A Tekingel a Jehovah a Di Ngar

A Omesodel a Babier er a Ongeim el Psalm

A REMERAU a melekoi el kmo: “A re ngeasek el ngelekam el sechal bo le ua dellomel el mukeroul el mo mesisiich, ma re ngelekam el redil bo le ua meduch el tang er a saus el menglebokel er a blil a king. A soko er a sersam di bo le mui . . . ma chermam el sib bo lomechell el mor a dertruich el telael a ngelekel.” Ma dirrek, a remeteet a sebechir el melekoi el kmo: “Te ngeltengat a re chad el mor tir tial klengeltengat!” Engdi a milluches er a psalm a kuk melekoi el kmo: “Te ngeltengat a re chad el Dios er tir a RUBAK [el Jehovah].” (Psalm 144:12-15) Adang, ngmekerang e diak leuaisei? A Jehovah a ngeltengat el Dios, ma klengeltengat a blingelir a remesiou er ngii. (1 Timoteus 1:11) Tia el klemerang el tekoi a obeketakl er aike el ulebongel el mlukreng el chelitakl el ngar er a Psalm 107 el mo er a 150.

A Ongeim el Babier er a Psalm a dirrek el omeketakl aike el ngar er a bab el blekerdelel a Jehovah, el uldimukl er ngii a blekokuii el bltikerreng ma blakerreng ma ungilreng. A bo dungil el omtab er a blekerdelel a Dios e tia rullid el mo betik a rengud er ngii e medakt er ngii. E tia dirrek el mo uchul a deurreng er kid. Ngkol ua ngera el mekreos tia el klumech el ngar er a chelsel a Ongeim el Babier er a Psalm!​—Hebru 4:12.

A BLEKOKUII EL BLTIKERRENG ER A JEHOVAH A UCHUL A KLENGELTENGAT

(Psalm 107:1–119:176)

A remle blebaol el Chijudea el tobeda er a Babilon a mengitakl el kmo: “Ng kirir el mereng a sulel a RUBAK er a diak le mengodech el bltikerreng er ngii; el kirel a mengasireng el tekoi el le riruul el kirir!” (Psalm 107:8, 15, 21, 31) A loldanges er a Dios, e a David a mengitakl el kmo: “Ma blakerreng er kau a mo melat a eabed.” (Psalm 108:4) Ngar er a ongingil el chelitakl, e ngmeluluuch el kmo: “Mngesukak e RUBAK el Dios er ngak! Mosebelak el oltirakl er a diak le mengodech el bltkil a rengum.” (Psalm 109:18, 19, 26) A Psalm 110 a ulaoch el melutk el mo er a omengederederel a Messias. “A omeluu er a RUBAK a uchelel a llomeserreng,” ngmelekoi a Psalm 111:10. E a ongingil el psalm a kmo: “Ng ngeltengat a chad el meluu er a RUBAK.”​—Psalm 112:1.

A Psalm 113 el mo er a 118 a okedongall el kmo Hallel Psalm e le ngomelekl er a tekoi el “Hallelujah,” ma lechub “Modengesii a Jah!” A doltirakl er a Mishnah​—a babier er a ongede el dart el rak el mle llechukl er ngii aike el uldedelid el tekoi er a irechar​—e aika el chelitakl a lulengitakl a Rechijudea er a taem er a Baskua ma ike el edei el ungil el klebesei er tir el loruul er a bek el rak. Sel kot el kekemanget el psalm e dirrek el kot el kekemanget el bliongel er a chelsel a Biblia el rokir, el Psalm 119, a mengebkall er a tekingel a Jehovah, ma lechub a klemechel.

Ker er a Biblia a Mlonger:

109:23​—Ngera belkul a tekingel a David er a ledu el kmo: “Ak di ua chuu a le kebesengei el mochu dibus”? A David a milengitakl el melekoi el kmo ngomelechesiu er a kodellel el kmedang.​—Psalm 102:11.

110:1, 2​—Ngerang mirruul er ngii a “Rubak [er a David],” el Jesus Kristus, er a ledengchokl er a kadekmel a Dios? Uriul er a okisel, e a Jesus a mlengai el mo er a eanged e mlo er a kadekmel a Dios e milengiil el mo tmurk er a 1914 e mlo omuchel er a omengederederel el King. Chelsel aikaikid el taem e ngmilengedereder er a rubengkel, el tir a rengellitel, el omekrael er tir er a ureor er a berkel a klumech ma omeruul el disciplo e dirrek  el mengetmokl er tir el mo mengedereder el obengkel el ngar er a Rengedel.​—Matteus 24:14; 28:18-20; Lukas 22:28-30.

