A Remesiou el Olengeriakl e Merderodel a Blekerdelir

“E mlo uar bek el chad el bedul ar bek el chad, el leko di le ngera kung me kusobelterir ar bebil.”​—1 KORINTH 9:22.

1, 2. (a) Ngoeak a ngera el rolel e a apostol el Paulus a mle meduch el mesiou? (b) Ngmlekera Paulus er a losaod er a uldesuel el kirel a urerel?

 NGMLE sebechel el obengterir a remellomes a rengrir el chad ma rengar er a eou a rengrir el chad el meruul a tento. Ngmle sebechel el mengedecheduch er a rengar er a bab el chad er a Rom ma redi chad er a Frigia. A tekoi el lulluches a mlo remutech a rengrir a rechad er a Grik ma rechad er a Judea. A losaod a tekoi e ngbleketakl e mesisiich el olekar a reng. Ngii a ulsiik a rolel el mo sebechel el mengedecheduch er a rebek el chad me bo lsebechir a rebebil el mo er a Kristus.​—Rellir 20:21.

² Ngika el chad a apostol el Paulus, el meduch el mesiou el blechoel el olengeriakl el beduluchei. (1 Timoteus 1:12) Ngngiluu a ngerachel er a Jesus el mo “chomerk ra ngklek [el Kristus] el morar Chisentail, mar king, mar ngalek ra Israel.” (Rellir 9:15) Ngera mle uldesuel el kirel tia el ureor? Ngdilu el kmo: “E mlo uar bek el chad el bedul ar bek el chad, el leko di le ngera kung me kusobelterir ar bebil. Ngiidi le ngeral tekoi me kuruul el kirel a evangkelio, el kirel me kdirrek el nguu a blingelek ra ngeltengetel a evangkelio.” (1 Korinth 9:19-23) Ngera sebeched el suubii er a kerebai er a Paulus el sebechel el ngosukid el mo meduch el omerk er a klumech e olisechakl?

A Mla Mengodech el Chad a Mlo Ungil er a Urerel

3. Ngera mle osengel a Paulus el bedul a Rekristiano er a uchei er a lobult?

³ A apostol el Paulus ngmle blechoel el klou a rengul, e melatk er a rechad, e mle rredemelel a ngerachel el lengilai? Ngkmal dimlak! A mesisiich el blakerreng er ngii er a klechelid a rirellii a Saulus (el mle ngklel a Paulus er a uchei) el mo oldechelakl er a ruleltirakl er a Kristus. Me sera lekekere el chad, e ngii a kilengei er a kodellel a Stefanus. E a uriul, e a Paulus a mlo meringel el osiik el oldechelakl er a Rekristiano. (Rellir 7:58; 8:1, 3; 1 Timoteus 1:13) E millemolem el “lorrouk e omekoad rar Ubengkel a Rubak.” Ngdimlak di loldechelakl er a ruumerang el ngar er a Jerusalem e lemerekong, ngbai mlo omerk er a mekngit el urerel el mo tmurk er a diluches er a beluu er a Damaskus.​—Rellir 9:1, 2.

4. Ngera el omelodech a lerirellii a Paulus me bo lsebechel el rokir a urerel?

⁴ Sel mle uchul a kltui er a Paulus el kirel a Klekristiano a mle klaumerang er ngii el kmo tia el beches el klechelid a mo olsiseb a ngodech el mekngit el uldasu el mo er a klechelid er a Rechijudea, el mo uchul a telemellel. E kele mobes el kmo, a Paulus a mle “Farisee,” e a belkul tia el ngakl a kmo “mleakl el chad.” (Rellir 23:6) Nglocha kmal kilebetiekl a Paulus er sera bo lodengei el kmo a Dios a mla tutkii el mo olisechakl el kirel a Kristus el mo er a Rechisentail! (Rellir 22:14, 15; 26:16-18) Nguaisei, a Refarisee a dimlak lomengur el obengterir a rechad el lomdasu er tir el kmo te ngar er a klengit! (Lukas 7:36-39) Nglocha kmal mlo meringel er ngii el mo merriter er a uldesuel e sumecheklii el mo oltirakl er a soal a Dios, el soal a rebek el chad a bo lsobel.​—Galatia 1:13-17.

