Ngmekera Debo er Ngike el ‘Longer a Nglunguuch’

“E le konger a nglunguuch. A rokui el chad a mer kau el kirel a kngterir.”​—PSALM 65:2.

1. Ngera el tekoi a meleakl er a rechad er a rokui el bleob el ngar er a chutem, e tiang mo uchul a ngera el techall?

 TE DI rechad er a chelsir a rokui el dingar el bleob el ngar er a chutem a sebechir el mengull el mesiou er a Ulemeob. Te di rechad a medengei el kmo te ousbech a tekoi er a klereng e melechesuar er a rengrir el sorir el mo kutmeklii. Tiang a meskid a techelled el mo er ngii a deleongel er kid ma Demad el ngar er a eanged.

2. Ngera el mekngit el tekoi a dilubech er a delongelel a chad ma Omebelel e le ngklengit a uchul?

² A Dios a milebii a chad el sebechel el mengedecheduch er a Omebelel. A Adam ma Eba a ulebeob el diak a kngterir. Sei a uchul, e ngsebechir el mengedecheduch er a Dios el mimokl el ua ngalek a longedecheduch er a demal. Engdi, tia el techall a mlengai el klengit a uchul. A Adam ma Eba a dimlak lolengesenges er a Dios a uchul me te urridii sel kmes el deleongel er tir me ngii. (Genesis 3:8-13, 17-24) Me tia ngbelkul a kmo a rediak lemecherrungel el ngelekel a Adam a dikea el sebechir el mengedecheduch er a Dios? Ngdiak, a Jehovah a mla mesterir a techall el meluluuch el mo er ngii engdi ngkirir el mo oltirakl a bebil el tekoi. Ngera ika el tekoi?

Aike el Tekoi el Usbechall el Mo Kmeed er a Dios

3. Ngmekerang e a rediak lemecherrungel el chad a sebechir el mo kmeed er a Dios, e ngera el kerebai a ochotii tiang?

³ A tekoi el dilubech el mo er tirke el teru el ngelekel a Adam a ngosukid el mo mesa el kmo ngera soal a Dios a bo loruul a rediak lemecherrungel el chad el tir a sorir el mo kmeed er Ngii. A Kain ma Abel a di diul millasem el mo kmeed er a Dios er a loldars a tenget el mo er ngii. A tengetengel a Abel a lekilengei er ngii a Dios, engdi a Kain a dimlak lekengei er ngii. (Genesis 4:3-5) Ngera mle klekakerous er aikang? A Hebru 11:4 a melekoi el kmo: “A Abel a uleak a kloumerang el melenget ra Dios a ngaruchei el tengetengel ra tengetengel a Kain, me ngiil kloumera uchul me ngmlodanges el kmo ngmelemalt.” Me ngbleketakl el kmo, a klaumerang a usbechall me bo lsebeched el mo kmeed er a Dios. A ta er a usbechall el tekoi a desang er a tekingel a Jehovah el mo er a Kain el kmo: “Chomko ng mle ungil omerellem e ng blekebek a medam?” Chochoi, a Dios a mle sebechel el kongei er a Kain omko ngulebult el mo meruul a ungil. Engdi, a Kain a ultngeklii a omellach er a Dios, e milekodir a Abel, me ngmeldebeakl el di mlo meleuaoch el chad. (Genesis 4:7-12) Me ngdi mle uchelel a reksi er a klechad, e ngmlo bleketakl el kmo a klaumerang el obengkel a ungil el omerelled a klou a ultutelel me bo lsebeched el mo kmeed er a Dios.

4. Ngera kired el melatk er ngii a lsoad el mo kmeed er a Dios?

⁴ Ma klemedengei er kid el kmo ngdiak demecherrungel a klou a ultutelel a lsekum e ngsoad el mo kmeed er a Dios. A rokui el chad a ngar er a klengit, e a klengit a melenget er kid me ngdiak el sebeched el mo kmeed er a Dios. A profet el Jeremia a milluches el kirel a Israel el kmo: “Aki mlor a klengit e ulemtok . . . Ke mililau er a eabed ma nglungucham a mlo diak el toech el ekong.” (Klengiterreng 3:42, 44) Altang uaisei, engdi chelsel a reksi er a klechad e a Dios a ulechotii el kmo ngkongei er a nglunguchir tirke el mo er ngii el oba klaumerang ma melemalt el reng, e lolengesenges a llechul. (Psalm 119:145) Te rua techang a rebebil er tirkang, e ngera kede suubii er a nglunguchir?

