A Tekingel a Jehovah a Di Ngar

Omesodel a Babier er a Ongedei ma Ongeua el Psalm

A LOLULUUCH el mo er a Dios, e a milluches er a psalm a oker el kmo: “A diak a ulebengelel el bltkil a rengum ng muchais er a debull, ma lechub e ng muchais a blakerreng er kau er a blil a omelemall?” (Psalm 88:11) Ngulterekokl a nger el kmo, ngdiak. E le a lak a klengar er kid, e ngdiak el sebeched el oldanges er a Jehovah. A doldanges er a Jehovah a ungil el uchul e kede melemolem el ngar, e a lengar er ngii a klengar er kid a uchul a odanges el mo er ngii.

A Ongedei ma Ongeua el Babier er Psalm, a uldimukl er ngii a Psalm 73 el mo er a 106, a meskid a betok el uchul e kede oldanges er ngike el Ulemeob e mengebkall er a ngklel. A dolebedebek el kirel aikeikid el psalm a mekedbechii a omereng el saul er kid el kirel a “tikingel a Dios” e smisichid el mo blechoel el oldanges er ngii. (Hebru 4:12) Ma leuaisei, e me bo leblak a rengud el omes er a Ongedei el Babier er a Psalm.

“UNGIL A DEKEED ER A DIOS”

(Psalm 73:1–89:52)

Aike el kot el 11 el psalm er a ongedei el Babier a leliluches a Asaf ma lechub a rechad er a kleblillel. Me sel kot el chelitakl a mesaod er a tekoi el ngilsuir a Asaf me ngdimlak lemechetakl er a cheleuid el uldasu. Ngngiluu a melemalt el uldasu. Ngmengitakl el kmo: “Ngdi kuk le ngak e ng bai ungil a dekeed er a Dios!” (Psalm 73:28) Sel klengiterreng el kirel a telemellel a Jerusalem a ngar er a Psalm 74. A Psalm 75 ma 76 ma 77 a ochotii a Jehovah el ua lemelemalt el Chad er a Kerrekeriil, el Osebelir a remedemedemek, el Orrenges a nglunguuch. Ma Psalm 78 a omelekl a tekoi er a irechar er a Israel er a taem er a Moses el mo tmurk er a David. E a 79 el Psalm a mesaod el kirel a telemellel a templo. Ma Psalm 80 a nglunguuch el kirel a lluut er a smechir a rechedal a Dios. E a Psalm 81 a uleklatk el mo olengesenges er a Jehovah. A Psalm 82 ma 83 a nglunguuch el kirel a kerrekerilel a Dios el mo er a remekngit el chad er a kerrekeriil ma recherrouel a Dios.

A cheliteklir a rengelekel a Kora a kmo: “Ng meral soak el mor ngii! Ak uureng a ikel mekesekesel a Templo er a RUBAK.” (Psalm 84:2) A Psalm 85 a ongit el kirel a klengeltengat er a Dios el mo er tirke el mle blebaol e liluut el mo remei. Tia el psalm a omeketakl el kmo a klengeltengat er a klereng a lmuut el mekreos er a klengeltengat er a klechad. El ngar er a Psalm 86, e a David a olengit er a Dios me longkar er ngii e losisecheklii. E a ngar er a Psalm 87, a chelitakl el kirel a Sion me tirke el mlechell er isei e a ongingil a nglunguuch el mo er a Jehovah el ngar er Psalm 88. A Psalm 89 a oldanges er a bekokuii el bltikerreng er a Jehovah el ngar er sel telbilel el mo er a David, el lulluches er ngii a Ethan, el locha mle ta er tirke el teua el mellomes a rengrir el chad er a taem er a Salomon.​—1 King 4:31.

 A Ker er a Bades a Monger:

73:9​—Ngoeak a ngera rolel e a remekngit a “melekoi a mekngit er a Dios el ngar a eanged, ng mekedidai omelekingir el loltobed el mor a re chad el ngar a beluulchad”? A remekngit a diak lomekerreu er a ngii di el chad el ngar er a eanged ma chutem, e diak lemeterob a ngerir el oltuub er a Dios. Te dirrek el ousbech a chururir el oltuub er a rechad.

74:13, 14​—Ngoingerang e a Jehovah a ‘chirrad a bdelul a meklou el charm er a daob e chordengii a bdelul a charm el Leviathan?’ A “Farao el king er a Ekipten” a okedongall el “klou el drakon el mechiuaiu er a omoachel el . . . Nail.” (Esekiel 29:3) A Leviathan a locha melutk el mo er ‘tirke el mesisiich el chedal a Farao.’ (Psalm 74:14) A bderrir el mlecherad a melutk er a temellel a Farao ma resoldau er ngii er sel taem el Jehovah a ulsobelterir a rechad er a Israel er a klsibai er a Ekipten.

