Rutechii a Rengul a Ngalek

NGMLA ta lebo lemekngit a rengum e le ke milsa ngalek el ousekool a klekool er a mekemad? Choua ika el blekeradel a loruul a rengalek er a bek el sils, e le kdekudel el omeruul a mla soiseb er a bek el bedengel a tekoi er a omilil. Ke mekerang e ngosuir a ngalek el mo mtechir a omotsia er a mekemad el mo omotsia er a budech? A Waltraud, el meketeketa el missionari er a Resioning er a Jehovah el ngar er a beluu er a Africa, a miltik er a rolel el ngosuir a ta el buik el mo meruul el uaisei.

A mekemad a uchul, ma Waltraud a mle kirel el tuobed er sel beluu el lekiei er ngii e melukl el mo er a ta er a beluu er a Africa. Ngar er isei e ngmlo mesuub er a Biblia el obengkel a redil el ngar er ngii a ngelekel el sechal el eim a rekil. Sel lebong, e ngika el buik a blechoel el oba di chimo el omotsia er ngii el boes el rruul er a plastic. A Waltraud a dimlak a ta lesang el oba bosel el bedul a ngii di el ngerang, e ngbai di mle blechoel el mesang el melechesech er ngii.

A Waltraud a dilu er ngika el buik el kmo: “Werner, ke medengelii a uchul ma kkiei er a beluam? A mekemad a uchul​—me ngmle kirek el chemiis er a remekngit el chad el tir a blechoel el omoes er a rechad el olab a boes el di ua itilecha el bosem. Omomdasu e ngungil a domoes er a rechad?”

Ngkora mle mekikngit a rengul e ulenger el kmo: “Ngdiak.”

A Waltraud a dilu er ngii el kmo: “Ngmera el tekoi.” E sola e uleker er ngii el kmo: “Ke medengelii a uchul ma kuldingel er kau ma delam er a bek el sandei? E le Resioning er a Jehovah a sorir el ngosuterir a rechad el mo oba budech er a delongelir, tir ma Dios ma rengar er a bita er tir.” Ngngiluu a kengei er a delal, e sola e a Waltraud a dilu er a Werner el kmo: “A lsekum e ke meskak a bosem, e ak mo choitii, e mo meskau a torak el ngar er ngii a kleua el ochil.”

Ma Werner a ngiluu a boes el msang. Ngmilengiil el eua el sandei, e sola e ngiluu a beches el omotsia er ngii​—ngmera el mlo ungil a rengul er a lenguu a torak er ngii el rruul er a kerrekar.

Kau ke mengoit a taem el mengedecheduch er a rengelekem, el melasem el remutech a rengrir me bo lsebechir el chemoit a kloklir el omotsia er a mekemad? A omoruul el uaisei, e ke osisecheklterir er a tekoi el ngii a mo uchul a klungiolir el mo er a diak a ulebengelel el taem.