5, 6. Ngera kede suubii er a rolel a Abraham a lolekeed er ngii er a Dios?

 ⁵ A ta er tirka el chad a mle Abraham. Ngmle sebechel el mo kmeed er a Dios, ma Dios a ulemekedong er ngii el kmo “sechelik.” (Isaia 41:8) Ngera kede suubii er a rolel a Abraham er a lolekeed er ngii er a Dios? Ngika el blak a rengul el rubak er a irechar a uleker el kirel a ngalek er a telbiil el kmo: “Ng diak a ngelekek; me ng ngera ultutelel cho momeskak a omeksaul?” (Genesis 15:2, 3; 17:18) A kuk ta er a taem, e ngulechotii a sebekreng er ngii el kirel a kmo te rua techang a mo suobel sel bo loukerrekeriil er a mekngit el Sodom ma Gomora a Dios. (Genesis 18:23-33) A Abraham a milluluuch el kirir a rebebil. (Genesis 20:7, 17) A Abraham a dirrek el uleldars a tenget el mo er a Jehovah, el di ua ike el lurruul a Abel.​—Genesis 22:9-14.

⁶ A Abraham a mle mimokl el mengedecheduch er a Jehovah el ngar er aika el rokui el blsechel. Malta e ngmle mimokl el mengedecheduch engdi tia ulebengkel a ngar er a eou el reng e le ngmle medengelii a delecherul er a medal a Ulemeob er ngii. Ka molatk a tekingel el olecholt a omengull el ngar er a Genesis 18:27: “Ak ulengit me mousubes er a blekengek el luutang el melekoi er kau e RUBAK [el Jehovah]. Ngak a di chad, me ng diak a llemeltek el melekoi a ngii di le ngerang.” Ngkol ua ngera el ungil el blekeradel el sebeched el oukerebai er ngii!

7. Tirike el rubak er a irechar te milluluuch el kirel a ngera el tekoi el mo er a Jehovah?

⁷ Tirke el rubak er a irechar a milluluuch el kirel a kakerous el tekoi, e a Jehovah a ulerrenges a nglunguchir. A Jakob a milluluuch el ngar er a teletelel a omeruul el telbiil. Uriul er a lolengit a ngeso er a Dios, e ngtilbir el kmo:“E ngak a mo meskau ongeltacher er a ikel rokui el beskak.” (Genesis 28:20-​22) E a uriul er a bochu lekebetech ngii ma obekul, e a Jakob a ullengit er a Jehovah el kirel a osebechakl el kmo: “Ak ulengit er kau me mosebelak er a klisichel a obekuk er a Esau. Ng suebek a renguk a le mei.” (Genesis 32:9-​12) A rubak el Job a mlo er a Jehovah, el oldars a tenget el kirel a telungalek er ngii. Tirke el tedei el sechelil a Job er sera lerebet er a klengit el omelekingir a uchul, e a Job a milluluuch el kirir “ma RUBAK [el Jehovah] a ulenger a nglunguchel a Job.” (Job 1:5; 42:7-9) Aika el cheldecheduch a olengeseu er kid el mo medengei aike el tekoi el sebeched el mesaod el mo er a Jehovah el ngar er a nglunguuch. Kede dirrek el mesa el kmo a Jehovah a kltmokl el mo kongei er a nglunguchir tirke el mo er ngii el ngar er a melemalt el rolel.

