“Le Meruul ra Belulechad el Ua Chomerellel ra Eanged”

“Sel klaumerang er a Katolic a mesaod a Eua el Ulebongel el Tekoi: A Kodall ma Kerrekeriil ma Beluu er a Ngau ma Eanged.”​—Catholicism, el lulluches er ngii a George Brantl.

MOMTAB aike el tekoi el llechukl, ngmesaod el kirir a rechad, el diak el chutem. Tia el tekoi a diak lemechas a rengud er ngii e le a Ikelesia er a Katolic a di ua ike el bebil er a klechelid, el oumerang el kmo a chutem a mo metemall er a ta er a klebesei. Sel babier el Dictionnaire de Théologie Catholique a meketeklii tiang el ngar er a omesodel er a suobel el “A Ulebongel er a Beluulechad” el kmo: “A Ikelesia er a Katolic a oumerang e dirrek el olisechakl el kmo tia el beluulechad, el lebilebii a Dios, a diak di lemedechel el mo cherechar.” A beches el osisechakl er a Rekatolic a dirrek el oba tiakid el tekoi el kmo: “A beluulechad er kid . . . a mo dibus er a ta er a klebesei.” Engdi a lsekum tia el chutem el dekiei er ngii a mo dibus, e ngngera belkul sel telbilel a Biblia el kirel a paradis el chutem?

A Biblia a kmal bleketakl el melekoi el kirel a paradis el chutem er a ngar er a medad el taem. El ua itiang, a profet el Isaia a milsaod el kirel a  chutem me tirke el mo kiei er ngii el kmo: “A re chad a toketek a blai e mo kiei er ngii; el diak le ngodech el chad a mo ousbech. Te mo dualem a sers er a bilong, e mo dmeu a rengrir er a bilong; ng diak le kuk ngodech el chad a mo melim. A re chedak a mo kemanget a klengar er tir el ua kerrekar. Ng mo cherrungel a deuil a rengrir er a ikel uluureor el kirel.” (Isaia 65:21, 22) A Rechijudea, el ngilai aika el telbiil er a Dios, a kmal uluumerang el kmo a Beluu er a Nglat​—ma beluulechad el rokir​—a mo paradis el mo uchul a klungiolir a rechad er a ta er a klebesei.

A Psalms 37 a oterekeklii tia el omelatk el kmo: “Tirkel medemedemek a mo ungilbesrir el kiei el ngar a beluu.” (Psalm 37:11) Tia el bades a diak lolekoi er a di tedeb el smechel a renged er a Israel el ngar er a Beluu er a Nglat e lemerekong. Tia el osisiu el psalm a meketeklii el kmo: “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.” (Psalm 37:29) a Mutebengii tia el kmo a psalm a melekoi er a diak a ulebengelel el klengar el ngar er tia el chutem el ua leklengeltengat el mo er “tirkel medemedemek.” El ngar er a Biblia er a tekoi er a France, e a omesodel tia el tekoi el “medemedemek” a kmo, “ngar er ngii a dmolech el belkul el mocholt er a oidel a tekoi, el uldimukl er ngii a remechebuul ma rechormang er a odechelakl el kirel a Yahweh, ma rengar er a eou a rengrir el tir a chederedall er a Dios.”

Ngar er a Chutem ma lechub el Ngar er a Eanged?

Ngar er a cheldechedechal er a Rois, e a Jesus a rirellii a telbiil el omeklatk er kid er aike el bla desuub el bades el kmo: “Te ngeltengat ar medemedemek, le te mo oudiukes ra belulechad.” (Matteus 5:5) Me tia el tekoi a lmuut el oterekeklii el kmo a chutem a mo kloklir a reblak a rengrir el chad el mo cherechar. Me nguaisei, engdi a Jesus a mileketeklii el mo er a rechapostol er ngii el kmo ngmo kutmeklii a basio el kirir el ngar er ‘a blil a Demal’ me tir a mo er a eanged el obengkel. (Johanes 14:1, 2; Lukas 12:32; 1 Petrus 1:3, 4) Me kede mekerang e mo medengei a belkul aike el klengeltengat el me er tia el chutem? Ngngar er ngii a belkul er a chelecha el taem, e aika el klengeltengat ngmo er a rua techang?

