Te Milechell el Chedal a Dios

“Kom chedal a RUBAK el Dios er kemiu. Ng millilt er kemiu.”—DUTERONOMI 7:6

1, 2. Ngera el mesisiich el omerellel a Jehovah a lurruul el kirir a rechedal, e ngera el deleuill a mlo er ngii er a Dios ma Rengalek er a Israel?

 SERA rak er a 1513 B.C.E., e a Jehovah a rirellii a beches el deleongel er ngii ma remesiungel el ngar er a chutem. Ngar er seikid el rak, e ngulemekrur er a mesisiich el renged e ulsobelterir a Rengalek er a Israel er a klsibai. Sera loruul el uaisei, e ngii a mlo Osobelir e Merredelir. Uchei er a loruul er a urerel, e a Dios a dilu er a Moses el kmo: “Misei e ng kiriu el dmu er a re chad er a Israel el kmo, ‘Ngak a RUBAK, ak mo rullemiu el mo mimokl er a ikel oberaod el ureor el lorrimel er kemiu a re chad er a Ekipten el meruul. Ak mo sobecheklemiu er a klsibai er kemiu. Ak udersii a mesisiich el chimak el mo meringel el omals er tir e osebelemiu er a chimorir. Ak mo ngoikemiu el mo chedak, e ngak a mo Dios er kemiu.’”​—Exodus 6:6, 7.

² Telkib el taem er a uriul er a letobed er a beluu er a Egipten, e a Rengalek er a Israel a mlo soiseb er a telbiil el obengkel a Jehovah el Dios er tir. A Jehovah a mocha er ngii a cheldebechelel er a chutem, e dikea loureor el obengkel a derta el chad ma lechub a telungalek ma lechub a klebliil, el ngar er tia el chutem. (Exodus 19:5, 6; 24:7). Ngmilsterir a rechedal a llach el mo omekrael a klengar er tir, ma lmuut el klou a ultutelel, el omekrael a omengull er tir. Ma Moses a dilu er tir el kmo: “Ng diak a tal beluu, el mo lmuut ma le sal chetengakl, me ng di diak a chelid er ngii el kmal kmeed sel lousbech er ngii, el ua RUBAK el Dios er kid el bedul kid. Ng onger er kid sel bek el domekedong er ngii el kirel a ngesou. Ng diak a tal beluu, el mo lmuut ma le sal chetengakl, me ng di diak a llechul el melemalt el di ua ikel bla kusisechakl er kemiu er chelechal sils.”​—Duteronomi 4:7, 8.

Mlechell er a Rengedir a Resioning

3, 4. Ngerang a ta er a klou el uchul e ngmla er ngii a renged er a Israel?

³ A betok el dart el rak er a uriul, e a Jehovah a ulemeklatk er a Rengalek er a Israel, el oeak a profet el Isaia, er a uchul e ngngar er ngii a rengedir. A Isaia a dilu el kmo: “Israel, a RUBAK el ngikel milebau a kmo, ‘Lak medakt, e ak mo mesebechakl er kau. Ak mla mekedongii a ngklem me ke chedak. Ele ngak a RUBAK el Dios er kau, el chedaol Dios er a Israel, el ngikel olsobel er kau. . . . A re chedak bo lluut el mei el ngar a bek el blingelel a beluulchad. Te kmal chedak, mak ulemeob er tir el mo mengebkall er ngak. . . . kemiu a sioning er ngak; ak millilt er kemiu el mesiungek el beluu, . . . Ng tir a tirikel chad el kurruul er tir el kirek, me te mo mengitakl odengesek!’ ”​—Isaia 43:1, 3, 6, 7, 10, 21.

 ⁴ A Rengalek er a Israel, el chad el mlokedong er a ngklel a Jehovah, a mesiou el ousioning el kirel a omengederederel el mo er a bek el renged. Tir a chad el ‘ulemeob er tir el mo mengebkall er a Jehovah.’ Me ngkirir el ‘mo mengitakl odengesel a Jehovah,’ e ouchais a mengasireng el urerel el olsobel me longebkall er a chedaol el ngklel. Nguaisei, ngkirir el mo chimo el renged el sioning el mo er a Jehovah.

