‘Ngar Sel Kmal Uchelel e a Jehovah a Ouchais er a Mo Rsel’

“Ngar sel kmal uchelel e ak uluuchais er a mo rsel; ak di mla ouchais er a mo duubech.”​—ISAIA 46:10.

1, 2. Ngera el tekoi el kirel a telemellel a Babilon a kora mechas a rengud er ngii, e tiang ngochotii a ngerang el kirel a Jehovah?

 NGMLE taem el kmal milkolk e a recheraro el soldau a mirrael er a tkul a omoachel el Eufrates el bedul sel klou el mats el Babilon. Ma lekeda er a siseball er a mats, e ngkmal mlo mechas a rengrir. A siseball er a Babilon a mle nglai aike el teblo el meklou el chesmerel! Ma lengesecha el mocha soiseb er a mats. E ngdi mle mereched el mengai a mats. A merredelir, el Sairus, a ngiluu a beluu e a uriul e ngultebedii a tekingel me lemengubet er a klsibai a rechad er a Israel. A betok el telael el chad a liluut el mo remei el omekbeches er a omengull er a Jehovah el ngar er a Jerusalem.​—2 Kronika 36:22, 23; Esra 1:1-4.

² Aika el tekoi el dilubech er a rak er a 539-537 B.C.E a lekengei er ngii a rechad er a tekoi er a reksi. Sel tekoi el mechas a rengud er ngii a kmo aika el tekoi a lulemlaoch el kirel a Isaia el profet er a Jehovah el mesaod er a rebetel a Babilon er a 200 el rak er a uchei er a lduubech. (Isaia 44:24–45:7) A Jehovah a ullecholt a tekoi el mo duubech er a taem er a telemellel a Babilon e dirrek el uluuchais er a ngklel ngike el merreder el mlo mesisiich. a Sera longedecheduch er a Rengalek er a Israel, el tir a mle sioning er ngii er seikid el taem, e a Jehovah a dilu el kmo: “Molatk a dilubech er a ngar a mong; molecholt el kmo ng di ngak el tang a Dios, e diak a ngodech el ua ingak. Ngar sel kmal uchelel e ak uluuchais er a mo rsel; ak di mla ouchais er a mo duubech.” (Isaia 46:9, 10a) A Jehovah a Dios el sebechel el medengei aike el mo duubech er a ngar er a medad el taem.

3. Kede mo mesaod a nger er a ngera el ker?

³ A Dios ngua ngera klemedengei er ngii el kirel a ngar er a medad el taem? A Jehovah ngmedengei aike el bo loruul a derta er kid er  a uchei er a bo doruul? Ma tekoi er a ngar er a medad ngmla moterekokl el kired? Kede mo mesaod a nger er a Biblia el kirel aikang ma kuk bebil er a ker el ngar er tia el suobel me sel ongingil el suobel.

A Jehovah​—A Dios er a Ulaoch

4. Ngtecha ngike el Uchul a ulaoch er a Biblia?

⁴ A Jehovah a sebechel el mes a tekoi er a ngar er a medad me ngulemekreng er a rechedal er a irechar el meluches a betok el ulaoch, el ngosukid el mo medengei aike el bo loruul. Ngmelekoi el kmo: “A ikel tekoi el kdilung a mocha tmaut. Me chelechang e ak mo subedemiu er a kuk beches el tekoi, er uchei er a lomuchel el mor ngii.” (Isaia 42:9) A rechedal a Dios a mera el ngeltengat!

5. Ngera el ngerachel a obengkel a klemedengei el dobang el kirel aike el bo loruul a Jehovah er a ngar er a medad?

⁵ A profet el Amos a ouchais er kid el kmo: “Ng ulterekokl el diak a ngeral loruul er ngii a Rubak el Dios e lak lochotii a uldesuel er a re mesiungel el profet.” Tia el klemedengei er a ngar er a medad a mo er ngii el okiu a ngerachel. Ka momtab er a mesisiich el okesiu el lousbech er ngii a Amos el kmo: “Sel longumk a laion, e ng kol techa sebechel el diak bo le medakt?” Sel longumk a laion e ngomekdakt er a rechad ma charm el ngar er a bita er ngii, ma reprofet el ua Amos a mle mereched el ouchais er a tekingel a Jehovah. “Ma Rubak el Dios sel longedecheduch, e ng techa sebechel el diak le berkii a klmechel?”​—Amos 3:7, 8.