110:4​—Ngera belkul a tekoi el kmo a Jehovah a ‘rullii a kmal mesisiich el telbiil me ngdiak lolutii a tekingel’? Tia el telbiil a lullib er ngii a Jehovah el obengkel a Jesus Kristus el kirel a deruchall er a Kleking ma Klengarbab el Priist.​—Lukas 22:29.

113:3​—Ngmekerang e a ngklel a Jehovah a modanges “sel lengasech a sils el mor sel le ngelt”? Tiang a diak di lolekoi er a cheldellir a rechad el mesiou er a Dios er a bek el sils. Ngar er a ngesechel a sils er a ongos el mo er sel lengelt er a ngebard, e a dichel a sils a melidiich er a beluulechad el rokir. Me nguaisei, e a Jehovah a modanges er a chutem el rokir. Tiang a diak el sebechel el mecherrungel el uaisei a lak a ungil el omengetmokl. Kid el Sioning er a Jehovah a ngar er ngii tia el mekreos el techelled el oldanges er a Dios e blak a rengud el meruul er tia el ureor er a berkel a klumech er a Renged.

116:15​—“Ng ua ngeral meringel er a RUBAK sel le mad a ta er a re chedal”? A remesiungel a Jehovah a kmal mekreos er a rengul, me sel lolatk er a kodellir el ua ta el cheldebechel el rokir e ngdiak el sebechel el kongei er ngii el mo uaisei e le ngdiak lemuchar. A lsekum a Jehovah a mecherei me ngmo uaisei, e ngdi ua dedu el kmo a recherrouel a kuk mesisiich er ngii. Ma lmuut el tang, e ngmo diak a chad el medechel er tia el chutem el mo uchetemel a beches el beluu.

119:71​—Ngngera sebechel el mo klungiolel a ongarm ma ringel? A ringel a sebechel el osisecheklid el mo mui el ultuil er a Jehovah, el oba blakerreng el meluluuch el mo er ngii, e mo meses el mesuub er a Biblia e oltaut a lolekoi. Ma lmuut el tang, a bo dechebangel a ringel e ngsebechel el ochotii a chelitechut el ousbech er a omesmechokl. A ongarm a diak el rellid el mo oba cheluached er a rengud a lsekum e kede mecherei me ngmengikiid er kid.

119:96​—Ngera belkul a ‘ngelsengesel a rokui el cherrungel’? A meluches er a psalm a melekoi er a osengel a chad el kirel a chelerrungel. A mla er a uldesuel a kmo a osengel a chad el kirel a chelerrungel a ngar er ngii a telkelel. E ngar er a kuk bitang, a llechul a Dios a diak a telkelel, me ngomekrael a bek el blekeradel er a klengar. A New International Version a melekoi el kmo: “Ak mesang a telkelel a rokui el chelerrungel, engdi ngdiak a telkelel a llechum.”

119:164​—Ngera belkul a doldanges er a Dios el ‘euid er a ta el sils’? A ochur el euid a olecholt er a cherrengelel. Ma leuaisei, e ngike el melluches er a psalm a melekoi el kmo a rokui el odanges a kirel el mo er a Jehovah.

A Klubeled:

107:27-​31. A llomeserreng er a beluulechad a ‘mo uchul a rraurreng’ er a taem er a Armageddon. (Chocholt 16:14, 16) Ngdiak el sebechel el mo osebelii a ngii di el chad er a tellemall. Te di tirke el omes el bedul a Jehovah el kirel a osobel a sebechir el mo kiei el “mereng a sulel a RUBAK er a diak le mengodech el bltikerreng er ngii.”

109:30, 31; 110:5. A kadekmel a chimal a soldau el orreked er a saider a blechoel el diak a omekreakl el omekerreu er ngii, e le ngurrekodel er ngii er a katur. A Jehovah “a ngar a kadekmem” er a remesiungel, el oumekemad el kirir. E seikid e ngomesterir a ulekerreu ma ngeso el uchul e ngkirel el “mo klou a ngerek el mereng a sulel”!

113:4-9. A Jehovah a kmal ngar er a bab me ngdirrek el kirel el “omes el mer iou er a eanged.” Engdi, ngkmal chubechubechad el mo  er a metacherbesul el chad ma chebulang ma kebai el dil. A Kot el Kedidai el RUBAK el Jehovah a kmal ngar er a eou a rengul e soal a remesiungel a ledirrek el mo uaisei.​—Jakobus 4:6.