5. Ngoeak a ngera el rolel e a Israel a ulak er a telbiil el renged?

⁵ Sera ongeteruich ma ta el dart el rak er a B.C.E., e a King el Salomon a mileketeklii el kmo a Jehovah a mla cheklii a renged er a Israel er a bek el beluu. El ngar er a nglunguchel el mo er a Jehovah e ngdilu el kmo: “Ke millilt er tir er a delongelir a rokui el chad er a bek el beluu el kmal mo chedam.” (1 King 8:53) A derta el Ngalek er a Israel a dirrek el mla er ngii a tokubets el deleongel er tir ma Jehovah. E telkib el taem er a uchei, e a Moses a dilu er tir el kmo: “Kemiu a chedal a RUBAK el Dios er kemiu. . . . Kemiu a chedaol el chedal a RUBAK el Dios er kemiu.” (Duteronomi 14:1, 2) A remekekerei el Chad er a Israel a dikea lekirir el mo tuib a rengrir el mo er a Jehovah. Te di mechell e mla mo chedal a Dios. (Psalm 79:13; 95:7) A bek el beches el telecheroll a mlosisechakl er a llechul a Jehovah e mle kirir el oltirakl er ngii e le sel telbiil el omak er a Israel el mo er a Jehovah a uchul.​—Duteronomi 11:18, 19.

Mimokl el Melilt

6. Ngera el omelilt a mle kirir a rederta el chad er a Israel el meruul er ngii?

⁶ Alta e te mlechell er a beluu el ngar er a telbiil el mo er a Jehovah, me nguaisei engdi a derta el Chad er a Israel a mle kirir el di tir el melilt el mo mesiou er ngii ma lechub e ngdiak. A uchei er a bo liuul el mo er a Beluu er a Nglat, e a Moses a dilu er tir el kmo: “Me ngak er chelechang a omeskemiu omelilt er a delongelel a klengar ma kodall, ma delongelel a klengeltengetel a Dios ma dellebeklel a Dios, e ak umekedong er a eanged ma chutem el me sioning er sel cho mngiltii. Mngiltii a klengar. Bo le betik a rengmiu er a RUBAK el Dios er kemiu e molengesenges er ngii e bo le blak a rengmiu er ngii me kemiu ma ruldidellel a rsechiu bo meketeket el kiei er ngii el beluu el le tilbir el omesterir a rucheliu el Abraham ma Isak ma Jakob.” (Duteronomi 30:19, 20) Sei a uchul, e a derta el Chad er a Israel a kirel el di ngii el melilt el mo betik a rengul er a Jehovah, e mo orrenges a tekingel, e mo bereked er ngii. E le a Chad er a Israel a mimokl el melilt, me ngngar er ngii a ngerechelel er sel tekoi el lullilt er ngii.​—Duteronomi 30:16-18.

7. Ngera dilubech er a uriul er a lemad sel telecheroll er a Josua?

⁷ Sera taem er a Mengeteklel e ngmlo bleketakl aike el tekoi el sebechel el mo duubech el okiu a blakerreng ma chad el diak el blak a rengul. Ma telkib el taem er a uchei, e a Rengalek er a Israel a uleltirakl er a ungil el kerebil a Josua me te mlukngeltengat. “A re chad er a Israel a milsiou er a RUBAK er ser a dirk le chad a Josua, e uriul er a le medei, me te di milsiou er a RUBAK er a dirk le chad a re mengeteklir el tirikel mle medengei a rokui el tekoi el le riruul a RUBAK el kirel a Israel.” E a uriul er a kodellel a Josua, “e sel mlo ongingil el telecheroll a ulebes er a RUBAK ma ikel bek el tekoi el le riruul el kirel a Israel. Misei e a re chad er a Israel a mlor a klengit el omtok er a RUBAK.” (Mengeteklel 2:7, 10, 11) E tirke el chad er a ongingil el telecheroll a dimlak lodengelii a kerresel sel dikesir el chedal a Dios, el Jehovah, el ngii a riruul a meklou el mengasireng el tekoi el kirir er a ngar er a mong.​—Psalm 78:3-7, 10, 11.

Otutel a Telbilir

8, 9. (a) Ngera el tekoi a milsterir a Rengalek er a Israel a techall el ochotii a telbilel a rengrir el mo er a Jehovah? (b) Me ngera te ngilai tirke el uleldars a tenget el mla er a rengrir?

