1, 2. Ngera el omelsemai a blo lechelebangel er ngii a Jeftha me a ngelekel?

 A TA el kekerei el redil a remurt el mo olsiuekl er a demal el merema remei er a uriul er a mekemad el diak el telemall. Ngkmal ungil a rengul el mengitakl e meloik e le demal el mlo kats er a mekemad. Engdi ngkmal kilebetiekl er a demal er a lesedelii a bilel e loldiu el kmo: “E a rungalek! Ke kmal mla kingtir a renguk.” E a uriul e ngsilbedii el kmo ngmla rullii a telbiil el mo er a Jehovah el mo uchul e ngika el ngelekel a mo diak el sebechel el mo bechiil e mo oungalek. Engdi ngii el dil a kmal di mle mereched el melisiich er a demal me lotutii a telbilel el mo er a Jehovah. Me ngoeak a tekingel e ngulechotii a mui el klaumerang er ngii el kmo, a ngii di el tekoi el soal a Jehovah a bo loruul a mo uchul a klungiolel. (Men. 11:34-37) Me a demal er a lesa tia el klaumerang er a ngelekel e ngkmal mlo dmeu a rengul, e le ngmle medengei el kmo a blekongesenges er ngii a odeuir a rengul a Jehovah.

² A Jeftha me a ngelekel el redil a mle mui el oumerang er a Jehovah me sel rolel a loruul a tekoi. Ngmle blak a rengrir el mo  lmuut er a taem el mle meringel er tir el meruul a tekoi. Me sel kengei er a Jehovah a lmuut el mle klou a ultutelel er tir er a ngii di el tekoi el sebechir el melenget.

3. Ngmekera kerebil a Jeftha me a ngelekel e ngosukid er chelecha el taem?

³ Ngdiak lebeot el tekoi el dolemolem el blak a rengud el mo er a Jehovah. Ngkired el ‘oumekemad el kirel sel tal mla moterekokl er kid el kloumerang.’ (Jud. 3, BT) Me bo dosuub er sel rolel e a Jeftha me a ngelekel a mlo sebechir el outekangel a omelsemai er a klengar er tir. Te milekerang e melemolem el blak a rengrir el mo er a Jehovah?

4, 5. (a) A Jehovah ngmilsterir a rechad er a Israel a ngera el llach er sera lesiseb er a Beluu er a Nglat? (b) Ngera el chelebuul a blo lechelebangel er ngii a rechad er a Israel, e le tir el dimlak lolengesenges er a Jehovah el ua losaod er ngii a Psalm 106?

⁴ Ngmle bek el sils el Jeftha me a ngelekel a ulemes a telemellel a klengar er a beluu er a Israel e le rechad er ngii el dimlak lolengesenges er a Jehovah. Ngar er a bekord el 300 el rak er a uchei, e a Jehovah a milengelechel er a rechad er a Israel el mo omekoad er tirke el rokui el milengull a klsuul el chelid er a chelsel a Beluu er a Nglat, engdi tir a dimlak lorrenges a tekingel. (Dut. 7:1-4) Me a rebetok el chad er a Israel a ulemuchel el mesuub a blekerdelir a rechad er a Kanaan, el tir a milengull a klsuul el chelid e kiei el di meruul a deleboes el omeruul.​—Monguiu er a Psalm 106:34-39.

⁵ Me a Jehovah a mlo diak lomekerreu er a rechad er a Israel er a recheraro, e le tir el dimlak lolengesenges er Ngii. (Men. 2:1-3, 11-15; Psa. 106:40-43) Me nglocha kmal mle meringel er tirke el telungalek, el tir a millemolem el blak a rengrir el mo er a Jehovah er sel taem. Me nguaisei, engdi a Biblia a omasech a ngklir a rebebil el mle blak a rengrir el ua Jeftha me a ngelekel, me a Elkana me a Hana me a dirrek el Samuel. Tirkang a kmal mle sorir el oldeu er a rengul a Jehovah.​—1 Sa. 1:20-28; 2:26.

