Blak a Rengud el Mesiou er a Kristus el King

“Me ngmlar isei e ngiluu a klisiich, ma omengull, ma klisichel omerreder, el kirel me losiou er ngii a re chad er a bek el beluu, ma re bek el bedengir a re chad, ma kakerous el omelekoi.”​—DANIEL 7:14.

1, 2. Kede mekerang e medengei el kmo a Kristus a dimlak lecherrungel el mengedereder er a Renged er a rak er a 33 C.E.?

 TECHA el chad el mengedereder a sebechel el mad el kirir a rechedal e lmuut el mo mengedereder el king? Ngtecha el king a sebechel el kiei er a beluulechad, el omekeroul er a klaumerang ma blakerreng er a rechedal, e uriul e ngmengedereder el ngar er a eanged? A di ta el chad el sebechel el remuul aikang, ma lmuut el betok, a Jesus Kristus. (Lukas 1:32, 33) Sera Pentacost 33 C.E., el uriul er a kodellel a Jesus ma okisel ma ngesechel el mo er a eanged, e a Dios a “rirellii el mo Bedul el ngar bebul a rokuil tekoi el milsa eklesia.” (Efesus 1:20-22; Rellir 2:32-36) Ma leuaisei, a Kristus a ulemuchel el mengedereder engdi ngdimlak el cherrungel el mengedereder. Seikid e ngmlo mengedereder er tirke el ngellitel el Kristiano, el tir a rirellii a Israel er a klereng, el “Israel ra Dios.”​—Galatia 6:16; Kolose 1:13.

² E a bekord el 30 el rak er a uriul er a Pentekost 33 C.E., e a apostol el Paulus a ulterekeklii el kmo a Kristus a dirkak bo lecherrungel a omengederederel er a Renged, engdi ngmle “dengchokl ra kidekmel a Dios, e mengiil el dimerkmo le meruul ar cherrouel el mo deruchellel chochil.” (Hebru 10:12, 13) E sera ulebengelel a kot el dart el rak C.E., e ngike el chudelang el apostol el Johanes a milsa ues el kirel a Jehovah er a lerellii a Kristus Jesus el mo King er a Rengedel el ngar er a eanged. (Chocholt 11:15; 12:1-5) Sel domes a tekoi er a reksi, e ngsebeched el mes a betok el tekoi el olecholt el kmo a Kristus a ulemuchel el mengedereder el ngar er a eanged er a 1914. a

3. (a) Sera 1914 el me er a chelechang, e ngera el beches el tekoi a uldimukl er a ungil el chais er a Renged? (b) Ngera el ker a kired el di kid el oker er kid?

³ Chochoi, sera 1914 el me er a chelechang e a ungil el chais er a Renged a uldimukl er ngii a beches el tekoi. A Kristus a mengedereder el King er a Rengedel a Dios el ngar er a eanged, altang ‘mengedereder er a recherrouel.’ (Psalm 110:1, 2; Matteus 24:14; Chocholt 12:7-12) Ma lmuut el tang, ngar er a beluulechad el rokir e a reblak a rengrir el mesiungel a kongei er a omengederederel, e te olecholt er tiang sel bo lteloi er a ureor el olsisechakl a tekoi er a Biblia. (Daniel 7:13, 14; Matteus 28:18) A rengellitel el Kristiano, el “ngalek ra rengedel a Dios,” a mesiou el ua “odruchel ra Kristus.” E a “ngodech el chermek el sib” a blak a rengrir el oureor el obengterir, el ua oderuchel er a Rengedel a Dios. (Matteus 13:38; 2 Korinth 5:20; Johanes 10:16) Engdi, ngkired el di kid el merritel el kmo a derta er kid kede kongei er a omengederederel a Kristus, ngdiak. Kid ngblak a rengud el mo er ngii? Ngmekera dolecholt er a blakerreng er kid el mo er a King el mengedereder el ngar er a eanged? Engdi, a kot e me bo dosaod er aike el uchul me ngkired el mo blak a rengud el mo er a Kristus.

