Bo Lemellomes a Rengum​—E Moluu er a Dios!

“A omeluu er a RUBAK a uchelel a llomeserreng.”​—OSISECHAKL 9:10.

1. Ngera uchul ma rebetok a metik er tia el dakt el bedul a Dios el ua lemeringel er tir a mo medengelii?

 NGMLA er ngii a taem el dakt el bedul a Dios a lulemes er ngii el ua lungil el tekoi. Chelecha el sils, e a rebetok el chad a omes er tia el tekoi el ua letekoi er a ngar er a mong el meringel er kid a mo medengelii. Te blechoel el oker el kmo, ‘A lsekum a Dios a bltikerreng e ngera mak medakt er ngii?’ Te omes er a dakt el ua lemekngit el blekeradel el mengitechut. Engdi a mera el dakt el bedul a Dios a ngar er ngii a lmuut el klou el belkul, e kede mo mesang el kmo ngdiak el di leblekerdelel a reng e lemerekong.

2, 3. Ngera uldimukl er a melemalt el dakt el bedul a Dios?

² Sel dakt el bedul a Dios, el lousbech er ngii a Biblia, a melekoi el kirel a ungil el blekeradel. (Isaia 11:3) Tiang a klou el omeluu ma dmolech el omengull el mo er a Dios e dirrek el mesisiich el urunguled el diak el soad el tomellii a rengul. (Psalm 115:11) Ngdirrek el uldimukl er ngii sel dekengei el mo mui el oltirakl aike el llechul a Dios el kirel a kldung ma urunguled el soad el kiei el oltirakl aike el lolekoi el kmo ngmelemalt ma lechub e ngdiak. A ta el babier a melekoi er tia el melemalt el rolel a dakt el kmo “ngklou a ultutelel el blekeradel el bedul a Dios el choitikikid el mo er a ungil el omeruul e oridid er a bek el bedengel a mekngit.” Misei a uchul ma Tekingel a Dios a melekoi er kid el kmo: “A omeluu er a RUBAK a uchelel a llomeserreng.”​—Osisechakl 9:10.

³ Chochoi, a dakt el bedul a Dios a ngar er ngii er a betok el blekerdelir a rechad. Ngdiak el di bo luchul a llomeserreng e lemerekong, e ngdirrek el mo uchul a deurreng ma budech ma ilteet ma kemanget el klengar ma omelatk ma klaumerang ma ulterekokl el reng. (Psalm 2:11; Osisechakl 1:7; 10:27; 14:26; 22:4; 23:17, 18; Rellir 9:31) Ngar er ngii a kmeed el deleongel er ngii ma klaumerang ma dirrek el bltikerreng. E a mera er ngii, nguldimukl er a cherrengelel tia el deleongel er kid el obengkel a Dios ma rechad. (Duteronomi 10:12; Job 6:14; Hebru 11:7) A dakt er a Dios a uldimukl er a dmolech e ulterekokl el klaumerang el kmo a Demad el ngar er a eanged a omekerreu er a derta er kid e kltmokl el mo ousubes a kngtid. (Psalm 130:4) Ngdi tirke el diak lobult er a omerellir el mekngit el chad a ngar er ngii a uchul e te medakt er a Dios. a​—Hebru 10:26-31.

Mosuub el Mo Medakt er a Jehovah

4. Ngera sebechel el ngosukid el “mesuub el mo meluu er a RUBAK”?

⁴ E le a dakt el bedul a Dios a klou a ultutelel me bo lsebeched el mellomes el melilt a tekoi e ngmai a klengeltengat er a Dios, me kede mekerang e “mesuub el mo meluu er a RUBAK” el ngar er a melemalt el rolel? (Duteronomi 17:19) A betok el kerebai er a remeluu er a Dios el sechal ma redil a ngar er a chelsel a Bades “el kirel chosisechakl el mer kid.” (Rom 15:4) Me bo lsebeched el mo medengelii a mera el belkul a doluu er a Dios, e me bo domes er a klengar er a ta er tirke el kerebai, el King el David er a Israel er a ngar er a mong.