6. Ngera el uldasu er tia el beluulechad a ngar er ngii er chelechang? Me ngkired el mekerang?

⁶ Chelecha el taem e a rechad a dirrek el omdasu e meruul a tekoi el ua rechad er a Kanaan. A klengar er tir a di melisiich a tekoi er a deleboes me a uldikel e di sorir a udoud. Engdi a Jehovah a meskid a bleketakl el uleklatk el kirel a telemellel aika el tekoi. Ngkmal soal el omekerreu er kid er chouaika el tekoi el ua omerellel el mo er a rechad er a Israel. Me kid, ngsebeched el nguu a klubeled er a cheleuid el omerellir? (1 Ko. 10:6-11) Me ngkmal kired el mengikiid er kid er a rokui el uldasu er tia el beluulechad. (Rom 12:2) Me a ker a kmo, kid kede mo er a tkurrebab el sebeched el mengeroid er kid er aika el tekoi?

7. (a) Ngmle ua ngera omerellir a rechedal a Jeftha el bedul ngii? (b) Engdi ngmilekerang a Jeftha?

⁷ Sel taem er a Jeftha, e a rechad er a Israel a kmal chilarm er a mekngit el omerellir a rechad er a Filistia me a Amon e le tir el mlo diak lorrenges er a Jehovah. (Men. 10:7, 8) Ngii el Jeftha a dirrek el chilarm er a mekngit el omerellir a rudam er ngii me a remengeteklel a beluu er a Israel. Te mle mechechei e uluuketui er ngii me te uldikii er a chetemel. (Men. 11:1-3) Engdi ngdimlak lebechei aika el mekngit el omerellir me letemellii a uldesuel. Kede mekerang e mo medengei? E le sel taem el remechuodel er a beluu a ullengit a ngeso er ngii, e ngdi mle mereched el mo olengeseu er tir. (Men. 11:4-11) Me ngera rirellii a Jeftha el mo meruul el uaisei?

8, 9. (a) Ngera el omellach el ngar er a Llach er a Moses a ulemekrael er a Jeftha? (b) Ngera mle kot el klou a ultutelel el tekoi er a rengul?

⁸ A Jeftha a ta er a mle mesisiich el chad er a  mekemad, e dirrek el mle ungil el medengelii a Llach er a Moses me a reksi er a beluu er a Israel. Me a omerellel a Jehovah el mo er a rechedal a kmal ulsisecheklii el mo medengei a llechul el kirel a melemalt me a cheleuid. (Men. 11:12-27) Me a Jeftha a uluusbech er tia el klemedengei er ngii el melilt a tekoi el loruul er a bek el sils. Ngmle ungil el medengelii a uldesuel a Jehovah el kirel a ngasechereng me a omelaitechei. Ngdirrek el mle medengelii a rolel e a Dios a soal a rechedal a bo lekaubltikerreng. Me a lmuut el tang, a Llach a dirrek el ulsisecheklii er a rolel a loruul a tekoi el mo er a rechad, el mo lmuut er tirke el chad el uluuketui er ngii.​—Monguiu er a Exodus 23:4, 5; Levitikus 19:17, 18.

⁹ A kerebil a Josef a dirrek el ngilsuir a Jeftha. Nglocha ngiluu a klubelel er sel blekerdelel a Josef el ullecholt er a klechubechub er ngii el mo er a rudam er ngii alta te uluuketui er ngii. (Gen. 37:4; 45:4, 5) Me tiang a locha ngilsuir a Jeftha el mo meruul a tekoi el oldeu er a rengul a Jehovah. A omerellir a rudam er ngii a kmal tilemellii a rengul a Jeftha, engdi a bltikerreng er ngii el mo er a ngklel a Jehovah me a rechedal a kmal mle klou a ultutelel er ngii el kuk ngaruchei er a di uldesuel. (Men. 11:9) Ngtilbir el mo melemolem el blak a rengul el mo er a Jehovah, me ngmlo uchul a betok el klengeltengat el mo er ngii me a dirrek el rechad er a Israel.​—Heb. 11:32, 33.

10. Ngmekerang a omellach er a Biblia e melisiich er kid a Rekristiano er chelechang?

¹⁰ Me kid kede kongei el oukerebai er a omerellel a Jeftha? Kede mo mekerang a lsekum a Kristiano el odam er kid a tomellii a rengud me a lechub e kede mo omdasu el kmo a omerellel el bedul kid a dimlak lemelemalt? Ngkmal diak el kired el mecherei tia el kngtil a rengud me bo luchul e bo lak dosiou er a Jehovah. Ngkmal diak el kired el mengoit a miting er kid me a lechub e bo lak deteloi er a rechad er a ongdibel. Bo doukerebai er a Jeftha e dolengesenges er a Jehovah. E le tiang a mo ngosukid el outekangel a meringel el blekeradel.​—Rom 12:20, 21; Kol. 3:13.