5. Kede mekerang a doukerebai er a omesiungel a Paulus?

⁵ Kid a locha kired el dirrek el mo meruul el uaisei. Sel lorael a taem el mong me bo dodengelterir a rechad er a ngodech el beluu, el ngodech a tekingir, e ngkired el mo merritel a blekerdeled e ngmai el choroid a ngii di el tekoi er a omengetukel el ngar er a rengud. (Efesus 4:22-24) E le a dolechesuar ma lak, engdi a blekerdeled a mukdubech el oeak sel rolel a ulekuruled er a beluad ma skuul el detilobed er ngii. Tiang a uchul me ngsebechel a choua ika el uldasu ma teletael er a  omengetukel er a rechad el medalem er a chelsel a rengud. Me ngkired el mo mesisiich er a choua ika el tekoi me bo lsebeched el mo metik er a rua sib me dengesuterir. (Rom 15:7) Tiaikid el tekoi a lerirellii a Paulus. Ngkilengei er a omelsemai el mo kilungii a omesiungel. E dirrek el oeak a bltikerreng, e ngtileketekii a dechal el olsisechakl el ngii a kired el mo oltirakl er ngii. Nguaisei, a dosuub el kirel a omesiungel ngika el “apostel rar Chisentail” e ngochotii el kmo ngmle semeriar, e sebechel el melodech a blekerdelel, e mle meduch el omerk er a klumech e olisechakl. a​—Rom 11:13.

A Mesiou el Olengeriakl el Ngar er a Urerel

6. Ngmekerang a Paulus e mle semeriar er a klengar er a rulerrenges er ngii, e ngera mlo rsel?

⁶ A Paulus a mle semeriar er a klaumerang ma klengar er a rechad el ullerrenges er ngii. Sera longedecheduch er a King el Agrippa II, e a Paulus a dilu el kmo a king a “kmal ungil medenge bek el siukang ma mondai rar Chijudea.” E seikid e a Paulus a uluusbech er a klaodengei er ngii er a klaumerang er a Agrippa el mo mesaod a tekoi el ble lodengei a king. A omesodel a Paulus el bleketakl e klemerang a rirelllii a Agrippa el mo dmu el kmo: “Ngdi kesai el tekoi cho mdung e omdasu a rullak el mo Kristiano!”​—Rellir 26:2, 3, 27, 28.

7. Ngmlekera Paulus e ngodechii a cheldechedechal er a lolsisechakl er a seked el ngar er a Listra?

⁷ A Paulus a mle sebechel el melodech a cheldechedechal. Ka molatk er sel ta er a rolel el luluusbech er ngii er a longedecheduch er a seked el ngar er a Listra me lak lerelleterir el mo mengull er ngii ma Barnabas el ua lechelid. A belkul a tekoi a meldung el kirir tirka el chad el melekoi a tekoi er a Likonia el kmo, te chad el diak a skulir e kmal betok el tekoi a omekdakt er tir. Ma doltirakl er a Rellir 14:14-18, e a Paulus a millutk el mo er a blebelel a Dios ma klungiolel el ua locholt el kirel a klengarbab er a mera el Dios. Tia el tekoi  a mle beot a lomtab er ngii, me ngmlo sebechel el “lokebiteterir ar chad el leko toldars a tenget el mor” er a Paulus ma Barnabas.

8. Ngoeak a ngera el rolel e a Paulus a ulechotii el kmo altang ngngar er ngii a chetil el tekoi, engdi ngsebechel el ngodechii a blekerdelel?

⁸ Nguaisei, a Paulus a dimlak lecherrungel, ma lebebil er a taem, e ngmle meringel a tekingel el kirel a bebil er a tekoi. El di ua tiang, a ta er a taem e ngdimlak a ungil el uchul e ngmlodechelakl, me ngmle mesisiich el onger er a chad er a Judea, el ngklel a Ananias. Engdi a Paulus er a bo lodengei el kmo ngmla otubii a ngar er a bab el priist, e ngdi mle mereched el olengit a klausubes. (Rellir 23:1-5) Sera lengar er a Athens, e “ngmilsa mats el mui ra bleob el chelid, me ngmlo melechesuar a ngasechereng er ngii ra chelsel a rengul.” Me nguaisei, engdi ngar er a cheldechedechal er a Mars’ Hill, e a Paulus a dimlak lochotii sel kngtil a rengul. Ngii a bai mlengedecheduch er a rechad er a Athens er a ongdibel er tir, el mesaod a tekoi el ledu el kongei er ngii er a lolekoi el kirel a olengetongel el llechukl el kmo, “Mora diak dodengelii el chelid” e dirrek el dillii a tekoi el lullekoi er ngii a ta er a rechederir er a ngar er a mong el taem.​—Rellir 17:16-28.