5. Ngmilekerang e mo sebechel a ureor el mengkar a sib el ulsisecheklii a David el mo oba dakt el bedul a Jehovah?

⁵ A Jehovah a ultngeklii a Saul, el ngike el kot el king er a Israel, e le ngdimlak loba dakt el bedul a Dios e bai mle medakt er a rechad. (1 Samuel 15:24-​26) Engdi sel kuk domes er a rolel a klengar er a David me sel mle kmes el deleongel er ngii ma Jehovah e ngullecholt el kmo ngkmal uleba dakt el bedul a Dios. Me sera lekekerei el chad, e a David a mle blechoel el mengkar a chermel a demal el sib. (1 Samuel 16:11) Ngulterekokl el oeak aike el betok el klebesei el longkar a sib e lomes a btuch e ngngilsuir a David el mo melechesuar a dakt el bedul a Jehovah. Malta e ngmiltebengii a di mle telkib er tia el cheldellel a btuch el deseluk er a chelsel, engdi ngmle sebechel el mo uchul a melemalt  el uldesuel el kmo a Dios a rredemellel a omengull ma odanges er kid. Ngmilluches er a uriul el kmo: “Sel kumes er a melidiul el mrirellii, e kisa buil ma btuch el mlilechang er olsechelel, e ng ngera belkul a chad me ke kmal melatk er ngii; ng di chad, e ke kmal omekerreu er ngii?”​—Psalm 8:3, 4.

6. Ngera mle uldesuel a David er sera bo lolechesuar sel klengarbab er a Jehovah?

⁶ Ngmera el tekoi, a David a kmal mle mechas a rengul er sera lomekesiu er ngii ma tia el kmal klou el cheldellel a btuch er a eanged. Tia el klemedengei a dimlak lomekdakt er ngii, ngbai rirellii el mo oldanges er a Jehovah e melekoi el kmo: “Ngkmal bleketakl a eanged el olecholt er a klebkellel a Dios! Ng kmal bleketakl el olecholt a bla leruul!” (Psalm 19:1) Tia el omeluu el mo er a Dios a ulekesengii a deleuill er a David ma Jehovah e rirellii el mo soal el mesuub el kirel a Dios e mo oltirakl er a melemalt el rolel. Ka molatk er a uldesuel a David er sera longitakl el mo er a Jehovah el kmo: “Kau ia ngarbab e meruul a mengasireng el tekoi, ng di kau el tang a Dios. Mosisecheklak er a rolem e RUBAK, me bo kurael er a klemerang er kau, mrellii a renguk el mo meluu er a ngklem.”​—Psalm 86:10, 11.

7. Ngmlekerang e a dakt el bedul a Dios a ngilsuir a David el mo okoad er a Goliath?

⁷ Sera lesiseb er a beluu er a Israel a rechad er a Filistia, e ngike el Goliath el mle etiu ma tedobech el fit a telongklel el chad, a milsemai er a rechad er a Israel el melekoi er tir el kmo: ‘Mngiltii a tar kemiu el me okoad er ngak! A lsekum ng mo mesisiich e a kim mo mesiungiu.’ (1 Samuel 17:4-10) A Saul ma resoldau er ngii a kmal mle medakt​—engdi a David a dimlak. Ngmle medengei el kmo a Jehovah a ngike el kired el mo medakt er ngii, el diak lengii di el chad, a lemesisiich ma lak. A David a millekoi er a Goliath el kmo: “Ngak ekong el oba ngklel a RUBAK el Olab a Bek el Klisiich, ma bek el chad el ngar tiang a mo omes el kmo ng diak lousbech a saider ma biskang el olsobel er a re chedal. Ng mesisiich er a mekemad.” Me nguleak a ngelseuil a Jehovah, e a David a milekodir ngika el mekoar el chad el loba balech ma di chimo el bad.​—1 Samuel 17:45-​47.

8. Ngera ngosisecheklid er ngii aike el kerebai er tirke el mle medakt er a Dios?

⁸ Kid me kede dirrek el mo chelebangel a meringel el blekeradel ma omengarm er a recherroued el ua ike el ble lechelebangel a David. Me kede mo mekerang? Ngsebeched el sumechokl a tekoi el oeak sel doba dakt el bedul a Dios el ua ike el lurruul a David ma reblak a rengrir el chad er a irechar. Ma dakt el bedul a Dios a sebechel el mo mesisiich er a dakt el mo er a chad. A blak a rengul el mesiungel a Dios el Nehemia a milengelechel er a rekldemel el chad er a Israel, el tir a mla er a eungel a omelasem er a ruumtok er tir el kmo: “Lak  medakt er a re cherroued. Molatk er a RUBAK [el Jehovah] el mesisiich e kdekudel.” (Nehemia 4:14) El oeak a ngelsuil a Jehovah, e a David ma Nehemia ma rebebil el blak a rengrir el mesiungel a Dios a mlo ungil el oltaut a ngerechelir el lebilsterir a Dios. Kid me ngdirrek el sebeched el meruul el uaisei sel doba dakt el bedul a Dios.