Ngar er a Eungel a Llach er a Telbiil

8. Ngar er a eungel a Llach er a telbiil, e ngmilekerang a lolab a tekoi el mo er a Jehovah el kirir a rechad?

⁸ A Jehovah er a uriul er a lotebedii a renged er a Israel er a Egipten, e ngmilsterir a Llach er a telbiil. Tia el Llach a ulterekeklii a rolel a lebo er a Dios el okiu a mla metutk el kleprist. A rebebil  er a rechad er a Levi a lulemekngerachel er tir el mo ua leprist el kirir a rechad. E sel leduubech a klou a ultutelel el tekoi er a beluu, e a chad el omtechei er a rechad​—el lebebil er a taem e ngking ma lechub e ngprofet​—a mlo er a Dios el oeak a nglunguuch. (1 Samuel 8:21, 22; 14:36-41; Jeremia 42:1-3) El di ua tiang, sera omengedaol er a templo, e a King el Salomon a ullecholt a ngar er a rengul el nglunguchel el mo er a Jehovah. Misei a uchul, ma Jehovah a ulechotii el kmo ngkongei er a nglunguchel a Salomon er a lomekeek er a templo el oba klebkellel e dilu el kmo: “E mo blkais a dingak el orrenges a nglunguuch el modars er ngii.”​—2 Kronika 6:12–7:3, 15.

9. Ngera mle usbechall el kirel a melemalt el rolel a bo lekeed er a Jehovah el ngar er a blil a omengull?

⁹ Ngar er sel Llach el mo er a Rengalek er a Israel, e a Jehovah a uldekiar a ta er a tekoi el ousbech er ngii me bo lsebechir el mo soiseb er a blil a omengull. Tiang mle ngerang? A ngar er a bab el prist a mle kirel el melul a ochod er a medal a Jehovah er a bek el tutau ma bek el kebesengei, el obengkel a uldars er a tenget el charm. E a uriul, e a reprist a dirrek el mirruul er tia el omesiou, engdi diak loruul er ngii er a Sils er a Tngakireng. A lsekum a reprist a dimlak lolecholt er choua isel omengull, e a Jehovah a diak bo lekengei er a omesiungir.​—Exodus 30:7, 8; 2 Kronika 13:11.

10, 11. Ngera el tekoi a olecholt el kmo a Jehovah a kilengei a nglunguchir a rederta el chad?

¹⁰ El ngar er a Israel er a irechar, e a rechad te mo er a Dios el di okiu a remeltutk el chad? Ngdiak, e le a Bades a olecholt el kmo a Jehovah a mle dmeu a rengul el kongei a nglunguchir a rederta el chad. Ngar er a nglunguchel a Salomon el kirel a omengedolel a templo, e ngullengit er a Jehovah el kmo: “E mrenges a nglunguchir. A lsekum a ngii di le chad er a Israel ma lechub e te chad, . . . me todars a chimorir el mer tial blai el meluluuch, e mrenges a nglunguchir.” (2 Kronika 6:29, 30) A cheldechedechal a Lukas a ouchais er kid el kmo sera lolul a ochod er a blil a omengull a Zaharias, el demal a Johanes el Techolb, e a rebetok el di chad el mengull er a Jehovah a “mlar rikl el meluluuch.” Me nguaisei, ngmle siukang er a rechad el mo kldibel el ngar er a nglunguuch er a ikrel a blil a omengull er sel taem el oldars a ochod el mo er a Jehovah el ngar er a kolt el olengetongel.​—Lukas 1:8-10.

¹¹ Ma leuaisei, e sel lebo er a Jehovah el ngar er a melemalt el rolel, e ngmle dmeu a rengul el kongei er a nglunguchir tirke el ulemtechei er a renged el rokir ma derta ma derta el chad el mle sorir el di tir el mo kmeed er ngii. Chelecha el sils, e ngdikea dekiei er a eungel a Llach er a telbiil. Engdi, ngsebeched el suub a meklou a ultutelel el suobel el kirel a nglunguuch el oeak a blekerdelir a Rechisrael er a irechar er a lolekeed er tir er a Dios.

Ngar er a Eungel a Ongdibel er a Klekristiano

12. Ngera el rael a mla meketmokl el kirir a Rekristiano me bo lsebechir el mo er a Jehovah?

¹² Chelecha el sils e kede kiei el ngar er a eungel a ulekrael er a Klekristiano. Ngdikea lengar er ngii a templo el lebo er ngii a reprist el tir a omtechei er a rokui el chedal a Dios ma lechub e kede mo chemau ngii sel bo doluluuch el mo er a Dios. Me nguaisei, engdi a Jehovah a mla kutmeklii a rolel me bo lsebeched el mo  er ngii. Tiang ngerang? Ngar er a 29 C.E, er sera lemengilt a Kristus e lemetutk el Ngar er a Bab el Prist, e a templo er a klereng a mlo oureor. a Tia el templo er a klereng a mle beches el rolel a bo dongull el meluluuch er a Jehovah el oeak a tngakireng el tengetengel a Jesus Kristus.​—Hebru 9:11, 12.

