Kau Ke Kltmokl el Kirel a Osobel?

“Bo mdiderekl er a diall kau ma rokui el chad er a telungalek er kau; ele kmla metik er kau el di kau el tang er a delongelir tirkal chad el ungil er a renguk.”​—GENESIS 7:1.

1. Ngera el tekoi el kirel a osobel a lerirellii a Jehovah er a taem er a Noah?

 A JEHOVAH “lilia eeleb er ngiil diak loluu ra Dios el belulechad” er a taem er a Noah, e dirrek el kiltmeklii a rolel a osobel. (2 Petrus 2:5) A mera el Dios a milsa melemalt el Noah a bleketakl el ulekrael er a rolel a bo loleketek er a arhe el mo olsobel a klengar er a ieleb el mochu er ngii er a chutem el rokir. (Genesis 6:14-16) E le ngii el kmal bekongesenges el mesiungel a Jehovah a uchul, “ma Noah a riruul a rokui el tekoi el le dilu er ngii a Dios.” Chochoi, ‘ngmirruul el uaisei.’ Tiaikid el blekongesenges er a Noah a ta er a uchul e kede chad er a chelecha el taem.​—Genesis 6:22.

2, 3. (a) A rechad er a taem er a Noah, ngmle ua ngera osengir er a urerel a Noah? (b) Ngera el ulterekokl el reng a luleba Noah el mo soiseb er a arhe?

² A omeleketek er a arhe a dimlak lebeot el ureor. Me ngulterekokl a rebetok el chad a mlo mechas a rengrir er a urerel a Noah ma telungalek er ngii. Me nguaisei engdi tia dimlak lerelleterir el mo oumerang el kmo a bo lsobel e ngkirir el mo soiseb er a arhe. A taem a mlei, e a kllourreng er a Dios el kirel sel mekngit el beluulechad a mlo tmurk.​—Genesis 6:3; 1 Petrus 3:20.

³ A betok el rak er a uriul er a meringel el urerel a Noah ma telungalek er ngii, e a Jehovah a dilu er a Noah el kmo: “Bo mdiderekl er a diall kau ma rokui el chad er a telungalek er kau; ele kmla metik er kau el di kau el tang er a delongelir tirkal chad el ungil er a renguk.” A klaumerang er ngii er a tekingel a Jehovah a uchul ma Noah “ma bechil ma re ngelekel ma re becherir a chiliis er a eeleb el mor a diall.” A Jehovah a chilsmerii a chesimer el omekerreu er a rechedal. Me sera lemei a ieleb er a bebul a chutem, e a arhe a mle uchul a osobel el mla er a Dios el mei.​—Genesis 7:1 10, 16.

 A Blekeradel er a Chelechang el Di ua Taem er a Noah

4, 5. (a) A Jesus ngulemekesiu er a demiel el mo er a ngerang? (b) Ngera el osisiu el blekeradel a ngar er ngii er a taem er a Noah ma taem er kid?

⁴ “Le be ldum a Ngelekel a chad e ngua sel taem ra Noah.” (Matteus 24:37) A Jesus a uluusbech aika el tekoi el omeketakl el kmo a taem el be lduum a mo ua ike el sils er a Noah, e tia kmal klemerang. E le sera 1919 el mei, e a uleklatk el di ua sel lullekoi er ngii a Noah a mla muchais el mo er a rechad er a bek el renged. Me nguaisei, e a blekerdelir a di ua blekerdelir a rechad er a taem er a Noah.

⁵ A Jehovah uluusbech er a Ieleb el mo okngemedii a beluulechad el “mio er a mekngit el omerellir.” (Genesis 6:13) Ngmle bleketakl er a rokui el chad el milsterir el kmo a Noah ma telungalek er ngii a mle mechesang el meruul er a arhe me ngdimlak el obengterir a rechad el meruul a mekngit. Kede mesang a osisiu el blekeradel er a chelechang. A rechad a sebechir el “mesa klekakerous er a melemalt ma chebirukel chad, ma klekakerous er a chad el mesiou er ngak ma chad el diak losiou er ngak.” (Malakai 3:18) A Resioning er a Jehovah a kmal honest, e bekokuii, e chad er a budech e blak a rengrir, e a rechad a chemat er tir e le tir el kuk ngodech er a rechad er a beluulechad. A Resioning a ouketui a rokui el kdekudel el omeruul e bai mecherei a reng er a Jehovah me ngomekrael er tir. Sei a uchul me te mla mukngeltengat er a budech e oltirakl er a melemalt el rael.​—Isaia 60:17.

