A Deurreng el Mo er Ngii el Oeak a Blakerreng

“Ng klengeltengat er a Rubak [el Jehovah] a rullau el mo merau, el diak le meringel el ureor.”​—OSISECHAKL 10:22.

1, 2. Ngera uchul me ngkired el mo kerekikl me ngdiak di dolatk a tekoi er a ngar er a medad?

 A TA el chad er a uldasu er a beluu er a Merikel a dilu el kmo: “A deblechoel el omdasu el kirel a ngar er a medad . . . a rullid el mo diak el deu a rengud er aike el tekoi el dolab er a chelechang.” Tia klemerang el tekoi el kirir a rengalek el di oureng er sel techellir el mo meklou el chad me ngdiak lengai a klungiolir er a klengeasek er tir e a uriul e te ouuchel a rengrir el kirel.

² A remesiou er a Jehovah a dirrek el sebechir el mo oltirakl er tia el rolel a uldasu. Choua tiakid el tekoi a sebechel el duubech. Kede kmal oureng er a otutel a telbilel a Dios el mo rullii tia el chutem el mo paradis. E kmal mengiil er a klengar el mimokl er a secher ma cheluodel ma ringel. Me ngungil a dolebedebek er a choua ika el tekoi, engdi ngmekerang a lsekum e kede di melatk aika el klengeltengat er a ngar er a medad el kired me ngdiak deues a klengeltengat er a klereng el ngar er ngii er a chelechang? Ngkmal sebechel el mo uchul a chelebuled! Ngsebechel el choitechetur a rengud “sel le metemall omelatk” e le ngua lsal meudang a otutel. (Osisechakl 13:12) A mondai ma ongarm er a klengar a sebechel el rullid el mo mekngit a rengud. Ngsebechel el mo uchul e ngdiak dosiik a rolel e doutekangel e bai di mengeremrum. Aikang a kmal sebeched el ochib a lsekum kede blechoel el melebedebek el kirel a klengeltengat el dengai er a chelechang.

3. Kede mo kerekikl er a ngerang el ngar er tia el suobel?

³ A Osisechakl 10:22 a kmo: “Ng klengeltengat er a RUBAK a rullau el mo merau, el diak le meringel el ureor.” A ungil el blekerdelel a klereng er a remesiungel a Jehovah er a chelechang, ngdiak el uchul a deurreng ma klengeltengat er kid? Ka me bo domes a bebil el telengtengil a sengk er a klereng e bo domtab  a belkul el me er kid el rokui. A dechoit a taem el melebedebek el kirel a klengeltengat el Jehovah a mla mesterir a ‘reblak a rengrir e meruul a melemalt el tekoi’ a mo smisiich a rengud el mo melemolem el mesiou er a Demad el ngar er a eanged el oba deurreng.​—Osisechakl 20:7.

Klengeltengat el Meskid a Deurreng er a Chelechang

4, 5. Kau ke semeriar er a ngera el osisechakl er a Biblia, e ngera uchul?

⁴ A melemalt el klemedengei er a osisechakl er a Biblia. Aike el klechelid er a Klsuul el Klekristiano a melekoi el kmo te oumerang er a Biblia. Me nguaisei, engdi te diak lekengei aike el tekoi el lolisechakl a Biblia. A rechedal a chimo el klechelid a dirrek el diak lekengei a osisechakl er a Biblia er a delongelir. Ngkol ua ngera el kakerous el blekeradel a desang er a remesiungel a Jehovah! Malta e ngkakerous a beluad ma klebliled ma siukang er kid, engdi kede rokui el mengull er a Dios el ousbech er a ngklel. E diak domes er ngii el ua lekdekudel el dios el trinidad. (Duteronomi 6:4; Psalm 83:18; Markus 12:29) Me kid a medengei el kmo ngar er ngii a tekoi el kirel a llemeltel a omengederederel a Dios er a eanged ma chutem el di kmedung e ngmo sumecheklii, ma dersta er kid a uldimukl er ngii a lsekum e kede melemolem el urrekodel er a blakerreng er kid el bedulngii. Kede medengelii a klemerang el kirir a rulekoad e mimokl er sel dakt el bedul ngike el Dios el leko ngomekcharm er a rechad er a beluu er a ngau ma lechub e ngmechiteterir er a purgatorio.​—Olisechakl 9:5, 10.