A ‘Tekingel’ a Jehovah a “Diak le Iit”

6. Ngoeak a ngera el rolel e ngtilaut a ‘uldesuel’ a Jehovah el kirel a telemellel a Babilon?

⁶ El okiu a profet el Isaia, e a Jehovah a dilu el kmo: “A ikel uldesuek a kmal diak bo le metom; ak mo remuul a bek el kullatk el mo meruul.” (Isaia 46:10b) A ‘uldesuel’ a Dios, ma lechub a moktek er ngii el kirel a telemellel a Babilon, a millutk el kirel ngike el mlo mesisiich er a Babilon el Sairus el chad er a beluu er a Persia. A Jehovah a uluuchais er a moktek er ngii er a uchei er a lemotaut. El ua dulsaod er ngii, tia el tekoi a tilaut er a rak er a 539 B.C.E.

7. Ngera uchul me ngsebechel el mo ulterekokl a rengud el kmo a ‘tekingel’ a Jehovah a mo tmaut?

⁷ Ngmle bekord el eua el dart el rak er a uchei er a lenguu a Babilon a Sairus, e a King el Jehosafat er a Juda a uluumekemad er a resoldau er a Amon ma Moab. Ngmle ulterekokl a rengul el meluluuch el kmo: “RUBAK, el Dios er a ruchelam, ke ngar a eanged e mengedereder a bek el beluu er a beluulchad. Kau a olab a bek el klisiich e mesisiich me ng diak a chad el sebechel el omtok er kau.” (2 Kronika 20:6) A Isaia a dirrek el ulechotii a osisiu el ulterekokl el reng er sera ldu el kmo: “Ng techa mo torbengii sel bla ludesuii a RUBAK el Olab a Bek el Klisiich? Ng techa mo olutii sel uldars el chimal?” (Isaia 14:27) E a uriul, e sera lluut el mo ungil a King el Nebukadnesar er a Babilon, e ngmle ngar er a eou a rengul el melekoi el kmo: “Ng diak a sebechel el omtok er a uldesuel a rengul [a Dios] ma lechub e ng oker a loruul.” (Daniel 4:35) Chochoi, a Jehovah a ouchais er a rechedal el kmo: “Ngii el tekingek. . . ng diak le iit el rullii sel kulemdasu er ngii el kirel; ng mo remuul a bek el kuldurech er ngii el mo  meruul.” (Isaia 55:11) Ngsebechel el mo ulterekokl a rengud el kmo a ‘tekingel’ a Jehovah a blechoel el mo klemerang. A moktek er a Dios a ulterekokl el mo tmaut.

A “Uldesuel a Dios ra Irechar el Mei”

8. Ngngerang sel “uldesuel a Dios?”

⁸ Ngar er a babilengel el mo er a Rekristiano er a Efesus, e a apostol el Paulus a millekoi el kirel a “uldesuel a Dios ra irechar el mei.” (Efesus 3:11) Tiang a diak el belkul a kmo a Dios a ngar er ngii a map el kirel el oltirakl er ngii. Ngdiak, ngbai olecholt el kmo a Jehovah a ulterekokl el mo oltaut er sel kot el moktek er ngii el kirel a klechad me tia el chutem. (Genesis 1:28) Me bo dosaod er sel kot el ulaoch er a Biblia, el meketeklii el kmo a moktek er a Jehovah a ulterekokl el mo tmaut.