6, 7. (a) Ngera el tekoi a dimlak lutebengii a rechad er a taem er a Noah, e tiang mekerang e sebechel el mo osisiu er a chelechang? (b) Ngera el okesiu a olecholt el kmo a Resioning er a Jehovah a ngodech a blekerdelir er a rebek el chad?

⁶ A rechad er a taem er a Noah a dimlak lolechesuar el kmo a Dios a omekerreu er ngii e le ngii el uleltirakl a tekingel. Me ngdimlak lorrenges er sel uleklatk ma ka luleltaut er ngii. E kuk ua ngerang er a chelechang? A rebetok el chad alta e te chemat er a urerir ma blekerdelir a Resioning er a Jehovah, engdi oumesingd er tir a diak lomekerreu er a uleklatk er a Biblia. A rengar er a bita er tir ma remerredelir er a ureor ma rechederir alta e te chemat er a ungil el blekerdelir tirka el mera el Kristiano engdi te melekoi el kmo, “Oleko te diak le Sioning er a Jehovah e te bai kuk bebil er a rechad!” Tirka el chad a diak lesa el kmo a Resioning a olecholt choua ika el blekeradel el bltikerreng ma budech ma blekokuii ma ungilreng ma delemedemek ma chomengerem e le chedaol el reng er a Dios a omekrael er tir. (Galatia 5:22-25) Tia dirrek el ta er a uchul e a rechad a kirir el oumerang er a klumech el omerk er ngii.

⁷ El di ua itiang, el ngar er a beluu er a Rosia, e a Resioning er a Jehovah a ulemekedechor er a Kingdom Hall. A chad a mlong el  mengedecheduch er a ta er a chad er a ureor el dilu el kmo: “Tia mera el ngodech a blekeradel er ngii el basio er a ureor er a construction e le ngdiak a omeloko el dekool ma diak a omelius ma diak a cheltelaol er ngii! Kemiu kom Sioning er a Jehovah?” Me ngika el oureor a uleker er ngii el kmo, “Oleko ak dmu er kau el kmo ngdiak e ke mo oumerang er ngak?” Me ngii el chad a mle mereched el onger el kmo, “Ngkmal diak.” Ngar er a kuk ta er a mats er a beluu er a Rosia, e a mayor a mera el mlo mechas a rengul er a leseterir a Resioning el mocha merekui er a beches el Kingdom Hall er tir. Ngulemdasu el kmo aike el cheldebechel er a bek el klechelid a di osisiu a blekerdelir, engdi uriul er a lomes er a Resioning er a Jehovah el ta rengrir el dmak el oureor, e ngdikea lomdasu el uaisei. Aikang a kuk di bebil er a okesiu el olecholt el kmo a remesiungel a Jehovah a ngodech a blekerdelir er a rechad el tir a diak loltirakl a llach er a Biblia.

8. Ngultuil er a ngerang a osobeled er a telemellel tia el mekngit el beluulechad?

⁸ Ngar er a chelsel sel ulebongel el taem er “sel dimla belulechad” el miltemall er a Ieleb, e a Noah a mle blak a rengul el “omerk ra llemalt.” (2 Petrus 2:5) E ngar er aika el uriul el sils er tia el mekngit el blekeradel er a beluulechad, e a rechedal a Jehovah a olecholt a melemalt el llechul a Dios e omerk er a ungil el chais el kirel a osobel el mo soiseb er a beches el beluulechad. (2 Petrus 3:9-13) El di ua Noah ma telungalek er ngii el milluu er a Dios me te silobel, me nguaisei, a klaumerang er a derta el chad me tir el obengkel a cheldebechellel a Jehovah el ngar er a chutem a mo uchul a osobelir.