75:4, 5, 10​—Ngera belkul sel tekoi el kmo “orsul”? A orsul a charm a mesisiich el klekedall el ousbech el okoad. Misei, e sel tekoi el “orsul” a melutk el kirel a klisiich. A Jehovah a olengasech a orsul a rechedal, e rulleterir el mo chetengakl, engdi ng “mo torudii a klisichel a dengerenger.” Kede muklatk el kmo ‘lak bo lemekedidai a rengud.’ E le Jehovah a mengedidai er a rechad, misei e a ngerachel er a ongdibel a mla er a ngii el me er kid.​—Psalm 75:7.

76:10​—Ngmekerang e a “klsbengel a rengrir a re chad” a sebechel el oldanges er a Jehovah? Sel lebechititerir a rechad me lolecholt a klsiberreng er tir el me er kid e le kid el mesiungel a uchul, e a ungil el tekoi a sebechel el mo duubech. A ongarm el bo dechelebangel er ngii a sebechel el omeklemalt er kid. A Jehovah a kongei er a ongarm el di mo er sel telkael el mo uchul a klungioled. (1 Petrus 5:10) “Tirkel suobel er a mekemad a mo meruul er a ungilklebesei er kau.” E mekerang a lsekum kede chormang el medkung? Tiang a dirrek el oldanges er a Jehovah e le tirke el omes er kid el blak a rengud el outekangel a dirrek el sebechir el mo oldanges er a Dios.

78:24, 25​—Ngera uchul e a mana a okedongall el kmo “a kall er a eanged” ma “kelir a re anghel el blauang”? Aike el tekoi a diak lebelkul a kmo a mana a kelir a rechanghel. Ngmle “kall er a eanged” e le a mana a mla er a eanged el mei. (Psalm 105:40) Ma rechanghel ma lechub ‘tirke el mesisiich’ a kiei er a eanged a uchul, me sel tekoi el kmo “kelir a re anghel el blauang” a di belkul a kmo a Dios el kiei er a eanged a omeskid a kall. (Psalm 11:4) A Jehovah a mle sebechel el ousbech er a rechanghel el lomesterir a rechad er a Israel a kall el mana.

82:1, 6​—Te rua techang a okedongall el kmo “re chelid” ma “[re]ngelekel a Kot el Ngarbab”? Aike el teblo el tekoi a melutk el mo er a rechad er a kerrekeriil er a Israel. Tiang a uaisei, e le te mesiou el ua lemelekingel a Dios e dirrek el omtechei er ngii.​—Johanes 10:33-36.

83:2​—Ngera belkul a tekoi el kmo “a omtok a tekoi”? Tiang a olecholt el kmo a chad a kltmokl el olecholt er a klisichel el mo omtok ma lechub el okoad ma lechub el omcheracheb.

A Klubeled:

73:2-5, 18-20, 25, 28. Ngdiak el kired el mo mechechei er a iltetir a redengerenger e mesuub a mekngit el blekerdelir. A redengerenger a ngar er a bekititerachel el rael. E te ulterekokl el “moubuu el mo metemall.” Ma chelebirukel a diak el sebechel el mo nguemed er a chelecha el longedereder a rediak  lemecherrungel el chad, me nguaisei ngmo diak a ultutelel a dolasem el merrob er ngii. El ua Asaf, ngbai kired el outekangel a chelebirukel loeak sel bo “dekeed er a Dios” e oldeu er a rengud er a kmes el deluill er kid me Ngii.

73:3, 6, 8, 27. Ngkired el mo kerekikl el kirel a klimang ma kldidai el reng ma omelenguul ma otuball el tekoi. Malta e aike el blekeradel a kora mo uchul a klungioled engdi kid a mo cheroid er ngii.

73:15-17. Sel lerrau a rengud er a tekoi, e ngdiak el kired el ouchais er ngii el mo er a rechad. A dolekoi “choua ikal tekoi” a mo mengitechut er a rebebil. Ngkired el mo chelellakl el melebedebek a tekoi el ngar er a rengud e melemolem el obengterir a rekldemed el ngar er a klaumerang.​—Osisechakl 18:1.