 A King el Melisiich er a Blakerreng

4. A Jesus, el ngii a Mlengilt el King, ngerang kiltmokl el oeak a omesiungel el ngar er a chutem?

⁴ A blakerreng er kid a mlukeroul el oeak a omereng el saul el kirel aike el bla lruul ma ike el ungil el blekerdelel el dirrek. (1 Petrus 1:8) Sera lengar er a chutem e a Jesus, el ngike el Mlengilt el mo King, a ulechotii er a kekerei el rolel aike el bo loruul er a beluulechad el rokir sel bo letemel a Dios el mo meruul. Ngulemekang er a resongerenger. E ulemekungil er a resmecher ma remeiko ma rechitechut ma remechad ma rebengong. Ngdirrek el ullekiis er a rulekoad. (Matteus 15:30, 31; Lukas 7:11-16; Johanes 6:5-13) Ma lmuut el tang, a klemedengei er kid el kirel a klengar er a Jesus er tia el chutem a ngosukid el mo medengei a blekerdelel sel bo longedereder er a beluulechad​—el tokubets sel bltikerreng er ngii. (Markus 1:40-45) Ma Napoléon Bonaparte a millekoi el kmo: “A Alexander ma Kaiser ma Charlemagne me ngak a milekedechor a remeklou el renged, engdi ngmleketmokl aika el tekoi er a bebul a ngerang? El oeak a klisiich. A Jesus Kristus a kiltmeklii a rengedel el oeak a bltikerreng, e chelecha el taem e te betok el milliol el chad a kongei el mad el kirel.”

5. Ngera uchul ma rechad a mle semeriar er a blekerdelel a Jesus?

⁵ A Jesus a mle medemedemek e ngar er a eou a rengul a uchul, me tirke el mle chelam a rengrir er a mondai er tir a mlo mesisiich el oeak a osisecheklel ma ungil el blekerdelel. (Matteus 11:28-30) A remekekerei el ngalek a dimlak lemedakt er ngii. A rengar er a eou a rengrir el chad a kilengei el mo disciplo er ngii. (Matteus 4:18-22; Markus 10:13-16) Ngmle blechoel el melatk er a rechad e ullecholt er a omengull a uchul ma rebetok el medakt er a Dios el redil a mle blak a rengrir el mo er ngii, e te betok er tir a chiloit a klou el taem ma klisichir ma ike el ngar er ngii er tir el mengetmokl er ngii er a lengar er a omesiungel.​—Lukas 8:1-3.

6. Ngmle ua ngera uldesuel a Jesus er sera lemad a Lazarus?

⁶ A Jesus a kmal mlo mekngit a rengul er sera lemad a sechelil er a Lazarus. Ngdirrek el mlo mekngit a rengul er sera lesa Maria ma Martha el kmal mechemo rengrir me ngmlo diak el sebechel el orreked er a rengul “ma Jesus a lilangel.” “Ngkmal mlo meringel ra rengul el mekngit a rengul,” altang mle medengei el kmo ngmo olekiis er a Lazarus. E sola e a bltkil a rengul ma klechubechub er a Jesus a ultbechii el mo ousbech er sel klisiich el lebilsa Dios el mo okisii a Lazarus.​—Johanes 11:11-15, 33-35, 38-44.

7. Ngera uchul ma blakerreng er kid a ungil el lebo er a Jesus? (Momes er a baks er a 17 el llel.)

⁷ Ngkmal mechas a rengud er a bltikerreng er a Jesus el kirel a llemalt ma kltui er ngii el kirel a blulak ma mekngit. Ngmle bekeu el oldik er tirke el olterau a charm er a templo el eru el taem. (Matteus 21:12, 13; Johanes 2:14-17) Ma lmuut el tang, e sera lengar er tia el chutem e ngchillebangel a betok el bedengel a ongarm, me ngkmal medengei aike el mondai ma ongarm el dechelebangel er ngii. (Hebru 5:7-9) A Jesus a dirrek el mle medengelii a rengelel a bo decharm a klauketui ma diak lemelemalt el tekoi. (Johanes 5:15-18; 11:53, 54; 18:38–19:16) E a uriul, e ngmlad er a mekngit el kodall el oltaut er a soal a rengul a Demal e mesterir a remesiungel a diak a ulebengelel el klengar. (Johanes 3:16) Aika el blekerdelel a Kristus ngdiak lotbechau el mo melemolem el blak a rengum el mesiou er ngii? (Hebru 13:8; Chocholt 5:6-10) Engdi ngerang a kired el meruul er ngii me bo lsebeched el mo mesiungel a Kristus el King?

