A Jehovah a Olsobel er Ngike el Chormang

“A ungil chad a chuarm er a betok el chelebuul, e ngdi RUBAK osebelii er ngii el rokui.”​—PSALM 34:19.

1, 2. Ngera el ringel a blo lechelebangel er ngii a ta el blak a rengul el Kristiano, e ngera uchul me kid a sebeched el mo chelebangel er a osisiu el uldasu?

 A TA el kekerei el redil el ngklel a Keiko a a mla mo betok er a lluich el rak el Lesioning er a Jehovah. Ngmla er a mui el taem el omesiou el kirel a Renged el telkib el taem. E kmal mle dmeu a rengul er tia el techall. Engdi telkib el taem er a uriul e ngkmal mlo metacherbesul e le ngkora mlo diak a ungil el omeltkel el kirel a klengar e mlo blechoel el soal el di ngii el tang. Ngmillekoi el kmo: “Ak blechoel el di lemangel.” Ma bo lemesisiich er a mekngit el uldesuel, e ngmle kirel a Keiko el mo mengoit a klou el temel el mesuub el di ngii el tang. Ngdilu el kmo: “Engdi ngdimlak bo lengodech a blekerdelek.” E melemolem el melekoi el kmo: “Ngmlo er ngii a taem e ak mlo melatk el kmo ngbai ungil ak mad.”

² Kau ke mla ta el momdasu el uaisei? E le kau el Sioning er a Jehovah a uchul me ngngar er ngii a klou el techellem el mo oldeu er a rengum e le a blakerreng el bedul a Dios “a ngarngii a telbiil er tial klengar me sel mei el klengar.” (1 Timoteus 4:8) Chelecha el taem e ke ngar er a paradis er a klereng! Me tiang belkul a kmo ke mla mukerreu er a rokui el ringel? Ngkmal diak! A Biblia a melekoi el kmo: “A ungil chad a chuarm er a betok el chelebuul.” (Psalm 34:19) E tiang a diak lebeches el tekoi e le “a belulechad el rokir a chederdall er ngikel mekngit,” el Satan el Diabelong. (1 Johanes 5:19) Ma ngii di el rolel a klengar el dengar er ngii me kid el rokui a mo melechesuar a belkul tia el tekoi.​—Efesus 6:12.

A Chelebuul e le Ngringel a Uchul

3. Ka mosaod a bebil el okesiu er a chelebuul ma ringel el dilubech el mo er a remesiungel a Dios er a irechar.

³ A melemolem el chelebuul a sebechel el ngodechii a osenged er a tekoi. (Osisechakl 15:15) Ka molatk er a melemalt el chad el ngklel a Job. Ngar er a chelsel a meringel el chelebuul, e a Job a dilu el kmo: “A chad a di kedeb a klengar er ngii e betok a ringelel.” (Job 14:1) A deurreng er a Job a mlo diak. Ngmlo er a ngii a taem e ngulemdasu el kmo a Jehovah a mla choitii. (Job 29:1-5) Ma Job a dimlak di lengii el tang el mesiungel a Dios el mlo chuarm er a meringel el chelebuul. A Biblia a ouchais er kid el kmo a Hana a “kmal mle mekngit a rengul” e le ngmle kebai el dil. (1 Samuel 1:9-​11) A Rebeka el mlukringel er a blekeradel er a telungalek er ngii a dilu el kmo: “Ng kmal kekeringa renguk.” (Genesis 27:46) Sera lolebedebek el kirel a kngtil, e a David a dilu el kmo: “Ng tal sils el di klangel.” (Psalm 38:6) Ma ika el kesai el okesiu a  meketeklii el kmo a resechal ma redil el uleba dakt el bedul a Dios er a uchei er a taem er a Klekristiano a dirrek el chilarm a betok el ringel ma chelebuul.

4. Ngera uchul me ngdiak lemechas a rengud er a tekoi el kmo ngar er ngii a re “mechitechut a rengrir” er a delongelir a Rekristiano er a chelecha el taem?

⁴ E kuk mekerang a Rekristiano? A apostol el Paulus a milechesuar el kmo ngklou a ultutelel el lolekoi er a Rekristiano er a Thesalonika el “molisiich rar mechitechut a rengrir.” (1 Thesalonika 5:14) A ta el omesuub a oliuid er a tekoi er a Grik el “mechitechut a rengrir” el kmo ngsebechel el melutk er “tirke el chormang er a tedeb el ringel er a klengar er tir.” Ma tekingel a Paulus a ouchais el kmo te ngar er ngii a rengellitel er a chelsel a ongdibel er a Thesalonika el chilarm er a klengiterreng. Te dirrek el ngar er ngii a rengar er a klengiterreng el Kristiano er a chelecha el taem. Engdi ngera uchul me ngmekngit a rengrir? Ka me bo domes a edei el uchul aika el tekoi.