73:21-24. A lebo er ngii a ‘cheluached er a rengud’ e le ngungilbeserir a remekngit, a di ua doltirakl a omerellel a charm. Tiang a diak lultebechel el tekoi, el di ultuil er aike el ngar er a rengud. Kid a bai kired el oltirakl a uleklatk er a Jehovah, el ulterekokl a rengud el kmo ngii a mo ‘orreked er a chimad’ e melisiich er kid. Ma dirrek, a Jehovah a mo ‘ngoikid el oba chetengakl,’ el mo kmeed er ngii.

77:6. A bo dekerekikl el melatk a klemerang el tekoi er a klereng e kerekikl el osiik er ngii a ousbech er a taem el mesuub e mo dmolech el melebedebek. Ngkol ua ngera el usbechall a docheuekl a chelellakl el taem el di kirel a omesuub!

79:9. A Jehovah a orrenges a nglunguched, el ileakl el kirel a omengedolel a ngklel.

81:13, 16. A dorrenges er a ngerel a Jehovah e merael er a rolel a mo uchul a betok el klengeltengat.​—Osisechakl 10:22.

82:2, 5. A chelebirukel a uchul e “a llemalt a dibusei er a beluulchad.” A chelebirukel el omeruul a mengitechut er a klisichel a klengar er a klechad.

84:1-4, 10-12. A omereng el saul er a remilluches er a psalm el kirel a basio er a omengull er a Jehovah me sel deurreng el kirel a tokubets el techellir er a omesiou a meskid a ungil el kerebai.

86:5. Ngkol ua ngera el uchul a omereng el saul e le Jehovah a “ousubes a tellemall”! Ngosiik er a uchul me bo lsebechel el olecholt er a klechubechub el mo er ngike el mla obult er a kngtil.

87:5, 6. Tirke el mo kiei er a Paradis el chutem ngsebechir el mo medengei a ngklir tirke el mo kiei er a eanged? Aikaikid el bades a ochotii el kmo ngmo uaisei.

88:13, 14. A bo lemeoud el onger a nglunguched el kirel a ta er a mondai er kid a belkul a kmo a Jehovah a soal a dochotii a mera el omeluu el mo er ngii.

‘MORENG A SULEL E MODENGESII A NGKLEL’

(Psalm 90:1–106:48)

Bo momtab a bebil er a uchul e ngkired el oldanges er a Jehovah el ua losaod er a ongeua el babier er a psalm. El ngar er a Psalm 90, e a Moses a omekesiu er a klengar er a “King ra ikel bek el taem” el mo er a kmal kedeb el klengar er a chad. (1 Timoteus 1:17) A doltirakl er a Psalm 91:2, e a Moses a melekoi er a Jehovah el kmo, “Kau osebecheklek e klekerengek!”​—ngii a Uchul a klisichel. Ma ike el ongingil el psalm a ouchais a klebokel el blekerdelel a Dios, ma ngar er a bab el uldesuel, ma mengasireng el omerellel. A kldei er aike el chelitakl a omuchel el kmo, “A RUBAK [el Jehovah] a king!” (Psalm 93:1; 97:1; 99:1) A lolekoi el kirel a Jehovah el Omebeled, e a meluches er a psalm a mengemedaol er kid el kmo, “Moreng a sulel e modengesii!”​—Psalm 100:4.

Ngmekerang e a merreder el medakt er a Jehovah a mengedereder? A Psalm 101, el lulluches er ngii a King el David, a meskid a nger. Sel ongingil el psalm a ouchais er kid el kmo a Jehovah a “mo remenges a nglunguchir a re mlechoit el chedal, e remenges a ongterir.” (Psalm 102:17) Sel 103 el Psalm a melutk el mo er a bekokuii el bltikerreng ma klechubechub er a Jehovah. E a losaod er a betok el blebelel a Dios el ngar er a chutem, e a meluches er a psalm a kmo: “RUBAK, ke mla remuul a kmal betok el tekoi! Ke meral mlo ungil remuul el rokui el oba llemesel a rengum.” (Psalm 104:24)  Aike el eru el ulebongel el chelitakl er a Ongeua el Babier a oldanges er a Jehovah el kirel aike el mengasireng el omerellel.​—Psalm 105:2, 5; 106:7, 22.

A Ker er a Biblia a Monger:

91:1, 2​—Ngera sel “eungel osebecheklel a Olab a Bek el Klisiich,” e mekerang a bo “[de]kiei” er sei? Tiang a okesiu el basio er a osebechakl ma ulekerreu er a klereng​—sel blekeradel el mo oumekerreu er kid er a telemellel a klereng er kid. Tia el basio a berrotel e le tirke el diak loumerang er a Dios a diak el sebechir el mo medengelii. Kede rullii a Jehovah el ua leberteled sel dosiik er ngii el mo osebechekled e klisiched, e oldanges er ngii el Kot el Ngar er a Bab el Merredeled, e dirrek el oeak a berkel a ungil el chais er a Renged. Kede melechesuar a ulekerreu er a klereng e le kede medengei el kmo a Jehovah a di blechoel el mo ngosukid.​—Psalm 90:1.