A rebebil el mesuub a Biblia a melekoi el kirel “a belulechad” el losaod er ngii a Jesus er a Cheldechedechal el ngar er a Rois ma dirrek el ngar er a Psalm 37 el kmo ngdi okesiu el tekoi e merekong. A tekingel a F. Vigouroux el ngar er a babier el Bible de Glaire el kirel aike el bades a kmo “ngdi okesiu el tekoi el kirel a eanged ma Ikelesia.” E a chad er a France el merritel er a Biblia el M. Lagrange a ngklel, a dmu el kmo tia el klengeltengat “a diak el telbiil el mo er a remedemedemek el kmo te mo ouklalo er tia chutem el lekiei er ngii, el ka lolekoi el kirel chelecha el blekeradel ma ka lengar er a eungel a kuk cherrungel el blekeradel, e ngbai melutk el mo er sel basio el lebo er ngii a renged er a eanged.” E a kuk ta er a chad a dmu el kmo, tiang a “ousbech a tekoi el ngar er a chutem el omekesiu a tekoi el ngar er a eanged.” E a rekuk bebil a kmo, a “beluu er a nglat, el Kanaan, a di okesiu el tekoi, el omtechei er a rengedel a Dios el ngar er a bab, el mla moterekokl el mo kloklir a remedemedemek a rengrir. E tia dirrek el osisiu a belkul el ngar er a Psalm 37 ma kuk bebil el bades.” Me tiang belkul a kmo, kid a kired el mereched el cheklii tia el chutem er aike el telbilel a Dios?

A Diak a Ulebengelel el Moktek el kirel a Chutem

Sera kot el uchul, e tia el chutem a mle uldak er a moktek er a Dios el kirir a rechad. Ngike el milluches er a psalm a kmo: “A eanged a kloklel a RUBAK [el Jehovah] el di ngii el tang, ngdi beluulchad a le bilsterir a re chad.”  (Psalm 115:16) Ma leuaisei, e a moktek er a Dios el kirel a klechad a ngar er a chutem, el diak lengar er a eanged. A Jehovah a milsterir a reteru el obekel a ngerechelir el mo menglou er a sers er a Eden el mo chiueklii a chutem el rokir. (Genesis 1:28) Tia el moktek a dimlak el ble letelkael a temel. A Jehovah a ulterekeklii el ngar er a Tekingel el kmo a chutem a mo medechel el mo cherechar: “A telecheroll a memochang ma beches el telecheroll a mermang, e a beluulchad a di ua isei el mo cherechar.”​—Olisechakl 1:4; 1 Kronika 16:30; Isaia 45:18.

A telbilel a Dios a kmal diak el bo leiit, e le ngii a Kot el Ngar er a Bab, e ngii a oterekeklii el kmo ngmo tmaut. A Biblia a omekesiu er a ulterekokl el otutel a telbilel a Dios el mo er a rolel a lemetengel a ralm el kmo: “A tekingek a ua snow ma chull el ngar a melidiul el me metengel el me melubs er a beluulchad. Ng meruul a dellomel me ng duubech . . . Ng dirrek el mo ua isei ngii el tekingek el kulekoi er ngii, ng diak le iit el rullii sel kulemdasu er ngii el kirel; ng mo remuul a bek el kuldurech er ngii el mo meruul.” (Isaia 55:10, 11) A Dios a meruul a telbiil el mo er a rechad. E sebechel el mo chuib a kemanget el taem er a uchei er a bo lemotaut ngii el telbiil, engdi ngulterekokl el mo tmaut. Ng “diak le iit el rullii” aike el rokui el bla ledung el tekoi.

A Jehovah a kmal “mlo ungil a rengul” er sera lomeob er a chutem el kirir a rechad. Ma ngar er a ulebengelel a ongelolem el sils er a lomeob, e ngdilu el kmo aike el bek el bla lrruul a “kmal mlo ungil.” (Genesis 1:31) A omerellel a chutem el mo paradis el mo er a diak a ulebengelel el taem a mle uldimukl er a moktek er a Dios el ngii a dirkak lemotaut. Nguaisei, a telbilel a Dios a ‘diak le iit el rullii sel lulemdasu er ngii el kirel.’ A rokui el telbiil el kirel a cherrungel el klengar el ngar er a chutem, el bo lekiei er ngii a rechad el ngar er a budech ma ulekerreu, a ulterekokl el mo tmaut.​—Psalm 135:6; Isaia 46:10.

A Moktek er a Dios a Ulterekokl el Mo Tmaut

A kngtil ngike el kot el demad ma delad, el Adam ma Eba, a milengesang er a moktek er a Dios el meruul er a chutem el mo paradis el telkib el taem. Sera bo lak lolengesenges, e te mlodik er a sers. Misei, e turridii sel techall el mo teloi er a otutel sel moktek er a Dios el kirir a remecherrungel el chad el mo kiei er a paradis el chutem. Me nguaisei engdi, a Dios a kiltmeklii a tekoi el mo oltaut er a moktek er ngii. E oeak a ngera el rolel?​—Genesis 3:17-19, 23.