Aike el Kired el Meruul e Mo Mesiungel a Kristus

8. Ngerang a kirel el meketmokl a lsekum a chad a soal el mo mesiungel a Kristus?

⁸ Ka molatk er tiang: A lsekum ngsoam el mo chad er a kuk ta er a beluu e ngngar er ngii a tekoi el kirem el mo oltirakl. A choua itirka el chad a kirir el ungil a chisir e mesisiich a bedengir. Me ngdi osisiu, a remesiungel a Kristus a kirir el mekedung e mesisiich a klereng er tir.​—1 Korinth 6:9-11; Galatia 5:19-23.

9. Ngmekerang a dolecholt el kmo kid a blak a rengud er a Kristus?

⁹ E a Jesus Kristus a dirrek el soal a remesiungel a bo leblak a rengrir el mo er ngii ma Rengedel. Te olecholt er a choua itia el blakerreng sel lekiei el oltirakl a tekoi el lullisechakl ngika el Mlengilt el King er sera lengar er tia el chutem. El ua itiang,  te ngmai a tekoi er a Renged ma soal a Dios el mo ngar er a uchei er a tekoi er a kerruul. (Matteus 6:31-34) Te dirrek el melasem el olecholt er a blekerdelel a Kristus, el mo lmuut er a chelsel a kmal meringel el odechelakl. (1 Petrus 2:21-23) Ma lmuut el tang, a remesiungel a Kristus a oltirakl er a kerebil el melasem el meruul a ungil el mo er a rebebil.​—Matteus 7:12; Johanes 13:3-17.

10. Ngmekerang e a blakerreng el mo er a Kristus a mocholt er a (a) chelsel a telungalek ma (b) chelsel a ongdibel?

¹⁰ A rultirakl er a Jesus a dirrek el olecholt er a blakerreng el mo er ngii sel lolecholt aika el blekeradel er a chelsel a telungalek er tir. El ua itiang, a rebechiil el sechal a olecholt er a blakerreng er tir el mo er a King er tir sel lolecholt er a ungil el blekerdelir el mo er a rebecherir ma rengelekir el ua blekerdelel a Kristus. (Efesus 5:25, 28-30; 6:4; 1 Petrus 3:7) A rebechiil el redil a olecholt er a blakerreng er tir er a Kristus el oeak a klikiid el blekerdelir ma “medemedemek e chelellakl reng.” (1 Petrus 3:1-4; Efesus 5:22-24) A rengalek a blak a rengrir el mo er a Kristus sel loltirakl er a blekongesenges er ngii. Sera lengeasek, e a Jesus a ullengesenges er a demal ma delal, alta e te dimlak lemecherrungel. (Lukas 2:51, 52; Efesus 6:1) A remesiungel a Kristus a blak a rengrir el outekangel el oltirakl er ngii sel ‘loruul a rengrir el rokui el mo tang’ e ‘lebetik a rengrir ra rudam.’ Te melasem el mo ua Kristus, el ‘ngariou a rengul.’ E diak lolab ‘a mekngit el omtechei a mekngit ma lechub e lolekoi a mekngit el lomtechei a mekngit lomelekoi.’​—1 Petrus 3:8, 9; 1 Korinth 11:1.

A Remesiungel a Kristus a Oltirakl er a Llechul

11. A remesiungel a Kristus te oltirakl er a ngera el llach?

¹¹ El ua rechad el sorir el mo chad er a kuk ta er a beluu a kirir el oltirakl er a llach er seikid el beluu, ma remesiungel a Kristus a kirir el oltirakl er a “llach ra Kristus” e kiei el oltirakl er a rokui el osisecheklel ma llechul a Jesus. (Galatia 6:2) E kirir el kmal blak a rengrir el oltirakl er a “kebkall el llach” er a bltikerreng. (Jakobus 2:8) Ngerang a uldimukl er aika el llach?

12, 13. Ngmekerang a bo leblak a rengud el oltirakl er a “llach ra Kristus”?

¹² A remesiungel a Kristus a diak lemecherrungel e ngar er ngii a chelitecheterir. (Rom 3:23) Sei a uchul me ngkirir el melemolem el omekeroul er a “diak a cheleblad er ngii el bltikerreng ra klaodam” me bo ‘ldul mekeald a rengrir el kaubltikerreng.’ (1 Petrus 1:22) E a ‘lengarngii a klaotutakl ra delongelir,’ e a Rekristiano a blak a rengrir el oltaut er a llechul a Kristus el mo ‘kaberekakl a chetirir rar chad.’ A loltirakl er tia el llach a ngosuterir el omes el chengelakl er a chelitecheterir e osiik er a uchul me lolecholt er a bltikerreng. Kau ke oba omereng el saul sel omobengterir tirke el blak a rengrir el mo er a King er kid e omail er tir er a bltikerreng, el “chochull el mengerrungel”?​—Kolose 3:13, 14.