Sel Dechelebangel a Mondai el Loba Dakt el Bedul a Dios

9. Ngoeak a ngera el blekeradel e a David a chilolt el uleba dakt el bedul a Dios?

⁹ A David er a uriul er a lokodir a Goliath, e a Jehovah a milsa lmuut el betok el kats. Engdi a bechechelingaol el Saulus a millasem el osiik a rolel el omekoad er a David, el kot e ngulemekbat er ngii, e a uriul e nguluusbech er a ururt er ngii. Malta e a Jehovah a ulterekeklii a David el kmo ngmo king, engdi ngmle kirel el chemiis e okoad e mengiil er sel temel er a Jehovah el mo rullii el mo king. Me ngoeak aika el rokui el blekeradel, e a David a chilolt el uleba dakt el bedul a mera el Dios.​—1 Samuel 18:9, 11, 17; 24:2.

10. Ngmilekerang a David e chilolt el medakt er a Dios er a chelsel a meringel el blekeradel?

¹⁰ A ta el taem, e a David a ulsiik a osebechakl el obengkel a Akis, el king er a Gath, el mats er a Filistia, e belual a Goliath. (1 Samuel 21:10-​15) A remesiungel a king a ultngeklii a David e ulemes er ngii el ua lecherroel a rengedir. Ngmilekerang a David er tia el kmal kdekudel el blekeradel? Ngmle blak a rengul el meluluuch el mo er a Jehovah. (Psalm 56:1-4, 11-13) Malta ngmle kirel el rullii el mo ua kebelung el chad, engdi ngii a mle ungil el medengei el kmo a Jehovah a ulsebelii er a lomekngeltengat er ngii. Me ngoeak a blekerdelel a David el mle cherrungel a klaumerang er ngii er a Jehovah, e ngulechotii el kmo ngmera el uleba dakt el bedul a Dios.​—Psalm 34:4-6, 9-11.

11. El ua David, e kede mekerang e ochotii a dakt el bedul a Dios sel dechelebangel a omelasem?

¹¹ El ua David, kid me ngdirrek el sebeched el lolecholt el kmo kede medakt er a Dios sel doumerang er a telbilel el mo ngosukid el outekangel a mondai er kid. A David a millekoi el kmo: “Modersau  el mor a RUBAK [el Jehovah]; moumeral ulsirs er ngii, e ng mo ngosukau.” (Psalm 37:5) Tiang a diak lebelkul a kmo kede di odars a mondai er kid el mo er a Jehovah e diak doruul a ngerang el kirel e ousbech el kmo ngmo sumechokl a mondai er kid. A David a dimlak di loluluuch el mo er a Dios el kirel a ngeso e lemerekong. Nguluusbech aike el dechal ma llemesel el lebilsang a Jehovah el mo mesmechokl a mondai er ngii. E le David a mle medengei el kmo ngdiak el sebechel el di klisichel a chad e bo luchul a klungiaol. Kid me ngdirrek el kired el mo uaisei. Me kede meruul aike el sebeched, e aike el diak a lengesukid er ngii a Jehovah. Engdi a mera er ngii, ngkired el di ultuil er a Jehovah e le ngdiak el sebeched el di kid el meruul a tekoi. Me ngngar er tiaikid el taem e ngkirel a dersta er kid el olecholt er a mera el dakt el bedul a Dios. Ngsebeched el ngmai a ongelaod er a tekingel a David el kmo: “A RUBAK [el Jehovah] a ousechelei er tirkel meluu er ngii.”​—Psalm 25:14.

12. Ngera uchul me ngkired el omes a nglunguched el ua lemekreos, e ngera el blekeradel a diak el kired el mo obang?

¹² Me nguaisei, ngkired el omes er a nglunguched ma deleongel er kid ma Dios el kmal mekreos el tekoi. Sel doluluuch el mo er a Jehovah, e ngkired el “loumera el kmo ngngarngii a Dios, e dirrek loumera el kmo tirikel osiik er ngii a le besterir chomeksulir.” (Hebru 11:6; Jakobus 1:5-8) Me sel lengesukid, e ngkired el ‘mereng a saul,’ el ua lomeklatk er kid a apostol el Paulus. (Kolose 3:15, 17) Ngkmal diak el soad el mo ua itirke el losaod er tir a ta el ngellitel el Kristiano el kmo: “Te omes er a Dios el ua lechad el ngar er a eanged el oderuchel. Me sel bo lousbech er ngii, e te di olekesebakl a chimorir e ngmei. Me sel lengai aike el lousbech, e ngmla mo di ungil a lorael.” A choua isel blekeradel a ochotii el kmo ngdiak loba dakt el bedul a Dios.

