A Remedemedemek a Mo Oudiukes er a Beluulechad

“Ak uumerang el kmo a beluulechad a mo mengodech el lmuut el mo ungil. . . . Ngdiak el di lemereched e ngbai meoud, el sel taem el lebo er ngii a beches el eanged ma beches el beluulechad.”​—Aikang a tekingel a Jean-Marie Pelt, el Chad er a France el meduch el mesuub a blekerdelel a beluu.

NGMEKNGIT a rengrir er a blekerdelel a beluulechad ma klechad a uchul, ma rebetok a oureng el mo mesang a beluulechad el mo mengodech el mo paradis. Engdi tia el omelatk a diak el di ua leberrous el tekoi er a chelecha el taem. A irechar, e a Biblia a tilbir a smechel a Paradis el ngar er tia el chutem. A rebetok el chad a kmal medengei aike el tekingel a Jesus el kmo “ar medemedemek . . . te mo oudiukes ra belulechad” ma “uldesuel a rengum le meruul ra belulechad el ua chomerellel ra eanged.” (Matteus 5:5; 6:​10) Engdi chelechang e ngdiak lebetok el chad a oumerang el kmo a chutem a mo paradis el bo lekiei er ngii a remedemedemek a rengrir el chad. E le ngngar er a osengir a ruumesingd er tirke el leko te Kristiano, e a uldasu el kirel a Paradis a mla remiid.

A ta el babier er a France a mesaod er sel uchul ma klaumerang el kirel a paradis​—el ngar er a chutem ma lechub e ngngar er a eanged​—a mla mo diak, el ua lolekoi a Ikelesia er a Katolik el kmo: “Chelsel a bekord el 1900 el rak, e tia el osisechakl er a paradis a mle klou el osisecheklir a Rekatolik, e a uriul e ngmlo diak er a osisecheklir er a tekoi er a klereng el obengkel a omengull er a Sandei ma osisecheklel a klechelid er tir ma omesuub el katekismo.” Tia el tekoi el paradis a ua lechelucheb er a “okrokr el chetechat” er a “berrotel el tekoi ma rraurreng.” A rebebil el mengeteklel a klechelid a kmal diak lousbech er ngii e le “ngomekdubech a betok el uldasu el kirel a deurreng el ngar er tia el beluulechad.”

El ngar er a osengel a Frédéric Lenoir, el chad el mesuub a blekerdelir a rechad, el ileakl a blekerdelel a klechelid, e tia el uldasu el kirel a paradis a ua bla bo “luldasu el lobang a rebetok el chad.” Ma dirrek el Jean Delumeau, el chad er a omesubel a reksi el mla lmuches a betok el babier el kirel a reksi, a omdasu el kmo a otutel a telbiil er a Biblia a di okesiu el tekoi e merekong. Ngmeluches el kmo: “Ma ker el kmo, ‘Ngera kede dmung el kirel a Paradis?’ A klaumerang er a Rekristiano a onger el kmo: A okiis er ngike el Osobel a uchul, e a ta er a klebesei e kede mo kaiuerekedechim e mo mesa deurreng.”

Ma ker a kmo, tia el klumech el kirel a paradis el ngar er a chutem ngdirk ngar er ngii a ultutelel? Ngera el tekoi a mo duubech er tia el chutem er a ngar er a medad el klebesei? A osenged el kirel a ngar er a medad ngkora mengab, ma lechub e ngbleketakl? A ongingil el suobel a mo onger aika el ker.