A Jehovah a Olisechakl er a Remengkar er a Delebechel

“Ng RUBAK a meskid a llomeserreng; a klemedengei ma sekutaberreng a ngar ngii el mei.”​—OSISECHAKL 2:6.

1, 2. Ngera uchul e a remla metecholb el sechal a sorir el menglou er a ngerechelir el ngar er a ongdibel?

 “NGKMAL mlo ungil a renguk er sera knguu a ngerachel el mo elder,” e ngmelekoi a Nick, el elder el mla mo euid el rak. “Ak milsa tia el ngerachel el ua letechall el mo kilungii a omesiungek el mo er a Jehovah. Ak ulemdasu el kmo ngkirek el mereng a sulel el kirel aike el tekoi el bla lruul el kirek. Ngmle soak el olengeseu er a rechad er a ongdibel el mo er sel tkurrebab el sebechek, el oltirakl er sel mle blekerdelir a rechelder el me er ngak.” Engdi, ngdirrek el mla er ngii a telkib el sebekreng er ngii. A Nick a kmo: “Seikid el taem er a knguu a ngerachel e ngdirkak bo lokedei a rekik ma kulemdasu el kmo ngkmal dirk ngesonges a duch er ngak er a sekutaberreng ma llomeserreng el kuusbech el mo ungil el mengkar er a ongdibel.”

² A rechad el Jehovah a melilt er tir el mo oungerachel er a delebechel a ngar er ngii a betok el uchul e ngdmeu a rengrir. A apostol el Paulus a ulemeklatk er a remechuodel er a Efesus er a ta er aikang er a lomelekl a tekingel a Jesus el kmo: “A dorous e ngbai ngeltengat ra dolai.” (Rellir 20:35) Ma losiou el ua ministerial servant ma lechub a elder e ngmesterir a remla metecholb el sechal a bebil el rolel e te merous el mo er a Jehovah ma ongdibel. El ua itiang, a reministerial servant a sebechir el oureor el lobengterir a rechelder. Te dirrek el sebechir el mengoit er a klou el taem el meruul a ngerechelir. Choua itirka el odam a meruul a meklou el ureor e le ngbetik a rengrir er a Dios ma rengar er a bita er tir.​—Markus 12:30, 31.

3. Ngera uchul e a rebebil a diak lsal sorir el mo olab a ngerachel er a ongdibel?

³ E kuk ua ngerang el kirel a sechal el Kristiano el diak lsal soal tia el techall el mo ministerial servant ma lechub e ngmo elder e le ngomdasu el kmo ngmetitur? El di ua Nick, alta e ngsuebek a rengul er a ngelsengesel a dechal el rullii el mo ungil el oungerachel el klekar. Me kau el mla metecholb el odam, nguaisei a uldesuem el di ua itirkaikid el chad? Choua ika el uldasu a ngar er ngii a ultutelel. E le Jehovah a mo oukerrekeriil er a remengkar er sel rolel a lomekerreu er a delebechel. A Jesus a dilu el kmo: “Ngikel mor ngii a betok, a mekeriil ra betok; me ngikel mloterekokl er ngii a betok, a lmuut el betok a mekeriil er ngii.”​—Lukas 12:48.

4. Ngmekerang e a Jehovah a olengeseu er a remla metutk el chad el omekerreu er a sib er ngii?

⁴ A Jehovah ngousbech el kmo a sel lengiltiterir el ministerial servant ma rechelder e ngmocha di tir el oltekau a berraod? Ngkmal diak, ngbai mesterir a ngeso me bo lsebechir el outekangel e dirrek el mo meduch er a urerir. El ua dulsaod er a suobel er a uchei, a Jehovah a mesterir a chedaol el reng er ngii, e a redechel a ngosuterir el mo oba delemedemek el omekerreu er a sib. (Rellir 20:28; Galatia 5:22, 23) E dirrek, ngii el Jehovah a mesterir a llomeserreng ma klemedengei ma sekutaberreng. (Osisechakl 2:6) Ngmekerang a loruul el uaisei? Ka me bo dosaod a edei el rolel e a Jehovah a osisecheklterir tirke el mla metutk el omekerreu er a sib er ngii.

