A Dios a Omekerreu er a Remechuodel

CHELECHA el taem el kmal klou a ongarm el mo er a remechuodel e kmal diak el kirel el mechas a rengud. A Biblia er a ngar er a mo el taem a ulemlaoch el kmo a “uriul sils” er tia el mekngit el blekerdelel a beluulechad, e a rechad a mo “betik a rengrir ra di tir, . . . e diak le chubechub.” (2 Timoteus 3:1-3) A tekoi er a Grik el mloiuid el kmo “diak le chubechub” a uldimukl er ngii sel bltikerreng el ngar er a delongelir a rechad er a telungalek. El di ua lulemlaoch a Biblia, chelecha el taem e tiaikid el bltikerreng a diak desang.

A Jehovah el Dios a kmal melatk e dirrek el omekerreu er a remechuodel, el diak leua itirke el chad el omekcharm er tir. Ka me bo desang sel rolel el olecholt er ngii a Biblia.

“Osebecheklir a Re Melakl Dil”

A ulekerreuil a Jehovah el mo er a remechuodel a kmal bleketakl el ngar er a Chuodel el Renged. El ua itiang, el ngar er a Psalm 68:5, e a David a omekedong er a Dios el kmo, “osebecheklir a re melakl dil,” e le oumesingd er tir a chudelang. a Me ngbleketakl el kmo a Jehovah a kerekikl er a remellakl el dil. Nguaisei, a Biblia a dmu el kmo ngmo kesib a rengul a lsekum e te meruul a mekngit el mo er tir. (Exodus 22:22-24) A remellakl el dil​—ma rokui el blak a rengrir el chudelang el chad​—a kmal mekreos er a rengul a Jehovah ma dirrek a remesiungel. A Osisechakl 16:31 a ochotii a uldesuel a Jehovah ma rechedal el kmo: “A kemanget el klengar a omeksullel a melemalt el chad, ma cheball el chui a krone er a klebkall.”

Ngdiak lemechas a rengud er tia el kmo, a omengull el mo er a remechuodel a ta er a uchetemel a Llach el Jehovah a milsterir a Rengalek  er a Israel. Te mluklatk el kmo: “Mocholt omengull er kemiu el bedul a re mechuodel e mongull er tir. ele kom meluu er ngak. Ngak a RUBAK.” (Levitikus 19:32) Sei a uchul ma omengull el mo er a remechuodel er a beluu er a Israel a mle delibuk er sel deleongel er tir ma Jehovah el Dios. A chad a diak el sebechel el melekoi el kmo ngbetik a rengul er a Dios a lsekum e ngmekngit a omerellel el mo er a remechuodel.

A Rekristiano a diak lengar er a eungel a Llach er a Moses. Engdi, te ngar er a eungel “a llach ra Kristus,” el kmal klou a lerellii er a omerellir ma blekerdelir, el uldimukl er a bltkil a rengrir ma ulekerreu er tir el mo er a remechuodel. (Galatia 6:2; Efesus 6:1-3; 1 Timoteus 5:1-3) E dirrek, a Rekristiano a diak el di loubltikerreng e le te olengesenges a llach e merekong, ngdiak leuaisei, te bai meruul el ngar er a rengrir el mei. Ma Petrus a melisiich el kmo: “Me bo ldul mekeald a rengmiu el kaubltikerreng.”​—1 Petrus 1:22.

A disciplo el Jakobus a dirrek el meskid a kuk ta er a uchul me ngkired el omekerreu er a remechuodel. Ngmilluches el kmo: “Chomeluu ra Dios el klikiid e diak a idek er ngii er medal a Dios el Chedam a di tiakid el kmo: choldingel rar ngalek el metacherbesrir, el diak a demerir ma derrir, mar mellakl dil, e diak le mechesechusem ra idek ra belulechad el mekedeldar el klikiid.” (Jakobus 1:27) A Jakobus a meskid a klou a ultutelel el tekoi. Ngomeklatk er kid el kmo a remechuodel a mekreos er a rengul a Jehovah.