Sel Bo Lemechitechut a Dakt el Mo er a Dios

13. Ngoingera el taem e a David a dimlak lochotii a omengull er ngii el kirel a Llechul a Dios?

¹³ Me ngoeak a ngelseuil a Jehovah el mo er a David el blo lolechesuar er a chelsel aike el meringel el taem e ngliluut el mo dmolech a klaumerang er ngii ma dektel el bedul a Dios. (Psalm 31:22-24) Engdi ngmla er ngii a edei el taem el blo lemechitechut sel dektel a David el bedul a Dios, e tiang a mlo uchul a oberaod el klengit. Sel kot el tekoi a dilubech er sera lousbech er a kareta el melukl er a blil a telbiil er a Jehovah el mo er a Jerusalem e bai dimlak loltirakl er a Llechul a Dios el kmo ngkirir a Relevait el mengol er ngii. Me sel taem er a lolasem a Usa el mo orreked er tia el Blil a Telbiil el mlo soal el kmoll, e ngmlad e le “ng dimlak le medakt el merutech er a Blil a Telbiil.” Chochoi, a Usa a rirebet er a oberaod el klengit, engdi a mera er ngii, e ngmle kngtil a David e le ngii el dimlak loba melemalt el omengull el kirel a Llechul a Dios ma uchul e tia el tekoi a dilubech. A doba dakt el mo er a Dios a belkul a kmo kede meruul a tekoi el oltirakl aike el soal.​—2 Samuel 6:2-9; Ulecherangel 4:15; 7:9.

14. Ngera dilubech e le David el millai a ulecherengelir a rechad er a Israel?

¹⁴ A uriul, e a Satan a rirellii a David el mo soal el melai er a ulecherengelir a resoldau er a Israel. (1 Kronika 21:1) Me sera loruul el uaisei, e a David a ulecholt el kmo ngmle mechitechut a dakt er ngii er a Dios el mlo uchul a kodellir a re 70,000 el Chad er a Israel. Malta e a David a ulebult er a medal a Jehovah, engdi ngii me tirke el illiuekl er ngii a kmal mlo chuarm.​—2 Samuel 24:1-​16.

15. Ngera rirellii a David el mo ruebet er a deleboes?

¹⁵ Ma ta er a chelitechetul a David el mora Dios a sera lerebet er a deleboes el obengkel a Bathseba, el bechil a Uria. A David a mle medengei el kmo a deleboes ma lechub e nglaokreng el bedul a bechil a ta er a chad a mle mekngit. (Exodus 20:14, 17) Tia el mondai a ulemuchel er a lomes er a Bathseba el melecholb. A melemalt el dakt el bedul a Dios a mle kirel el mereched el rullii a David el mo ochebir a medal ma uldesuel el mo melatk a kuk ngodech el tekoi. Engdi ngii a bai ‘di millemolem el lomes’ er ngii ma ngelbesel a rengul a mlo mesisiich er a dektel er a Dios. (Matteus 5:28; 2 Samuel 11:1-4) A David a ulebes el kmo a Jehovah a mle medengei a bek el tekoi er a klengar er ngii.​—Psalm 139:1-7.

16. Ngera el tekoi a blo lecharm er ngii a David el kngtil a uchul?

¹⁶ Me ngdeleboes el omeruul el leblo er ngii a David el obengkel a Bathsheba a mlo uchul me ngmlo er ngii a ngalek el sechal. Me ngtelkib er a uriul, e a Jehovah a uldureklii a profet el Nathan el mo olecholt er a kngtil a David. Me sera bo lodengelii tia el kngtil, e ngliluut el nguu sel dektel el bedul a Dios e ulebult. Me ngullengit  er a Jehovah me lak lecheridii a chedaol el reng er Ngii. (Psalm 51:7, 11) A Jehovah a uluusubes er a David e milengebekakl a kelebsengel, engdi ngii a mlo chuarm e le ngmekngit el omerellel a uchul e a Jehovah a dimlak el olsebechakl er ngii. Ma ngelekel a mlad e a klengiterreng ma chelebuul a millemolem el ngar er a chelsel a telungalek er ngii el kemanget el taem. Ngkol ua ngera el char a mle kirel el mengkad er ngii e le ngii el mlo mechitechut a dakt er ngii er a Dios!​—2 Samuel 12:10-14; 13:10-14; 15:14.