9. A Genesis 3:15 ngmekerang e melutk el mo er a moktek er a Dios?

⁹ Sel telbiil el ngar er a Genesis 3:15 a olecholt el kmo ngdi mle mereched er a uriul er a lrebet er a klengit a Adam ma Eba, e a Jehovah a ulterekeklii el kmo ngike el okesiu el redil a mo mechellii a ngalek el sechal. A Jehovah a dirrek el milsa sel mo rsel a klautok er a delongelel ngika el redil ma Satan ma rengelekir. Altang e a Jehovah a mo kongei er a Ngelekel a redil me lobangch a kotel chochil, engdi sel bo ltemel a Dios e ngika el Ngalek a mo rukemii a bdelul a bersoech, el Satan el Diabelong. Ma moktek er a Jehovah a millemolem el oltirakl er a uldidellel a rasech el mo tmurk er a demiel a Jesus, el ngike el miltib el Messias.​—Lukas 3:15, 23-38; Galatia 4:4.

A Bla Loterekokl a Jehovah a Mo Tmaut

10. A Jehovah ngulterekeklii er a uchelel el kmo a Adam ma Eba a mo ruebet er a klengit? Mosaod.

¹⁰ Ma losaod er a ngerechelel a Jesus er a moktek er a Dios, e a apostol el Paulus a milluches el kmo: “A Kristus a dimla metutk er uchei ra uchelel a belulechad, e mlocholt er tial mocha taem ra ullebongel, el kemiu a uchul.” (1 Petrus 1:20) Ma Jehovah ngulterekeklii el kmo a Adam ma Eba a mo er a klengit e a tenget er a olubet a mo er ngii el oeak a Jesus Kristus? Ngkmal diak. Sel tekoi el kmo “uchelel” a mlengai er a tekoi er a Grik el belkul a kmo “omriid a tane er a chutem.” Ngmla er ngii a ‘tane el ulebriid er a chutem,’ ma lechub a chad el mla mechell, er a uchei er a lrebet er a klengit a Adam ma Eba? Ngdiak. Nguriul er a lomtok er a Dios e a Adam ma Eba a mlo er ngii a rengelekir. (Genesis 4:1) Ma uriul er a ultok, engdi a uchei er a lebo er ngii a ngelekel a Adam ma Eba, e a Jehovah a ulterekeklii a demiel a ‘ngalek.’ A kodellel ma okisel a Jesus a kiltmeklii a sengk er a olubet, el ngii a mo uchul e a klengit ma ike el bla lruul a Satan a mo diak.​—Matteus 20:28; Hebru 2:14; 1 Johanes 3:8.

11. Ngera el tekoi a lulterekeklii a Jehovah el kirel a otutel a moktek er ngii?

¹¹ A Jehovah a ulterekeklii a kuk ta er a tekoi el kirel a otutel a moktek er ngii. A Paulus a ulemeketakl er tiang er a loluches el mo er a Rechad er a Efesus el kmo a Dios a mo “odekdak a bek el tekoi ra eanged ma chutem el mo tang el ngara Kristus.” Me sera losaod aike el “tekoi ra eanged,” el tirke el mludiukes el obengkel a Kristus, e a Paulus a dilu el kmo: “Kede dimla metutk el oudiukes el ngara Kristus loeak a uldesuel ngikel meruul a bek  el tekoi el ngar sel telbilel a rengul.” (Efesus 1:10, 11) Chochoi, a Jehovah a ulterekeklii el kmo a remekesai el chad a mo chedal sel ongeru el tedebechel a tane er a redil er a Dios e mo obengkel a Kristus el omesterir a rechad a klungiolir el oeak a olubet. (Rom 8:28-30) A apostol el Petrus a omekedong er tirkang el kmo te “chedaol renged.” (1 Petrus 2:9) E a apostol el Johanes a milsa ues el kirel a ulecherengelir tirke el mo oudiukes el obengkel a Kristus​—144,000. (Chocholt 7:4-8; 14:1, 3) Tirkang a oureor el obengkel a Kristus el King, e mesiou el kirel a ‘odengesel a klebkellel a Dios.’​—Efesus 1:12-14.