9. A Paulus ngmlekera e mle meduch el olengeseu er a rekakerous el chad el ulerrenges er ngii?

⁹ Sera longedecheduch er a rekakerous el chad, e a Paulus a mle sebechel el ousbech a betok el rolel el kirel a kakerous el blekeradel. Ngmillatk a siukang ma blekerdelel a klengar el sebechel el omesiul a uldesuir tirke el orrenges er ngii. Me sera loluches el mo er a Rekristiano er a beluu er a Rom, e ngmle medengei el kmo te kiei er a klou el beluu er a kot el mesisiich el renged er seikid el taem. A klou a ultutelel el tekoi el ngar er a babilengel a Paulus el mo er a Rekristiano el ngar er a Rom a kmo a klisichel a kngtil a Adam el melemall a mo diak el oeak a klisichel a Kristus el melubet. Me ngmilengedecheduch er a Rekristiano el ngar er a Rom me tirke el mla er a bita er tir el ousbech a tekoi el sebechel el olechau a rengrir.​—Rom 1:4; 5:14, 15.

10, 11. Ngmlekera Paulus er a loledaes aike el okesiu el mo er tirke el ulerrenges er ngii? (Momes er a footnote.)

¹⁰ Ngmlekera Paulus er a losaod a dmolech el klemerang er a Biblia el mo er a rulerrenges er ngii? Ngika el apostol a mle meduch el ousbech a okesiu el omeketakl a meklou a ultutelel el tekoi er a klereng el mle sebechir a rechad el mo omtab er ngii. El di ua tiang, a Paulus a mle medengei el kmo a rechad el kiei er a beluu er a Rom a mle medengelii a blekeradel er a tekoi er a klsibai el ngar er a Renged er a Rom. Me nguaisei, te betok er tirke el chad el lulluches el mo er tir a mle sibai. Me seikid, e a Paulus a uluusbech er a klsibai el ua lokesiu el melisiich er a tekingel el kirel a chad el melilt el mo chederedall er a klengit ma lechub el mo chederdall er a llemalt.​—Rom 6:16-20.

¹¹ A ta er a babier a melekoi el kmo: “Sel dosaod el kirir a rechad er a Rom, e a mastang a sebechel el ngubetii a sibil, ma lechub a sibai a msa udoud a merrederel me lemengubet er a klsibai. Ma ilmokl a sebechel el meketmokl a lsekum a merredel a oterekellii a sibai el mo kloklel a chelid.” A mla mengubet el sibai a dirrek el sebechel el melemolem el oureor el mo er ngike el mle mastang er ngii e mo uduudel. Ma Paulus a locha millekoi el kirel tiaikid el siukang er a loluches el kirel a chad el melilt er a mastang el bo lolengesenges er ngii, el klengit ma lechub a llemalt. A Rekristiano er a beluu er a Rom a mla mo mimokl er a klengit me chelechang e te mla mo kloklel a Dios. Me te mimokl el mesiou er a Dios, e a osisiu el taem e a lsorir, e ngsebechir el melilt el mo mesiou er a klengit, el mle mastang er tir er a uchei. Me tia el beot e bleketakl el okesiu a mle sebechel el rulleterir a Rekristiano el ngar er a Rom el di tir el oker er tir el kmo, ‘Ngak ak mesiou er a techang el mastang?’ b

 Mesuub er a Kerebil a Paulus

12, 13. (a) Ngera kede ousbech er a chelechang me bo lsebeched el remutech a rengrir a rekakerous el chad el orrenges er kid? (b) Ngera ke mla ousbech el ngii a kmal ungil sel omomerk er a klumech el mo er a rechad el mla er a ngodech el beluu el mei?