Mlosisechakl er a Remeduch el Klekar

5. Ngera uchul e a Petrus ma Johanes a mle meduch el loureor el klekar?

⁵ Sel taem el rechapostol el Petrus ma Johanes a dilechor er a mederir a rechellimosk er a llach el ngar er a kort er a Sanhedrin, e a rechad a mle metengel a osengir er tir e le tir el “diak  a skulir.” Chochoi, a rechapostol a sebechir el menguiu e meluches, engdi dimlak losuub a Bades er a skuul er a rabbi. Me nguaisei engdi, a Petrus ma Johanes el obengterir a rebebil el disciplo a ullecholt el kmo te mera el meduch el sensei, el olengeseu er a rechad el mo oumerang. Ngmilekerang e a choua itirka el diak a skulir el chad a mlo meduch el sensei? Uriul er a lorrenges er a Petrus ma Johanes, e a kort a “miltik er tir el kmo tulebengkel a Jesus.” (Rellir 4:1-4, 13) Ngkmal klemerang, te ngiluu a chedaol el reng. (Rellir 1:8) Engdi ngmlo bleketakl el mo er tirka el chad el diak lomtab a tekoi er a klereng el kmo a Jesus a ulsisecheklterir. Sera lengar er a chutem el obengterir a rechapostol, e a Jesus a ulsisecheklterir el mengudel er a rua sib, e mengkar er tir er a chelsel a delebechel.​—Matteus 11:29; 20:24-28; 1 Petrus 5:4.

6. Ngera el kerebai el mo olsisechakl er a rechad a lebilecherei a Jesus ma Paulus?

⁶ Uriul er a okisel a Jesus, e ngmillemolem el olsisechakl er a remeltutk el klekar. (Chocholt 1:1; 2:1–3:22) El ua itiang, ngii a ngileltii a Paulus e ulemekrael er a omesubel. (Rellir 22:6-10) A Paulus a mle medengelii a kerresel a suobel el lengilai me ngullisechakl aike el lesiluub el mo er a rebebil el elder. (Rellir 20:17-35) El ua itiang, ngchiloit a klou el taem ma klisichel el olsisechakl er a Timoteus el mo “chad ra ureor” el mesiou er a Dios, “el diak a ngeral le merur er ngii.” (2 Timoteus 2:15) Me ngkmal mlo kmes a deleongel er tir el terung. E a uchei er isei, e a Paulus a milsaod el kirel a Timoteus el kmo: “Lobengkek el mesiou ra evangkelio, el di ua ngalek a lobengkel a demal.” (Filipi 2:22) A Paulus a dimlak el soal el meruul er a Timoteus ma lechub a kuk ta er a chad el mo disciplo er ngii. Ngdiak, ngbai millisiich er a ruumerang el ‘moukerebai er ngii, el ua ingii loukerebai er a Kristus.’​—1 Korinth 11:1.

7, 8. (a) Ngera el experience a ochotii el kmo ngsebechel el mo er ngii a ungil el mo duubech a lsekum a rechelder a oltirakl er a kerebai er a Jesus ma Paulus? (b) Oingerang e a rechelder a kirir el olsisechakl er a resechal el tir a sebechir el mo ministerial servant ma rechelder?

⁷ Ma loukerebai er a Jesus ma Paulus, e a remeduch el klekar a di tir el mo olsisechakl er a remla metecholb el odam, el sebechel el mo uchul a klungiaol er a uriul. Ka momtab er a experience er a sechal el ngklel a Chad. Ngmlukeroul er a telungalek el kakerous a klechelid er ngii, e sola e dirk meltutk el mo elder. Ngmelekoi el kmo: “A klteketel a rak, e a rebebil el meduch el elder a ngilsukak el mo olengeriakl er a tekoi er a klereng. A demak el dimlak lengar er a klemerang a uchul, me tirke el elder a ua blo ledemak er a klereng e kmal mlo kerekikl el melatk er ngak. Te chiloit a taem el olsisechakl er ngak el oldingel a obliil, e a uriul e a ta er tir a ulsisecheklak el mo meduch el meruul a ngerechelek er a ongdibel.”

