“A Tekingem a Meskak a Deuil a Renguk”

“Le ikal rokuil tekoi el dimla meluches a melluches el kirel chosisechakl el mer kid.”​—ROM 15:4.

1. Ngmekerang a Jehovah a lomeskid a uleklatk, e ngera uchul me kede ousbech er ngii?

 A JEHOVAH a omesterir a rechedal a uleklatk me bo lsebechir el sumechokl a mondai el ngar er ngii er a chelsel aika el meringel el taem. A bebil er aika el uleklatk a dengai el oeak a omesubed er a Biblia, e dirrek el remenges el oeak a suobel ma dirrek el cheldechedecherir a rebebil el motobed er a miting er a Rekristiano. E a betok er aike el donguiu ma ike el derenges a diak lebeches el tekoi. Kede ulterekokl el mla mesuub a osisiu el suobel er a ngar er a mong. Le kid a rechad a blechoel el obes a uchul me ngkired el melemolem el melai a uleklatk el kirel a moktek er a Jehovah ma llechul ma osisecheklel. E kired el mo oba omereng el saul el kirel a uleklatk er a Dios, e le ngmelisiich er kid el mo melatk er a uchul e ngmlo soad a rolel a klengar el oltirakl er a soal a Dios. Sei a uchul ma chad er a psalm a milengitakl el mo er a Jehovah el kmo: “A tekingem a meskak a deuil a renguk.”​—Psalm 119:24.

2, 3. (a) Ngera uchul ma Jehovah a ulemekedelad aika el chisir a rechad er a Biblia el me er a chelecha el taem? (b) Ngera el cheldecheduch er a Bades a bo dosaod er ngii er tia el suobel?

² Malta e a Tekingel a Dios a melluches er a kmal irechar, engdi ngkmal dirk mesisiich. (Hebru 4:12) Ngmeskid a mera el cheldecheduch el kirel a klengar er a rechad el ngar er a Biblia. Malta e a siukang ma osengir a rechad a mla mengodech er aike el mla er ngii er a taem er a Biblia, engdi a mondai el dechelebangel a di ua ike el mla er ngii er a irechar. Ma chisir a rechad a ulekedelad el kired el ngar er a Biblia, el tir a mle betik a rengrir er a Jehovah e mle blak a rengrir el mesiou er ngii er a chelsel a meringel el blekeradel. E a kuk bebil el cheldecheduch a mesaod aike el omeruul el ouketui er ngii a Dios. A Jehovah a milekedelad a chisir a rechad, el ungil ma mekngit, el locha er a chelsel a Biblia el kirel el omeklatk er kid. Me ngdi ua sel tekingel a apostol el Paulus el kmo: “Le ikal rokuil tekoi el dimla meluches a melluches el kirel chosisechakl el mer kid, el kirel me bo doba chomelatk loeak a ducherreng ma chongelaod el lomeskid a chedaol Llechukl.”​—Rom 15:4.

³ Me bo domes a edei el cheldecheduch er a Biblia: a chisel a David ma Saul, ma Ananias ma Safira, ma blekerdelel a Josef el mo er a bechil a Potifar. A derta er aikang a meskid a ungil el klubeled.

Blakerreng el Mo er a Urerel a Dios

4, 5. (a) Ngera el tekoi a mla er ngii er a delongelel a King el Saul ma David? (b) Ngmlekera David el kirel sel kltui er a Saul?

⁴ A King el Saul a ullerrengesmengoit er a Jehovah me ngmlo diak el lerredemelel a mengedereder er a rechedal a Dios. Ma Dios a chilitii e ulderchii a profet el Samuel el mo omcheluch er a David el mo king er a Israel er a ngar er a medal el klebesei. Sel taem el David a ulechotii a klsechal er ngii er a mekemad e lengai a odengesir a rechad, e a Saul a mocha omes er a David el ua lecherroel. A Saul a mle mekudem el osiik a kodellel a David, engdi ngii a silobel er aika el blekeradel e le a Jehovah a ulebengkel.​—1 Samuel 18:6-12, 25; 19:10, 11.

