Merael er a Rael el Ngar er a Didichel a Llomes

“Ngdi rolel a melemalt a ua sel lobuu a llomes er a mochu tutau, el mengal mo mellomes sel bo le cheldecheos.”​—OSISECHAKL 4:18.

1, 2. A rechedal a Jehovah el Dios ngera te mla mo medengei e le ngii el mla mesterir a klou el llomes er a klereng?

 NGTECHANG a ngodech el sebechel el mo ungil el smodii a rolel a ngesechel a sils a bo lolidiich er a ilkolk er a klebesei el ua ngike el Uchul a llomes, el Jehovah el Dios? (Psalm 36:9) A Dios a kmo: ‘Sel le metetekakl a llomes er a tutau e ng oberk er a beluulchad. A llomes a meketakl a bukl ma dellas el ua deluuelel a bail.’ (Job 38:12-14) Sel lorael a sils el mo medidiich, e a teletelel a beluulechad a mengal el mo bleketakl, el di ua medemedemek el chutem el obeob el mo sebechel el nguu a teletelel a ngii di el kata er a olangch.

² A Jehovah a dirrek el Uchul a llomes er a klereng. (Psalm 43:3) A beluulechad a ulsiseb er a okrokr el ilkolk, engdi a mera el Dios a melemolem el omekllomes er a rechedal. Me ngera mo rsel? A Biblia onger el kmo: “Ngdi rolel a melemalt a ua sel lobuu a llomes er a mochu tutau, el mengal mo mellomes sel bo le cheldecheos.” (Osisechakl 4:18) A dichel a llomes el ngar er a Jehovah el mei a melemolem el omekllomes er a rolir a rechedal e omiich er a cheldebechelir, ma osisecheklir, ma tekoi er a kldung er tir.

A Llomes a Omekrael a Bichel a Tekoi er a Cheldebechel

3. Ngera miltib er a Isaia 60:17?

³ Nguleak a profet el Isaia, e a Jehovah a ulemlaoch el kmo: “Ak mo ngmai el mer kau a kolt el diak le brons, e mo ngmai el mei a silber ma brons, el diak el deel ma kerrekar; ng mor ngii er kau a deel el diak el bad.” (Isaia 60:17) A denguu a meringelchad el klalo el mtechir a diak a belkul el klalo a olechotel a ukbechesul a tekoi, me nguaisei a Resioning er a Jehovah a mla mes a ukbechesul a tekoi er a cheldebechelir er a chelecha el “ullebongel ra taem ra belulechad” ma lechub “a ikel uriul sils.”​—Matteus 24:3; 2 Timoteus 3:1.

4. Ngera el oketmeklel a ureor a mlo omuchel er a 1919, e ngera mle klungiolel?

⁴ Sera uchelel aika el uriul el sils, e a ongdibel er tirke el Ngalek er a Skuul er a Biblia, el mle ngklir a Resioning er a Jehovah er isei el taem, a mle sengkio el melilt er a remo mechuodel ma rediakon er tir. Engdi, a rebebil er a remechuodel a dimlak loba mera el klemeriarreng el kirel a berkel a klumech. A rebebil a dimlak el di lechitirir el mo teloi er a berkel a klumech e lemerekong, te dirrek el mlo olekebai er a rebebil  me ngdiak el bo leteloi er a ureor. Ma sera 1919 e ngmeldalem a beches el obis er a chelsel a derta el ongdibel, el ngii a mo service director. A service director a dimlak lemengilt el oeak a sengkio er a rechad er a ongdibel, e ngbai ngiluu a deruchellel el mla er a obis er a branch er a rechedal a Dios. A ngerechelel ngika el meltutk el director a uldimukl er ngii a omengetmeklel a ureor er a berkel a klumech, e merous a territory, e melisiich er a rechad el mo teloi er a odingel a obliil. A ureor er a berkel a klumech er a Renged er a uriul er seikid el taem a merrael el mo klou.

5. Ngera el tekoi a mlukbeches er aike el rak er a 1920?

⁵ A rechad er a bek el ongdibel a liluut el mlo blak a rengrir er a lerengesii a omellach el kmo “Momerk, e momerk, e momerk el kirel a King ma rengedel,” el tilobed er a 1922 er a convention er a Rengalek er a Skuul er a Biblia er a Cedar Point, Ohio. E sera 1927 e a odingel a obliil a ngilesechekl me te ngileltii a Sandei el ua lekot el ungil el sils el kirel a odingel a obliil. E ngera uchul? E le seikid el sils e a rebetok el chad a ulengull er a ureor. Ma Resioning er a Jehovah er a chelechang a dirrek el olecholt er a uaisei el reng el melasem el oldingel er a rechad er aike el taem el tir a ngar er a blirir, el ua sel le Sebadong ma le Sandei ma leklebesei.