 ¹³ Ma lmuut el tang, a Jesus a milsaod el kmo sel bltikerreng el lulechotii a lmuut el klou er sel bltikerreng el lolecholt er ngii a rechad. (Johanes 13:34, 35) A lsekum e kede oubltikerreng el di mo er tirke el betik a rengrir er kid e tiang a diak el “ngarbab el tekoi cho mrellii.” A bo leuaisei e a bltikerreng er kid a mo diak a ultutelel. A Jesus a milengelechel er kid el mo oltirakl er a bltikerreng er a Demal el mo betik a rengud er a recherroued el tir a ouketui e oldechelakl er kid. (Matteus 5:46-48) Tia el bltikerreng a dirrek el melisiich er a rechedal a Renged el mo blak a rengrir el outekangel er a urerir. Er a ngera el ureor?

A Blakerreng er a Rechedal a Kristus a Measem

14. Ngera uchul me ngklou a ultutelel a ureor er a berkel a klumech?

¹⁴ A rechedal a Rengedel a Dios a ngar er ngii a klou el urerir el “lolecholt ra rengedel a Dios.” (Rellir 28:23) Ngkirir el meruul el uaisei e le sel Rengedel a Messias a mo mesebechakl er a omengederederel a Jehovah er a eanged ma chutem. (1 Korinth 15:24-28) Me sel domerk er a ungil el chais, e tirke el orrenges a ngar er ngii a techellir el mo chedal a Rengedel a Dios. Ma dirrek, a Kristus el King a sebechel el ousbech er a nger er tir el kirel a ungil el chais el oukerrekeriil er a klechad. (Matteus 24:14; 2 Thesalonika 1:6-10) Ma leuaisei, e sel kot el ungil el rolel a dolecholt el kmo ngblak a rengud el mo er a Kristus a oeak sel dolengesenges er a omellach er ngii el mo ouchais er a rechad el kirel a Renged.​—Matteus 28:18-20.

15. Ngera uchul ma blakerreng er a Rekristiano a measem?

¹⁵ Chochoi, a Satan a omtok er a ureor er a berkel a klumech er a ngii di el rolel el sebechel, ma remerreder er a rechad a diak lekengei er a omerredelel a Kristus el lengiluu er a Dios. (Psalm 2:1-3, 6-8) Seikid a uchul ma Jesus a ulemeklatk er a redisciplo er ngii el kmo: “A mesiou a diak le bor bab ra rubak er ngii. A lsekum toldechelakl er ngak, e toldechelakl er kemiu.” (Johanes 15:20) Ma rultirakl er a Kristus a mo er a chelsel tia el klaumekemad er a klereng el ngii a melasem er a blakerreng er tir.​—2 Korinth 10:3-5; Efesus 6:10-12.

16. A rechedal a Renged te mekerang a lengai a ‘kloklel a Dios el mo er a Dios’?

¹⁶ Nguaisei, a rechedal a Rengedel a Dios a melemolem el blak a rengrir el mo er a diak lemeues el King er tir e a osisiu el taem e te mengull er tirke el olab a dereder er a klechad. (Titus 3:1, 2) A Jesus a dilu el kmo: “A kloklel a kaiser le bora kaiser, ma kloklel a Dios le bora Dios.” (Markus 12:13-17) Ma leuaisei, e a rechedal a Kristus a oltirakl a llach er a kabelment el ngii a diak lomtok er a llechul a Dios. (Rom 13:1-7) Engdi, sel ngar er a bab el kort er a Rechijudea er a lomtok er a llechul a Dios el mellach er a redisciplo er a Jesus me lak lomerk er a klumech, e te dimlak lemedakt el melekoi el kmo ngkirir “loltirakl ra Dios ra bai doltirakl rar chad.”​—Rellir 1:8; 5:27-32.