11, 12. Ngera el telbiil a lerirellii a Jeftha?

¹¹ A Jeftha a mle medengei el kmo ngousbech er a ngelsuil a Jehovah el mo olsobel er a rechad er a Israel er a chimorir a rechad er a Amon. Me ngtilbir el mo er a Jehovah el kmo, a lsekum ngmo ngosuir el mo kats er a mekemad, e ngmo tongetengii ngike el kot el chad el mo olsiuekl er ngii sel lluut el mo remei. Ngmo “odersii el delaol tenget.” (Men. 11:30, 31) Me ngera belkul tia el tekoi?

¹² A Jehovah a kmal ouketui er a omeruul el rechad a melenget er a rengelekir, me kede medengei el kmo a Jeftha a dimlak bo loruul er tia el tekoi. (Dut. 18:9, 10) Ngar er a Llach er a Moses e a delaol tenget a mle ileakl el sengk er a chad el mo er a Jehovah. Me a mle belkul a tekingel a Jeftha a kmo, ngike el chad el bo lolenget er ngii a kirel el mo choitii a klengar er ngii el mesiou el ngar er a chedaol Tento. Me a Jehovah a rirengesii a Jeftha e ngilsuir el mo kats er a mekemad. (Men. 11:32, 33) Engdi ngtecha ngike el chad el bo lenguu a Jeftha el msa Jehovah?

13, 14. Ngolechotel a ngerang a tekingel a Jeftha el ngar er a Mengeteklel 11:35?

¹³ Ka di molatk er a tekoi el dulsaod er ngii er a uchelel tia el suobel. Sera lemerema lrei a Jeftha e ngike el kot el chad el mlo olsiuekl er ngii a di ta el betik er a rengul el ngelekel el redil! Me a Jeftha ngmo otutii a telbiil el bla lerellii? Ngmo tongetengii a klengar er a ngelekel el mo er a Jehovah me ngmo mesiou el ngar er a chedaol Tento?

¹⁴ Me a lmuut el tang, a omellach el ngar er a  Llechul a Dios a ulterekokl el ngilsuir a Jeftha el mo ungil el melilt a tekoi el loruul. Nglocha millatk a tekoi el medung er a Exodus 23:19, el milengelechel er a rechedal a Dios el mo msang a Jehovah aike el kot el ungil er tir. A Llach a dirrek el mesaod el kmo “a lsekum a chad a tibir a telbiil el mor a RUBAK, . . . e ng diak le kirel el oleiit a tekingel. Ng kirel el mo oltaut a ikel le dilung el tekoi.” (Ule. 30:2) Me a omerellel a Jeftha a kmal di ua Hana el locha kiliei er a taem er ngii. Ngii el Jeftha a lilemelemii a telbilel alta e ngmle meringel er ngii. Ngmle medengei el kmo a ngelekel a mo kirel el mesiou er a chedaol Tento, me ngbelkul a kmo ngmo diak a techellel el mo oungalek. Me ngmo diak a chad el sebechel el mo oudiukes a kloklel me a ngklel a Jeftha. (Men. 11:34) Me nguaisei, engdi ngulelsiich a tekingel el kmo: Ak “krirellii a telbilek el mor a RUBAK e diak el sebechek el oietii.” (Men. 11:35) Me a Jehovah a kilengei er a tengetengel a Jeftha e ulemekngeltengat er ngii. Me kau, ngmo blak a rengum el ua Jeftha?

15. Ngera el telbiil a bla deruul? E kede mekerang e ochotii a klaumerang er kid?

¹⁵ Sel detibir a rengud el mo er a Jehovah e kede tibir el mo meruul a soal er a bek el taem. Kede ungil el medengei el kmo ngdiak lebeot el bo dotireklii tia el telbiled. Engdi ngmo ua ngera uldesued a lsekum ngmo kired el meruul er a tekoi el diak el soad? A lsekum ngmo diak demedakt e bai kongei el olengesenges er a Dios, e kede ochotii el kmo ngblak a rengud el oltaut er a telbiled. Me alta e ngmo meringel er kid el otutii a telbiled, engdi a klengeltengat er a Jehovah a lmuut el ngaruchei er a ngii di el tekoi el dolenget er ngii. (Mal. 3:10) E kuk mekerang a ngelekel a Jeftha? Ngmlo ua ngera uldesuel el kirel a telbilel a demal?