6. Sera rak er a 1931, e ngera el telbiil a lekilengei er ngii, e tiang ngerang rirellii el kirel a berkel a klumech er a Renged?

⁶ A klou el tekoi el kirel a berkel a Renged a mlo er ngii er a chodochosong er a Sandei, er a July 26, 1931, er sera lekengei er a telbiil el ngar er sel convention er a Columbus, er a Ohio, e a uriul, e a beluulechad el rokir a dirrek el kilengei. A tedebechel tia el telbiil a melekoi el kmo: “Kid el mesiungel a Jehovah el Dios a mla mukngerachel el mo oureor el oba ngklel, me kede olengesenges er a llechul e ouchais el kirel a Jesus, e mo mesubed er a rechad el kmo a Jehovah a di ta el mera el Dios el Olab a Bek el Klisiich; ma leuaisei e ngdmeu a rengud el nguu tia el ngakl, e soad el mo okedongall el kmo, Sioning er a Jehovah.” (Isaia 43:10) Tia el beches el ngakl a mera el mileketeklii a uchetemel a urerir tirke el omtechei er ngii. Chochoi, a Jehovah a mla er ngii a urerel el kirir a rokui el mesiungel el mo meruul er ngii. Ngkmal mle dmeu a rengrir el kirel tia el tekoi!

7. Ngera el tekoi a mlengodech er a rak er a 1932, e ngera uchul?

⁷ A rebetok el mechuodel a mlo ngar er a eou a rengrir e mlo teloi er tia el ureor er a berkel a klumech. Engdi, ngar er a bebil er a beluu, e a remechuodel el ble lesengkio er tir a ulemtok er sel tekoi el kmo a rokui el chad er a ongdibel a kirir el mo teloi er a berkel a klumech. Nguaisei, engdi a telkib el taem er a uriul e ngmlo er ngii a kuk bebil er a omelodech. Sera rak er a 1932 e a subed a mlo er a bek el ongdibel el okiu a Ongkerongel el kmo ngmla mo diak el kirir el sengkio el melilt er a remechuodel ma rediakon. Te bai mle kirir el melilt er a service committee, el tir a resechal el mesisiich er a tekoi er a klereng e teloi er a ureor er a berkel a klumech. Ma ngerachel a mloterekokl el mo er tirke el chad el mechesang el meruul er a ureor, misei e a berkel a klumech a ullengesechekl el beduluchei.

A Didichel a Llomes er a Klereng a Mo Uchul a Omichel a Tekoi

8. Ngera el omichel a tekoi a mlo er ngii er a rak er a 1938?

⁸ A llomes a ‘mlengal mo mellomes.’ Sera rak er a 1938 e ngmlo diak el sengkio el melilt er a ruungerachel er a ongdibel. A rokui el mesiou a ngilai a ngerechelir el okiu “ngikel blak a rengul e mellomes a rengul mesiou.” (Matteus 24:45-47) Tia el tekoi a lekilengei er ngii a oumesingd el ongdibel er a Resioning er a Jehovah, e a ureor er a berkel a klumech a millemolem el ourodech.

9. Sera rak er a 1972, e ngera el tekoi a mleketmokl, e ngera uchul me tia el tekoi a mle ungil?

⁹ E a kuk ta er a ngeldechel a tekoi er a ngerachel er a ongdibel a mlo er ngii er a October 1, 1972. A ongdibel er a Resioning er a Jehovah el meliuekl er a beluulechad a mlo diak loungerachel er ngii a di ta el chad, e ngbai mileketmokl el oeak a ulekrael er a chelechad er a remechuodel. Tia el tekoi a mlo uchul a klou el omelisiich el mo er a meklou el chad el tir a rredemelel a olab a ngerachel er a chelsel ongdibel. (1 Timoteus  3:1-7) Misei a uchul ma rebetok el odam a mle sebechir el mesuub el mo meduch el mengetmokl a ngerechelir er a chelsel a ongdibel. Ngkol ua ngera el uchul a klengeltengat choua itirkaikid el chad el tir a sebechir el olengeseu er a resemeriar el mla kongei er a klemerang er a Biblia er seikid el taem el me er a chelechang!