A Osobel a Ultuil er a Klaumerang

9, 10. Ngera uchul me ngusbechall a klaumerang a lsekum e kede mo suobel er a telemellel tia el blekeradel er a Satan?

⁹ A chad ngmo mekerang a lsekum e ngmo suobel er tia el merekung el telemellel a beluulechad el chederedall er a klisichel a Satan? (1 Johanes 5:19) A kot e ngkirel el mo medengei el kmo ngousbech er a ngera el ulekerreu. E sola e mo ousbech er ngii el ulekerreu. A rechad er a taem er a Noah a mle mechesang er a klengar er a bek el sils me ngdimlak lesa el kmo te mo ousbech er a ulekerreu el kirel a merekung el tellemall. Ngdirrek el dimlak lobang a ta er a tekoi, el ngii a klaumerang er a Dios.

¹⁰ Sel kuk domes er a Noah ma telungalek er ngii, e te mle medengei el kmo te ousbech er a ulekerreu ma osobel. Te dirrek el ullecholt a klaumerang er tir el mo er ngike el Merredel er a eanged ma chutem, el Jehovah el Dios. A Paulus a milluches el kmo: “Ma lak a kloumerang e ngdiak el sebechel mo dmeu a rengul a Dios, ele tirikel sorir lolekeed er tir er ngii a diak le iit loumera el kmo ngngarngii a Dios, e dirrek loumera el kmo tirikel osiik er ngii a le besterir a chomeksulir.” A Paulus a dilechelir el kmo: “A kloumera uchul ma Noah ngiluu a sbedel a Dios el kirel a ikel tekoi el diak le ues, e mlengull er ngii e meruul ra Arhe el kirel me le mosobel ar chad ra blil; me nguleak ngiil kloumerang el ulemlals a kngtil a belulechad, e mlo oudiukes ra llemalt el kloumera uchul.”​—Hebru 11:6, 7.

11. Ngera klubeled er a rolel a Jehovah a lolsobel er a rechad er a irechar?

¹¹ A bo desobel er a telemellel tia el mekngit el blekeradel, e ngkired el meruul a lmuut el betok er a di doumerang el kmo ngmo metemall e merekong. Ngkired el otuil a klaumera er kid er aike el sengk er a Jehovah el kirel a osobel e mo mui el ousbech er ngii. Chochoi,  ngkired el oumerang er a olubet el tengetengel a Ngelekel a Dios, el Jesus Kristus. (Johanes 3:16, 36) Engdi ngkired el melatk el kmo ngdi tirke el mlo soiseb er a arhe er a Noah a silobel er a Ieleb. Ngdirrek el uaisei, el ike el beluu er a osebechakl er a Israel er a irechar a mle kirel el osebecheklel ngike el dimlak ledurengul el omekoad a lsekum e ngmo soiseb er ngii e lekiei er isei el mo er sel lemad a ngar er a bab el priist. (Ulecherangel 35:11-32) Ngar er sel ongeteruich el ringel el mlo er a Egipten er a taem er a Moses, e a rekot el ngelekir a Rechad er a Egipten a mlad, engdi rengelekir a Rechad er a Israel a silobel. E le ngera uchul? A Jehovah a dilu er a Moses el kmo: “Isei e te [a Rechad er a Israel] mo ngmai a bebil er a rasech [er a ngelekel a sib er a Baskua] el chosberberii a chelseklel a tuangel ma bebul a tuangel er a ikel blai el bo longa ikel charm er ngii. Kom nguu a rechelel a hisob, e dilechii er a rasech el ngar a delluchel belatong, e chosberberii a chelseklel ma bebul a tuangel. . . . Ng diak a tar kemiu el mo tuobed er a blil el dimerkmo bo le tutau.” (Exodus 12:7, 22) E omomdasu e ngtecha er a rekot el ngalek er a rechad er a Israel a mle bekeu el okor a tekingel a Dios e mlo tuobed er a blai el chelsbereber a chelseklel ma tungelel er a rasech?