⁵ El kirel a betok el rak, e a David a mle kirel el di omart er ngii. E mlo er ngii a taem e ngmle sebechel el mekodir a Saul ma rechedal  a David a ulerrimel er ngii el kmo a Jehovah a mla msa techellel me lokodir. A David a dimlak lekengei. A blakerreng er ngii el mo er a Jehovah me ngii el mengull er a deruchellel a Saul el ngellitel el king er a rechedal a Dios a rirellii el mo meruul el uaisei. Ngdimlak el ngii el Jehovah a ngileltii a Saul el mo king er a Israel? Ma leuaisei, e ngdirrek el ngii el Jehovah a mo nguu el choridii sel bo lungil el temel. A David a ulemtab el kmo ngdiak a llemeltel el meruul a ngii di el ngerang. Ma uriul er a loruul aike el sebechel el mengedechuul er a kltui er a Saul el kirel, e a David a mlo medengei el kmo: “A RUBAK a di ngar, me ng RUBAK a mo mekodir. Ng di mochu er a belsechel a kodellel, ma lechub e ng mor a mekemad e mad. A RUBAK a olekebai er ngak el diak le bo chimak er a mlechilt er a RUBAK.”​—1 Samuel 24:3-15; 26:7-20.

6. Ngera uchul me kede semeriar er a cheldechedechal a David ma Saul?

⁶ Tia el cheldecheduch a ngar er ngii a klou el suobel er ngii. Ngar er ngii a bebil er a taem el di kau el oker el kmo ngera uchul ma bebil el mondai a duubech er a ongdibel er a Rekristiano? Ngulterekokl el mo uaisei e le a chad a mo diak lungil a blekerdelel. Malta e sel omerellel a diak el obereod el klengit, engdi ngsebechel el mo mekngit er a uldesuem. Me ke mo mekerang? E le ngii el chad a Kristiano ma dirrek el blakerreng er kau el mo er a Jehovah a uchul, e ke melilt el mo mengedecheduch er ngii, e le ke melatk el kmo ngodam er kau. E mekerang a lsekum tia el mondai a di melemolem? Uriul er a obla mruul aike el sebechem, e becherei sel tekoi me lengar er a chimal a Jehovah. A David a mirruul el uaisei.

7. Ma doukerebai er a David, e kede mo mekerang a lsekum e ngduubech a chelebirukel ma omengetukel el me er kid?

⁷ Malta e ke chelebangel a chelebirukel el tekoi ma omengetukel er a klechelid er kau. E locha diak a ngera el sebechem el rullii el kirel aika el mondai er a chelechang. Ngmeringel a doutekangel choua ika el blekeradel, engdi a omerellel a David el kirel a chelebirukel el tekoi a meskid a klubeled. A David a milluches a psalm el olengit a ngeso er a Dios me losebelii er a chimal a Saul ma omesodel a blakerreng er ngii el mo er a Jehovah me ngii el soal el oldanges er a ngklel a Dios. (Psalm 18:1-6, 25-27, 30-32, 48-50; 57:1-11) Malta e a Saul a millemolem el meruul a betok el chelebirukel el betok el rak, engdi ngii a di millemolem er a blakerreng er ngii el mo er a Jehovah. Me kid a kired el melemolem el blak a rengud el mo er a Jehovah ma cheldebechelel er a chelsel a ngii di el chelebirukel el tekoi el decharm er ngii ma dirrek a ngii di el mekngit el tekoi el loruul a rechad el me er kid. E le kede ungil el medengei el kmo a Jehovah a medengelii a blekeradel el dengar er a chelsel er a bek el taem.​—Psalm 86:2.