16. Ngmilekerang a ngelekel a Jeftha er a telbiil el bla lerellii a demal? (Momes er a siasing er a uchelel a suobel.)

¹⁶ A telbilel a Jeftha a kuk mle ngodech er a Hana. A Hana a tilbir el kmo ngmo tongetengii a ngelekel er a Samuel me ngmo mesiou er a chedaol Tento el ta er a Nasarait. (1 Sa. 1:11) E tirke el Nasarait a mle sebechir el mo bechiil e  mo oungalek. Engdi a ngelekel a Jeftha a mlo ua “delaol tenget,” me ngdiak el sebechel el mo bechiil me a lechub e bo loungalek. (Men. 11:37-40) Ka di molatk, ngika el redil a mle sebechel el mo bechil a kot el ungil el chad er sel beluu, e le demal a mle merreder er a beluu er a Israel. Engdi chelechang e ngmocha kirel el mo mesiou el ngar er a chedaol Tento. Me ngmlo ua ngera uldesuel? Ngulechotii el kmo a omesiungel el mo er a Jehovah a kirel el mo kot er a ledu er a demal el kmo: “Mrellii el mer ngak sel mdillii el kmo ke mo meruul er ngii.” (Men. 11:36) Me ngkilengei el diak bo lebechiil e loungalek me bo el sebechel el mesiou er a Jehovah. Me kede mekerang e oukerebai er tia el blakerreng er ngii?

17. (a) Ngmekerang a doukerebai er a klaumerang er a Jeftha me a ngelekel? (b) Ngmekerang a Hebru 6:10-12 e smisichau el lmuut el mo menglou er a omesiungem?

¹⁷ A rebetok el telael el mekekerei el chad el Kristiano a kongei el diak bo lebechiil me a lechub e loungalek er chelecha el taem. E ngera uchul? E le ngsorir el klou a temir el mesiou er a Jehovah. Te dirrek el betok a remechudelang er a delongeled el sorir el mengoit a temir el teloi er a rengelekir me a rengelekir a rengelekir, engdi te bai mengoit a temir me a klisichir el mesiou er a Jehovah. A rebebil er tir a teloi er a ureor er a okedecherul a Blil a Ongdibel me a lechub e te mo er a Skuul el Kirir a Rumerk er a Rengedel a Dios, e dirrek el melukl el mo er aike el ongdibel el ousbech a ngeso. A rekuk bebil a menglou er a omesiungir el mo er a Jehovah er a temel a Chedaol Belsoil. Me a Jehovah a kmal diak lobes aika el tengetengir tirka el blak a rengrir el mesiungel. (Monguiu er a Hebru 6:10-12.) E kau a kuk mekerang? Omomdasu, e ngmo sebechem el lmuut el kilungii a omesiungem el mo er a Jehovah?

18, 19. Ngera kede mla suubii er a cheldecheduch el kirel a Jeftha me a ngelekel, e mekerang a doukerebai er tir?

¹⁸ Ngera el tekoi a ngilsuir a Jeftha el mo sebechel el outekangel a omelsemai el lechilebangel? Ngkilengei me ngomekrael er ngii a Jehovah. Ngdimlak lekengei el mekesuseu er a rechad el kiliei el iliuekl er ngii, e millemolem el blak a rengul alta e a rebebil a millemall er a rengul. Me a Jehovah a ulemekngeltengat er ngii me a ngelekel er a blakerreng er tir, e mlo ousbech er tir el terung el melisiich er a mera el omengull. Me alta e a rechad a mlo diak loruul a melemalt el tekoi, engdi ngii me a ngelekel a millemolem el blak a rengrir el mo er a Jehovah.

¹⁹ A Biblia a mesaod el kmo: “Bo moltirakl a blekerdelir tirkei el di uluumerang e uleba kllourreng me te mlo ngma dikesir er a telbilel a Dios.” (Heb. 6:12) Mada me bo doukerebai er a Jeftha me a ngelekel, e le kede ungil el medengei el kmo, a dolemolem el blak a rengud e kede nguu a kengei er a Jehovah.