A urered el omerk er a klumech er a Renged a kmal klou a ultutelel. Engdi te ngar er ngii a rebebil el diak lodengelii tia el tekoi. Te dirrek el ngar er ngii a rekuk bebil el telkib el semeriar er a Biblia, engdi ngdiak el sorir el mesuub er ngii.

Ka molatk er a Gavin. Ngulemais el mei er a miting er a Blil a Ongdibel, engdi ngdimlak el soal el mesuub er a Biblia. Ngmilsaod el kmo, ngdimlak el soal a rechad a bo lodengei el kmo ngdimlak el sal medengelii a Biblia er ngii. Ngdirrek el dimlak el soal el mecheblad me a lechub e lemorimel el mo chedal a klechelid. Me omomdasu, e ngmle sebechir a rechad el ngosuir a Gavin? Ka di molatk a klungiolel a osisecheklel a Biblia el sebechel el ngosuir a chad. A Jehovah a dilu er a rechad er a Israel el kmo: “A osisecheklek a . . . mo obeob er a chutem el ua nguches. A tekingek a mo ruebet er bebul a mengrengur el dellomel el ua ngerngir.” (Dut. 31:19, 30; 32:2) Mada, bo domekesiu er a omesiunged er a nguches, me bo el sebeched el ngosuterir “a rokui el chad” el mo medengelii a klemerang.​—1 Ti. 2:3, 4.

A nguches a diak lomekberaod a dellomel. A nguches a mo er ngii er sel taem el delekimes el ngar er a eolt a mo ngimech er a ralm. Me ngmilekerang a tekingel a Jehovah e mo “ua nguches”? Ngmle ungil el mengedecheduch er a rechedal el ochotii el kmo ngbetik a rengul er tir. Me ngsebeched el oukerebai er ngii el okiu sel dungil el mengedecheduch er a rechad el ngodech a klaumerang er tir. Kede melisiich er tir el mo ungil el omdasu e di tir el melilt a tekoi el bo loruul. Me a klemeriarreng er kid el mo er tir a sebechel el mo uchul e te kongei er a klumech el domerk er ngii.

A nguches a melisiich a dellomel. A omesiunged a sebechel el smisiich a rengrir a rechad a lsekum kede mo ungil el melatk er a rolel a dolengeseu er tir. A ta er a odam el Chris a dimlak lorrimel er a Gavin el mo mesuub er a Biblia el obengkel, e ngbai millasem el meruul er ngii me ngmo ungil a rengul el mesaod er a Biblia el obengkel. Ngdilu er ngii el kmo, ngar er ngii a tekoi el leblechoel el mesaod er ngii a Biblia, e a bo lodengelii tiang, e ngsebechel el lmuut el mo ungil el omtab a suobel er a miting. Ngdirrek el uluuchais er ngii el kmo, ngmlo oumerang er a Biblia e le ngmilsuub el kirel aike el betok el ulaoch er a chelsel. Me tiang a mlo uchul a ungil el cheldechedecherir el kirel a otutel a ulaoch er a Biblia, me ngdi mle telkib el taem e a Gavin a kilengei er a omesubel a Biblia.

A nguches a klou a belkul el kirel a klengar. Ngar sel temel a kleald er a beluu er a Israel, e ngsebechel el mo chuib a betok el buil el di diak a chull. Me a lsekum ngmo diak a nguches, e a betok el dellomel a sebechel el mo merat e mad. Me ngdi osisiu, a Jehovah a ulemlaoch el kirel a taem er kid el kmo, a rebetok el chad a “mo meched a rengrir . . . e songerenger er a klumech el ngar a RUBAK el mei.” (Amo. 8:11) Engdi ngdirrek el tilbir el kmo, a rengellitel el Kristiano a “mo ua mengelekolt el nguches el uldureklii a RUBAK,” e le te omerk er a ungil chais er a Renged, tir me a rekldemir el ‘kuk bebil el sib.’ (Mik. 5:7; Jn. 10:16) Me a klumech el domerk er ngii a sebechel el mo uchul a klengar er tirke el sorir el mo medengelii a klemerang. Me kid, kede omes er tia el klumech el klou a ultutelel?

A nguches a klengeltengat el mla er a Jehovah el mei. (Dut. 33:13) Me a klumech el domerk er ngii a dirrek el mo uchul a klengeltengat el mo er tirke el kongei er ngii. A Gavin a kmal mlo dmeu a rengul e le ngmlo medengei a nger er aike el betok el keril el kirel a Biblia. Ngdi mle mereched el olengeriakl er a omesubel e mlo metecholb. Me chelechang e ngdmeu a rengul el omerk er a ungil chais er a Renged, ngii me a bechil er a Joyce.

Tia el okesiu el kirel a nguches a dirrek el meketeklii el kmo a urerel a derta me a derta er kid a ngar er ngii a belkul. E ngerang? E le di chimo el nguches a diak a ngera el lerellii, engdi a betok el miliol el nguches a dikmesii a klou el sers. Me ngdi osisiu, kede locha omdasu el kmo a urered el omerk er a klumech a di telkib a leketmeklii. Engdi ngoeak a urerir a rebetok el miliol el mesiungel a Jehovah e a rechad er a “beluulchad el rokir” a ngar er ngii a techellir el rongesii a ungil chais. (Mt. 24:14) Me a omesiunged ngsebechel el mo uchul a klengeltengat el mo er a rechad? Ochoi! Ngkmal sebechel el mo ua nguches el melisiich er a rechad e mo uchul a klengar er tir!