modanges el Ulemeob e Chad er a omelib el llach, e ngar er a Psalm 20 e ngokedongall el Olsobel, e Osobelel ngike el ngellitel el King er ngii er a Psalm 21. A Psalm 23 a omekesiu er ngii el ua le Klou el Mengkerengel a Sib, e a Psalm 24 a kuk omekesiu er ngii el ua kebkall el King.
Ker er a Biblia a Mlonger:
2:1, 2—Ngera el “diak a belkul” el tekoi a lolib aike el renged? Sel “diak a belkul” el tekoi a melutk er aike el kabelment er a klechad el di osiik a cheldechulir el melemolem er a omerredelir. Tia ua lebechachau el tekoi e le moktek er tir a ulterekokl el mo metemall. A rebeluu ngsebechir el mo mesisiich a bo ldak el ‘omtok er a Jehovah ma ngellitel king er ngii’?
2:7—Ngera ‘ikel bla le dung a Jehovah’? Aike el ledilung a melutk el kirel a telbiil er a Renged, el Jehovah a mla rullii el obengkel ngike el betik er a rengul el Ngelekel, el Jesus Kristus.—Lukas 22:28, 29.
2:12—Ngoeak a ngera el rolel e a remerreder er aike el renged a “[turngur a medal a ngalek]”? Sera taem er a Biblia, e a omelungelmad a mle olechotel a klausechelei ma blakerreng er a delongelir a rechad. Ngmle rolel a loutkeu er a rechokiaksang. Ma reking er a beluulechad a mluchelechel el mo turngur a medal a Ngalek el Sechal, el belkul a kmo te outkeu er ngii el Messias el King.
3:Tekoi el ngar er a bebul a bades—Ngera moktek er aike el tekoi el ngar er bebul a bebil er a psalm? Aike el tekoi a lebebil e ngochotii ngike el melluches ma lechub e ngochotii a blekeradel el lebla er ngii a chad el melluches, el ua Psalm 3. A tekoi el ngar er bebul a bades a dirrek el ouchais er a moktek er a derta el chelitakl (Psalm 4 ma 5) ma dirrek el ulekrael el kirel a chelitakl (Psalm 6).
3:2—Ngera “Selah”? Tia el tekoi a mesaod el kirel a chad el mengitakl ma lechub e ngousekool a ongngak, el mo er a melengel, e olengull e dmolech el melebedebek. Tia el rolel a ulengull a rullii a uldasu ma tekoi el meldung el mo mesisiich. Ngdiak lekirel el menguiu er ngii el klou a ngerel er sel temel a omengiuel a Psalm el mo er a buai.
11:3—Ngera el omekedecheraol a metemall? Aikang a omekedecheraol el rechad er a beluu a urrekodel er ngii, el llach ma oketmeklel a tekoi ma llemalt. Aika el tekoi sel lak lemeketmokl e ngmo er ngii a uldikel er a beluu e mo diak a llemalt. Me ngngar er a eungel choua ika el blekeradel, e a ‘chad el melemalt’ a kirel mui el oumera er a Dios.—Psalm 11:4-7.
21:3—Ngera belkul a “ungil kolt el krone”? Ngdiak a olechotel el kmo tia el krone a okesiu ma lechub e ngmera el klebkall el mlo er a David el kirel aike el betok el kats er ngii er a mekemad. Engdi, tia el bades a omlaoch el kirel a krone er a omerreder el lengiluu a Jesus er a Jehovah er sera 1914. Tia el krone a meruul er a kolt el olecholt el kmo a omengederederel a kot el ngar er a bab el ungil el omerreder.
22:1, 2—Ngera ma David a mellatk el kmo a Jehovah a mla choitii? A David a mla er a chelsel a kmal mle meringel el ongarm er a recherroel me ng ‘milechesuar a chaidirengul el ua mla toker el wax.’ (Psalm 22:14) Me ngulemdasu el kmo a Jehovah a mla choitii. Sera lemedeel a Jesus, e ngdirrek el melatk el uaisei. (Matteus 27:46) A tekingel a David a ochotii a blekerdelel a chad sel bo lechebangel a ringel. Engdi ngar er a nglunguchel el llechukl er a Psalm 22:16-21, e ngmeketeklii el kmo a David a dimlak el oridii a kloumerang er ngii er a Dios.
A Klubeled:
1:1. Ngdiak el kired el ousechelei er a rechad el tir a diak lebetik a rengrir er a Jehovah.—1 Korinth 15:33.
1:2. Ngkmal diak el kired el choitii a ta el sils el diak dolatk a tekoi er a klereng.—Matteus 4:4.
4:4. Sel lengasech a rengud, e ngbai ungil a dorekedii a churad ma lak dedu tekoi el bo douuchel er ngii er a uriul.—Efesus 4:26.
