Olechotel: A doltirakl er a ta er a babier, e a tekoi er a Grik el moiuid el “olechotel” el ngar er a 2 Korinth 1:22 a “luluusbech er ngii a rechad er a siobai” el mesaod el kirel a chad el osirs a sesei el udoud me ngorekedii a klalo me ngdiak el sebechir a rengodech el chad el mecherar. Me ngdi osisiu, a Jehovah a mla mesterir a rengellitel el Kristiano a chedaol reng el olechotel me a lechub e ngoterekeklii a omeksaul el bo lenguu. E a 2 Korinth 5:1-5 a mesaod er sel taem el bo lenguu tia el omeksulir el kmo, te mo kiei er a eanged e mo er ngii a beches el bedengir el diak el ngemed, el dikea bo lemad.​—1 Ko. 15:48-54.

Me chelecha el taem, e a tekoi er a Grik el kirel a kebkebil a chad el telbiil el mo bechiil, a dirrek el mengai er sel tekoi el moiuid el “olechotel.” Me tiang a kmal ungil a belkul, e le rengellitel el Kristiano a mo ua le “bechiil el Redil,” el bechil a Kristus.​—2 Ko. 11:2; Och. 21:2, 9.

Olangch: A ngar er a mong e a rechad a melecha olengchelir er a babier el ochotii el kmo ngmera el tekingir me a lechub e te kongei a tekoi el medung er ngii el babier. Te dirrek el melecha olengchelir er a klalo el ochotii el kmo ngkloklir. Me ngdi osisiu, a Dios a melecha olengchelel er a rengellitel el ochotii el kmo te chedal. (Efe. 1:13, 14) Me nguaisei, engdi tia el olangch a dirk sebechel el mengai. E le rengellitel el Kristiano a nguu a ulebongel el olengchelir el telkib el taem er a uchei er a lemad me a lechub e ngtelkib el taem er a uchei er a lomuchel a kloul ringel.​—Efe. 4:30; Och. 7:2-4.