⁸ Me ngdi osisiu el ua experience er a Chad, a resekutab el klekar a omuchel el olsisechakl er a resechal el tir a sebechir el mo ministerial servant ma rechelder er a uchei er a bo lerredemelel a ureor. E ngera uchul? E le a Biblia a mellach el kmo a reministerial servant ma rechelder a kirir el mo oltirakl aike el ngar er a bab el llach er a kldung ma klereng er a uchei er a bo lengai a ngerachel. Me nguaisei “tomuchel el meteriter.”​—1 Timoteus 3:1-10.

9. Ngera el ngerachel a lobang a remeduch el klekar, e ngera uchul?

⁹ A lsekum a remla metecholb el odam a kirir el meteriter, e ngungil a lemosisechakl er a uchei. El ua itiang: A lsekum a ngalek er a skuul a kirel el melai er a meringel el skeng engdi a resensei a dimlak el losisecheklterir, e omomdasu e ngsebechel a ngalek el mo ungil er sel skeng? Nglocha diak bo lungil a teng er ngii. Me nguaisei, a osisechakl a usbechall. Engdi, a reblak a rengrir el sensei a diak el di lolsisechakl er a rengelekir el mo ungil er a skeng e lemerekong, e te dirrek el ngosuterir el mo meduch el ousbech aike el klemedengei el lengai. Me nguaisei, a reblak a rengrir el elder a ngosuterir a remla metecholb el odam el omekeroul aike el blekeradel el ousbech a chad el olab a ngerachel el oeak a ulterekokl el osisechakl. Te meruul el uaisei e le ngsorir el ngosuterir el mo meduch el mesiou, e dirrek el ngosuterir el mo sebechir el ungil el omekerreu er a delebechel. (2 Timoteus 2:2) Nguaisei, a remla metecholb el odam a kirir el mo blak a rengrir e meringel el oureor  el mo rredemelel a mo ministerial servant ma lechub e ngmo elder. (Titus 1:5-9) Me nguaisei, a lsekum e te mo ungil el osisecheklterir tirke el oureng a ngerachel er a ongdibel, e a remeduch el klekar a sebechir el ngosuterir el mereched el olengeriakl.

10, 11. Te mekerang a reklekar e mo sebechir el olsisechakl er a rekuk bebil el kirel a lmuut el bebil el techall?

¹⁰ Ngoeak a ngera el ulterekokl el rolel e a remeduch el klekar a sebechir el olsisechakl er a rebebil el mo meruul a ngerechelir er a ongdibel? A kot el uchul, e ngkirir el mo semeriar e melatk er a rudam er a ongdibel​—el blechoel el obengterir el oldingel a obliil, e ngosuterir el mo sebechir “el melemalt loleisech a tekoi ra klemerang.” (2 Timoteus 2:15) A remeduch el klekar a mesaod el mo er tirke el odam a deurreng el lengilai er a omesiungir el mo er a rebebil, ma ungilreng el bo lodengelii e le ngmlo sebechir el oltaut aike el mle turrekong er tir er a klereng. Te dirrek el mesterir a ulterekokl el ungil el uldasu er a rolel e a odam a sebechel el mo ungil el “mkerebai ra delebechel.”​—1 Petrus 5:3, 5.

¹¹ Sel taem e le metutk a odam el mo ministerial servant, e a mellomes a rengrir el klekar a melemolem el olsisechakl er ngii. A Bruce, el milsiou el elder el betok el rak, a dmu el kmo: “Ngkmal soak el mo dengchokl el obengkel ngike el beches el servant e omelekl aike el uleklatk el bla lotobed ngike el blak a rengul e mellomes a rengul el mesiou. Aki dirrek el menguiu a ulekrael el kirel a ngerechelel, e sola e soak el oureor el obengkel el dimerkmo lebocha lungil el medengei a ngerechelel.” Sel lorael el mo klou a klemedengei er ngike el servant, e ngdirrek el sebechel el mesuub el meruul a urerel a klekar. Ngmelemolem el kmo: “E sel kubengkel a ministerial servant el mo oldingel er a rudam ma rudos, e ak ngosuir el melilt a bades el sebechel el melisiich e olekar er a rengul a chad ma lechub a telungalek el ki moldingel er ngii. A rolel a omesuub el ousbech a Bades el mo remutech a reng a klou a ultutelel a lsekum ngike el servant a mo meduch el meruul a urerel a klekar.”​—Hebru 4:12; 5:14.