17. Ka momekesiu er a klengiterreng el mo er ngii e le ngklengit a uchul.

¹⁷ Me ngdi osisiu er a chelecha el sils, a lsekum e ngdiak a tekoi er a kldung ma dakt el bedul a Dios e ngsebechel el mo uchul a melemolem el kemanget el ringel el kired. Ka di molatk er a ringel el lechilebangel er ngii a ta el kekerei el bechiil el redil el mlo medengei el kmo a bechil el Kristiano a mlo er a laokreng er a loureor er a ta er a beluu. Ngkngtil a rengul me ngkmal di lmangel. Ngmo ua ngerang a klemengetel el taem a lousbech er ngii a bechil e ngmo sebechel el lmuut el nguu a klaumerang ma omengull er ngii? A choua isel mekngit el tekoi a sebeched el ochebir a lsekum e kede mera el medakt er a Dios.​—1 Korinth 6:18.

A Dakt er a Dios a Mengeroid er Kid er a Klengit

18. Ngerang a rolel ma moktek er a Satan a loruul a tekoi?

¹⁸ A Satan a melemall a tekoi er a kldung er a beluulechad e tokubets el soal el melemall er a remera el Kristiano. A bo loruul el uaisei, e ngngousbech er sel kot el mereched el rael el me er a rengud ma uldesued​—el oeak a medad ma dingad. (Efesus 4:17-19) Ke mo mekerang a lsekum e ke remenges a mekngit el tekoi ma lechub e ngmekngit el siasing ma dirrek a rechad?

19. Ngmilekerang a dakt el mo er a Dios a ngilsuir a ta el Kristiano el mo mesisiich er a ongetikaik?

¹⁹ Ka molatk er a Andre, b el ta er a elder el Kristiano, e chedam e dirrek el toktang er a beluu er a Europe. A ta el taem e nguluureor el ta el kesus er a osbitar, e tirke el redil el ledilak el oureor a milluches a klebokel el babier e ulemereked er a chillel, e milengesuseu er ngii el mo er a deleboes el obengterir. Engdi a Andre a ultngeklii tia el mekngit el omeruul. Misei e ngmle soal el mo cheroid er tia el mekngit el basio, me ngmlo osiik a ureor er a ta er a basio. Ma dakt el mo er a Dios a mle mellomes el tekoi el lerirellii, me ngmlo uchul a klengeltengat, me chelecha el sils e a Andre a mesiou el part-time er a obis er a branch er a Resioning er a Jehovah er a belual.

20, 21. (a) Ngmekera e a dakt er a Dios a ngosukid me lak debo er a klengit? (b) Ngerang a bo dosaod er ngii er a ongingil el suobel?

²⁰ A dolemolem el omdasu a mekngit el uldasu e ngsebechel el mo uchul e a chad a mo kongei el choitii a mekreos el deleongel er ngii ma Jehovah el kirel a tekoi el ngii a diak el kirel el meruul. (Jakobus 1:14, 15) Ma lmuut el tang, a lsekum e kede medakt er a Jehovah, e kede mo mengeroid er kid​—ma lechub e kede merael el mo er a cheroid​—er a rechad ma basio ma omilil ma tekoi er a ongelaod el sebechel el mo uchul e ngchoitechetur a tekoi er a kldung er kid. (Osisechakl 22:3) Me ngdiak a ngii di el tekoi el bo demerur er ngii ma lechub a omelenget er kid el sebechel el mekesiur sel doridii a kengei er a Dios. (Matteus 5:29, 30) A dakt el mo er a Dios a ulterekokl el uldimukl er ngii sel lak el durengud el omes a ngii di el tekoi el mekngit, el ua ike el mekngit el siasing, e bai “mochib a medak er a chelsengsang.” A bo doruul el uaisei, e ngsebeched el oumera el kmo a Jehovah a ‘momekngar er kid’ e meskid aike el rokui el dousbech.​—Psalm 84:11; 119:37.

²¹ Chochoi, ngblechoel el mo uchul a llomeserreng sel doruul a tekoi el oba melemalt el dakt el mo er a Dios. Ngdirrek el uchul a mera el deurreng. (Psalm 34:9) Tia el tekoi a mo obeketakl er a ongingil el suobel.

[Footnote]

Ngsebechem el Mesaod?

• Ngera el blekerdelel a Kristiano a uldimukl er ngii a dakt el mo er a Dios?

• Ngmekerang e a dakt el mo er a Dios a mo mesisiich er a dakt el mo er a chad?

• Kede mekerang e ochotii el kmo ngar er ngii a melemalt el osenged el kirel a nglunguuch?

• Ngmekerang e a dakt el mo er a Dios a choridid er a klengit?

[Aike el Ker er a Suobel]

[Siasing er a 9 el llel]

A David a mlo medengelii a dakt el mo er a Dios er sera lomtab aike el blebelel a Jehovah

[Siasing er a 10 el llel]

Ke mo mekerang a lsekum e ke di mereched el mo chelebangel er a ongetikaik?