⁸ A Jehovah a milsterir a rechedal a techellir el mo oltaut er sel telbiil el lekiltmeklii el kirel a renged el mo meruul er ngii. El ua itiang, a Llechul a mla er ngii a ulterekokl el rolel a omelenget, ma lechub e nguldars, el bebil er ngii a  mle kirir el meruul, e a kuk bebil a di tir el oldars. (Hebru 8:3) Aike el tenget a uldimukl er ngii a delaol el tenget ma tenget el keik ma tenget er a budech el ngar er a rengrir​—sengk el mo er a Jehovah el olengit a kengei er ngii ma omereng el saul.​—Levitikus 7:11-13.

⁹ Ma ika el tenget el mla er a reng el mei a uldeuir a rengul a Jehovah. Ma tekoi a mildung el kirel aike el delaol el tenget ma tenget el keik el kmo “ungil a bul bau el odeuir a rengul a RUBAK.” (Levitikus 1:9; 2:2) Ngar er sel tenget er a budech, e a rasech ma lekel a charm a mlodars el mo er a Jehovah, e a blingelir er a techel a charm a mlo kelir a reprist me ngike el millenget. Tiang a mle ua leblengur el olecholt el kmo ngar er ngii a budech er a delongelir tir ma Jehovah. A Llach a kmo: “Sel momekoad er a charm el kirel a tenget er a budech, e moltirakl a ikel llach el bla kbeskemiu, e ak mo nguu a tengetengiu.” (Levitikus 19:5) Ma rechad er a Israel, alta e te di mechell e chedal a Dios, me nguaisei engdi tirke el oldars a tenget el ngar er a rengrir a olecholt el kmo ngmera el sorir el chedal a Jehovah el uchul e ngmo sebechir el “nguu” a kengei ma klengeltengat er ngii.​—Malakai 3:10.

10. Ngmilekerang a Jehovah e ochotii el kmo ngdiak a deuil a rengul er a taem er a Isaia ma Malaki?

¹⁰ Engdi, a betok el taem e a Israel, el renged er a telbiil, a dimlak loba blakerreng el mo er a Jehovah. Me ngoeak a profet el Isaia, e a Jehovah a dilu er tir el kmo: “A delaol tengetengem el sib a dimlak molab el mer ngak; ng diak le ngak ngikel mulengull er ngii el olab a tengetengem. Ng dimlak kumekberaod er kau el okiu omengeriil el tenget.” (Isaia 43:23) Ma dirrek, aike el tenget el mlodars el dimlak loeak a bltikerreng a mo diak a ultutelel er a medal a Jehovah. El ua tiang, edei el dart el rak er a uriul er a taem er a Isaia, el mle taem er a profet el Malaki, e a Rengalek er a Israel a uleldars a smecher el charm. Isei a uchul, e a Malakai a dilu er tir el kmo: “A RUBAK el Olab a Bek el Klisiich a dmu el kmo, ‘Ng diak el deu a renguk er kemiu, me ng diak bo kngai a tenget el molab el me omeskak. . . . Kom oba rrechorech el charm el mo tengetengiu el mer ngak, ma lechub e ng meringel ochil ma lechub e ng smecher. Cho  momdasu e ng soak choua isel tengetengiu?’”​—Malaki 1:10, 13; Amos 5:22.

A Renged el Ngar er a Telbiil a Mlutngakl

11. Ngera el techall a mlo er a Israel?

¹¹ Sera taem el Rengalek er a Israel a mloak a delongelir tir ma Jehovah, e ngulelsiich a tekingel el kmo: “A lsekum kom mo olengesenges er ngak e olab a telbilek, e kom mo meral chedak. A beluulchad el rokir a kloklek, e ngdi kemiu a mo ngellitel chedak. Kom mo chimol beluu el prist el mo mesiou er ngak, el cheledaol el di kirek.” (Exodus 19:5, 6) Ngike el ngar er a telbiil el Messias a me duum er a delongelir e mo mesterir a techall el mo chedal sel kabelment el Rengedel a Dios. (Genesis 22:17, 18; 49:10; 2 Samuel 7:12, 16; Lukas 1:31-33; Rom 9:4, 5) Engdi a ruumesingd el chedal sel renged er a Israel a dimlak loltaut er a telbilir. (Matteus 22:14) Te ultngeklii a Messias e dirrek el milekodir.—Rellir 7:51-53.