12. Ngmekerang a remeduch el klekar a osisecheklterir a redirk meltutk el elder?

¹² A redirk meltutk el klekar a sebechir el ngmai a klungiolir er a lmuut el betok el osisechakl. A Nick, el dulsaod er ngii er a uchei, a kmo: “A osisechakl el kngiluu er a teru el mechuodel er a ongdibel a kmal ngilsukak. Tirka el lodam a mle medengelii a rolel a doruul a bebil el ureor. Alta e ngdimlak lekengei a tekingek, engdi te mle blechoel el klou a rengrir el orrenges e omtab. Ak mera el siluub a betok er a omerellir el olecholt a klengareourreng ma omelengmes el mo er a rudam ma rudos er a ongdibel. Tirka el elder a ulterekeklii er a renguk el kmo ngkirek el mo meduch el ousbech er a Biblia er sel taem el bo lekirek el mesmechokl a mondai ma lechub e ak mo melisiich er a rechad.”

Mlosisechakl er a Tekingel a Dios

13. (a) Ngerang a lousbech er ngii a odam a lsoal el mo meduch el klekar? (b) Ngera uchul ma Jesus a dilu el kmo: “Chosisecheklek a diak le mlar ngak”?

¹³ Nguaisei, a Tekingel a Dios el Biblia a olab a llach ma omellach ma ike el kerebai el ousbech er ngii a klekar me bo “lsiich a kedmeklel el kirel a ungil lurreor, me le mekedmokl el mecherrungel.” (2 Timoteus 3:16, 17) Ma odam alta e ngngar er a bab a skulel, engdi sel klemedengei er ngii er a Bades me sel rolel a loltaut er ngii a ngosuir el mo meduch el klekar. Ka momtab er a kerebil a Jesus. Ngii a mle kot el klou a klemedengei er ngii e kot el sekutab e mellomes a rengul el klekar er a klereng el mla kiei er a chutem, me nguaisei engdi, ngdimlak a ta el  taem el di leble lultuil er a klemedengei er ngii er sera lolsisechakl er a sib er a Jehovah. Ngdilu el kmo: “Chosisecheklek a diak le mlar ngak, ele ng mlar ngikel ulderchak.” Ngera uchul me nguleldanges er a Demal el ngar er a eanged? Ngmilsaod el kmo: “Ngikel melekoi a di tikingel chosiik a klebkellel.”​—Johanes 7:16, 18.

14. Ngmekerang a reklekar a diak el osiik a chetengakl el di kirir?

¹⁴ A reblak a rengrir el klekar a diak el osiik a chetengakl el di kirir. Te ousbech er a Tekingel a Dios el mellach e melisiich, e diak lultuil er a llomeserreng er tir. Te medengei el kmo a ngerechelel a klekar a olengeseu er a sib el mo oba “chomelebedebekel a Kristus,” el diak el omelebedebekir a rechelder. (1 Korinth 2:14-16) El ua itiang, ngmekerang a lsekum a elder el olengeseu er a chad ma bechil el kirel a chetituokel el tekoi er a chebechiielir a di ousbech er a experience er a klengar er ngii e diak lousbech er a omellach er a Biblia ma suobel el bla lotebedii “ngikel blak a rengul e mellomes a rengul mesiou”? (Matteus 24:45) Sel uleklatk er ngii a sebechel el cheliseksikt er a siukang er a beluu ma telkelel a klemedengei er ngii. Ngmerang, a bebil el siukang er a beluu a diak el mekngit, me ngike el elder a sebechel el ngar er ngii a klemedengei er ngii ma dechal er a klengar. Me nguaisei engdi, a rua sib a sebechir el ngmai a klungiolir sel taem el reklekar a melisiich er tir el orrenges er a ngerel a Jesus ma tekingel a Jehovah er a bai lorrenges a uldesuir a rechad ma lechub e loltirakl a siukang er a beluu.​—Psalm 12:6; Osisechakl 3:5, 6.

Mlosisechakl er “Ngikel Blak a Rengul e Mellomes a Rengul el Mesiou”

15. A Jesus ngera el ngerachel a lebilsang “ngikel blak a rengul e mellomes a rengul el mesiou,” e ngerang a ta er a uchul me ngmlo ungil a urerel ngika el mesiou?