10. Ngera el tekoi a mleketmokl er a rak er a 1976?

¹⁰ A rechedal a Governing Body a mlo obii el mo elolem el committee, e ngomuchel er sera January 1, 1976, e aika el committee a mlo oungerachel er a rokui el urerel tia el cheldebechel ma urerel a ongdibel er a beluulechad el rokir. Ngkol ua ngera el klengeltengat e le rokui el telengtengil tia el ureor er a Renged a meketmokl el okiu a “betok a oltobed a ungil uldasu”!​—Osisechakl 15:22; 24:6.

11. Ngera el tekoi a mlengodech er a rak er a 1992, e ngera uchul?

¹¹ Sera rak er a 1992 e ngmlo er ngii a kuk ta er a omichel a tekoi, el di ua sel tekoi el dilubech el mo er a rechad er a Israel ma rekuk bebil, er a uriul er a letobed er a klsibai er a Babilon e lluut el mo er a Jerusalem. Ngar er seikid el taem, e te mle ngesonges a rechad er a Levi el meruul a ureor er a templo. Ma Renethinim, el tir a dimlak el chad er a Israel, a mlo klou a ngerechelir el olengeseu er a rechad er a Levi. Me nguaisei, sera rak er a 1992, e a rebebil er a “ngodech el chermek el sib” a ngilai a lmuut el bebil er a ngerachel el mo olengeseu er ngike el blak a rengul e mellomes a rengul el mesiou el omekerreu a daisang er ngii el ngar er a chutem. Te mlengilt el mo olengeseu er aike el chelechad er a Governing Body.​—Johanes 10:16.

12. A Jehovah ngmilekerang e ngmai el mei a “kolt el diak le brons”?

¹² Ngera mlo rsel aika el tekoi? A Jehovah a dmu el kmo: “Ak mo rulleterir me te mo mengedereder el oba llemalt ma budech.” (Isaia 60:17) Ngngar er ngii a “budech” er a delongelir a rechedal a Jehovah er a chelechang, e a bltikerreng el mo er a “llemalt” a “mengedereder” er tir, e tiang a melisiich er tir el mo mesiou er a Dios. Te kmal kltmokl el mo meruul er a ureor er a berkel a Renged e meruul er a remo disciplo.—Matteus 24:14; 28:19, 20.

A Jehovah a Omekllomes er a Rolel a Osisechakl

13. A Jehovah ngmilekerang e omekllomes er a rolir a rechedal el kirel a tekoi er a osisechakl er aike el rak er a 1920 el mei?

¹³ A Jehovah a melemolem el omeketakl er a rolel a osisechakl er a rechedal. A Chocholt 12:1-9 a meskid a okesiu. Aika el bades a mesaod  er a retedei el okesiu el chad: a “redil” el dioll, ma “dragon,” ma “ngalek el sechal.” Ke medengei el kmo tirka te melutk er a rua techang? A suobel el ngar er a March 1, 1925 el Ongkerongel, el dai er ngii a kmo, “A Cherellel a Renged” a meketeklii. Tia el suobel a milsterir a rechedal a Dios a bleketakl el klemedengei el kirel aike el ulaoch el melutk er a cherellel a Renged, e rirelleterir el mo omtab el kmo ngar er ngii a eru el kakerous el cheldebechel​—a cheldebechelel a Jehovah ma cheldebechelel a Satan. E sera rak er a 1927/28, e a rechedal a Dios a mlo medengei el kmo a Kurismas ma tanziobi a diak loltirakl er a bades me ngmlo diak loruul aika el tekoi.