13. El kirel a nglunguuch, e ngera el klaisisiu a ngar er sel templo er a Jerusalem ma templo er a klereng?

¹³ A betok el teletelel a templo el ngar er a Jerusalem a ungil el olecholt aike el betok el klekedellel a templo er a klereng, el uldimukl er aike el tekoi el mesaod el kirel a nglunguuch. (Hebru 9:1-10) El ua tiang, aike el ochod el mlodars er a bek el tutau ma kebesengei, er a bebul a olengetongel er a ochod el ngar er a Chedaol el delmerab er a templo, ngomtechei er a ngerang? A babier er a Chocholt a melekoi el kmo a “chochod, el nglunguchir ar mechedaol.” (Chocholt 5:8; 8:3, 4) A David a mlukreng el meluches el kmo: “A nglunguchek bo le ua ochod er medam.” (Psalm 141:2) Ma leuaisei, el ngar er a ulekrael er a Klekristiano, e a bechochod a bul el ochod a omtechei er a nglunguuch ma odanges el odeuir a rengul a Jehovah.​—1 Thesalonika 3:10.

14, 15. Ngera sebeched el dmung el kirel a nglunguuch el mo er a Jehovah er a (a) rengellitel el Kristiano? (b) ma “ngodech el chermek el sib”?

¹⁴ Ngtecha sebechel el mo er a Dios el ngar er a templo er a klereng? El ngar er sel templo, e te di reprist ma rechad er a Levi a mlukebkall el mo mesiou el ngar er a chelsel a mekesokes, engdi te di reprist a sebechir el mo soiseb er a Chedaol el Delmerab. A rengellitel el Kristiano el oba omelatk el mo er a eanged a dmeu a rengrir er a ileakl el blekeradel er a klereng el mlocholt er sel chelsel a mekesokes ma Chedaol el Delmerab, el rulleterir el mo sebechir el meluluuch e oldanges er a Dios.

¹⁵ E kuk mekerang el kirir tirke el oba omelatk el mo kiei el ngar er a chutem, el “ngodech el chermek el sib”? (Johanes 10:16) A profet el Isaia a mileketeklii el kmo a rechad er a betok el renged a mo mesiou er a Jehovah er “a ngar medad el sils.” (Isaia 2:2, 3) Ngdirrek el milluches el kmo “tirkel chad er a ngodech el beluu” a dirrek el mo chedal a Jehovah. Ma lolecholt el kmo ngkongei er a nglunguchir, e a Dios a melekoi el kmo: “Ak mo . . . odeu a rengrir er a blil a omeluluuch er ngak.” (Isaia 56:6, 7) A Chocholt 7:9-15 a meskid a komakai el omesodel a “kloul seked” er a “bek el renged,” el mo kldibel el mesiou e meluluuch er a Dios “ra llomes ma klebesei,” el dechor er a ikrel a mekesokes er a templo er a klereng. Ngkol ua ngera el uchul a ongelaod el kirir a rokui el mesiungel a Dios er a chelecha el sils, el sebechir el mo er a Dios e mui el oumerang el kmo ngorrenges er tir!

Ngera el Nglunguuch a Lekengei er Ngii?

16. Ngera kede suubii er a nglunguchir a rekot el Kristiano?

¹⁶ A rekot el Kristiano a mle chad er a nglunguuch. Te milluluuch el kirel a ngera el tekoi? A rechelder el Kristiano a ullengit a ulekrael el mo melilt er a resechal el mo olab a ngerachel er a cheldebechel. (Rellir 1:24, 25; 6:5, 6) A Epafras a milluluuch el kirir a rekldemel er a klaumerang. (Kolose 4:12) A rechad er a ongdibel el ngar er a Jerusalem a milluluuch el kirel a Petrus er sera lemekelebus. (Rellir 12:5) A rekot el Kristiano a ullengit er a Dios el kirel  a blekeurreng a bo lechelebangel a ultok, el melekoi el kmo: “Rubak, me chelecha e meseterir lorrouk, mo mrelleterir ar mesiungem me le bekeu el mengedecheduch a tikingem.” (Rellir. 4:23-30) A disciplo el Jakobus a milengelechel er a Rekristiano me loluluuch el mo er a Dios el kirel a llomeserreng er a taem er a omengarm. (Jakobus 1:5) Kau ke dirrek el olengit choua ikakid el tekoi er a Jehovah?

