A Kerresel a “Mechitechut er Kemiu el Klekedall”

A APOSTOL el Petrus a milluches el kmo: “Me kemiul sechal, dilerrek el muaisei el bo molechesuar a redil el kmo ngkuk mechitechut er kemiu el klekedall, mo mdak el kiei kemiu mar bechemiu el oltirakl ra klemedengei.” (1 Petrus 3:7) A tekoi el ngar er tia el Bades el mesaod er a redil el kmo “mechitechut er kemiu el klekedall” ngua lerellii a redil el mo mechitechut el chad? Ka me bo desa sel mera el mle belkul tia el tekoi el luluusbech er ngii ngika el mlukreng el chad er a omeluches.

A tekoi er a Grik el mloiuid el kmo “mongull” a belkul a kmo “char ma mekreos ma omengull.” Ma leuaisei, e a bechiil el sechal el Kristiano a kirel el oba delemedemek el bedul a bechil el redil, el olecholt omengull el kirel el ua lokedeldaol el mekreos el klekedall. Tiang a diak lomekrur er a redil er a ngii di el rolel. El ua itiang, ka molatk er a lambei el okedongall el kmo Tiffany lotus. Tia el meringelchad el lambei a sebeched el omes er ngii el ua okedeldaol el klalo. Me tiang ngbelkul a kmo ngii el okedeldaol a uchul me ngdikea lemekreos el klalo? Ngkmal diak leuaisei! Sera 1997 e sel kot el lambei el Tiffany lotus a lulterur el cheral a mle 2.8 milliol el kluk! Me ngoeak sel okedeldaol el rolel a loruul er tia el lambei e ngolecholt er a kerresel, el diak longesadel er ngii.

Me nguaisei, a losaod er a redil el kmo ngmechitechut el klekedall a diak lomekrur er ngii. Ma lekiei tir ma rebecherir el “oltirakl a klemedengei” a belkul a kmo a bechiil el sechal a kirel el mo medengei aike el klisichel ma chelitechetul a bechil, ma ike el soal ma chetil ma osengel ma uldesuel er a tekoi. A betik a rengul el bechiil el sechal a omes e mengull aike el mo duubech el ngodech er a delongelel ngii ma bechil. Ngmelatk aike el ousbech “el kirel me lak le metenget a nglunguchiu.” (1 Petrus 3:7) A bechiil el sechal el diak longull a tekoi el kirel a bechil a sebechel el tomellii a deleongel er ngii ma Dios. Me ngbleketakl el kmo, a Tekingel a Dios a diak lomekrur er a redil. Ngdiak, ngbai mengebkall e oldanges er tir.