¹² Me ngdi ua Paulus, kid a kired el mo semeriar, e melodech a cheldechedechad, e mo meduch el remutech a rengrir a rekakerous el chad. Me bo lsebeched el ngosuterir tirke el orrenges el mo omtab er a belkul a ungil el chais, e ngkired el meruul a lmuut el betok er a di bo doldingel, e douchais er a klumech, e dorous a babier er a Biblia. Kede melasem el mo medengei aike el lousbech ma ike el ngar er a rengrir, aike el tekoi el lesemeriar er ngii ma ike el chetirir, ma ike el uchul a dektir ma uchul e te mengetukel a tekoi. Malta e aikang a ousbech er a klou el temed ma klisiched, engdi a rumerk er a chais er a Renged el meliuekl er a beluulechad a dmeu a rengrir el meruul el uaisei. El di ua itiang, a obis er a branch er a Resioning er a Jehovah el ngar er a beluu er a Hungary a ouchais el kmo: “A rudam a olecholt a omengull er tir el mo er a siukang ma blekerdelel a klengar er a rechad er a ngodech el beluu e diak lousbech el kmo tir a kirir el mo medengei a siukang er a beluu.” E a Resioning er ker me ker a dirrek el meruul el uaisei.

¹³ Ngar er a ta el beluu er a Far East, e a ruumesingd el chad a kerekikl er a klisichel a bedengir, ma okurulel a ngalek, ma rolel a omesuub. Ma rumerk er a klumech er a Renged el ngar er isei a melasem el mesaod choua ikaikid el suobel er a bai losaod a mekngit el blekeradel el ngar er a beluulechad ma kuk bebil el chetituokel el tekoi. Me ngdirrek el uaisei, a republisher el ngar er a klou el mats er a beluu er a Merikel a milsa el kmo a rechad er a ta el hang el ngar er a territory er tir a bai melatk a tekoi el ua chelebirukel el omeruul ma imis el betok el mlai el ngar er a rael ma delengerenger. Ma Resioning a ousbech aikaikid el suobel el omuchel a cheldecheduch el ousbech er a Biblia. Ma ngii di el suobel el lengiltii, e a remeduch el sensei er a Biblia a blechoel el di ungil a tekingir el melisiich er a rechad e olecholt er a klungiolel a doltaut a omellach er a Biblia er a chelechang ma ike el ungil el tekoi el bo lomeskid a Dios er a ngar er a medad el klebesei.​—Isaia 48:17, 18; 52:7.

14. Ka mosaod a bebil el rolel el dousbech sel doldingel er a rechad el tekoi el lousbech ma blekerdelel a klengar er tir a kakerous?

¹⁴ Ngdirrek el ungil a bo dousbech a kakerous el rolel a cheldecheduch sel doldingel a obliil, e le rechad a kakerous a siukang er tir ma rolel a skulir ma klechelid er tir. Ma cheldechedechad el mo er a rechad el oumerang er a Ulemeob e diak loumerang er a Biblia, a kirel el mo ngodech er a cheldechedechad el mo er tirke el oumerang el kmo ngdiak a Dios. Ma tekinged el mo er a chad el omdasu el kmo a rokui el babier er a klechelid a dongu el ousbech a rebebil el omerk er a osisecheklir, a mo ngodech er a tekinged el mo er a chad el oumerang er a osisecheklel a Biblia. Ngkired el melodech a rolel a cheldechedechad a bo doldingel er a rechad el kakerous a rolel a skulir. Ma remeduch el sensei a ousbech a ungil el omesodel a tekoi ma okesiu el oltirakl er a blekeradel el bo lechebangel er ngii.​—1 Johanes 5:20.

Ngeso el Mo er a Rebeches el Mesiou

15, 16. Ngera uchul me ngkired el olsisechakl er a rebeches el chad el kirel a omesiou?

¹⁵ A Paulus a dimlak el di lolatk er a ngelsecheklel el kirel a rolel a lolisechakl e lemerekong. Ngmle medengei el kmo ngkirel el olsisechakl e mengetmokl er tirke el mekekerei el chad, el ua Timoteus ma Titus, el mo meduch el sensei. (2 Timoteus 2:2; 3:10, 14; Titus 1:4) Me ngdi osisiu er a chelechang, e le ngusbechall a rechad el olsisechakl ma rechad el melai aikaikid el osisechakl.