⁵ Ma dirrek, ngkol ua ngera el deurreng a dodengei el kmo kid a dimlak dengar er a mongkii el mei. Kede bai ulebeob el okesiul a Dios. (Genesis 1:26; Malakai 2:10) A chad er a psalm a mengitakl el mo er a Dios er ngii el kmo: “Ak uldanges er kau ele ke rirellak el ileakl ngodech e mengasireng. Ng kmal mengasireng a urerem; ak ungil medengei.”​—Psalm 139:14

6, 7. Ngera el omelodech er a klengar er kau ma klengar er a rekuk bebil a mlo uchul a klengeltengat?

⁶ Mimokl er a terached ma omeruul el uchul a ringel. Ngar er ngii a uleklatk el ngar er a tv ma babier el kirel a omeloko el dekool ma imis el omelim ma deleboes el omeruul. Engdi a ruumesingd el chad a diak lomekerreu aika el uleklatk. Engdi ngera mo duubech a lsekum a chad a mesuub el kmo a Dios el ouketui choua ika el tekoi e mekngit a rengul er a rechad el meruul er ngii? Chochoi, ngika el chad a modubech el mo choroid ngii el rokui er a klengar er ngii! (Isaia 63:10; 1 Korinth 6:9, 10; 2 Korinth 7:1; Efesus 4:30) Ngmeruul el uaisei e le ngsoal el odeuir a rengul a Jehovah el Dios, e dirrek el uchul a klungiaol el kirel​—mo mesisiich a bedengel e dirrek el mo er ngii a budech er a uldesuel.

⁷ Ngmeringel el kirir a rebetok el mengoit a mekngit el blekerdelir. Me nguaisei engdi, a bek el rak e a kuk betok er a teruich el telael el chad a otutii tia el omeruul. Te tuib a rengrir el mo er a Jehovah e mo metecholb, el olecholt el mo er a rechad el kmo te mla chemoit aike el omeruul el louketui er ngii a Dios. Ngkol ua ngera el uchul omelisiich el kired me bo lsebeched el rokui el mo cheroid er aike el mekngit el omeruul!

8. Ngera el uleklatk el mla er a Biblia a mo uchul a deurreng er a telungalek?

⁸ Deurreng er a klengar er a telungalek. Ngmla mo mechitechut a klengar er a telungalek er a betok el beluu. Betok el chebechiil a mla metemall, el mlo uchul a secherel a uldesuir a rengalek. Ngar er a bebil el beluu er a Europe, e a 20 el basent er a bek el delengchokl a loungerachel er ngii a mesobil el chad. A Jehovah ngmekera lengesukid el mo blak a rengud el merael kid ma telungalek er kid? Moutekangel el menguiu er a Efesus 5:22–​6:4, e mesa sel ungil el uleklatk  el mo er a resechal ma rebecherir ma rengelekir el ngar er a Tekingel a Dios. A bo doltaut aika el tekoi ma lmuut el betok el uleklatk el ngar er a Biblia e ngsmisichii a chebechiil, e toketek a ungil el okurulir a rengalek, el mo uchul a deurreng er a telungalek. Tiang diak el sal ulterekokl el uchul a deurreng er kid?

9, 10. Ngmekera e a osenged er a ngar er a medad a kuk ngodech er a osengel a beluulechad?

⁹ Ngulterekokl a rengud el kmo a mondai er a beluulechad a kmedu el mo diak. A tekoi er a science ma betok el klemedengei el kirel a tekoi ma meringel el urerir a remengeteklel a beluu a ngar er ngii engdi a meklou el mondai er a klengar er a chelechang a di melemolem. A Klaus Schwab, el milechelii a World Economic Forum, a millekoi el kmo “a ildisel a mondai er a chutem a di merael el mo betok e a klungel a taem el dousbech el mesmechokl a di merael el mo kedeb.” Ngmesaod el kirel aike el “kdekudel el tekoi el ua terrorism ma omengikiongel er a chutem el rokir ma diak lultebechel el rolel a keizai” el mla oberk er a beluulechad el rokir. A Schwab a merekui er a tekingel el kmo: “Chelechang, el kuk ngar er a uchei er a ngar er a mong, e a rechad er a beluulechad el rokir a melechesuar el kmo ngkirir el mo dmak el rokui e mesmechokl aika el tekoi.” Ma lorael el beduluchei tia el 21 el dart el rak, e a osengir a rechad er a ngar er a mederir el klebesei a diak lungil.