8. A Resioning er a Jehovah er a beluu er a Mozambique, te mlekera er a lemeasem a blakerreng er tir el mo er a Jehovah?

⁸ A Rekristiano el ngar er a beluu er a Mozambique a meskid a kerebai er a rebebil el tir a ullecholt a blakerreng el mo er a Jehovah er  a taem er a omelsemai. Sera 1984 e a rechad el omtok er a kabelment a mle mekudem el me er a belurir el merechorech e meleseb a blai e omekoad. Me tirke el mera el Kristiano a dimlak el sebechir el di tir el mesebechakl er tir. E a resoldau a ulerrimel er tir el mo teloi er a klsoldau ma lechub e lolengeseu er tir. A Resioning er a Jehovah a dimlak lekengei el mo oba bitang ma ka lebitang er aika el tekoi. Me ngkmal mlo kesib a rengrir er a Resioning el dimlak lekengei el olengeseu er tir. Te mla er ngii a 30 el Sioning el mlad er seikid el taem, e le ngblakerreng er tir el mo er a Jehovah a uchul. a Te mlo ua David, el uluutekangel a chelebirukel el mlo uchul a ungil a tekoi el kirir er a uriul.

A Uleklatk el Tekoi

9, 10. (a) Kede mekerang e ngmai a klungioled er a bebil el kerebai er a Bades? (b) Ngera sel mle mekngit er a omerellel a Ananias ma Safira?

⁹ A rebebil el chad er a chelsel a Biblia a meskid a uleklatk er a omeruul el kired el mengeroid er kid er ngii. Nguaisei, a Biblia a mesaod a chisir a rebetok el chad, el mo lmuut er a remesiungel a Dios, el tir a mirruul a mekngit e mlo chuarm er a uriul. (1 Korinth 10:11) A ta er aika el cheldecheduch a ouchais a chisel a Ananias ma bechil er a Safira, el mle chedal sel ongdibel er a Rekristiano er a kot el dart el rak el ngar er a Jerusalem.

¹⁰ Uriul er a Pentekost 33 C.E., e tirke el mlo oumerang e di kiliei er a Jerusalem el obengterir a rechapostol el melai a klungiolir a mlo ousbech a ngeso er a kall ma kuk bebil el tekoi. A rebebil er a rechad er a ongdibel a ulelterau a chetemir me bo lengesuterir. (Rellir 2:41-45) A Ananias ma Safira a ulterur a sers e ngiluu a tetiud er a cheral el mo er a rechapostol, e melekoi el kmo seikid el sengk er tir a sel cherrungel el cheral a chetemir. Nguaisei, a Ananias ma Safira a mle sebechir el melenget er a klou ma lechub a kekerei el tenget el sel mle sorir, engdi a tekoi el mla er a rengrir a mle mekngit ma omerellir a dimlak lemelemalt. Ngmle sorir a bo lungil a chisir el ua leriruul a meklou el tekoi. A apostol el Petrus, el mlukreng er a chedaol el reng, a ullecholt a blulekngir ma telingolir, e sola e a Jehovah a milekodeterir.​—Rellir 5:1-10.

11, 12. (a) Ngera bebil er a ulekrael el kirel a bo dehonest? (b) Ngera el klungiaol a mo er ngii e le chad a honest?

¹¹ A lsekum e ngkora mo soad el mengeuid er a klemera el tekoi me bo lungil a chised, e me dolatk er a cheldechedechal a Ananias ma Safira. Altang sebeched el mengeblad er a rechad, engdi ngdiak el sebeched el chobeldir a Jehovah. (Hebru 4:13) A Bades a blechoel el  mengelechel er kid el mo honest er a delongeled, e le a rebulak a diak a blingelir er a chutem el ngii a mla mekikiid er a chelebirukel el tekoi. (Osisechakl 14:2; Chocholt 21:8; 22:15) Misei a uchul me tia el tekoi a kmal bleketakl. Ngike el uchul a rokui el blulak a Satan el Diabelong.​—Johanes 8:44.