12. Ngera el tekingel a Jesus a ulechotii el kmo a Jehovah a mla otngeklii a Israel me ngdikea lebeluu er a telbiil?

¹² A sesei el klebesei er a uchei er a kodellel, e a Jesus a dilu er a remengeteklel a klechelid er a Rechijudea el kmo: “Ngdirekak mchieuii ra chedaol Llechukl a kmo: ‘A bad el mlechoit rar umekedechor a blai a mla mo bad ra saus; tia le rirellii a RUBAK, me ngongasireng er chosenged’? Isei a uchul ma kdmu er kemiu el kmo, a rengedel a Dios a mengai er kemiu e morar ngodech el renged el ourodech a redemelel a rengedel a Dios.” (Matteus 21:42, 43) Ma lomeketakl el kmo a Jehovah a mla otngeklterir el beluu el miltib el mo er Ngii, e a Jesus a dilu el kmo: “O Jerusalem, Jerusalem, kau el omekoad rar profet, me tirkel mlodurch lekor kau cho mometech er tir ra bad lomekoad er tir! Ak mle mekudem el leko kmengudel rar ngelekem el ua dechuu el malk el mengudel rar ngelekel er cheungel chosobekel, me nguaisei e kau a mle chetim! Mesang, a blimiu a mechoit.”​—Matteus 23:37, 38.

A Beches el Renged er a Telbiil

13. Ngera el tekoi a lulemlaoch er ngii a Jehovah er a taem er a Jeremia?

¹³ Sera taem er a profet el Jeremia, e a Jehovah a ulemlaoch er a beches el tekoi el mo er a rechedal. Kede menguiu el kmo: “Ng mor ngii a taem el mei el bo krellii a beches el telbiil el obengterir a re chad er a Israel ma re chad er a Juda. Ng diak bo le ua sel telbiil el krirellii el mor a ruchelir er ser a kchetikikterir el tuobed er a Ekipten. Ak mle RUBAK er tir, ngdi tir a dimlak le bekelatk er a telbiil el krirellii el obengterir. A ika tekingek, ngak el RUBAK. Sel taem a le mei, e tiakid a telbiil el bo krellii el obengterir a re chad er a Israel: Ak mo locha llechuk er a uldesuir e luchesii el mor a rengrir. Ak mo Dios er tir, me tir a mo chedak. A ika tekingek, ngak el RUBAK.”​—Jeremia 31:31-33.

14. Sel beches el renged er a telbiil er a Jehovah ngmlo er ngii er a oingerang e ngera mle uchetemel? Ka msodii sel beches el renged.

¹⁴ A uchetemel tia el beches el telbiil a mlo er ngii er sera lemad a Jesus, e a uriul e ngngiluu a tenget er a mloitel el rsechel el mo er a Demal er a rak er a 33 C.E. (Lukas 22:20; Hebru 9:15, 24-26) Me nguaisei, er sera lemetengel a chedaol el reng er a Pentekost er a 33 C.E, e ngmlo er ngii a beches el renged el “Israel ra Dios,” e sola e mlo omuchel el oureor. (Galatia 6:16; Rom 2:28, 29; 9:6; 11:25,  26) A apostol el Petrus a milluches el mo er a rengellitel el Kristiano, e dilu el kmo: “Ngdi kemiu a mlengilt el rasech, e king el priist, el chedaol renged, e chad el bereked ra Dios, el kirel me momerk a chetengel chomerellel ngikel milekedongemiu era ilkolk losisebemiu ra mengasireng el llemesel. Kemiu a dimlak mchad ra Dios ra mlamemong, e chelechang e kom chad ra Dios.” (1 Petrus 2:9, 10) Seikid el ileakl el deleuill er a Jehovah ma Israel er a tech a mlo nguemed. Sera 33 C.E., e a klengeltengat er a Jehovah el mla er a Israel er a tech a mloiuul el mo er a Israel er a reng, el ongdibel er a Rekristiano, “el renged el ourodech” a rodech er a Renged er a Messias.​—Matteus 21:43.

A Telbilel a Derta el Chad

15. Seikid el sils er a Pentekost  33 C.E., e ngera el techolb a lullisiich er ngii a Petrus me lenguu tirke el ullerenges er ngii?