12. Kede mekerang e medengei el kmo a derta ma derta er tirka el 144,000 a diak lebla lemoterekokl?

¹² Ma ulterekokl el ochur er a 144,000 a diak lebelkul a kmo a Jehovah a mla tutketerir a rebebil er a rechad el mo blak a rengrir el mesiou er Ngii el ngar er tiaikid el rolel. Nguaisei, sel omengelechel el ngar er a Beches el Renged a lulluches er ngii me lomekrael e mlolisiich er a rengellitel el mo melemolem el blak a rengrir el rredemelel sel ngerechelir el mo kiei er a eanged. (Filipi 2:12; 2 Thesalonika 1:5, 11; 2 Petrus 1:10, 11) A Jehovah a mle medengei er a uchei el kmo a 144,000 el chad a mo rredemelel a mo oltaut er a moktek er ngii. Engdi a blekerdelel a klengar er tir a mo olecholt el kmo tirka te ua ngera el chad, me tia el tekoi a di mo ultuil er a omelilt er a derta ma derta el chad.​—Matteus 24:13.

Aike el Di Bla Bo Lodengei a Jehovah

13, 14. A klisichel a Jehovah el medengei a tekoi er a uchei er a leduubech ngoltirakl er a ngerang, e ngera uchul?

¹³ A lsekum a Jehovah a Dios er a ulaoch e ngar er ngii a moktek er ngii, e ngmekera lousbech er a klisichel el mo medengei a tekoi er a uchei er a leduubech? A kot, e ngulterekokl a rengud el kmo a rolel a Dios a klemerang e melemalt e bltikerreng. Me sera loluches el mo er a Rekristiano el chad er a Hebru er a kot el dart el rak, e a apostol el Paulus a ulterekeklii el kmo a tekingel a Dios ma telbilel a “diak le mengodech el lulekedechor a Dios el diak lomulak.” (Hebru 6:17, 18) Ngar er a babilengel el mo er a disciplo el Titus, e a Paulus a ullechotii a uldesuel er sera loluches el kmo a Dios “diak lomulak.”​—Titus 1:2.

¹⁴ Ma lmuut e kung, a klisichel a Jehovah altang ngdiak a telkelel, me nguaisei, engdi ngii a blechoel el melemalt a omerellel. A Moses a milsaod el kmo a Jehovah a “blak a rengul e merang, ng meruul a llemalt ma ungil.” (Duteronomi 32:4) A rokui el tekoi el loruul a Jehovah a oltirakl er a ungil el blekerdelel. Ma omerellel a olecholt el kmo aike el ngar er a bab el blekerdelel, el bltikerreng ma llomeserreng ma llemalt ma klisiich, a ungil el dmak el oureor.

15, 16. Ngngera el omelilt a lebilecherei a Jehovah el kirel a Adam er a sers er a Eden?

¹⁵ Ka molatk el kmo ngmekerang e aika el rokui el tekoi a melutk el mo er aike el dilubech  er a sers er a Eden. A Jehovah a betik a rengul el Chedam, me ngmilsterir a rechad aike el rokui el lousbech. Ngmilsa Adam sel dechal el omdasu a tekoi, e omtab er ngii, e mo medengelii a nger er ngii. A Adam a dimlak el ua charm, e le ngmle sebechel el di ngii el melilt a tekoi el kirel. Ma uriul er a lebebii a Adam e a Dios a ulemes el me er a eou e a “le ues a ikel bek el bla leruul e ng kmal mlo ungil a rengul.”​—Genesis 1:26-31; 2 Petrus 2:12.

¹⁶ A Jehovah er a lollach er a Adam me lak bo longa er a redechel a “kerrekar er a mo medengei a ungil ma mekngit” e ngmilsang a ungilbesul el osisechakl me bo lsebechel a Adam el melilt er a bo loruul er ngii. Ngkilengei er a Adam me longa “a redechel a rokui el kerrekar el ngar a chelsel a sers,” engdi a di mle chimo el kerrekar a dimlak el kirel menga er ngii e le ngmo uchul a kodall. (Genesis 2:16, 17) Me ngsilodii el mo er a Adam aike el mo duubech a bo longa er sel rodech. Me ngmo mekerang a Adam?