¹² A bo dehonest er a klengar er kid a mo uchul a betok el klungiaol. A bebil er ngii a klikiid el uklatk ma ungilreng e le ngsebechir a rechad el oumerang er kid. Ngmera el tekoi, te kmal honest a uchul ma Rekristiano a sebechir el melemolem el oureor e urrekodel ngii el urerir. Ma ngar er a uchei el klungiaol el sebeched el nguu a rullid el kmal mo kmeed el sechelil a Dios el Cherrengelel a Klisiich e le kid el blechoel el honest.​—Psalm 15:1, 2.

Melemolem el Klikiid

13. Ngera el tekoi a blo lechelebangel er ngii a Josef, me ngngerang mirruul er ngii?

¹³ A Josef, el ngelekel a Jakob el rubak er a irechar, a mloterau el mo er a klsibai er a le 17 rekil. Ngmlo kiei er a blil a Potifar, el ofiser er a king er a Ekipten, e ulechuir a osengel a bechil. Ngika el redil a mlo soal el mo bad el obengkel a Josef, e le ngkmal mle ungil el sechal, ma bek el sils e ngdi melekoi er ngii el kmo: “Mei me bo bad el obengkek.” A Josef a mla er a beluu el cheroid er a belual me ngdimlak a chad el medengelii. Me ngmle sebechel el mo bad el obengkel ngike el redil e diak a chad el medengei. Engdi sel taem el bechil a Potifar a millasem el mo orkedii, e a Josef a chiliis.​—Genesis 37:2, 18-28; 39:1-12.

14, 15. (a) Ngera uchul me kede semeriar er a cheldechedechal a Josef? (b) Ngera uchul ma ta el redil el Kristiano a mlo ungil a rengul e le ngulerrenges a uleklatk er a Dios?

¹⁴ A Josef a mlukeroul er a telungalek el meluu er a Dios, me ngmle medengei el kmo a durs er a chebechiil er a delongelir a rechad el diak lebechiil a mekngit. Me nguleker el kmo: “Ng mekera e sebechek el mo meruul er cho ua tial mekngit el tekoi e mor a klengit el omtok er a Dios?” A nger a di bla lodengelii a oeak a klemedengei er ngii er a llechul a Dios el kirir a rechad el meldung er a Eden, el kirel a sechal ma redil el mo ta el chelechad. (Genesis 2:24) A rechedal a Dios er a chelechang a sebechir el ngmai a klungiolir sel bo lolebedebek er a blekerdelel a Josef. Ngar er a betok el beluu, e ngbeot a osengir a rechad el kirel a durs er a chebechiil misei e te melenguul er a rengeasek el tir a oltngakl a deleboes el omeruul. Ma laokrreng a loruul er ngii a rebetok el bechiil el chad. Sei a uchul, ma cheldechedechal a Josef a ungil el uleklatk el kired er a chelecha el taem. A llechul a Dios a kmo a deleboes ma laokrreng a dul klengit. (Hebru 13:4) Te betok el chad el mlo er a deleboes el omeruul a melekoi el kmo ngngar  er ngii a mesisiich el uchul me ngkired el mengeroid er kid er ngii. A bebil er aike el mekngit el uchul a ua ikang, ngrullii a chad el mo merur, e mo mekngit a ukltkel, e mo uchul a chelechei ma kldiull ma dirrek el bekoiueiuul el rakt. Ma Bades a omeklatk er kid el kmo a chad el ngar er a deleboes a “mocha ra klengit el kirel a di bedengel.”​—1 Korinth 5:9-12; 6:18; Osisechakl 6:23-29, 32.