A Diak el Cherrungel el Klechad a Uchul a Ringel

5, 6. Ngera el ongelaod a sebeched el nguu er a Rom 7:22-​25?

⁵ A remera el Kristiano a mukringel e le tir el diak lemecherrungel el diak leua itirke el durengrir el meruul a klengit el “diak lodenge rur.” (Efesus 4:19) Te melechesuar el ua lulluches a Paulus el kmo: “Le ngikel chelsek el chad a dmeu a rengul ra llach ra Dios, e ngarngii a kuk ngodech el llach era chelsel a klekedall ra bedengek, el oumekemad ra blekeradel er chomelebedebekek, e mengelebus er ngak ra chelsel a blekeradel ra klengit el ngara klekedall ra bedengek.” E sola e a Paulus a dilu el kmo: “Ak meral chebuul el chad!”​—Rom 7:22-24.

⁶ Ngmla ta el molechesukau el ua Paulus? Ngdiak lemekngit a lsekum ke kerekikl el omelechesiu aike el chelitechetum e le tiang a sebechel el rullau el mo melechesuar a berredel a kngtim me ngsmisichau el mo sebechem el mengeroid er kau er a mekngit. Engdi tiang a diak lebelkul a kmo ngkirem el blechoel el mo mekngit a rengum er aike el ngelsengesem. Ngar er a chelsel a chelebulel el bla desodii er a uchei, e a Paulus a dilechelii el kmo: “Doreng a sulel a Dios loeak a Jesus Kristus el Rubak er kid!” (Rom 7:25) Chochoi, a Paulus a mle ulterekokl a rengul el kmo a mloitel el rsechel a Jesus a sebechel el osebelii er a klengit.​—Rom 5:18.

7. Ngera sebechel el ngosuir a chad me lak bo lemekngit a rengul er aike el chelitechetul?

⁷ A lsekum ke melechesuar el kmo ke chormang e le ngdiak el cherrungel el klechad er kau a uchul, e mngai a ongelaod er a tekingel a apostol el Johanes, el melluches el kmo: “Ngdi lsekum ngngarngii a mocha ra klengit, e ngngarngii a Rubak ra ngeso el kired el ngar medal a Dios, el Jesus Kristus el ngikel melemalt; el ngii a tngakireng el tenget el kirel a kngtid, el diak di le kirel a kngtid e le merekong, e ngkirel a kngtil a belulechad el rokir.” (1 Johanes 2:1, 2) Me sel taem el mcharm e le ngchelitechetum a uchul, e bo blechoel el melatk el kmo a Jesus a mlad el kirir a rengar er a klengit, el diak el kirir a remecherrungel el chad. Ngklemerang el tekoi el kmo, “le rokuil chad a mlora klengit, ma uchul e ngdiak el sebechir el nguu a klebkellel a Dios.”​—Rom 3:23.

8, 9. Ngera uchul me ngdiak el kired el di kid el loukerrekeriil er kid?

⁸ Malta e ke rirebet er a oberaod el klengit er a uchei. Nguaisei, ke ulterekokl el mla meluluuch el kirel el mo er a Jehovah, el locha mla mo betok el taem. Ke dirrek el mla ngmai a ngeso er a klereng er a remechuodel el Kristiano. (Jakobus 5:14, 15) Me ke mla obult e chelecha el taem e ke melemolem el teloi er a ongdibel. Ma lechub e ke tilobed er a cheldebechelel a Dios el telkib el taem, engdi uriul e ke ulebult e melemolem el klikiid. Me ngar er a ngii di el ta er aika el blekeradel, e ngsebechem el mo melatk er a kngtim er a ngar er a mong e tiang a sebechel el omekringel er kau. Ma lsekum e ngmo duubech a choua itia el blekeradel, e molatk el kmo a Jehovah a ousubes er ngike el mera el lobult e le “ng chubechub e mereched el ousubes.” (Isaia 55:7) E uaisei el diak el soal a bo momdasu el kmo ngdikea omeltkem. E le tia el tekoi a kmal moktek er a Satan. (2 Korinth 2:7, 10, 11) Ma Diabelong a mo nguemed e le ngmekngit el blekerdelel a uchul, engdi ngdirrek el soal a obo molebedebek el kmo kau me ngdirrek el kirem el mo mukerrekeriil el ua ingii. (Chocholt 20:10) Lak becherei a Satan me bo lekats er tia el tekoi me bo luchul me letemellii a klaumerang er kau. (Efesus 6:11) Ke bai mo “misisiich el dechor ra kloumerang  e momtok er ngii” el kirel ngii el tekoi ma lmuut el bebil.​—1 Petrus 5:9.