Me nguaisei, ngdiak el di sel lak doruul a mekngit el mo er a remechuodel a ungiang. Ngkired el meruul a ungil el olecholt el kmo kede kerekikl er tir. (Momes er a box el “Urerel a Bltikerrreng,” el ngar er a page 6-7.) A Jakobus a milluches el kmo: “A kloumera el diak chomerellel a ulekoad.”​—Jakobus 2:26.

A Ongelaod el mo er a “Metacherbesrir”

Ngar er ngii a kuk ta er a suobel el denguu er a tekingel a Jakobus. Ka molatk er a tekingel el mo er a Rekristiano el mo omekerreu er a remellakl el dil el “metacherbesrir.” A tekoi er a Grik el mloiuid el kmo “metacherbesrir” a belkul a kmo a sebekreng ma chelebuul ma ringel, el blekerdelel a klengar er a chad a uchul. Me ngdiak doumededenger el kmo a rebetok el mechuodel a chormang er a choua ika el blekeradel. A rebebil a kmal sabisi. E a rekuk bebil a mekngit a rengrir e le ngringel er a cheluodel a uchul. El mo lmuut er tirke el blak a rengrir el meruul a urerel a Dios me ngsebechir el mo mekngit a rengrir. Ka molatk er a John, b el mla mo okeua el rak el leblak a rengul el omerk er a klumech er a Rengedel a Dios, e aike el dirk mlo merek el okedei el rak e ngmilsiou el mui el taem. Chelechang el le 80 ma derengel a rekil, e ngmelekoi el kmo a lebebil er a taem e ngmo mekngit a rengul. Ngdmu el kmo: “Sel kulebedebek aike el betok el cheleuid el omerellek, e ak blechoel el omdasu el kmo ngmle sebechek el remuul el mo ungil.”

Choua itirka el chad a sebechir el ngmai a ongelaod sel bo lodengei el kmo a Jehovah a cherrungel, engdi ngdiak lousbech el kmo kid a mecherrungel el diak a kngtid. Ngmedengei a cheleuid el omerelled, engdi a Biblia a melekoi el kirel el kmo: “Chomko ke meluches a kngtmam, e ng techa sebechel moiub el diak le medebeakl?” (Psalm 130:3) Chochoi, a Jehovah a diak di lomes a kngtid e lemerekong, e ngomes aike el ngar er a rengud. Kede mekerang e medengelii tia el tekoi?

 A King el David​—el mirruul a betok el klengit ma cheleuid el omeruul​—a mlukreng er a Dios el meluches el ngar er a Psalm 139:1-3 el kmo: “RUBAK, ke mla tirterak me ke medengelkak. Ke medengei a bek el kuruul; ke di ngar cheroid e omtab a rokui el uldesuek. Ke di mesekak a kuureor ma lechub e a kulengull; ke medengei a rokui el kuruul.” Tia el tekoi el kmo “ke di mesekak” a belkul a kmo “omiich,” el ua chad er a sers a lolsebek a besbas er a kokumots. Ma David a mlukreng el omeklatk er kid el kmo a Jehovah a meduch el omiich e omekedelad a ungil el urered el ngar er a rengul.

A bo leblak a rengud el mo er ngii, e a chubechubechad el Demad el ngar er a eanged a melatk​—e kongei​—er a ungil el urered. Nguaisei, a Biblia a dmu el kmo a lsekum ngobes a urered ma bltikerrreng el dochotii el kirel a ngklel e tiang a ua lak lemelemalt el tekoi er a osengel.​—Hebru 6:10.

“Ngmla Nguemed a Ikel Dimla Ngarngii”

A Biblia a olecholt el kmo a mondai er a cheluodel a dimlak lulsiseb er a moktek er a Dios el kirel a klechad. A ringelel a cheluodel a siliseb er a klengar er a rechad, e le uchul e a kot el demad  ma delad a ulemtok er a Omebelir. (Genesis 3:17-19; Rom 5:12) Tiang a diak lolemolem el uaisei el mo cherechar.

