“El Subedii a Dios ra Ikel Molengit”

“Di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit.”​—FILIPI 4:6.

1. Ngngar er ngii a techelled el mengedecheduch er a techang, e ngera uchul me tiang a mengasireng el tekoi?

 OLEKO ke olengit el mo mengedecheduch er a merreder er a beluam, e nglocha mo ua ngera el nger a obo mnguu? Ngulterekokl el diak el ngike el merredel a mo onger er kau, nglocha di babier a mei el mla er a obis er ngii, engdi kau a locha diak el sebechem el di melemalt el mo mengedecheduch er ngike el merreder. Engdi, tia el blekeradel a kmal kakerous er sel blekeradel el sebeched el nguu er ngike el kot el ungil el Merreder, el Chimong el Kedidai el Jehovah el Dios. Ngsebeched el mo er ngii er a ngii di el taem el soad ma basio el dengar er ngii. Ngblechoel el orrenges aike el nglunguuch el lekengei. (Osisechakl 15:29) Tiang a kmal klebokel el tekoi! A omereng el saul er kid el kirel tiang a kirel el odbechid el mo blechoel el meluluuch el mo er Ngike el domekedong er ngii el kmo ‘Ngorrenges a nglunguuch.’​—Psalm 65:2.

2. Ngerang a usbechall me bo lsebechel a Dios el kongei er a nglunguched?

² Engdi, a chad a sebechel el oker el kmo, ‘Ngera el nglunguuch a lekengei er ngii a Dios?’ A Biblia a ouchais er kid er a chimo el tekoi el usbechall el kirel a nglunguuch sel lolekoi el kmo: “Ma lak a kloumerang e ngdiak el sebechel mo dmeu a rengul a Dios, ele tirikel sorir lolekeed er tir er ngii a diak le iit loumera el kmo ngngarngii a Dios, e dirrek loumera el kmo tirikel osiik er ngii a le besterir chomeksulir.” (Hebru 11:6) El ua lulsaod er sel mlo merek el suobel, a klou a ultutelel el tekoi el dousbech er ngii sel doluluuch el mo er a Dios a klaumerang. A Dios a kongei a nglunguchir tirke el meluluuch el mo er ngii, engdi ngkirir el meruul el uaisei el oba klaumerang e kirel el ungil a urerir ma blekerdelir e melemalt a rengrir.

3. (a) El ua lolecholt a nglunguchir a reblak a rengrir el mesiungel a Dios er a irechar, e ngsebeched el meluluuch el kirel a ngera el tekoi? (b) E ngera el bedengel a nglunguuch a ngar er ngii?

³ A apostol el Paulus a milengelechel er a Rekristiano er a taem er ngii el kmo: “Lak el sebek a rengmiu ra ngiidi le ngerang, e di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit.” (Filipi 4:6, 7) Ngngar er ngii a betok el kerebai er a chelsel a Biblia el kirir a rechad el milluluuch el mo er a Dios el kirel a mondai er tir. A bebil er tirka el chad a rua Hana ma Elias ma Hesekia ma Daniel. (1 Samuel 2:1-10; 1 King 18:36, 37; 2 King 19:15-19; Daniel 9:3-21) Ngkired el oukerebai er tir. A tekingel a Paulus a dirrek el olecholt el kmo ngar er ngii a betok el bedengel a nglunguuch. Ngmilsaod el kirel a omereng el saul, el ngii a nglunguuch el olecholt er a omereng el saul er kid el mo er a Jehovah el kirel aike el loruul el kired. Tiang a sebechel el obengkel a odanges. A ongit a sel doba ngareourreng el olengit er a ileakl el tekoi. (Lukas 11:2, 3) A Demad el ngar er a eanged a dmeu a rengul el kongei er a nglunguched el mo er ngii el ousbech aikaikid el rolel.