⁹ Ngar er a Chocholt 12:10, e ngomekedong er a Satan el kmo “ngikel oltutakl rar udam er kid”—a rengellitel el Kristiano. Ngoltutakl er tir “ra llomes ma klebesei” er a medal a Dios. Ma domtab er tia el bades e ngsebechel el ngosukid el mo medengei el kmo a Satan a bulak, e soal a di lekid el loukerrekeriil er kid, engdi a Jehovah a diak lomdasu el uaisei. (1 Johanes 3:19-​22) Ngera me ke melemolem el mekngit a rengum el kirel a chelitechetum el mo er a taem el mla mo soam el chemoit a rokui el tekoi? Lak becherei a Satan me letemellii sel lungil el deleongel er kau ma Dios. Lak becherei a Satan me lerellau el mo diak mesa sel klemerang el tekoi el kmo a Jehovah a “mui er a blekokuii ma klechubechub, el diak le mereched el ngmasech a renguk, e olecholt er a blechoel bltikerreng.”​—Exodus 34:6.

A Chelitechetud a Sebechel el Mengitechut er Kid

10. Ngoeak a ngera el rolel e a chelitechetud a sebechel el mengitechut a rengud?

¹⁰ A rebebil el Kristiano a mo mechitechut er a omesiungir el mo er a Dios e le ngchelitechetul a klechad er tir a uchul. E tiang ngosisiu el kirem? Nglocha secher ma cheluodel ma lechub e ngkuk di ta er a blekeradel a uchul me ngdiak el sebechem el chemoit a taem el ngar er a ureor er a berkel a klumech el ua ngar er a mong. Me nguaisei, a Rekristiano a muchelechel el mo ousbech a techall el kirel a omesiungir el mo er a Dios. (Efesus 5:15, 16) Engdi ngkuk mekerang a lsekum e tia el chelitechetum a mo uchul me ngdiak el sebechem el omerk er a klumech me ngmo mechitechut a rengum?

11. Ngmekerang e a uleklatk er a Paulus el ngar er a Galatia 6:4 a sebechel el mo uchul a klungioled?

¹¹ A Biblia a omeklatk er kid me lak bo demesaik e bai “moukerebai er tirkel oeak a kloumerang ma ducherreng el mediukes ra ikel telbiil.” (Hebru 6:12) Tiang a sebeched el rullii a lsekum e kede mo kerekikl el omes aike el ungil el blekerdelir e mo oltirakl er sel klaumerang er tir. Ma leuaisei, e ngdiak bo leklungioled a lsekum e kede blechoel el omekesiu er kid er a rebebil e deblechoel el omdasu el kmo aika el doruul a diak el sebechel el mo ungil. Me ngbai ungil a doltirakl er a uleklatk er a Paulus el kmo: “Ma chad di le ngii el merriter a di omerellel, me bo lsebechel chemat er ngii ra di ngii, e lak le chat er ngii er chomerellel a tara chad.”—Galatia 6:4.

12. Ngera uchul me ngsebechel el dmeu a rengud el kirel a omesiunged el mo er a Jehovah?

¹² A Rekristiano a ngar er ngii a ungil el uchul e ngsebechel el mo dmeu a rengrir, el mo lmuut er a taem el lemechitechut a bedengir e le ngsecher a uchul. A Biblia a ouchais er kid el kmo: “Ele Dios a diak le ngara chelebirukel, me ngdiak lobes a ureriu kemiu el mesiou rar mechedaol.” (Hebru 6:10) Ma blekerdelel a klengar er kau a locha dikea leua ngar er a mong me ngrullau el mo meringel er kau el meruul a tekoi el ngii a mle sebechem el meruul er a ngar er a mong. Ngoeak a ngelseuil a Jehovah, e ngmo sebechem el mo teloi er tia el ureor er a berkel a klumech, el oeak a usbechellel a dengua ma lechub e ngomeluches el babier. Ngsebechem el oba ulterekokl el reng el kmo a Jehovah a mo omekngeltengat er kau el kirel a urerem me sel bltkil a rengum el molecholt er ngii el mo er a Jehovah ma rechad.​—Matteus 22:36-40.

“Mekngit el Taem” a Sebechel el Mengitechut er Kid

13, 14. (a) Ngoeak a ngera el rolel e tia el “blsechel a ringel” a sebechel el omekcharm er kid? (b) Ngmekerang e a diak a klechubechub er ngii el blekeradel a ngar er ngii er a chelechang?