¹⁰ Ngkol ua ngera el uchul a deurreng sel dodengei el kmo a Jehovah el Dios a mla kutmeklii a Rengedel a Messias er ngii el mo meledaes a rokui el mondai er a klechad! Me ngoeak ngii el Renged, e a mera el Dios a mo “merrob a mekemad” ma budech a “di le medechel.” (Psalm 46:9; 72:7) A ngellitel el King, el Jesus Kristus, a ‘olsobel er a remechitechut ma remechebuul er a ulecheracheb ma mekngit el bekeu el omeruul.’ (Psalm 72:12-14) Ngar er a eungel a omengedereder er a Renged, e ngmo diak a klengerenger. (Psalm 72:16) A Jehovah a “mo mesuld a bek el chiuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.” (Chocholt 21:4) A Renged a mla medalem er a eanged e di kmedung e ngmo meledaes a rokui el tekoi el ngar er a chutem.​—Daniel 2:44; Chocholt 11:15.

11, 12. (a) A doltoir a tametereng ngmo uchul a diak a ulebengelel el deurreng? Mosaod. (b) Ngerang a meskid a mera el deurreng?

¹¹ Kede medengei aike el mo uchul a deurreng. Ngerang a sebechel el meskid a mera el deurreng? A ta el toktang er a uldasu a dmu el kmo ngngar er ngii a ede el telengtengil a deurreng​—a uchul a deurreng, el mechesang el meruul er ngii, el mo uchul a klungiolir a rebebil. E ngii a dmu el kmo sel uchul a deurreng a diak leklou a ultutelel e dilechelir el kmo: “Tia mechas a rengud er ngii e le a rebetok el chad a mengoit a klou el taem el di oltoir a uchul a tametereng.” Ngera osengel a Biblia el kirel tia el tekoi?

¹² A King el Solomon er a Israel er a irechar a kmo: “Ak tilbir er a renguk el kmo, ak mo chormii a tametereng e oldeu er a renguk. E ngdi tia mak mlo metik er ngii el diak a ultutelel. Ak mlo medengei el kmo a dereuakl a klebelung, ma tametereng a diak a ngeral le rellii er a chad.” (Olisechakl 2:1, 2) A doltirakl er a Biblia, e a ngii di lengera el uchul a tametereng a di tedeb a klungiolel. E kuk ua ngerang sel bo demechesang el meruul er a ureor? A ureor el omerk er a klumech e meruul er a remo disciplo a sel kot el klou a belkul el ureor el ngar er ngii er a chelechang. (Matteus 24:14; 28:19, 20) Ma lsekum e kede omerk er a klumech el kirel a osobel el ngar er a Biblia, e kede mechesang er a ureor el sebechel el mo uchul a osobel el kired kid me tirke el orrenges er kid. (1 Timoteus 4:16) E le kid a  “choureor el kldemel a Dios,” me kede mo melechesuar el kmo “a dorous e ngbai ngeltengat ra dolai.” (1 Korinth 3:9; Rellir 20:35) Tia el ureor a meskid a moktek er a klengar er kid e msang a Omebeled a tekoi el onger er ngike el oltuub er ngii, el Satan el Diabelong. (Osisechakl 27:11) Chochoi, a Jehovah a mla ochotii el kmo a omeluu er a Dios a meskid a mera el deurreng el mo cherechar.​—1 Timoteus 4:8.

13. (a) Ngera uchul ma Theocratic Ministry Skuul a klengeltengat el kired el oldeu a rengud el kirel? (b) Ke mlekera e ngmai a klungiolem er a Theocratic Ministry Skuul?