 ¹⁶ Sera 1914, e te mle bekord el 5,000 el publisher er a Renged a mla er ngii er a beluulechad el rokir; e chelechang, er a bek el sandei, e a bekord el 5,000 el beches el chad a metecholb! (Isaia 54:2, 3; Rellir 11:21) Ma rebeches el chad a lomuchel el me teloi er a ongdibel er a Rekristiano, e bocha lsorir el mo oldingel a obliil, e te ousbech a osisechakl ma ulekrael. (Galatia 6:6) Me ngklou a ultutelel a dousbech aike el teletael el luluusbech a Mastang, el Jesus, el lolsisechakl e omekrael er a redisciplo. c

17, 18. Kede mekerang e sebeched el ngosuterir a rebeches el chad el mo sebechir el omerk er a klumech?

¹⁷ A Jesus a dimlak di lolekoi er a rechapostol er ngii el kmo bo er sel basio el betok a rechad er ngii e mongedecheduch er tir. A kot e ngulemeketakl er a ultutelel a berkel a klumech e millisiich er tir el mo blechoel el meluluuch el kirel a urerir. E sola e kiltmokl a edei el tekoi: a chad el mo kldemel, ma beluu el lebo er ngii, ma klumech el bo lomerk er ngii. (Matteus 9:35-38; 10:5-7; Markus 6:7; Lukas 9:2, 6) Ngsebeched el dirrek el meruul el uaisei. Ma lsekum e kede olengeseu er a ngeleked ma lechub a chad el mesuub er a Biblia ma lechub a chad el mla mo meketeket el diak loldingel a obliil, e ngkired el outekangel el olsisechakl er tir.

¹⁸ A rebeches el chad a ousbech er a klou el ngeso me bo lsebechir el omerk er a klumech er a Renged. Kau ngsebechem el ngosuterir el mengetmokl e melasem er a ungil e beot el cheldechederir? E sel bocha moldingel, e a kerebim sel mongedecheduch er a rechad er a rekeblirir a mo olsisechakl er tir. Ngsebechem el oltirakl er a rolel a Gideon, el dilu er a resoldau er ngii el kmo: “Kom omes er ngak e meruul a ikel kurruul.” (Mengeteklel a Israel 7:17) E sola e bsa ngika el beches el chad a techellel el mo mengedecheduch. E mchat er tir er a urerir, e a bo lekirel, e mouchais er tir aike el tekoi el mo ngosuterir.

19. Ngera ke melatk el mo meruul er ngii sel molasem el mo ‘churrengelii chomesiungem’?

¹⁹ A bo lsebeched el ‘churrengelii chomesiunged,’ e ngkired el mo melodech a cheldechedechad, e dirrek el soad el mo olsisechakl er a rebeches el mesiou el mo meruul el uaisei. E sel dolatk er a klungel a ultutelel a turrekong er kid, el mo olsisechakl er a klemedengei er a Dios el mo uchul a osobel, e kede kmal oumerang el kmo ngmo ungilbesul a rokui el tekoi a dechoit a klisiched el “mlo uar bek el chad el bedul ar bek el chad, el leko di le ngera kung me kusobelterir ar bebil.”​—2 Timoteus 4:5; 1 Korinth 9:22.

[Footnote]

Ke Dirk Melatk?

• Ngoeak a ngera el rolel e ngsebeched el oukerebai er a Paulus el ngar er a omesiunged?

• Ngera el omelodech er a uldesued a kired el meruul er ngii?

• Ngkired el mo mekerang me di lungil a klumech el domerk er ngii?

• Ngera te ousbech a rebeches el mesiou me bo lemeduch er a omesiungir?

[Aike el Ker er a Suobel]

[Blurb er a 10 el llel]

A apostol el Paulus a mle semeriar, e mellodech a cheldechedechal, e mle meduch el omerk e olisechakl

[Siasing er a 9 el llel]

A Paulus a mle sebechel el mengedecheduch er a rekakerous el chad er a lengedechii a cheldechedechal

[Siasing er a 11 el llel]

A remesiou el olengeriakl a olengeseu er a rebeches el chad el kutmeklterir el mo oldingel a obliil

[Siasing er a 12 el llel]

A remeduch el mesiou a melatk er a siukang er tirke el chad el orrenges er tir