¹³ Malta e kede omes el bedul a klengar er a chelsel a beches el beluulechad er a Dios, engdi chelechang e kede kiei er a “ikel uriul sils ra belulechad a morngii er ngii a blsechel a ringel.” (2 Timoteus 3:1) Ngsebeched el ngmai a ongelaod er a klemedengei el kmo aika el chelebuul a meketeklii el kmo a osobel a kmedang. Nguaisei, e kid a kmal chormang er aika el mekngit el blekeradel el iliuekl er kid. El ua itiang, ke mo mekerang oleko ngdiak a urerem? A ureor altang mekesai, ma omerollel a taem el mong, e ke locha mo melatk el kmo a Jehovah ngsebechel el mes ma lechub e ngremenges a nglunguchek, ngdiak. Ma lechub e ke mlo chuarm e le ngomeketukel a uchul ma dirrek el kuk di bebil er a diak lemelemalt el omeruul a uchul. Ma lechub e ke mo melechesiu el ua melemalt el chad el Lot “el chilarm” el kirel aike el mengelengalek el omeruul el meliuekl er ngii sel omonguiu a chais er a simbung.​—2 Petrus 2:7.

 ¹⁴ Ngar er ngii a ileakl el tekoi er a uriul el sils el diak el sebeched el olechib a osenged er ngii. A Biblia a ulemlaoch el kmo a rebetok a mo “diak le chubechub.” (2 Timoteus 3:3) A klechubechub a kmal meringel a debetik er ngii er a chelsel a betok el delengchokl. Me nguaisei, a babier el Family Violence (A Kdekudel el Omeruul er a Chelsel a Telungalek) a melekoi el kmo: “A rebetok el chad a mad el klaudechelakl a uchul ma meringel el uldasu ma mekngit el rolel a deleboes el mla er a rechad er a blirir er a bai lechad er a rael a uchul. Me ngar er a osengir a rebebil el meklou el chad ma rengalek, e sel basio el kirir a rechad el mukerreu e melechesuar a bltikerreng er a chelsel, a bai mla mo kot el kdekudel el basio er a chelechang.” Tirke el mla er a chelsel a choua iseikid el delengchokl a mo melechesuar a sebekreng ma lechub e ngmo mechitechut a rengrir er a uriul el taem. E kuk mekerang oleko tiang a dilubech el kirem?

15. Ngmekerang e a bltkil a rengul a Jehovah a chengelakl er a bltkil a rengrir a rechad?

¹⁵ A milluches er a psalm el David a milengitakl el kmo: “A demak ma delak a bo le chitak, e a RUBAK a mo omekerreu er ngak.” (Psalm 27:10) Ngkol ua ngera el uchul a ongelaod sel dodengei el kmo a bltkil a rengul a Jehovah a chengelakl er a ngii di el bltikerreng el olecholt er ngii a rechedam ma rechedil el di chad! Malta e ngkmal meringel sel bo dolechesuar a mekngit el omeruul ma ultngakl ma lechub e kede mlechoit er a rechad er a blid, engdi a ngii di el ta er aikang a diak bo leterebengii sel ulekerreuil a Jehovah el bedulkau. (Rom 8:38, 39) Molatk el kmo a Jehovah a mengurs er tirke el betik er a rengul. (Johanes 3:16; 6:44) Malta e ke mlechoit er a redi chad, engdi a Demam el ngar er a eanged a kmal betik a rengul er kau!

A Ungil el Bakes el Mengelaod a Klengiterreng

16, 17. Ngera sebechel a chad el rullii me lolemolem el omekerreu er a tekoi er a klereng, er sel taem el bo lechelebangel er a klengiterreng?

¹⁶ Ngsebechem el oltirakl a ungil el bakes el mo mengelaod a klengiterreng. El ua itiang, moltirakl er a ungil el rolel a klengar er a Rekristiano. Bo mblechoel el melebedebek er a Tekingel a Dios, el ileakl er sel taem el mekngit a rengum. A milluches er a psalm a milengitakl el kmo: “Ser a kumdasu el kmo, ‘Ak mocha ubuu,’ e a diak le mengodech el bltkil a rengum a urrekedak. Sel lesal mo ouedikel a renguk, e ng kau a cholodak e rullii a renguk el mo ungil.” (Psalm 94:18, 19) Ma omengiuel a Biblia er a bek el sils a sebechel el ngosukau el mo omekeek er a uldesuem er a ungil el tekoi ma uldasu el melisiich e mengelaod.