4:5. A tengetenged er a klereng a “kerioll el tenget” me ngkirel el ngar er a rengud e dirrek a omerelled me ngkirel el oltirakl aike el soal a Jehovah.
6:5. Ngera sel ungil el uchul e ngsoad el melemolem el ngar?—Psalm 115:17.
9:12. A Jehovah a osiik er tirke el chelsechusem er a rasech e omals er tir, engdi “ng diak lobes a lengelir a re mukcharm.”
15:2, 3; 24:3-5. A remera el mesiou a melekoi a klemerang, el diak lolaes, ma ka lomerk a klsuul el chisir a rechad.
15:4. A lsekum a telbilem a diak lolemall a llach er a Biblia, e alta e ngkmal merengela er kau engdi ngkirem el mo er sel tkurrebab el sebechem el mo oltaut er ngii.
15:5. Kid a remesiungel a Jehovah a kired el mengeroid er kid er a mekngit el rolel a usbechellel a udoud.
17:14, 15. “Te chad el blingelir er a klengar a ngar a beluulchad” a chemoit a klengar er tir el osiik a kerruul, e omekeroul er a rengelekir, e mengudel a dikesir a rengelekir. Sel mle klou el tekoi er a klengar er a David a meruul er a ngklel el mo ungil er a medal a Dios el ua ‘le bo lomes er a medal,’ ma lechub el bo lolechesuar el kmo ngmla odeuir a rengul a Jehovah. Sel ‘lemekar’ el kirel aike el telbilel ma tekingel a Jehovah, e a David a mo ua ‘ldeu a rengul el omes er ngii,’ ma lechub e ngmo dmeu a rengul e le ngmelechesuar el kmo a Jehovah a obengkel. El ua David, e kid ngdiak bai bo leblak a rengud el kirel a mekreos el tekoi er a klereng?
19:1-6. A lsekum e aika el rokui el bleob, el diak longedecheduch ma ka lomtab a tekoi a mengebkall er a Jehovah, e kid el sebeched el omdasu, e mengedecheduch e mesiou er ngii ngdiak bai lsal kired el mengebkall er ngii?—Chocholt 4:11.
19:7-11. Aike el soal a Jehovah, ngkol ua ngera el uchul a klungioled!
19:12, 13. Ngkired el mengeroid er kid er a cheleuid el telemelled ma klengit.
19:14. Ngdiak di dekerekikl er a omerelled e lemerekong, ngdirrek el kired el kerekikl er a omelekinged ma uldesued.
“KE MO NGOSUKAK, ELE KURUUL ER NGII A MELEMALT”
Sel urungulel ma mesisiich el rengul a rirellii a David el mo lomelemii sel blakerreng er ngii el mocholt er aike el kot el eru el bliongel er a Psalm! Ngmengitakl el kmo: “Ngak a bai diak a mekngit er a klengar er ngak.” (Psalm 26:11) Ngar er a nglunguchel el olengit a klausubes er a kngtil, e ngdilu el kmo: “Ser a lak kucholt a kngtik, e ng mlo diak a klisichek er a lengelek el chelliloil sils.” (Psalm 32:3) El mo er tirke el blak a rengrir er a Jehovah, e a David a omeklatk el kmo: “A RUBAK a mengkar er a re melemalt e orrenges ongterir.”—Psalm 34:15.
A Psalm 37 a mle mekreos el ulekrael el mo er a rengalek er a Israel, e ngkol ua ngerang a kerresel el kired kid el kiei er a “uriul sils” er tia el beluulechad! (2 Timoteus 3:1-5) Ngulemlaoch el kirel a Jesus Kristus, ma Psalm 40:7, 8 a kmo: “Ngak tiang; e a tekingem el kirek el oltirakl a ngar a babier er a Llach. Dios er ngak, ng kmal soak el meruul a tekingem! Ak sichedekl osisecheklem er a renguk.” Aike el uriul el beldeklel a psalm a mesaod er a ongtil a David el mo er a Jehovah el olengeseu er ngii er a ringel el lebla er ngii er a uriul er a lrebet er a klengit el obengkel a Bathsheba. Ngmilengitakl el kmo: “Ke mo ngosukak, ele kuruul er ngii a melemalt.”—Psalm 41:12.
Ker er a Biblia a Mlonger:
26:6—Kede mekerang e mo ua David, el ua dorael el meliuekl er a olengetongel er a Jehovah? A olengetongel a omtechei er sel soal a Jehovah el kongei er a olubet el tenget er a Jesus Kristus el mo olsobel er a klechad. (Hebru 8:5; 10:5-10) Kede meliuekl er a olengetongel er a Jehovah sel dolecholt a kloumerang el kirel sel tenget.