17. Ngera uchul me ngsebeched el outekangel a omengarm er a blakerreng er kid el oeak a blekeurreng?

¹⁷ Chochoi, a rechedal a Kristus a ousbech er a blekeurreng el melemolem el blak a rengrir el mo er a King er tir er a eungel a odechelakl. Engdi, a Jesus a dilu el kmo: “Kom ngeltengat ar chad a loltuub er kemiu el kirek, el oldechelakl er kemiu e lolekoi a bek el blekeradel el mekngit el bedul kemiu el di klsuul. Moldeu, e lodeu a rengmiu, e ngklou chomeksaul el bo mnguu era eanged.” (Matteus 5:11, 12) Tirke el uleltirakl er a Jesus er a kot el uchul a mlo medengei a belkul aike el tekoi. El mo lmuut er sera lemodechelakl el kirel a urerir el omerk er a Renged, e ngdileu a rengrir “ele ngmlo sebechir lobasech el motuub ra ngklel a Jesus. E mle bek el sils el lolisechakl ra templo ma blai, el dimlak le meterob lomerk el kmo a Jesus a Kristus.” (Rellir 5:41, 42) Aki kmal chemat er kemiu el olecholt er a uaisei  el blakerreng el outekangel a ringel ma secher ma chelebuul ma ultok.​—Rom 5:3-5; Hebru 13:6.

18. A tekingel a Jesus el mo er a Pontius Pilatus ngngolecholt er a ngerang?

¹⁸ Uchei er a lebo el King, e a Jesus a dilu er a Kobernor er a Rom el Pontius Pilatus el kmo: “A rengedek a diak le ngar tial belulechad; le kmo rengedek a ngar tial belulechad, e ar chederdellek chokoad, me ngdiak kbora chimorir ar Chijudea; ngdi rengedek a diak le ngar tial belulechad.” (Johanes 18:36) Ma leuaisei, e a rechedal sel Renged er a eanged a diak loumekemad er a ngii di el chad ma ka lebo er a bitang ma ka lebitang el kakoad. Me te olecholt er a blakerreng er tir el mo er a “King er a Budech” a lak bo leteloi er a ngii di el tekoi er tia el beluulechad.​—Isaia 2:2-4; 9:6, 7.

A Diak a Ulebengelel el Klungiaol el mo er a Reblak a Rengrir el Chedal

19. Ngera uchul ma rechedal a Kristus a sebechir el omes el beduluchei el oba ulterekokl el reng?

¹⁹ A reblak a rengrir el chedal a Kristus, el ngii a ‘King rar king,’ a ulterekokl a rengrir el omes el beduluchei. Te kmal mengiil er sel taem el ngii a mo olecholt er a klisichel a kleking er ngii el mo er a chutem. (Chocholt 19:11–20:3; Matteus 24:30) Me tirke el medechel el blak a rengrir el ngellitel el “ngalek ra rengedel a Dios” a omes el beduluchei el kirel a dikesir el mo king el obengkel a Kristus el ngar er a eanged. (Matteus 13:38; Lukas 12:32) Ma ‘rengodech el cheremel’ a Kristus el sib a dirrek el mengiil er a King er tir sel bo ledu el kmo: “Mei, kemiu el mlukngeltengat ra Demak, mo mediukes ra rengedel a Dios el mlekedmokl el kiriu era uchelel a belulechad.” (Johanes 10:16; Matteus 25:34) Ma leuaisei, e a rokui el chedal a Renged a kirir el melemolem el blak a rengrir el mesiou er a Kristus el King.

[Footnote]

Ngsebechem el Mesaod?

• Ngera uchul ma blakerreng er kid a kirel el mo er a Kristus?

• A rechedal a Kristus te mekerang e olecholt er a blakerreng er tir el mo er ngii?

• Ngera uchul me ngsoad el mo blak a rengud el mo er a Kristus el King?

[Aike el Ker er a Suobel]

[Baks er a 17 el llel]

A LMUUT EL BEBIL ER A MEKLOU EL BLEKERDELEL A KRISTUS

Diak el longetukel er a rechad​—Johanes 4:7-30.

Chubechubechad​—Matteus 9:35-38; 12:18-21; Markus 6:30-34.

Diak longreos el bltikerreng​—Johanes 13:1; 15:12-15.

Blakerreng​—Matteus 4:1-11; 28:20; Markus 11:15-18.

Melatk a reng​—Markus 7:32-35; Lukas 7:11-15; Hebru 4:15, 16.

Ulserechakl el reng​—Matteus 15:21-28.

[Siasing er a 15 el llel]

Sel dolecholt er a bltikerreng el mo er a rechad, e kede olecholt el kmo kede oltirakl er a “llach ra Kristus”

[Siasing er a 17 el llel]

A blekerdelel a Kristus ngrullau el mo blak a rengum el mesiou er ngii?