14. Ngera el osisechakl er a klemerang a mlo bleketakl er aike el rak er a 1930 el mei?

¹⁴ E sera 1930 el mei e ngmlo bleketakl a lmuut el ede el osisechakl. El kirel a betok el rak, e a Rengalek er a Skuul er a Biblia a mle medengei el kmo a “kloul seked,” el losaod er ngii a Chocholt 7:9-17 a mle ngodech er a 144,000, el tir a mo mengedereder el obengkel a Kristus el ua reking ma repriist. (Chocholt 5:9, 10; 14:1-5) Engdi, ngdimlak lodengei el kmo tia el klou el seked ngmelutk el mo er a rua techang. E sera 1935 e ngmlo bleketakl el kmo tia el klou el seked a melutk el mo er tirke el chad el mo suobel er sel “kloul ringel,” e ngar er ngii a techellir el mo kiei er a chutem el diak a ulebengelel. Ngar er tiaikid el osisiu el rak e ngmlo bleketakl a tekoi el mla er ngii a lerellii el mo er a rengelekir a Resioning er a Jehovah el ngar er a skuul er a bebil er a beluu. Seikid el taem e a omeluu el mo er a beluu a kmal mle mesisiich, ma Resioning a mle medengei el kmo a bo losus er a banderang a omtok er a bades. E a ongingil el rak, e te mlo medengei el kmo a Kristus a dimlak el mad er a kerus, e ngbai mlad er a teluo el kerrekar.​—Rellir 10:39.

15. Oingerang e mekerang e a cheledolel a rasech a mlo bleketakl?

¹⁵ Ngdi mle telkib er uriul er a Ongeru el Mekemedil a Beluulechad, e ngmlo bleketakl a tekoi el kirel a cheledolel a rasech, e le seikid el taem e a oidel a rasech a luluusbech er ngii el omkar er a resoldau. A July 1, 1945 el Ongkerongel a millisiich “er a rokui el mesiungel a Jehovah el tir a melatk el mo kiei el mo cherechar el ngar er sel beches el beluulechad er a llemalt el mo meluu er a cheledolel a rasech e mo oltirakl a tekingel a Dios el kirel tia el tekoi.”

16. Ngoingerang e ngtilobed a babier el New World Translation of the Holy Scriptures, e ngerang a eru el ungil el tekoi er tia el babier?

¹⁶ Sera 1946, e te mlo melechesuar el kmo te kmal ousbech er a beches el oidel a Biblia el dimlak loltirakl er a siukang er a klsuul el Klekristiano. Ma ureor el meruul er a choua itia el oidel a Biblia a ulemuchel er a December 1947. E sera 1950 e a New World Translation of the Christian Greek Scriptures a tilobed er a tekoi er a Merikel. Aike el bades er a Chuodel el Renged a mle eim el kltmokl el hong, el tilobed a derta er ngii, el ulemuchel er a 1953. Sel ulebongel el hong a tilobed er a 1960, el bekord el mle 12 el rak er a uriul er a lomuchel a ureor el oliuid. Sel cherrungel el babier el New World Translation of the Holy Scriptures a tilobed er a rak er a 1961. Chelechang e tia el babier a ngar er ngii er a betok el bedengel a omelekoi e betok a ungil el tekoi er ngii. Ngousbech er sel chedaol el ngakl, el Jehovah. Ma lmuut el tang, ngmelemolem el omeskid a llomes el kirel a klemerang er a Dios e le ngoltirakl er a oidel aike el mle kot el omelechesel a Biblia.

17. Ngera el tekoi a mlo bleketakl er a rak er a 1962?

¹⁷ Sera 1962 e ngmlo bleketakl a tekoi el kmo ngtechang a “klisiich el ngar chomerreder” el ngar er a Rom 13:1, e ua klungel a ngerang a blekongesenges er kid el mo er tir. A dmolech el omesubel a Rom er a 13 el klou el bliongel ma  bades el ua Titus 3:1, 2 ma 1 Petrus 2:13, 17 a mileketeklii el kmo a “klisiich el ngar chomerreder” a diak lolutk el mo er a Jehovah ma Jesus, e ngbai melutk el mo er a gobelment er a rechad.

18. Ngera bebil er a klemerang el mlo bleketakl er aike el rak er a 1980 el mong?

¹⁸ Ngar er aike el rak er a uriul, e a rolir a remelemalt el chad a millemolem el mlo mellomes. E sera rak er a 1985 e ngmlo bleketakl a tekoi el kmo ngera belkul a bo demelemalt ‘el mo cherechar’ ma demelemalt el ua desechelil a Dios. (Rom 5:18, NW; Jakobus 2:23) Ma belkul a Rak er a Deurreng er a Rekristiano a melsaod el rokir er a rak er a 1987.