¹³ A klou a ultutelel e ungil el rolel a osisechakl. A Gerhard a mesiou el ta er a remechuodel er a ongdibel er a Resioning er a Jehovah. Ma lolatk er a taem er a lengeasek, e ngdmu el kmo: “Sera kngeasek, e a mondai er ngak a mle meringel er ngak sel kungedecheduch. E a lsekum a rechad a orrimel er ngak, e ak mengal el mo kokong a kungedecheduch. Ak ulemdasu el kmo ngak a mera el diak a belkuk el chad. Ngdirrek el mlo diak a ultutelel a skuul el kirel a omengedecheduch el demak ma delak a ulsisebak er ngii. A mondai er ngak a mla er a chelsel a bdeluk, el diak el ikrel a bedengek. Engdi ngmla er ngii a ungil el sengk el mla er a Jehovah el mei, el ngii a Theocratic Ministry Skuul. E sera klia ngklek er a skuul e tia millisiich er ngak. Ak uluutekangel el oltaut a tekoi el ksiluub. E tia mlo uchul a klungiolek! Ngmlo sebechek el ungil el mengedecheduch, e dikea kkora bekikl e mocha bekeu el oldingel a obliil. Me chelechang e ngsebechek el oltobed a cheldecheduch el mo er a buai. Ak mera el mereng a sulel a Jehovah el mla meskak a beches el klengar el okiu tia el skuul.” A rolel a Jehovah a lolisechakl er kid el mo meruul er a urerel ngdiak bo luchul a deurreng er kid, nguaisei ngdiak?

14, 15. A dengar er a chelsel a chelebuul e ngera el ngeso a sebeched el ousbech er ngii? Momekesiu.

¹⁴ Ngngar er ngii a delongeled kid ma Jehovah ma ulengeseuil a klodam el ngar er a beluulechad el rokir. A Katrin, el kiei er a beluu er a Dois, a kmal silebek a rengul er a lrenges chisel a desiu ma tsunami el mlo er ngii er a beluu er a Asia. A ngelekel el redil a uleldingel er a beluu er a Thailand er seikid el taem. Me ngika el chedil a dimlak lodengei el kmo a ngelekel ngdirk chad ma lechub e ngteloi er a rulekoad er a lorrenges a chais er a chelsel a 32 el sikang. Ngmera el mlo ungil a rengul er a lenguu a dengua el ouchais el kmo a ngelekel a di ungilbesul!

¹⁵ Ngerang a ngilsuir a Katrin er sel taem el lesebek a rengul? Ngmeluches el kmo: “Ak milluluuch el mo er a Jehovah er a chelsel aikeikid el taem. E miltik er ngii el kmo ngmillisiich er ngak e mlo sebechel el cholleklii a renguk. A rudam er a klereng a uleldingel er ngak e millisiich er ngak.” (Filipi 4:6, 7) E ngkol ua ngerang el rengelel oleko aike el taem e ngdimlak lousbech er a sengk er a nglunguuch ma ka lengilai a ongelaod el mla er a klodam er a klereng! A kmes el deleongel er kid ma Jehovah ma Ngelekel a ileakl el klengeltengat, el kmal mekreos me ngdiak el kired el mo meterekakl er ngii.

16. Mosaod er a tekoi el olecholt er a klungel a ultutelel a omelatk er a okiis.

¹⁶ Omelatk el mo lmuut el meseterir a rulekoad el betik er a rengud. (Johanes 5:28, 29) A kekere el chad el ngklel a Matthias a mlukeroul el  ta er a Resioning er a Jehovah. Ngdimlak a omereng el saul er ngii el kirel tia el klengeltengat, me ngmlechetakl el mo cheroid er a ongdibel er a Rekristiano er a dirk lengeasek. Me ngmeluches el kmo: “Ngdimlak kchoit a taem el ungil el chachedecheduch ngak ma demak. Aki bai di mle blechoel el kautoketok. Me nguaisei engdi, a demak a mle blechoel el melatk a ungil el kirek. Ngmle betik a rengul er ngak, el tekoi el dimlak kumtab er ngii er seikid el taem. E sera 1996, er a lemedkung me kdengchokl er a bita er ngii lorreked er a chimal e ak lilangel, el olengit er ngii me lousubes aike el betok el mekngit el kriruul e ouchais er a bltkil a renguk el mo er ngii. Engdi seikid el taem e ngdikea lsebechel el rongesak. Ngdi mle telkib el smecher, e sola e mlad. A lsekum e ak di ngar el mo mesa demak er a taem er a okiis, e aki mo dmedesii a delongelam el terung. E ngii a ulterekokl el mo dmeu a rengul el remenges el kmo a ngelekel a mesiou el ta er a remechuodel e ngii ma bechil a dirrek el mesiou el mui el taem el pioneer.” Ngkol ua ngera el klengeltengat a dobang el kirel a omelatk er a okiis!