29:3-9—Ngera el tekoi a sebeched el omekesiu er ngii er a ngerel a Jehovah el ua oto er a derumk sel lengelakl? Tiakid el tekoi: Sel klou el klisichel a Jehovah!
33:6—Ngerang a “reng” ma lechub a “telil” el tilobed er a ngerel a Jehovah? Tia el reng a melutk el mo er a klisichel a Jehovah ma lechub a chedaol el reng, el luluusbech er ngii el omeob er a meues el eanged. (Genesis 1:1, 2) Tiang a reng el tuobed er a ngerel el di ua mesisiich el telil, el sebechel remuul a tekoi el ngar er a cheroid.
A Klubeled
26:4. Ngkired el mengeroid er kid er a remengesuul el ngar er a Internet chat rooms, ma rengar er a skuul ma ureor el leko te sechelid engdi ngngodech a moktek er tir, me tirke el omtok er a mera el osisechakl el kora ungil a blekerdelir, me tirke el oltirakl a eru el bedengel a klengar.
26:7, 12; 35:18; 40:9. Ngkmal kired el mengebkall er a Jehovah er a mederir a rechad sel dengar er aike el ongdibel er kid el Kristiano.
26:8; 27:4. Kid kede semeriar el mo er aike el miting er kid a Rekristiano?
26:11. Sera losaod el kmo ngmo urrekodel er a blakerreng er ngii, e a David a ullengit el kirel a osobel. Chochoi, alta e ngdiak demecherrungel engdi ngsebeched el lomelemii a blakerreng er kid.
29:10. A Jehovah el dengchokl el “ngar bebul a eeleb” a belkul a kmo ngsebechel el omtebechel er a klisichel.
30:5. Sel kot el ngar er a uchei el blekerdelel a Jehovah a bltikerreng, ngdiak el ngasechereng.
32:9. A Jehovah diak el soal a bo deua roba ma lechub e nguos el ousbech er a chelebed el mo olengesenges. Ngii a bai soal a dolilt el mo olengesenges er ngii e le kid el medengelii a moktek er ngii.
33:17-19. Ngdiak a ngii di el omengederederel a chad, el sebechel el olsobel. A kloumerang er kid a kirel ultuil er a Jehovah ma Rengedel.
34:10. Ngkol ua ngera el omelisiich el mo er tirke el mla ngmai a tekoi er a Renged el mo kot er a klengar er tir.
39:1, 2. A remekngit sel losiik a rolel el mo omekcharm er a rekldemed er a kloumerang, e ngkmal kired el ‘diak dolekoi a ngerang’ e di lmuk.
40:1, 2. Sel dultuil er a Jehovah e ngsebechel el ngosukid el outekangel er a meringel el uldasu e ‘otebedid er a kdekudel kliokl, ma dechudech el chiiechab.’
40:5, 12. Ngkmal sebeched el outekangel sel bo dechelebangel a ringel ma ngii di lechelitechetud a lsekum e ngdiak ‘dobes aike el diak lemochur el klengeltengat el bla dengai.’
“Modengesii a RUBAK”
Ngkol ua ngera el uchul a ongelaod ma omelisiich aike el 41 el chelitakl er a Psalm! A desal chorma er a ringel ma lechub a mekngit el ukltked, e ngsebeched el mo ngmai a ngeseu ma omelisiich el ngar er tia el tedebechel a mesisiich el Tekingel a Dios. (Hebru 4:12) Aika el psalm a meskid a ungil el ulekrael el kirel a klengar. Ngomelekl el olterekokl a rengud el kmo, a ngii di el ringel el dengar er a chelsel, e a Jehovah a diak lechitid.
A ulebongel el tekoi er aike el kot el group er a babier er a Psalm a kmo: “Modengesii a RUBAK el Dios er a Israel! Modengesii er chelechang el mor a diak a ulebengelel! Amen! Amen!” (Psalm 41:13) Uriul er a omesodel, e tiang ngdiak lodbechid el mo oldanges e dongebkall er a Jehovah?
[Footnote]
[Blurb er a 30 el llel]
A lsekum a diak louteliil el bleob a mengebkall er a Jehovah, e kid ngdiak bai lekired el mo mengbkall er ngii!
[Siasing er a 28 el llel]
A David a dilibech a betok er aike el psalm er a 1 el mo er a 41
[Siasing er a 29 el llel]
Ke medengei el kmo ngera el psalm a olecholt er a Jehovah el ua le Klou el Klekerengel a Sib?
[Siasing er a 31 el llel]
Lak becherei a ta er a sils el diak molatk er a tekoi er a klereng
[Credit Line]
Stars: Courtesy United States Naval Observatory
[Credit Line]
Stars, pages 29 and 30: Courtesy United States Naval Observatory
[Credit Line]
Stars: Courtesy United States Naval Observatory