A blekeradel el ngar er a Eden a mle ua chad el mlo omekedechor er a blai el ngar er a kmal ungil el chutem. E sera leketmeklii a omekedecheraol, e a chad a mlei el tomellii. Me ngika el chad a osiik a rolel el merekui er sel blai er a bai lebecherei me lemechoit. Malta e tia el ureor a liluut el mo meringel a cheral, engdi ngulterekokl el soal el rokir sel letilbir el mo meruul er ngii er a kot el uchul.

Me nguaisei, a Dios a mla kutmeklii a rolel me lemotaut a moktek er ngii. Ngdi mle telkib el taem er a uriul er a lerebet er a klengit a kot el demad ma delad, e ngmilsubed el kirel a omelatk el mo er a rengelekir​—“ngikel rasech er ngii” el mo rullii sel miltemall el mo ungil. Ma lebocha loltaut er tia el ulaoch, e a kot el chedal “ngikel rasech er ngii” a Ngelekel a Dios, el Jesus, el ngii a mle er a chutem el me tongetengii a klengar er ngii el melubet er a klechad. (Galatia 3:16; Matteus 20:28) Me sera lebekiis a Jesus el mo er a eanged, e ngmlo King er a Renged. Ma kot, e ngii a ngike el medemedemek el mo oudiukes er a chutem el obengterir a reblak a rengrir el ngellitel el mo mekiis el mo er a eanged el obengkel el mengedereder er a Renged. (Psalm 2:6-9) E a taem a mei, e tia el kabelment a mo mengedereder er a chutem e mo oltaut er sel mle moktek er a Dios er a kot el uchul, e rullii el mo paradis. A rebetok el milliol el medemedemek a rengrir a mo “oudiukes ra belulechad” el belkul a kmo te mo ngmai a klungiolir er a omengederederel tia el Rengedel a Jesus Kristus ma rubengkel.​—Genesis 3:15; Daniel 2:44; Rellir 2:32, 33; Chocholt 20:5, 6.

“Ra Belulechad el Ua Chomerellel ra Eanged”

Tia el osobel a ngar er ngii a eru el rolel, a mo er a eanged ma mo er a chutem, el mlocholt er a ues er a apostol el Johanes. Ngmilsterir a reking  el dengchokl er a kingall er a eanged el tir a mlengilt er a delongelir a reblak a rengrir el disciplo er a Kristus. A Biblia a bleketakl el mesaod el kirir tirka el mo obengkel a Kristus el kmo “te mo mengedereder ra belulechad.” (Chocholt 5:9, 10) Ka momes aika el eru el tekoi el kirel a otutel a moktek er a Dios​—a smechel a paradis el chutem el ngar er a eungel a ulekrael er a Renged er a eanged el chad er ngii a Jesus Kristus ma rubengkel. Aika el rokui el bla leketmokl a Dios a mo rullii a chutem el mo Paradis el oltirakl er sel mle moktek er a Dios er a kot el uchul.

El ngar er a nglunguchel, e a Jesus a milengemedaol er a redisciplo er ngii el mo meluluuch ma soal a Dios lemeruul “ra belulechad el ua chomerellel ra eanged.” (Matteus 6:9, 10) Aika el tekoi ngkol ngar er ngii a belkul a lsekum a chutem a mo nguemed ma lechub e ngdi ua ble lokesiu el tekoi el kirel a eanged? Ma dirrek, ngkol ngar er ngii a belkul a lsekum a rokui el melemalt el chad a mo er a eanged? A soal a rengul a Dios el kirel a chutem a kmal bleketakl er a chelsel a Biblia, el ulemuchel er a taem er a omeob el mo tmurk er aike el ues el ngar er a babier er a Chocholt. Tia el chutem a mo oltirakl er a moktek er a Dios​—el mo paradis. Tiaikid sel soal a Dios el bla letibir el mo rullii. A reblak a rengrir el ngar er a chutem a meluluuch me lemotaut a soal a rengul.

A diak a ulebengelel el klengar el ngar er a chutem a mle kot el moktek er ngike el Ulemeob, el ngii a Dios el ‘diak lemengodech.’ (Malakai 3:6; Johanes 17:3; Jakobus 1:17) Ma chelsel a kuk betok er a dart el rak, e tia el babier, el The Watchtower, a milsaod aike el eru el rolel a bo lemotaut a moktek er a Dios. Tiang a ngosukid el mo medengei a belkul aike el telbiil el kirel a smechel a chutem el ngar er a Bades. Aki mengemedaol er kau me bo morriter er tia el tekoi, el mo mengedecheduch er a Resioning er a Jehovah ma lechub e moluches el mo er tirke el mirruul er tia el babier.

[Footnote]

[Siasing er a 4 el llel]

A Biblia a kmal bleketakl el melekoi el kirel a Paradis el ngar er a chutem er a ngar er a medad

[Siasing er a 7 el llel]

A nglunguchel a Jesus ngkol ngar er ngii a belkul a lsekum e tia el chutem a mo nguemed?