4. Malta e a Jehovah a medengei aike el dousbech, engdi ngera uchul me ngkired el meluluuch el mo er ngii?

⁴ A rebebil a locha mo oker el kmo, ‘A Jehovah ngdiak lodengei a bek el dousbech?’ Chochoi, ngmedengei. (Matteus 6:8, 32) Me ngera uchul me ngdirk soal a doluluuch el mo er ngii? Ka molatk er tia el okesiu: A merreder er a stoang a soal el mesterir a rechokiak er ngii a omiange. Engdi, a lsekum ngsorir el melai, e ngkirir el mo omes er ngike el merreder er a stoang me bo lsebechir el ngmai. Tirke el chetirir el mo omes er ngii a olecholt el kmo ngdiak el sorir sel klalo. Me ngdi  osisiu, a lak doluluuch el olengit aike el dousbech a olecholt el kmo ngdiak doba omereng el saul el kirel aike lomeskid a Jehovah. A Jesus a millekoi el kmo: “Molengit, mo ngmai.” (Johanes 16:24) A doruul el uaisei, e kede olecholt el kmo kede ultuil er a Dios.

Ngmekerang a Doluluuch el Mo er a Dios?

5. Ngera uchul me ngkired el meluluuch el oeak a ngklel a Jesus?

⁵ A Jehovah a diak lebeskid a betok el meringel el llach el kirel a nglunguuch. Me nguaisei engdi, ngkired el mo medengelii a melemalt el rolel a doluluuch el mo er a Dios, el ua losaod er ngii a Biblia. El di ua tiang, a Jesus a ulsisechakl er a rulebengkel el kmo: “A ikel molengit ra Chedam a le beskemiu loba ngklek.” (Johanes 16:23) Sei a uchul, me ngkired el meluluuch el okiu a ngklel a Jesus, el olecholt el kmo kede omes el bedul a Jesus el ngii a di ta el rolel el sebeched el mo ngmai a klengeltengat er a Dios.

6. Ngkirel el mo ua ngerang a teleteled sel doluluuch?

⁶ Ngkirel el mo ua ngerang a teleteled sel doluluuch? A Biblia a diak el losaod el kmo ngkirel el mo ua ngera teleteled a doluluuch me bo lsebechel el morrenges a nglunguched. (1 King 8:22; Nehemia 8:6; Markus 11:25; Lukas 22:41) A klou a ultutelel el tekoi a kmo kede meluluuch el mo er a Dios el oba blakerreng ma melemalt el reng.​—Joel 2:12, 13.

7. (a) Ngerang a belkul a tekoi el “amen”? (b) Ngerang a melemalt el usbechel tia el tekoi el ngar er a nglunguuch?

⁷ E ngerang a belkul sel tekoi el “amen” er a nglunguched? A Bades a olecholt el kmo ngungil a dousbech er ngii er a orokiolel a nglunguched, el tokubets sel doluluuch el ngar er a mederir a rebetok el chad. (Psalm 72:19; 89:52) A tekoi er a Hebru el amen a belkul a kmo “bo leuaisei.” A babier er a McClintock ma Strong el Cyclopedia a mesaod el kmo sel dolekoi el kmo “Amen” er a orokiolel a nglunguched a olecholt el kmo “kede kongei aike el tekoi el meldung, e olengit me lemutaut.” Me sel dolekoi el kmo “Amen” er a ulebengelel a nglunguched, e kede olecholt er a uldesued el kirel a tekoi el meldung er sel nglunguuch. Sel loluluuch a Kristiano el omtechei er a ongdibel e lolekoi el kmo “Amen,” e tirke el orrenges er ngii a dirrek el sebechir el melekoi el uaisei er a chelsel a rengrir ma lechub e ngklou a ngerir el olecholt el kmo te mera el kongei er aike el mla medung.​—1 Korinth 14:16.

8. Ngmekerang e a nglunguched a mo ua nglunguchel a Jakob ma Abraham, e tiang olechotel a ngerang?

⁸ A lebebil er a taem e a Dios a meskid a techelled el ochotii a delechel a klemeriarreng er kid el kirel aike el ngar er a nglunguched. Ngsebeched el mo ua Jakob er a irechar el mle kaibedechakl ngii ma anghel me bo lsebechel el ngmai a klengeltengat. (Genesis 32:24-26) Ma lechub e ngkired el mo ua Abraham el milluluuch el kirel a Lot me tirke el melemalt el chad el kiliei er a Sodom. (Genesis 18:22-33) Me kid a dirrek el sebeched el meluluuch el mo er a Jehovah el kirel aike el tekoi el mekreos er a rengud, el olengit el oeak a blekerdelel el llemalt ma blekokeuii el bltikerreng ma klechubechub.