“El Diak le Meringel el Ureor”

17. Ngera kede mo melechesuar sel dolebedebek el kirel a klengeltengat el lomeskid a Jehovah?

¹⁷ El kirel a Demal el ngar er a eanged, e a Jesus Kristus a dilu el kmo: “A Demmiu ra eanged chongesechii a sils er bebrir ar mekngit mar ungil, e oleiit ra chull el morar melemalt mar diak le melemalt.” (Matteus 5:45) Ma lsekum a Jehovah el Dios omekngeltengat er a rechad el mo lmuut er a rediak el melemalt ma remekngit, e ngulterekokl el kuk lmuut el mo omekngeltengat er tirke el chad el merael er a rolel a blakerreng! A Psalm 84:11 a kmo: “Ng diak lolechib a ungil tekoi el mor tirkel meruul a melemalt el tekoi.” Me sel dolebedebek er ngii el kmal omekerreu e melatk er tirke el betik a rengrir er ngii, e ngkol ua ngera el klou el omereng el saul ma deurreng a mo er a chelsel a rengud!

18. (a) Ngmekerang e diak a ringel el mei el obengkel a klengeltengat er a Jehovah? (b) Ngera uchul ma rebetok el chedal a Dios a chuarm?

¹⁸ “Ng klengeltengat er a RUBAK [el Jehovah]” a mla rulleterir a rechedal el mo merau er a tekoi er a klereng. E ngulterekokl a rengud el kmo “diak le meringel el ureor.” (Osisechakl 10:22) Ma leuaisei e ngera uchul ma ongetikaik ma ongarm a bo lecharm er ngii a reblak a rengrir el chedal a Dios, el mo uchul a ringel ma klengiterreng el mo er tir? A ringel ma chelebuul a me er kid e le ikaikid el ede el tekoi a uchul. (1) E le kid el oudiukes er a klengit. (Genesis 6:5; 8:21; Jakobus 1:14, 15) (2) Ma Satan ma remengelengalek el reng er ngii. (Efesus 6:11, 12) (3) Me tia el mekngit el beluulechad. (Johanes 15:19) A Jehovah a mechei aika el mekngit me ngduubech el me er kid, engdi ngii a diak luchul ngii el mekngit. A mera er ngii, “a bek lungil ngat ma bek el cherrungel sengk a ngarbab el ngara Demal a bek el llomes el mei.” (Jakobus 1:17) Ngdiak a ringel el mei el obengkel a klengeltengat er a Jehovah.

19. Ngera mo blingelir tirke el chad el melemolem el blak a rengrir el merael?

¹⁹ A bo dekeed er a Dios e ngmo uchul a ungil el klengar er a klereng. E le a dekeed er ngii, e kede sumecheklii “a ungil lomekedecheraol el kirir el kudmeklii a ngar medad, me bo lsebechir el nguu a klengar, el meral klengar.” (1 Timoteus 6:12, 17-19) Ngar er a chelsel sel beches el beluulechad er a Dios, e a klengeltengat er a klereng a mo obengkel a klengeltengat er a klechad. Me sel mera el klengar, el obengkel a olsibes el klengeltengat er a Dios, a mo blingelir tirke el chad el “orrenges er a RUBAK [el Jehovah] el Dios er kemiu.” (Duteronomi 28:2) Mada me desisiich a rengud, e dolemolem el oldeu a rengud el merael el loba blakerreng.

Ngera Ke Siluub?

• Ngera uchul me ngdiak lungil a deblechoel el di mechesang el melebedebek el kirel a ngar er a medad el klebesei?

• Ngera el klengeltengat a doldeu a rengud er ngii er a chelechang?

• Ngera uchul ma reblak a rengrir el mesiungel a Dios a mo chuarm?

[Aike el Ker er a Suobel]