114:3-7. Omesuub el kirel a mengasireng el urerel a Jehovah el lurruul el kirir a rechedal er a Bekerekard el Daob ma ngar er a Chomoachel er a Jordan ma Rois el Sinai a kirel el remutech a rengud. A “beluulchad,” el omtechei er a klechad, a kirel el mo mechas a rengul​—el ua bo “momritel”​—e le Rubak a uchul.

119:97-101. Sel denguu a llomeserreng, ma dmolech el klemedengei er a Tekingel a Dios e ngsebechel el omekerreu er kid er a telemellel a klereng.

119:105. A tekingel a Dios a olbidel el omekrael er kid el sebechel el ngosukid el sumechokl aike el mondai el bo dechebangel. Ngdirrek el ua lolbidel el meluich er a roled, e le ngouchais a moktek er a Dios el mo er ngii er a ngar er a medad el klebesei.

DEURRENG EL NGAR ER A CHELSEL A RINGEL

(Psalm 120:1–145:21)

Kede mekerang e sebeched el chobangel a meringel el blekeradel e outekangel a chetituokel el tekoi? A Psalm 120 el mo er a 134 a onger er tia el ker. Kede outekangel a ringel e melemolem er a deurreng er kid sel dosiik a ngeso er a Jehovah. Aika el psalm, el domekedong el kmo Chelitakl er a Terebel, a locha lulengitakl a Rengalek er a Israel el ngar er a omerollir el mo er a Jerusalem el mo mengedaol a chedaol el sils er tir er a bek el rak.

A Psalm 135 ma 136 a ochotii a Jehovah el Ngike el meruul aike el soal, el kmal ileakl a blekerdelel er tirke el bleob el chelid el tir a diak a klisichir. Sel 136 el Psalm a meldibech el chelitakl ma nger er ngii, ma ulebengelel a derta el bades a longitakl er ngii el onger er a tekoi el meldung er a uchelel. Ma ongingil el psalm a mesaod er a klengiterreng er a Rechijudea el ngar er a Babilon el mle sorir el mengull er a Jehovah el ngar er a Sion. A David a dilibech aike el Psalm 138 el mo er a 145. Ngsoal el ‘mereng a sulel a RUBAK [el Jehovah] el oba rengul el rokir.’ Ngera uchul? Ngii a kmo: “Ele ke rirellak el ileakl ngodech e mengasireng.” (Psalm 138:1; 139:14) Chelsel aike el uriul el eim el psalm, e a David a meluluuch el kirel a ulekerreu er a remekngit el chad ma melemalt el uleklatk ma ngubet er a ruldechelakl ma ulekrael el kirel a omerellel. Ngomeketakl er a deurreng er a rechedal a Jehovah. (Psalm 144:15) Uriul er a lorritel er a klengarbab ma ungilreng er a Dios, e a David a melekoi el kmo: “Ak di mo blechoel el oldanges er a RUBAK; a rokui el bleob bo loldanges er a chedaol ngklel el mo cherechar.”​—Psalm 145:21.

A Ker er a Bades a Monger:

122:3​—Ngmekerang e a mats er a Jerusalem a “kmal ungil selmechokl e tabesul”? El ua blekeradel er a betok el mats er a irechar, a blai el ngar er a Jerusalem a mlukedechor el kaiuekeed. Sei a uchul e a mats a mle beot a losebechakl er ngii. E aike el obliil a mle kaiuekeed a uchul ma rechad er a beluu a sebechir el kaingeseu e kaukerreu. Tiang a olecholt er a kltang er a klereng er aike el 12 el klebliil er a Israel sel lebo ldak el mengull.

123:2​—Ngerang a belkul sel okesiu el kirel a mederir a remesiou? Ngar er ngii a eru el uchul e a remesiou el sechal ma redil a di ultaut a mederir er a chimal a mastang er tir: e le te mo medengei a soal a mastang e dirrek el ngmai a ulekerreu ma ike el lousbech. Kid a uaisei, el omes er a Jehovah me bo dodengelii a soal e nguu a kengei er a ngii.

131:1-3​—Ngmilekerang a David a ‘olleklii a rengul; ua ngalek el chelellakl er a ochil a delal’? A ngalek el mla mechib er a tut a mesuub el mo chelellakl er a ochil a delal, me nguaisei a David a milsuub el mo chelellakl a rengul el “ua ngalek el chelellakl er ochil a delal.” El mekerang? El diak bo lekedidai a rengul ma ka lousimang ma diak losiik a tekoi el chengelakl er a klisichel. A David a mle medengei a chelitechetul me ngulechotii a klengareourreng e dimlak losiik a ngar er a bab el tekoi el kirel. Me ngrolel a llomeserreng a bo doukerebai er a blekerdelel, el ileakl el kirel a ngerachel er a ongdibel.