¹⁵ Uriul er a Pentekost 33 C.E., e a derta el Chijudea ma derta el Chisentail a mle kirir el di tir el meruul a telbilel a reng er tir el mo er a Dios e mo metecholb “loba ngklel a Chedam, ma Ngalek, ma Chedaol Reng.” a (Matteus 28:19) E sera Pentekost, e a apostol el Petrus a dilu er a resemeriar el Chijudea ma remla obult el chad el kmo: “Molodech a rengmiu ar derta er kemiu e bo metecholb el ngara ngklel a Jesus Kristus me le mechoit a kngtmiu; mo mnguu a ngat el Chedaol Reng.” (Rellir 2:38) Tirke el Chijudea ma remla obult el chad a mlo metecholb el olecholt el kmo te mla tuib a klengar er tir el mo er a Jehovah e dirrek el mla kongei el kmo a Jehovah a ousbech er a Jesus el mo ousubes a kngterir. Ngmle kirir el kongei er ngii el Ngar er a Bab el Prist er a Jehovah, e Merredelir, e Bdelul a ongdibel er a Rekristiano.​—Kolose 1:13, 14, 18.

16. Sera taem er a Paulus, e tirke el rredemelel el chad​—el Chijudea ma Rechisentail​—te milekerang e mlo chedal a Israel er a reng?

¹⁶ A betok el rak er a uriul, e a apostol el Paulus a dilu el kmo: “Ak bai ulemuchel lolisechakl rar ngara Damaskus, mar ngara Jerusalem, ma beluu ra Judea el rokir, mar Chisentail, me louuchel e lobult el mora Dios e loruul a ureor el redemelel a bult.” (Rellir 26:20) Uriul er a loterekeklii el mo er a Rechijudea ma Rechisentail el kmo a Jesus a Kristus, el Messias, e a Paulus a ngilsuterir el mo tuib a rengrir e mo metecholb. (Rellir 16:14, 15, 31-33; 17:3, 4; 18:8) Me sera lobult el mo er a Dios, e tirke el beches el disciplo a mlo chedal sel Israel er a reng.

17. Ngera el omelecha el olangch el ureor a mochu merek, e ngera el ureor a dirk melemolem?

¹⁷ Chelechang, e sel ulebongel el omelechang a olangch er a remedechel el ngellitel el Israel er a klereng a kmedu el mo merek. Sel bocha lemerek, e a tekoi a mo er “ar teual anghel” me lengai a chimorir er aike el eua el uchul a eolt el mo uchul a tellemall er a “kloul ringel.” Nguaisei, a omengudel er a “kloul seked,” el tir a melatk el mo kiei er a chutem el diak a ulebengelel, a dirk melemolem. Tirka el “ngodech el chermek el sib” a di tir el melilt el mo oumera er a “rsechel a Ngelekel a sib” e mo metecholb el olecholt er a telbilel a rengrir el mo er a Jehovah. (Chocholt 7:1-4, 9-15; 22:17; Johanes 10:16; Matteus 28:19, 20) E a ngar er a delongelir a rebetok el ngeasek el tir a mlukeroul er a rechedam ma rechedil el chad el Kristiano. Ma lsekum kau a ta er a tirkaikid el ngeasek, e ngulterekokl el soam el mo menguiu er sel ongingil el suobel.

[Footnote]

A Omeleklel a Suobel

• Ngera uchul ma Rengeasek er a Israel a dimlak el kirir el meruul a telbilel a reng el mo er a Jehovah?

• Ngmilekerang e a Rechad er a Israel a ochotii el kmo te uleltaut er a telbilel a reng er tir?

• Ngera uchul e a Jehovah a ultngeklii a Israel el telbiil el renged, e ngerang a mlo omtechei er ngii?

• Sera Pentekost 33 C.E. el mei, e ngerang a mle kirel el ruoll me bo lsebechir a Rechijudea ma Rechisentail el mo chedal a Israel er a klereng?

[Aike el Ker er a Suobel]

[Siasing er a 7 el llel]

A Rengeasek er a Israel a di mechell e chedal a Dios

[Siasing er a 9 el llel]

A derta el Chad er a Israel a mle kirir el di tir el meruul a telbilir el mesiou er a Dios

[Siasing er a 9 el llel]

A tenget el mla er a reng a milsterir a Rengalek er a Israel a techellir el olecholt er a bltkil a rengrir el mo er a Jehovah

[Siasing er a 11 el llel]

Uriul er a Pentekost 33 C.E., e a ruleltirakl er a Kristus a mle kirir el di tir el rullii a telbilel a reng er tir el mo er a Dios e ochotii el oeak a techolb