¹⁵ A Jenny, b el mesobil el Sioning er a Jehovah, a uleba omereng el saul el kirel a uleklatk er a Dios. Ngar er a urerel, e ngmla er ngii a ta el kmal ungil el sechal el blechoel el melekoi a tekingel er ngii. Me sera lak lekengei a Jenny, e ngika el buik a liluut el kmal mo blak a rengul el melasem el mengesuseu er ngii. A Jenny a melekoi el kmo: “Ak mera el uluutekangel me bo lsebechek el melemolem el klikiid, e le kede blechoel el kora mo ungil a rengud sel dodengei el kmo ngar er ngii a chad el kora soal kid.” Ngmle medengei el kmo ngika el chad a di soal el mo bad el obengkel me bo lsebechel el omasech er ngii el kmo ngta er tirke el redil el mla mo sechelil. Me ngblechoel el meluluuch el mo er a Jehovah me lengesuir el mo lomelemii a blakerrreng er ngii er sel taem el bocha lomelechesiu er ngii el mocha mechitechut. A Jenny a mlo medengei el kmo aike el suobel el lesiluub er a Biblia ma babier er a Rekristiano a mle ua luleklatk el omeklatk er ngii me di lemekar. E a ta er aika el uleklatk a sel cheldechedechal a Josef ma bechil a Potifar. Ngika el redil a melekoi el kmo: “Sel bo kblechoel el melatk er a bltkil a renguk el mo er a Jehovah, e tiang a ngosukak me ngdiak bo krellii a mekngit el omtok er ngii.”

Mrenges a Uleklatk er a Dios!

16. Ngmekerang e mo uchul a klungioled sel donguiu e dolebedebek el kirel a klengar er a rechad el ngar er a Biblia?

¹⁶ Kid el rokui a sebeched el menglou er a omereng el saul er kid er a llechul a Jehovah sel doutekangel el omtab er a uchul me ngmilechei a bebil el cheldecheduch er a chelsel a Bades el kired. Aikang ngosisecheklid er a ngerang? Ngera el blekerdelir a rechad er a taem er a Biblia a kired el oukerebai er ngii ma lechub e kede olechib er kid er ngii? Kede menguiu a chisir a rebetok el dart el chad er a chelsel a Tekingel a Dios. Ma rokui el sorir a osisecheklel a Dios a ungil a lomekeroul er a reng el semeriar el kirel a llomeserreng el mo uchul a klengar, el uldimukl er ngii aike el klubeled el dengai er a kerebai er a rechad el bla lukedelad a Jehovah el kired. Me tiaikid el babier a blechoel el meskid a suobel er a choua itirkaikid el chad el chisir a sebeched el ngmai a klubeled er ngii. Ngera me ngdiak bai moutekangel el chemoit a taem el menguiu aika el suobel?

17. Ngera uldesuem el kirel a uleklatk er a Jehovah, e ngera uchul?

¹⁷ Ngkol ua ngera el omereng el saul a dobang e le Jehovah a kmal kerekikl er tirke el chad el outekangel el meruul a soal! Kid a diak demecherrungel el di ua itirke el sechal ma redil el omasech a ngklir er a Biblia. Nguaisei, a omerellir a mleketmokl el mo uchul a klungioled. Ma lsekum e kede orrenges a uleklatk er a Jehovah, e ngsebeched el olechib er kid er a meklou el cheleuid el tekoi, e sebeched el oukerebai er a ungil el kerebai er tirke el chad el mirrael er a rael er a llemalt. A doruul el uaisei, e ngmo sebeched el mengitakl el obengkel ngike el milluches er a psalm el kmo: “Te ngeltengat tirkel oltaut a tekingel [a Jehovah], el osiik er ngii el oba rengrir el rokir. A kultaut osisecheklem, ng kmal imis el soak.”​—Psalm 119:2, 167.

[Footnote]

Ngmekerang a Omonger?

• Ngera kede suubii er a osengel a David el bedul a Saul?

• Ma cheldechedechal a Ananias ma Safira ngosisecheklid er a ngerang?

• Ngera uchul ma cheldechedechal a klengar er a Josef a desemeriar er ngii er a chelechang?

[Aike el Ker er a Suobel]

[Siasing er a 24 el llel]

Ngera uchul ma David a dimlakl ekengei elokodir a Saul?

[Siasing er a 25 el llel]

Ngera klubeled er a cheldechedechal a Ananias ma Safira?

[Siasing er a 26 el llel]

Ngera rirellii a Josef el mo oltngakl a deleboes el omeruul?