12. Ngera el ker a kired el di kid el oker er kid, e ngera uchul?

¹² Misei e ngkired el mo chelellakl e melebedebek er a di blekerdeled er a chelechang. Kid kede mera el ngar er a chelsel sel bla leketmeklii a Jehovah el kirel a ulekerreu er a klereng? E le sel lemei a klou el ringel, e a chiuosech er a deurreng ma omereng el saul a mo omaoch er a mederir tirke el chad el ulsiik er a choua itia el rolel a ulekerreu. E a rekuk bebil a mo lmangel er a klengiterreng e ouuchel a rengrir.

Omelodech el Mengetmokl er Kid

13. (a) Aike el omelodech er a cheldebecheled ngngera ngmla remuul? (b) Mosaod a bebil er aike el omelodech el mleketmokl.

¹³ A Jehovah a mekekokil el melodech a blekeradel er a cheldebechellel el ngar er a chutem. Aikang a mlo uchul a klebkellel e mlo omtebechel e mellisiich er sel oketmeklel el kirel a ulekerreuid er a klereng. E sera 1870 el mo tmurk er a 1932, e a rechad er a ongdibel a mle sengkio el melilt er a remechuodel ma rediakon el mo oungerachel. E sera 1932 e tirke el mlengilt el oeak a sengkio el mechuodel a mlutechei er a service committee el mlengilt er a ongdibel el mo olengeseu er a mlengilt el service director. E sera 1938, e a rolel a omelilt er a rokui el mechuodel er a ongdibel a merruul el oltirakl er a ulekrael er a Dios. E sera 1972 el me er a chelechang, el ngar er a eungel a ulekrael er a Governing Body er a Resioning er a Jehovah el oltirakl er a rolel a Dios, e a ngklir a rechad el kirel a ngerachel a meketmokl ma ongdibel a ngmai a babier el lolterekokl er tirke el mla metutk el mo elder ma reministerial servant. A cherengel a taem, e a ngerechelel a Governing Body a mengal el mla mo klou ma betok el omelodech a mla meketmokl el mo ngosuir er a urerel.

14. Ngera el program er a osisechakl a ulemuchel er a 1959?

¹⁴ Sera 1950 e a omerritel er a Psalm 45:16 a mlo uchul a program el kirel a osisechakl. Sel bades a kmo: “Kau el king er ngak a mo betok a re ngelekem el sechal el mo omtechei er a ruchelir, me ke mo rulleterir el mo merreder er a beluulechad el rokir.” A remechuodel el mengetakl er a ongdibel a lolsisechakl er tir el kirel a  urerel a Dios el ruoll er a chelechang ma uriul er a Armageddon. (Chocholt 16:14, 16) A Kingdom Ministry Skuul a mlo omuchel er a 1959. Ngar er seikid el taem, e ngmla er ngii a skuul el ta el buil a klemengetel el olsisechakl er a remesiou er a ongdibel, el omekedong er tir er a chelechang el kmo presiding overseer. Tia el skuul a mla mo klou el mo olsisechakl er a rokui el mechuodel ma reministerial servant. E a uriul, e tirkaikid el odam a mo olsisechakl er a derta el Sioning er a Jehovah el ngar er aike el ongdibel er tir. Iseikid, e a rebek el chad a mongeseu er a tekoi er a klereng ma rolel a bo lemeduch el omerk er a ungil el chais er a Renged el ngar er a omesiungir.​—Markus 13:10.

15. Ngerang a eru el rolel e a ongdibel er a Rekristiano a melemolem el klikiid?

¹⁵ A derta el chad el sorir el mo teloi er a ongdibel er a Rekristiano a kirir el mo oltaut a bebil el tekoi er a klengar er tir. Me nguaisei, e a remelenguul el chad a diak be lsiseb, el di ua itirke el chad el dimlak bo lsiseb er a arhe er a Noah. (2 Petrus 3:3-7) E sera 1952 el mei, e a Resioning er a Jehovah a omekerreu er a ongdibel sel losuld a ngklir tirke el chad el tir a diak lobult er a kngterir el melisiich er a mla meketmokl el tekoi. Me nguaisei, engdi a lsekum a chad a mera el olecholt er a beltel a reng e ngmongeseu el ‘meruul a melemalt el rolir.’​—Hebru 12:12, 13; Osisechakl 28:13; Galatia 6:1.

