A Odingel el Mlo Uchul a Bult

“A K MERA el mle semeriar el mo ouchais er a telungalek er ngak el kirir a reteru el ‘anghel’ el Dios a uldureklterir el me er ngak.” Aika lulluches a ta el chad el blo loldingel er ngii a reteru el odos el Sioning er a Jehovah. A sesei el sandei er a uchei er a kot el odngelir, e a mechas er ngii a mlad e tir a mle bechiil el 45 el rak.

Ngimis el mlo mekngit a rengul. A remeklunga el ngelekel a milengelaod er ngii, engdi te kiliei el kmal cheroid er ngii. Ngdimlak a resechelil ma retonari er ngii el mle oldingel er ngii.

“Ak melechesukak el kmal cheridang er a Dios,” ngmelekoi ngika el chad el mo er tirka el odos el mlo oldingel er ngii. Me nguaisei, te di mlengedecheduch er ngii el telkib e milsang a tract el Ngera Omelatk el Kirir a Rebetik er a Rengud el Ulekoad?, e mlelmesumech er ngii. E seikid el klebesei e ngchiliuii e kmal mlo ungil a rengul.

Telkib el taem er a uriul, e te liluut el mong tirka el odos el Kristiano. Te millatk er sel kngtil a rengul er sera lekot el mo kasoes me ngmle sorir el lmuut el mo mesa el kmo ngkol mla mo ua ngerang. Ngika el chad a milluches er a uriul el kmo: “Ngkmal mlo mechas a renguk er tirka el teru el kmal diak kudengelterir el chad el kmal millatk er ngak e mle sorir el mo medengei el kmo ngak ak ua ngerang.” Ngkmal millisiich er ngii aike el tekoi el uluuchais er ngii el mlengai er a Biblia. Tirka el odos a dilu er ngii el kmo te mong e lmuut el me oldingel er ngii. Ngika el chad a kmal mlo ungil a rengul me ngmlo luchesii tiaikid el babilengel e oduruklii el mo er a Kingdom Hall er a Resioning er a Jehovah el ngar er a belual.

Uchei er a lolukl el mo kiei er a bita er a ngelekel, e ngmlo er a miting er a Resioning er a Jehovah, e a uriul e ngmlo omesoil el obengkel a telungalek er a ta er a tirke el odos. Ngmelluches el kmo: “Ak morolung el mo cheroid er tia el basio, engdi tirke el teru el mekekere el redil ma ikelesia er kemiu a di mo blechoel el ngar er a renguk ma nglunguchek. Chochoi, ak blechoel el meluluuch er a chelechang. Ak mera el mla obult. Ngkmal mle klou a urerir tirke el teru el ekebil el kirel tiang, ma kmera el di mereng a saul el diak a ulebengelel.”