19. A Jehovah ngmilekerang e omekllomes er a rechedal er a tekoi er a klereng er a taem er kid?

¹⁹ Sera rak er a 1995 e ngmlengal el mo bleketakl a omingel a sib ma kaming. E sera rak er a 1998 e ngmla er ngii a komakai el omesodel a ues er a Esekiel el kirel a templo, el ngii a toutang er a chelechang. E sera rak er a 1999, e ngmlo bleketakl el kmo ngoingerang e mekerang e ‘ngike el melemall a chedaol . . . el mocha dechor er a chedaol.’ (Matteus 24:15, 16) E ngdirrek el mlo bleketakl er a 2002 el kmo ngera belkul a dongull er a Dios el “loba reng ma klemerang.”​—Johanes 4:24.

20. Ngera kuk bebil er a rolel e a rechedal a Dios a milsang a omichel a tekoi?

²⁰ El obengkel aika el omichel a tekoi er a cheldebechel ma osisechakl, e ngdirrek el mla er ngii a omichel a tekoi er a blekerdelel a Kristiano. El ua itiang, sera rak er a 1973 e a omeloko el dekool a lulemes er ngii el ua le “idokel ra bedenged” me ngkmal mle mekngit el omeruul. (2 Korinth 7:1) E a teruich el rak er a uriul, e sel July 15, 1983 el Ongkerongel a mileketeklii a delecherud el kirel a usbechel a boes. A ikang a di bebil er a olechotel a llomes el mlengal el mlo mellomes er a taem er kid.

Molemolem el Merael er a Rael el Ngar er a Dichel a Llomes

21. Ngera el osenged er a tekoi a ngosukid el merael er a rael er a dichel a llomes?

²¹ A ta er a chad el meketeketa el lechelder a melekoi el kmo: “Ngkmal meringel a dekengei e bo doltirakl er a tekoi el mla mengodech.” Ngerang a ngilsuir el kongei er aika el omichel a tekoi er aika el mereko el 48 el rak el ngii a milsiou el omerk er a klumech er a Renged? Ngii a onger el kmo: “Ngkirel el mo melemalt a uldesued. A lak dekengei er a ngii di el omichel a tekoi a belkul a kmo sel lorael el mo beduluchei a cheldebechel, e kede mo cheloit er a uriul. A lsekum a blekeradel el kngar er a chelsel a meringel er ngak el ngodechii, e ak melatk er a tekingel a Petrus el mo er a Jesus el kmo: ‘Rubak, a ki mor techang? Kau cholab a tekoi ra diak a ullebengelel klengar.’ E sola, e di ngak el oker er ngak el kmo, ‘Ngak ak mo er ker​—ak mo er a ilkolk er a beluulechad?’ Tiang a ngosukak el mo urrekodel er a cheldebechelel a Dios.”​—Johanes 6:68.

22. Ngera el klungiaol a dengai sel dorael er a llomes?

²² A beluulechad el meliuekl er kid a mera el ngar er a klou el ilkolk. Sel lolemolem a Jehovah el omesterir a rechedal a llomes, e sel oliochel er a delongelir tir ma rechad er tia el beluulechad ma mengal el mo cheroid. Me tia el llomes ngerang rullii el kired? A dengki el meluich er a rael a leklebesei a diak lengai a delluchel er a rael; me nguaisei, a llomes er a tekingel a Dios a diak lengai a mondai el choroid. Engdi, a chedaol el llomes a bai ngosukid el olechib er kid er a mondai me bo lsebeched el melemolem el merael er a rolel a dichel a llomes. Ma leuaisei, e me dolemolem el orrenges er a tekingel a Jehovah, “el ua lolbidel el dmiich ra milkolk.”—2 Petrus 1:19.

Ke Dirk Melatk?

• Ngera el ngelsecheklel a tekoi er a cheldebechel a lebilsterir a rechedal a Jehovah?

• A dichel a llomes ngmla omiich er a ngera el osisechakl?

• Ngera el omichel a tekoi a bla mues, e ngerang a ngilsukau el kongei er ngii?

• Ngera uchul me ngsoam el melemolem el merael er a rolel a dichel a llomes?

[Aike el Ker er a Suobel]

[Siasing er a 15 el llel]

Sel Convention er a Cedar Point, Ohio, er a rak er a 1922 a millisiich er a Rengalek er a Skuul er a Biblia el mo meruul er a urerel a Dios

[Siasing er a 16 el llel]

A “New World Translation of the Christian Greek Scriptures” a tilobed er a 1950, e a chad a N. H. Knorr

[Picture Credit]

© 2003 BiblePlaces.com