Ngsebeched el Olengit a Ngerang?

9. Ngerang aike el kired el melatk el ngar er a nglunguched?

⁹ Molatk er a tekingel a Paulus el kmo: “E di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit.” (Filipi 4:6) Ma leuaisei, e a nglunguched a sebechel el uldimukl er ngii a bek el telengtengil a klengar er kid. Engdi, a soal a Jehovah a kirel el mo kot el tekoi el dolatk er ngii er a nglunguched. A Daniel a milecherei a ungil el kerebai el kirel tiang. A Rechisrael er a lengar er a ringel el kngterir a uchul, e a Daniel a ullengit er a Jehovah me lolecholt er a klechubechub er a lolekoi el kmo: “Misei e a re bek el chad bo lodengei el kmo kau a Dios me lak mongeteket!” (Daniel 9:15-19) A nglunguched nguaisei el olecholt el kmo lemechedaol a ngklel a Jehovah ma moktek er ngii lemutaut?

10. Kede mekerang e medengei el kmo ngsebeched el meluluuch el kirel aike el dousbech er a klengar er kid?

¹⁰ Ngdirrek el sebeched el meluluuch el kirel aike el dousbech er a klengar er kid. El ua itiang, ngsebeched el meluluuch el ua ngike el milluches er a psalm me bo dodengei aike el dmolech el osisecheklel a Dios. Ngmilluluuch el kmo: “Beskak  a sekutaberreng, me klemolem a llechum, e kutirakl el oba renguk el rokir.” (Psalm 119:33, 34; Kolose 1:9, 10) A Jesus a “uleldars a nglunguuch ma chongit loba kloul diu ma chiuosech el mor ngikel sebechel losobelii ra kodall.” (Hebru 5:7) Me sera loruul el uaisei, e ngullecholt el kmo ngkired el olengit a ngeso a bo dechelebangel a ringel. Sera louchais er a redisciplo er ngii el kirel a Nglunguchel a Rubak, e a Jesus a dirrek el milsaod a kuk bebil er a tekoi el ua klausubes el kirel a mekngit ma keled er a bek el sils.

11. Ngmekerang e a nglunguuch a sebechel el ngosukid me lak bo demechitechut er a ongetikaik?

¹¹ Ngar er sel nglunguuch, e a Jesus a dirrek el uldekiar tia el ongit el kmo: “E lak momekesiuekl er kemam er chomengarm, e mosobelemam era mekngit.” (Matteus 6:9-13) E a uriul e ngmilellach el kmo: “Mekar e moluluuch, me lako mekesuseu.” (Matteus 26:41) A nglunguuch a klou a ultutelel sel dechelebangel a ongetikaik. Altang mo soad el mengemikr a uleklatk er a Biblia el ngar er a urered ma lechub a skuul. A rechad el diak el Sioning a locha mo mengemedaol er kid el mo obengterir el meruul a tekoi el diak el ungil el kirir a Rekristiano. Ngsebechir el orrimel er kid el mo meruul a tekoi el omtok a omellach er a Dios. Ngar er a chelsel choua ika el taem, e ngungil a doltirakl er a uleklatk er a Jesus el mo meluluuch, er a uchei er a bo dechelebangel a ongetikaik ma dengar er a chelsel a ongarm, el olengit ma Dios lengesukid me lak bo demechitechut er a ongetikaik.

12. Ngera el uchul a sebekreng a rullid el mo meluluuch, e ngera bo loruul a Jehovah?

¹² Ngkmal betok a ongarm ma sebekreng el lechelebangel a remesiungel a Dios er a chelecha el taem. A secher ma meringel el uldasu a sebechel el mo uchul a sebekreng el kirir a rebetok el chad. A kdekudel el blekeradel el meliuekl er kid a sebechel el omekringel a uldesued. E a mondai er a  udoud a rullii el mo meringel er kid el ngma ike el dousbech el kirel a klengar er kid. Ngkol ua ngera el ongelaod sel dodengei el kmo a Jehovah a orrenges a nglunguchir a remesiungel el tir a ouchais er ngii a ngii di el tekoi! A Psalm 102:17 a melekoi el kirel a Jehovah el kmo: “Ng mo remenges a nglunguchir a re mlechoit el chedal, e remenges a ongterir.”