A Klubeled:

120:1, 2, 6, 7. A otuub ma omelebsochel a sebechel el rulleterir a rechad el mo mekngit a rengrir. A bo dekerekikl er a churad a ta er a rolel e kede olecholt el kmo ‘ngsoad a budech.’

 120:3, 4. A lsekum e ngkired el outekangel er a chad el “cheblad,” e sel dodengei el kmo a Jehovah a mo omeklemalt a tekoi er a temel e ngsebechel el mengelaod er kid. A rechad el oltuub a mo chormii a klisichel a chimorir a “re soldau.” Te mo nguu a meringel el kerrekerilel a Jehovah el ua “kmard el kol!”

127:1, 2. El ngar er a bek el omerelled, e ngkired el osiik er a ulekrael er a Jehovah.

133:1-3. A kltarreng er a rechedal a Jehovah a mengelaod e ungil e melisiich. Ngdiak el kired el melemall er ngii el oeak sel di dosiik a telemellel a chad ma klaititekangel ma omengeremrum.

137:1, 5, 6. A reblebaol el chedal a Jehovah a uluureng er a Sion​—a cheldebechelel a Jehovah el ngar er a chutem er sel taem. E kuk mekerang el kired? Kid, ngblak a rengud el mo er a cheldebechel el lousbech er ngii a Jehovah er a chelecha el taem?

138:2. A Jehovah a “mla ochotii el kmo a ngklel ma tekingel a ngarbab er a bek el tekoi” e le a otutel a rokui el telbilel el oeak a ngklel a chengelakl er aike el tekoi el doureng er ngii. Nguaisei, a meklou el tekoi a mo er ngii er a ngar er a medad el klebesei.

139:1-6, 15, 16. A Jehovah a medengei a omerelled ma uldesued ma tekinged er a uchei er a douchais er ngii. Ngmedengelkid er sera dengar er a delel a delad, er a uchei er a lemeruul a chiuis er a bedenged. A klemedengei er a Jehovah el kired “a kmal mengasireng” me ngdiak a sebechel el mtebengii. Ngkol ua ngera el ongelaod sel dodengei el kmo a Jehovah a diak di lesang a meringel el blekeradel el dengar er a chelsel e lemerekong, e ngdirrek el medengelii a klisichel el kired!

139:7-​12. Ngdiak a basio el kmal cheroid me bo lak el sebechel a Jehovah el smisichid.

139:17, 18. A klemedengei er a Jehovah ngmla meskid a deuil a rengud? (Osisechakl 2:10) A leuaisei, e kid a mla metik er a madedok er a deurreng. A uldesuel a Jehovah a “kuk betok er a chelechol.” Ngdi blechoel el mo er ngii a tekoi el sebeched el mesuub el kirel.

139:23, 24. Ngsoad a Jehovah a bo lorriter er a rengud e ‘lesa ngar er a uldesued’​—el cheleblad el uldasu ma ngibeserreng​—e lengesukid el mo cheroid er ngii.

143:4-7. Kede mekerang e sebeched el outekangel a meringel el blekeradel? Ngike el milluches er a psalm a meskid a kiis: El mo melebedebek a urerel a Jehovah, e mechesang el meruul er a urerel, e meluluuch me lengesukid.

“Modengesii a RUBAK [el Jah], Kau el Renguk!”

A derta er aike el eua el bldeklel a psalm a mengesimer er sel tekoi el kmo bo moldanges er a Jehovah. (Psalm 41:13; 72:19, 20; 89:52; 106:48) E sel ulebongel el bldeklel me ngdirrek el osisiu. A Psalm el 150:6 a kmo: “Moldanges er a RUBAK e rokui el di ngar el bleob! Moldanges er a RUBAK!” Tiang a ulterekokl el mo mera el tekoi el ngar er sel beches el beluulechad er a Dios.

Me chelecha el domes el bedul seikid el ngeltengat el taem, e ngngar er ngii a ungil el uchul me ngkired el mengebkall er ngike el mera el Dios e oldanges er a ngklel. Sel dolatk er a deurreng el dobang e le kede medengelii a Jehovah e ungil a deleuill er kid me ngii, e tiang ngdiak bai lotbechid el mo odengesii el oba klou el omereng el saul, adang uaisei, ngdiak?

[Siasing er a 29 el llel]

A ungil el urerel a Jehovah a kmal mengasireng

[Siasing er a 31 el llel]

A uldesuel a Jehovah a “kuk betok er a chelechol”