16. Ngua ngerang a blekerdelel a klereng er a rechedal a Jehovah?

¹⁶ Ngdiak lemechas a rengud er a ungil el blekerdelir a rechedal a Jehovah er a klereng ma ka lsebechel el di ngii el duubech. El oeak a profet el Isaia, e a Jehovah a kmo: “Mak uuchais er kemiu el kmo tirkel mengull el meluluuch er ngak e olengesenges er ngak a mo betok a kelir ma imelir, e kemiu a mo songerenger e meched a rengmiu. Ng mo ungil a rengrir, e kemiu a mo merur. Te mo mengitakl er a deurreng, e kemiu a mo lmangel el chelam a rengmiu.” (Isaia 65:13, 14) A Jehovah a melemolem el omeskid a olsibes el ungil el kall er a klereng er a telutk el blsechel el melisiich er kid er a tekoi er a klereng.​—Matteus 24:45.

Bo Mkltmokl el Kirel a Osobel

17. Ngera el okedong a kmedu el mo er a rechedal a Jehovah, e tiang ngrullid el mo soad el mekerang?

¹⁷ Chelechang, el kuk lmuut el orechudel er a mong, e ngmla mo taem el “bo de kasisiich el omekses a bltikerreng ma ungil lomeruul, e lak de ua blekerdelir a bebil rar chad el mengoit chongdibel er kid, e bai de kachelechel me de mengal mo uaisei.” (Hebru 10:23-25) Ma bo deteloi er a ureor el obengkel a ta er aike el kuk betok er a 98,000 el ongdibel er a Resioning er a Jehovah e ngmo ngosukid el kltmokl el kirel a osobeled. Kede kaingeseu kid ma rekldemed er a klaumerang el outekangel el olecholt “er ngikel beches el chad” e mo er sel tkurrebab el klisiched el ngosuterir a rebebil el mesuub el kirel sel sengk er a Jehovah el kirel a osobel.​—Efesus 4:22-24; Kolose 3:9, 10; 1 Timoteus 4:16.

18. Ngera uchul me ngulterekokl a rengum el mo kiei er a chelsel a ongdibel er a Rekristiano?

¹⁸ A Satan me tia el mekngit el beluulechad er ngii a mengesuseu er kid el mo cheroid er a ongdibel er a Rekristiano. Engdi kid a sebeched el di kiei er a chelsel e mo suobel er a telemellel tia el mekngit el blekeradel. A bltikerreng er a Jehovah ma omereng el saul er kid el kirel aike el sengk er ngii a lerellid el mengal el mo mesisiich el omtok er a Satan. Ma dolebedebek el kirel aike el klengeltengat el dolab er a chelechang a dirrek el melisiich er kid. A bebil er aika el klengeltengat a bo dosaod er a ongingil el suobel.

Ngerang a Nger er Kau?

• Ngmekerang e a taem er kid a di ua taem er a Noah?

• Ngera el blekeradel a usbechall el kirel a osobel?

• A Jehovah ngngera el omelodech a bla leketmeklii el kirel a osobeled?

• Ma derta er kid, kede mekerang e kutmeklid el kirel a osobel?

[Aike el Ker er a Suobel]

[Siasing er a 18 el llel]

A rechad er a taem er a Noah a dimlak lorrenges er ngii

[Siasing er a 19 el llel]

Ngungil a bo dorrenges a uleklatk er a Dios

[Siasing er a 20 el llel]

Ngerang a moktek er a Kingdom Ministry Skuul?

[Siasing er a 21 el llel]

Chelechang e ngkired el mo kmeed er a ongdibel er a Rekristiano