13. (a) Ngera el tekoi el dousbech a sebeched el meluluuch el kirel? (b) Ka mosaod er a okesiu el kirel a choua itia el nglunguuch.

¹³ A mera er ngii, a ngii di el tekoi el ngar er ngii a lerellii er a omesiunged el mo er a Jehovah ma lechub a deleongel er kid me ngii a sebeched el meluluuch el kirel. (1 Johanes 5:14) A lsekum e ngkirem el melib a tekoi el kirel a chebechiil ma lechub a ureor ma lechub e ngsoam el menglou er a omesiungem, e lak momai er a rengum el olengit a ulekrael er a Dios. El di ua itiang, a ta el ngeasek el redil er a Huiriping a mle soal el mo teloi er a mui el taem el omesiou. Engdi, ngdimlak a urerel. Ngmelekoi el kmo: “A ta el Sebadong, e ak milluluuch el mo er a Jehovah el kirel a klepioneer. Ma uriul er sel sils, e ak uleldingel e mirrous a babier el mo er a ngeasek el redil. E ngdilu er ngak el kmo: ‘Ngkirem el mo er a skulek er a Kot el Ureor.’ Ma kuleker el kmo, ‘E ngera uchul?’ Ngmilsaod el kmo ngngar er ngii a ureor el kmal ousbech er a chad er a mereched el taem. Me ak mlong, e te di mle mereched el kongei er ngak el mo oureor. Ngkmal di mle mereched el meketmokl tia el tekoi.” A rebetok el Sioning er a beluulechad el rokir a mla chormii choua itia el tekoi. Me lak momai er a rengum el meluluuch el mo er a Dios el kirel aike el tekoi er a rengum!

E Kuk Mekerang Sel Bla Derebet er a Klengit?

14, 15. (a) Ngera uchul ma chad a diak el kirel el omai er a rengul el meluluuch a lsekum ngmlo er a klengit? (b) El obengkel a nglunguuch, e ngerang a sebechel el ngosuir a chad el mo mesisiich er a kngtil?

¹⁴ Ngmekerang e a nglunguuch a sebechel el ngosuir a chad el mla ruebet er a klengit? A rebebil el mla ruebet er a klengit a diak loluluuch e le te merur. Engdi, tiang a diak el rolel a llomeserreng. El di ua tia el okesiu: A rumekall a skoki a medengei el kmo a lsekum te remiid e ngsebechir el mengedecheduch er tirke el omekrael a skoki el kirel a ngeso. Engdi, ngera mo duubech a lsekum ngike el omekall a skoki a chetil el olengit a ngeso e le ngmerur el ouchais el kmo ngmla remiid? Ngsebechel el mo uchul a klou el tellemall! Me nguaisei, a chad el rirebet er a klengit e merur el meluluuch el mo er a Dios a sebechel el dochel a ringel el kirel. A rur el klengit a uchul a diak el kirel el olekebai er a chad el mengedecheduch er a Jehovah. A mera er ngii, a Dios a mengemedaol er tirke el ruebet er a oberaod el klengit el mo meluluuch el mo er ngii. A profet el Isaia a milengelechel er a redengerenger el mo oleker er a Jehovah, e le “ng chubechub e mereched el ousubes a klengit.” (Isaia 55:6, 7) Engdi, a chad a kot e ngkirel el mo ngar er a eou a rengul el ‘oba rengul el rokir el olengit er a Jehovah,’ me bo lsebechel el obult el mo cheroid er a klengit.​—Psalm 119:58; Daniel 9:13.

¹⁵ A dosaod el kirel a klengit, e a nglunguuch a klou a ultutelel el kirel a kuk ta er a tekoi. A disciplo el Jakobus a mesaod er a chad el ousbech a ngeso er a klereng el kmo: “Ngiil chad loleker rar mechuodel ra eklesia, me bo loluluuch el kirel, . . . ma Rubak a mo okisii.” (Jakobus 5:14, 15) Chochoi, a chad a kirel el ouchais a kngtil el mo er a Jehovah el okiu a nglunguuch, e dirrek el sebechel el olengit er a remechuodel me loluluuch el kirel. Tiang a ngosuir el mo omekungil er a deleongel er ngii ma Jehovah.