¹⁷ A nglunguuch me ngdirrek el klou a ultutelel. Malta e ngdiak bo mungil el smodii a uldesuem, engdi a Jehovah a medengei el kmo ngera ke melasem el ouchais er ngii. (Rom 8:26, 27) A milluches er a psalm a milengelechel el kmo: “Bsa RUBAK a berredem, e ng mo ngosukau. Ng kmal diak bo le bechere melemalt me bo lubuu.”​—Psalm 55:22.

18. Ngera el ungil el bakes a sebechel a mechitechut a rengul el oltirakl?

¹⁸ A rebebil a chuarm e le ngsecherel a uldasu a uchul. b Ma lsekum e tiang a uaisei el kirem, e bo molasem el melatk el kirel sel beches el beluulechad er a Dios me sel taem el “mo diak a tal chad el kiei er a beluad el lmuut el mo mengeremrum el kmo ng smecher.” (Isaia 33:24) A lsekum e ke melechesukau el kora oberaod a kngtil a rengum, e ngbai ungil a obo momes er a remeduch el toktang. (Matteus 9:12) Ngklou a ultutelel el bo momekerreu er a bedengem. A ungilbesul el blengur  e blechoel el exercise a klou a ultutelel. E mkerekikl me lungil a cheliuem. Lak momes a tv el mo osoi e mkerekikl me lak mousekool el mo imis me bo luchul e bo lemesaul a bedengem. E a ngar er a uchei er ngii el rokui, e bo leblak a rengum er a urerel a Dios! Altang dirkak bo el taem el Jehovah a mo “mesuld a bek el iuosech ra mederir,” engdi ngmo ngosukau el outekangel.​—Chocholt 21:4; 1 Korinth 10:13.

Kiei er a “Cheungel a Mesisiich el Chimal a Dios”

19. A Jehovah ngtibir a ngerang el kirir a rechormang?

¹⁹ A Biblia a meketeklii el me er kid el kmo altang betok a chelebulel ngike el melemalt, “e ngdi RUBAK osebelii er ngii el rokui.” (Psalm 34:19) Ngmekerang a Dios e meruul el uaisei? Sera di loluluuch a Paulus me lemengubet er “a teluol toched,” e a Jehovah a dilu er ngii el kmo: “Ma klisichek a cherrungel el mocholt ra chelitechut.” (2 Korinth 12:7-9) A Jehovah ngmilsa Paulus a ngera el telbiil, e ngerang a telbilel el ekor er kau? Ngdiak el kar el di mereched el omekungil, e ngbai meskau a klisiich el mo outekangel.

20. A 1 Petrus 5:6, 7 ngomeketakl er a ngerang el kired alta e kede mo chelebangel a ringel?

²⁰ A apostol el Petrus a milluches el kmo: “Misei e moruul er kemiu el ngariou a rengmiu er cheungel a misisiich el chimal a Dios, ma le me blsechel e longididai er kemiu. A Dios chomekerreu er kemiu, mo moterekokl er ngii a ikel rokuil tekoi el suebek a rengmiu er ngii.” (1 Petrus 5:6, 7) A Jehovah a omekerreu er kau, me ngdiak bo lechitau. Ngmo ngosukau er a ngii di el ringel el bo mchebangel. E lak mobes el kmo a reblak a rengrir el Kristiano a ngar er a “cheungel a misisiich el chimal a Dios.” Sel dosiou er a Jehovah, e ngii a meskid a klisiich el mo outekangel. A lsekum e ngmo blak a rengud el mo er ngii, e ngdiak a ngii di el ngera el sebechel el mo tomellii a klereng er kid. Ma leuaisei, e bo dolemolem er a blakerreng er kid el mo er a Jehovah me bo doldeu a rengud er a diak a ulebengelel el klengar er a chelsel a beches el beluulechad me bo desa sel sils el ngii a ulterekokl el mo osobelii ngike el chormang el mo cherechar!

[Footnote]

Ke Dirk Melatk?

• Ngera uchul ma remesiungel a Jehovah a dirrek el mo er tir a ringel?

• Ngera bebil er a tekoi el sebechel el rulleterir a rechedal a Dios el mo mekngit a rengrir?

• Ngmekerang a Jehovah e ngosukid el mo outekangel aike el ringel el bo dechebangel?

• Ngoeak a ngera el rolel e kede ngar er a “cheungel a misisiich el chimal a Dios”?

[Aike el Ker er a Suobel]

[Siasing er a 17 el llel]

A rechedal a Jehovah a ngar er ngii a ungil el uchul e ngdmeu a rengrir, alta e te chelebangel a ringel