“E Le Ngchetiu-a-Rekil el Buik A Uchul”

SEL lemei er a blil a Resioning er a Jehovah, e a Wiesława, el kiei er a dimes er a Poland, a blechoel el di mereng a sulir e melmesumech er tir. E a ta er a klebesei, e a etiu-a-rekil el Samuel a mlo er a blil el obengkel a delal. E tiaikid el taem e a Wieslawa a ullerrenges er a klumech e kilengei el nguu a babier el mesaod er a paradis el chutem.

A Chedaol el Blsoil er a kodellel a Jesus Kristus a kmedu el mo er ngii, misei e a Samuel a mle soal el mengemedaol er a Wieslawa el mo er tia el ileakl el sils. Me ngulebengkel a delal e liluut el mo oldingel er ngii el oba siotaikeng. Ma lesa ngika el buik el ungil a bilel, e ngmlo oidii er a ungil el bilel e mlei me ngorrenges er a Samuel, e ngiluu sel siotaikeng, e ulleker el kmo: “Ngsebechek el di ngak el mong ma lechub ak mong el obengkel a bechik?” E dilechelir el kmo: “A lsekum a bechik a diak lebong, e ngak a mong. Ak mo rullii tiang el kirem e Samuel.” A Samuel a mlo ungil a rengul e le nguleltaut a tekingel.

Sel taem er a cheldecheduch er a Chedaol el Blsoil, e a Samuel a dilengchokl er bita er a Wieslawa, e ullecholt er ngii aike el bades el meldung. Tiang a kmal chilsir a rengul. Ngkmal dileu a rengul er a Chedaol el Blsoil e le ngmle bleketakl a omesodel aike el dmolech el suobel. Ngdirrek el mlo ungil a rengul er a rechad er a ongdibel el uluuetkeu er ngii e mlengedecheduch er ngii. E seikid el taem el mei, e a Wieslawa a mengal el mlo semeriar er a tekoi er a klereng, e chelechang e ngobengterir a Resioning er a Jehovah. Ngdilu el kmo: “Ak kmal merur e le ngdimlak kurrenges er kemiu er a uchei. E ngkirek el ouchais el kmo ak di ullerrenges er a klumech e le etiu-a-rekil el Samuel a uchul.”

El di ua Samuel el ngar er a Poland, e a rebetok el ngeasek el Sioning er a Jehovah a oldanges er a Dios el oeak a tekingir ma blekerdelir ma ungil el omerellir. A lsekum e kau a ngeasek, e ngdirrek el sebechem el ngosuterir a rungil a rengrir el chad el mo semeriar er a tekoi er a klereng.