Nger el kirel a Nglunguuch

16, 17. (a) A Jehovah ngmekerang e onger er a nglunguched? (b) Ngera el experience a olecholt el kmo a nglunguuch ma berkel a klumech a dmak el oureor?

¹⁶ Ngmekerang e a nglunguched a monger? A bebil a locha mereched el obeketakl e monger.  (2 King 20:1-6) E a kuk bebil a telkib el meoud e meringel er kid el mtab. El di ua okesiu er a Jesus el kirel a mellakl el dil el mle blechoel el mo er a chad er a kerrekeriil, me ngungil a deblechoel el meluluuch el mo er a Dios. (Lukas 18:1-8) Nguaisei, ngulterekokl a rengud el kmo a doluluuch el oltirakl a soal a rengul a Dios, e a Jehovah a diak a ta el bo ldu er kid el kmo: “Lak mongesang er ngak.”​—Lukas 11:5-9.

¹⁷ A rechedal a Jehovah a mla ngmai a nger el kirel a nglunguchir. Tiang a sebeched el mesang el ngar er a omesiunged. El ua tiang, a reteru el Kristiano el odos er a beluu er a Huiriping a mirrous a babier er a ta el cheroid el beluu. Te mirrous er a tract el mo er a ta el redil e nglilangel. Ngdilu el kmo: “A kesus e ak milluluuch el mo er a Dios me lodureklii a chad el me osisecheklak er a Biblia, e a kumdasu e tiaikid a nger er a nglunguchek.” Ngdi mle telkib el taem er a uriul, e ngika el redil a mlo er aike el miting er a Kingdom Hall. Ngar er a kuk ta er a beluu er a Asia, e a ta el Kristiano el odam a mle telkib el suebek a rengul er a lomerk er a klumech el ngar er aike el blai el mesisiich a omengkar er ngii. Me nguaisei, engdi ngmilluluuch el mo er a Jehovah e mlo soiseb er tia el blai. Ngmillengod er a chesimer er a ta er aika el blai e a ngeasek el redil a tilobed. Me ngika el odam er a losaod er a uchul me nguleldingel er ngii, e ngika el redil a lilangel. Ngmilsaod el kmo ngulsiik er a Resioning er a Jehovah e milluluuch me bo lsebechel el metik er tir. Ngika el odam a mle dmeu a rengul el olengeseu er ngika el redil el mo medengelterir a Resioning er a Jehovah el kmeed er ngii.

18. (a) Ngkired el mekerang sel lemonger a nglunguched? (b) Ngsebechel el ulterekokl a rengud er a ngerang sel dousbech er a bek el techall el meluluuch?

¹⁸ A nglunguuch a mera el ungil el tekoi el dobang. A Jehovah a kltmokl el orrenges er kid e onger a nglunguched. (Isaia 30:18, 19) Engdi, ngkired el mo kerekikl el omes er a rolel e a Jehovah a onger er a nglunguched. Ngdiak el blechoel el oltirakl er a soad. Engdi sel domes er a ulekrael er ngii, e ngdiak el soad el obes el oureng a sulel e oldanges er ngii. (1 Thesalonika 5:18) Ma lmuut el tang, lak mobes er a tekingel a apostol el Paulus el kmo: “E di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit.” Chochoi, mousbech er a bek el techall el mengedecheduch er a Dios. Ngoeak tia el rolel, e ngsebechem el melemolem el mesang a klemerang er a tekingel a Paulus el kirir tirke el chad el mlonger a nglunguchir el kmo: “Ma diak le metuk ra klemedengei rar chad el budech ra Dios a mo kokar a rengmiu ma chomelebedebekiu.”​—Filipi 4:6, 7.

Ngsebechem el Onger?

• Ngkirel el mo ua ngerang a teletelel a nglunguched?

• Ngmekerang a doluluuch?

• Ngera el tekoi a sebeched el mesaod er a nglunguched?

• A nglunguuch ngmekerang e sebechel el ngosuir a chad el mlo er a klengit?

[Aike el Ker er a Suobel]

[Siasing er a 21 el llel]

A nglunguuch el ngar er a rengud a ngosukid me lak bo demechitechut er a ongetikaik

[Siasing er a 23 el llel]

Ngoeak a nglunguuch, e ngsebeched el olecholt er a omereng el saul er kid el mo er a Dios ma ike el ngar er a uldesued ma ike el dousbech