92:12​—Ngoeak a ngera el rolel e a remelemalt “a mo meloseb el ua kerrekar el palm”? A kerrekar el palm a dechor el melemalt el blechoel el ourodech. Ma melemalt el chad a uai a kerrekar el palm e le ngmelemalt el ngar er a osengel a Jehovah e di blechoel el ourodech a “ungil rodech,” el uldimukl er a ungil el omeruul.​—Matteus 7:17-20.

A Klubeled:

90:7, 8, 13, 14. A mekngit el omerelled a blechoel el melemall er a deleongel er kid ma mera el Dios. E a berrotel el klengit a diak el obart er a medal. Engdi, a lsekum kede mera el obult e mo cheroid er a mekngit el omerelled, e a Jehovah a lmuut el ngoikid, ‘el mo omotech a rengud er a bltikerreng el blekokuii.’

90:10, 12. A klengar a kmal kedeb a uchul me ngkired el ‘omechur a sils er kid.’ Ngmekerang? A ‘bo lemellomes a rengud,’ e kede ousbech aike el medechel el sils er kid er a mellomes el rolel el odeuir a rengul a Jehovah. Me kede remuul a tekoi er a klereng el mo kot e mo meduch el ousbech a temed.​—Efesus 5:15, 16; Filipi 1:10.

90:17. Ngungil a doluluuch er a Jehovah el kmo, “mngesukemam el di mo ungil er a ikel bek el kimoruul” e bo lomekngeltengat er a omesiunged.

92:14, 15. A bo leblak a rengud el mesuub er a Tekingel a Dios e deblechoel el teloi er a rechedal a Jehovah e seikid e a remechuodel a sebechir el “di mo blechoel el mesisiich e mekereker”​—el mesisiich er a klereng​—e klou a ultutelir el mo er a ongdibel.

94:19. A ngii di lengerang el uchul e ‘ngouedikel a rengud,’ e a omengiuel ma omelebedebek el kirel a ‘ongelaod’ el debetik er a Biblia a mo chollakl a rengud.

95:7, 8. A dolengesenges a uleklatk er a Biblia e doltirakl er ngii a ngosukid me ngdiak bo lemedecherecher a rengud.​—Hebru 3:7, 8.

106:36, 37. Aika el bades a oldak er a omengull el bleob el chelid el obengkel a omelenget el mo er a remelengengalek el reng. Tiang a olecholt el kmo a chad el ousbech a bleob el chelid a mo chederedall er a klisichir a remekngit el reng. Ma Biblia a omeklatk er kid el kmo: “Bo mkerekikl el mengeroid er kemiu ra bleob el chelid.”​—1 Johanes 5:21.

“Modengesii a RUBAK!”

Aike el kldei el ulebongel el chelitakl er a Ongeua el Babier er a Psalm a mengesimer er ngii el oba tia el uleklatk el kmo: “Modengesii a RUBAK!” Sel ulebengelel el psalm er tia el Ongeua el Babier a dirrek el omuchel el uaisei. (Psalm 104:35; 105:45; 106:1, 48) Nguaisei, sel tekoi el kmo “Modengesii a RUBAK!” a ngar er ngii el betok el taem er a chelsel a Ongeua el Babier er a psalm.

Ngkmal ngar er ngii a betok el uchul e kede oldanges er a Jehovah. A Psalm er a 73 el mo er a 106 a meskid a betok el tekoi el omekeek er a rengud er a omereng el saul el mo er a Demad el ngar er a eanged. Ma dolatk aike el bla lruul ma ike el bo loruul er a ngar er a medad, e tia ngdiak lodbechid el mo “odengesii a Jah” el oba klisiched el rokir?

[Siasing er a 8 el llel]

El ua Asaf, e ngsebeched el outekangel a chelebirukel a bo “dekeed er a Dios”

[Siasing er a 9 el llel]

A Farao a meltemall er a Bekerekard el Daob

[Siasing er a 9 el llel]

Ke medengelii a uchul e a mana a okedongall el kmo “kelir a re anghel el blauang”?

[Siasing er a 11 el llel]

Ngerang a sebechel el choridii a ‘uldikel a rengud’?