17. Ngera uchul me ngsebeched el melekoi el kmo a Jehovah a sebechel el ngiltii el mo medengei a tekoi ma lechub el diak bo lodengei a tekoi el mo duubech er a ngar er a medad?

¹⁷ Altang mle sebechel el medengei el kmo ngerang a mo duubech el mo er a Adam, engdi a Jehovah a dimlak lolilt el ousbech er tia el klisichel. Me nguaisei, a Jehovah a sebechel el omes er a ngar er a medad, engdi a ker a kmo a Dios ng melilt el meruul el uaisei ma lechub e ngdiak. Ma lmuut el tang, ngulterekokl a rengud el kmo a Jehovah a Dios er a bltikerreng, me ngdiak el sebechel el oterekeklii sel ultok ma rokui el mekngit el rsel a tekoi el mo duubech el uaisei. (Matteus 7:11; 1 Johanes 4:8) Mada, a Jehovah a sebechel el melilt el mo medengei a tekoi ma lechub el diak bo lodengei a tekoi er a uchei er a leduubech.

18. Ngera uchul ma Jehovah el sebechel el melilt el omes er a ngar er a medad ma lechub e ngdiak a diak lolecholt el kmo ngii a diak lecherrungel?

¹⁸ Ma Jehovah el sebechel el melilt el mo medengei a tekoi ma lechub el diak bo lodengelii, ngolecholt el kmo a Jehovah a olengesonges er a kmung ngerang, el diak lecherrungel? Ngdiak. A Moses a milsaod er a Jehovah el kmo ‘ngmesisiich el osebechekled, ng cherrungel e melemalt el ngar a rokui el rolel.’ Ngdiak el kired el oltelechakl er Ngii el kirel a kngterir a rechad. Aike el rokui el mekngit el decharm er ngii er a chelechang a mla er a ultok er a Adam el mei. A apostol el Paulus a mileketeklii el kmo ng “tal chad a uchul ma klengit a siliseb ra belulechad ma rokuil chad a mlora klengit, me ngsiliseb ra rokuil chad a kodall, el ua kodall luleak a klengit el me soiseb.”​—Duteronomi 32:4, 5; Rom 5:12; Jeremia 10:23.

19. Ngera el ker a bo dosaod er ngii er sel ongingil el suobel?

¹⁹ Me ngar er tia el suobel, e kede mla suubii el kmo a Jehovah a melemalt. (Psalm 33:5) Nguaisei, a kldachelbil a Jehovah ma blekerdelel el kirel a ungil ma mekngit ma llechul a rokui el dmak el oureor el oltirakl er a moktek er ngii. (Rom 8:28) Ma Jehovah el Dios er a ulaoch a uchul me ‘ngar sel kmal uchelel e ngouchais er a mo rsel; e ngouchais er a mo duubech.’ (Isaia 46:9, 10) Kede dirrek el milsuub el kmo a Jehovah a sebechel el melilt el mo medengei a tekoi er a ngar er a medad ma lechub e ngdiak. Me tia ngngera belkul el kired? Kede mekerang e medengei el kmo a omelilt er kid a oltirakl er a moktek er a Dios? E ngera el klengeltengat a dengai a bo doruul el uaisei? Sel ongingil el suobel a mo mesaod aika el ker.

[Footnote]

Ngsebechem el Mesaod?

• Ngera el kerebai er a irechar a olecholt el kmo a ‘tekingel’ a Dios a “diak le iit”?

• A Jehovah ngmla oterekokl a ngerang el kirel a “uldesuel . . . ra irechar el mei”?

• A Jehovah ngmekerang a lousbech er a klisichel el omes er a ngar er a medad?

[Aike el Ker er a Suobel]

[Siasing er a 9 el llel]

A Jehosafat a mle ulterekokl a rengul er a Jehovah

[Siasing er a 11 el llel]

A Jehovah a ulemlaoch er a kodellel ma okisel a Jesus

[Siasing er a 10 el llel]

A Jehovah ngulelterekokl a tekoi el bo loruul a Adam ma Eba?