El di ua dulsaod er a uchei, a betok el mekngit el blekeradel a ngar er a ngii er a chelechang​—el uldimukl er a mekngit el omeruul el mo er a remechuodel​—a meketeklii el kmo kid a kiei er a “uriul sils” er tia el beluulechad. (2 Timoteus 3:1) A moktek er a Dios a mo smuld a urerel a klengit, el ua cheluodel ma dirrek el kodall. A Biblia a kmo: “[A Dios] a mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.”​—Chocholt 21:4.

El ngar er a beches el beluulechad er a Dios, e a rokui el rengelel a cheluodel a mo tekoi er a mla me mong. Ma mekngit el omeruul el mo er a remechuodel a dirrek el mo diak. (Mika 4:4) Me tirke el ulekoad el tir a ngar er a uldesuel a Dios a lmuut el mo ngar, me bo lsebechir el mo nguu a techall el mo kiei el mo cherechar el ngar er a paradis el chutem. (Johanes 5:28, 29) E seikid el taem, e ngkuk lmuut el mo bleketakl el kmo a Jehovah a kmal omekerreu er a remechuodel ma rebek el chad el olengesenges er ngii.

[Footnote]

[Baks er a 6, 7 el llel]

A Urerel a Bltikerreng

Ngar er a delongelir a Resioning er a Jehovah, e a remechuodel er a ongdibel a ngar er a medal a tekoi el omekerreu er a rechudela el chad. Te kmal oltirakl er a uleklatk er a Petrus el kmo: “Bo mongedmokl er sel moterekokl er kemiu el delebechel el sib ra Dios.” (1 Petrus 5:2) A bo lungil el omekerreu er a rechudelang a ta er a ngerechelir el omekerreu er a delebechel er a Dios. Engdi, tiang nguldimukl er a ngerang?

A kllourreng e blechoel el oldingel e chachedecheduch a ngosuterir el mo medengei aike el ousbech a remechudela el chad. Alta e te ousbech a ngeso el mo er a stoang ma omengetmeklel a blai ma rolel a olidiuul er a mo er a miting er a Kristiano ma omengiuel a Biblia ma babilengir a Rekristiano ma lmuut el bebil el tekoi. Ma bo lsebechel, e a ungil el rolel a ngeso a mo meketmokl el kirel tia el tekoi. c

E kuk mekerang a lsekum a chudelang el odam ma lechub el odos er a ongdibel a kmal metacherbesul, el ousbech a ngeso er a udoud? A kot, e ngungil a bo lodengei el kmo kele lengar er ngii a rengelekel ma rechedal el sebechir el mo ngosuir. Tiang a oltirakl er a 1 Timoteus 5:4 el kmo: “E a le ngarngii a ngelekel malechub e le ngelekel a ngelekel a mellakl dil, e bo lomuchel mesuub a ngerechelel a ulekeroul el omteche sulir ar chederir; le tia ungilbesul ra rengul a Dios.”

Alta e ngike el chuodel el chad a ousbech a ngeso el lolai er a ngeso er a kabelment. Ma lechub e a rebebil el ngar er a ongdibel a sebechir el olengeseu. A lsekum e ngdiak a ta er aikang el oureor, e a rechelder er a ongdibel a sebechir el tirterii el kmo ngika el chad a rredemelel a melai a ngeso er a ongdibel, ma lechub e ngdiak. El di ua bebil el tekoi el dilubech er a ongdibel er a kot el dart el rak, e le a apostol el Paulus a milluches el mo er a Timoteus el kmo: “Lak moluches ra ngklel a mellakl dil el direkak bo lokolem a rekil, e moluches er ngikel dirke tal le bechiil; el ungil a chisel ra ungil lomerellel, el ulemekeroul rar ngalek, e ometechakl rar ngar chomerael, e meriso chocherir ar mechedaol, e olengeseu rar metacherbesrir, e blak a rengul ra bek lungil lomeruul.”​—1 Timoteus 5:9, 10.

[Footnote]

[Siasing er a 5 el llel]

A Dorkas a ulemekerreu er a remetacherbeserir el melakl el dil.​—Rellir 9:36-39.