Kau Ngsoam a Lebo er Ngii a Rungil el Sechelim?

A RUUMESINGD el chad a sorir a lebo er ngii a rungil el sechelirir. Ngsebechel el mo ungil a klengar er kid sel lsekum te ngar er ngii a resechelid el sebeched el ouchais er tir aike el ngar er a rengud. Engdi ke mekerang e sebechem el metik er a rungil el sechelim? Ngbekord el 2,000 el rak er a mla me mong, e a Jesus a ulechotii a rolel e a deleuill er a klechad a melemolem el di ungilbesul a lsekum a rechad a olecholt er a diak longreos el bltikerreng. Ngullisechakl el kmo: “Ma ikel moureng el somiu a lruul ar chad lekor kemiu, cho mruul el mor tir.” (Lukas 6:31) Tia el tekoi el leblechoel el melekoi el kirel el kmo Ngmekreos el Llach, a olecholt el kmo a diak longreos el bltikerreng a uchul me ngmo sebechel a chad el metik er a rungil el sechelil. A beot el omesodel a kmo, a lebo er ngii a sechelim, e ngkirem el mo ungil el sechelei. El mekerang?

A mekreos el klausechelei a diak el sebechel el meteketek er a di chelsel a ta el sils. E le a resechelid a lmuut el mekreos er a di le klaodengei er a delongeled kid ma rebebil. E le tirkang a tirke el chad el kau a sebechem el kmal mo kmeed er tir. A domekeroul e doleketek er a mekreos el deleongel a ousbech er a klou el klisiched. A klausechelei a blechoel el rullau el mo melatk aike el ousbech a resechelim el mo ngar er a uchei er aike el tekoi el kau a ousbech. A rekausechelei el chad a diak el di le kaiuecholt a tekoi el dmeu a rengrir er ngii e lemerekong, te dirrek el kauchais aike el mo uchul a kngtil a rengrir.

Ke mo olecholt er a mera el reng er a klausechelei el ileakl el ngar er a rengum ma omerellem el ngosuir ngike el sechelim el ousbech a ngeso. A Osisechakl 17:17 a kmo: “A sechelid a di blechoel el oubltikerreng, e a ta er kid el sechal a ngosukid er a chelebuul.” A mera er ngii, a deleongel er a klausechelei a sebechel el lmuut el mo mesisiich er sel deleongel er a telungalek. A Osisechakl 18:24 a melekoi el kmo: “Ngar ngii a re sechelid el diak le meral sechelid, e ngdi mor ngii a sechelid el kuk mo kmeed er kid er a ta er kid.” Kau, ngdiak el soam el mo medengei a lmuut el betok el kirel a rolel a doleketek er a ungil el klausechelei? Ngdiak el soam el mo teloi er a cheldebechel er a rechad el tir a lodengelterir el oeak sel bltikerreng er a delongelir? (Johanes 13:35) A lsekum e ngsoam, e a Resioning er a Jehovah a kmal dmeu a rengrir el ochotii er kau a mera el rolel a klausechelei el ngar a beluam.