¹⁵ A reklekar el ua rechapostol el Petrus ma Johanes ma Paulus a mle chedal sel cheldebechel el lulemekedong er ngii a Jesus el kmo “ngikel blak a rengul e mellomes a rengul el mesiou.” A rechedal tia el mesiou el cheldebechel a tirke el mlechilt er a reng el odam er a Jesus el dirk ngar er a chutem, el omeltkir a mo mengedereder el obengkel a Kristus el ngar er a eanged. (Chocholt 5:9, 10) Me chelecha el taem er a uriul el sils er a beluulechad, e a ildisir a rudam er a Kristus el ngar er a chutem a merael el mo kesai. Engdi, a urerir el lebilsterir a Jesus​—el omerk er a ungil el chais er a Renged er a uchei er a lemei a ulebongel​—a kuk lmuut el klou er a ngar er a mong. Me nguaisei engdi, a urerir a rengellitel a kmal mla mo ungil! Ngera uchul? E le tir el mla osisecheklterir a rechedal a “ngodech el chermek el sib” el mo ngosuterir er a ureor el omerk e olsisechakl. (Johanes 10:16; Matteus 24:14; 25:40) Chelechang, e a klou el ureor a loruul er ngii a reblak a rengrir el kuk bebil er a sib.

16. Ngmekerang a rengellitel a lolsisechakl er a remla metutk el sechal?

 ¹⁶ Ngmekera rengellitel a meruul er tia el osisechakl? Sera kot el dart el rak, e tirke el ulemtechei er a rengellitel a mlukngerachel el mo olsisechakl e melutk er a rechoverseer er a ongdibel, e tir el overseer a mo olsisechakl er a rua sib. (1 Korinth 4:17) Ngdi osisiu er a chelechang. A Governing Body​—a kekerei el cheldebechel er a rengellitel el elder el omtechei er ngike el blak a rengul el mesiou​—a omekngerachel er tirke el omtechei er tir el mo olsisechakl e omekingar er a reservant ma rechelder er aike el betok el telael el ongdibel el ngar er a beluulechad el rokir. Ma dirrek, a Governing Body a mengetmokl a skuul el mo olsisechakl er a rechedal a Branch Commitee ma ruldingel el overseer ma rechelder ma reministerial servant er a kot el ungil el rolel a lomekerreu er a sib. A lmuut el bebil el ulekrael a lebesterir el oeak a babier ma suobel el ngar er a Ongkerongel ma kuk bebil el babier, el ua Organized to Do Jehovah’s Will (Kltmokl el Mo Meruul a Soal a Jehovah). a

17. (a) Ngmilekerang e a Jesus a ochotii el kmo ngkmal loumerang er a rengellitel? (b) Ngmekerang e a reklekar er a klereng a ochotii el kmo te kmal oumerang er a rengellitel?

¹⁷ A Jesus a kmal uluumerang er ngike el mesiou me ngtiltkii el “mo mengedereder a daisang er ngii el rokui”​—a rokui el daisang er ngii er a klereng el ngar er a chutem. (Matteus 24:47) A remla metutk el klekar a dirrek el kmal oumerang er a rengellitel me te oltaut a ulekrael el lengai er a Governing Body. Chochoi, a reklekar sel lolsisechakl er a rebebil, me sel lekengei el mosisechakl er a Tekingel a Dios, e dirrek sel loltaut a osisechakl el lengilai er a rengellitel, e te melisiich er a kltarreng er a delebechel. Ngkol ua ngera el omereng el saul a dobang e le a Jehovah a mla osisecheklterir a resechal el tir a kmal omekerreu er a derta el chad er a ongdibel er a Rekristiano!

[Footnote]

Ke Mekerang Omonger?

• Te mekerang a remeduch el klekar er a klereng e olsisechakl er a rebebil?

• Ngera uchul ma reklekar a diak lolsisechakl el olab a di uldesuir?

• Ngmekerang e ngera uchul ma reklekar a olecholt el kmo te kmal oumerang er a rengellitel?

[Aike el Ker er a Suobel]

[Siasing er a 11 el llel]

A rechelder el Kristiano a olsisechakl er a remekekerei el chad er a ongdibel

[Siasing er a 12 el llel]

“Ngikel blak a rengul e mellomes a rengul el mesiou” a omesterir a rechelder a betok el osisechakl