17. A Jehovah ngkongei er a nglunguchir a rua techang?

¹⁷ A Dios a diak lekengei a rokui el nglunguuch. Ma leuaisei, e ngmekerang e mo ulterekokl a rengud el kmo a nglunguched a bo lekengei er ngii? A Dios a ulerrenges a nglunguchir a reblak a rengrir el chad el mlo er ngii el oba llemalt ma ngar er a eou el reng. Te ullecholt er a klaumerang e dirrek el uleltaut er ngii el oeak a ungil el ureor. Ngsebechel el mo ulterekokl a rengud el kmo a Jehovah a mo orrenges er tirke el mo er ngii el oba choua itiaikid el blekeradel er a chelechang.

18. Ngera mle kirir a Rekristiano el meruul me lemorrenges a nglunguchir?

¹⁸ Ngar er ngii a lmuut el ta er a tekoi el usbechall. A apostol el Paulus a milsaod er ngii el kmo: ‘Me lsebeched el dul oeak ngii el ngara tal Reng el mo kmeed ra Chedam.’ A Paulus a meketeklii el kmo el“oeak a Kristus.” (Efesus 2:13, 18) Chochoi, ngngar er ngii a techelled el mo er a Chedam el di okiu a Jesus.​—Johanes 14:6; 15:16; 16:23, 24.

19. (a) Ngoingerang e aike el tenget el ochod er a Israel er a irechar a kmal mlo mekngit er osengel a Jehovah? (b) E mekerang e ngsebechel el ulterekokl a rengud el kmo a nglunguched a ua ungil a bul ochod el mo er a Jehovah?

¹⁹ El di ua ike el medung, e a tenget el ochod el uleldars a reprist er a Israel a ullecholt el kmo a Dios a kilengei er a nglunguchir a reblak a rengrir el mesiungel. Engdi, a lebebil er a taem e aike el tenget el ochod er a Rechad er a Israel a kmal mle mekngit er a osengel a Jehovah. Tiang a mlo uaisei er sel taem el Rechad er a Israel a millul a tenget el ochod er a templo e a osisiu el taem e te mengull a bleob. (Esekiel 8:10, 11) Me ngdi osisiu er a chelecha el taem, a nglunguchir er tirke el leko te mesiou er a Jehovah e osisiu el taem e te meruul a tekoi el omtok a llechul a di mo ua mekngit el bau el bedulngii. (Osisechakl 15:8) Mada, me dolemolem el mengikiid a rokui el tekoi er a klengar er kid me bo lsebechel a nglunguched el mo ua ungil a bul el ochod el mo er a Dios. A Jehovah a dmeu a rengul er a nglunguchir er tirke el oltirakl er a melemalt el rolel. (Johanes 9:31) Engdi, a bebil er a ker a dirk medechel. Ngmekerang a doluluuch? Kede meluluuch el kirel a ngerang? E mekerang a longer a nglunguched a Dios? Ma ongingil el suobel a mo onger aikang ma lmuut el bebil er a ker.

[Footnote]

Ngsebechem el Mesaod?

• Ngmekerang e a rediak lemecherrungel el chad a sebechir el nguu a kengei er a Dios?

• Ngar er a nglunguched, e ngmekerang a doukerebai er tirke el rubak er a irechar?

• Ngera kede suubii er aike el nglunguchir er tirke el mle kot el Kristiano?

• Ngoingerang e a nglunguched a ua ungil a bul el ochod el mo er a Dios?

[Aike el Ker er a Suobel]

[Siasing er a 15 el llel]

Ngera uchul ma Jehovah a kilengei er a tengetengel a Abel e dimlak el kengei er a tengetengel a Kain?

[Siasing er a 16 el llel]

“Ngak a di chad”

[Siasing er a 17 el llel]

“E ngak a mo meskau ongeltacher er a ikel rokui el beskak”

[Siasing er a 18 el llel]

A nglunguchem ngua ungil a bul el ochod el mo er a Jehovah?