NGERA el klekedall a di 3 el bond a berredel, el bebil er a rechad a mesaod er ngii el kmo “ngkot el mengasireng el klekedall er a chutem me a eanged”? Tiang a no er a bdelud. Me sel dosuub a lmuut el betok el kirel, e ngmengal mo mechas a rengud er a llemesel a rengul a Jehovah. (Psa. 139:14) Ka di molatk er a ta el tekoi el sebeched el meruul er ngii, e le ngii el milskid tia el kmal ungil el sengk.

Kid el ngar er ngii a no er a bdelud a uchul me ngsebeched el melatk a tekoi el dirkak deues me a tekoi el dirkak doruul. Me kau, ke blechoel el omdasu a chouaika el tekoi? Ngmla ta el monguiu me a lechub e ke rirenges a chisel a basio el dirkak a ta el obo er ngii? Ngulterekokl el uaisei, engdi nglocha mle sebechem el melatk er ngii el basio. Kid el rokui a blechoel el omdasu el kirel a tekoi el dirkak deues me a dirkak derenges, me a kall el dirkak decharm me a lechub e deterengur a bul.

A Biblia a meketeklii el kmo a rechad a ulebeob el okesiul a Dios. (Gen. 1:26, 27) Me tiang a ochotii el kmo, a Jehovah a dirrek el meduch el melatk a tekoi. Me ngii el milskid tia el duch a uchul me ngkired el ousbech er ngii el mo omtab aike el tekoi el soal a bo doruul. (Oli. 3:11) Me ngera el tekoi a kired el melatk? E ngera el tekoi a kuk diak el kired el melatk?

(1) Mekngit el uldasu me a lechub e kede di mechesang el melatk a kuk ngodech el tekoi.

A remesuub a tekoi a mla metik el kmo, ngmo uchul a klungioled sel dolatk a tekoi el dirkak deues me a lechub e doruul. Engdi ngbleketakl el kmo ngkired el melilt er a ungil el taem el bo dolatk a tekoi. El ua tiang, a lsekum kede ngar er a miting me a lechub e kede mesuub el di kid el tang e melatk a kuk ta er a tekoi, e a uldesued, ngmo uchul a klungioled me a lechub e ngdiak? Me a lmuut el tang, a Jesus a milengelechel er kid el mo diak di dolatk a mekngit el tekoi el ua deleboes el omeruul. (Mt. 5:28) Me a chad a lak lekerekikl er a uldesuel, e ngsebechel el mo melatk a tekoi el louketui er ngii a Jehovah. E a lsekum e ngmelatk er a deleboes el omeruul, e ngklou a techellel el mo meruul er ngii. Me bo mkerekikl me a uldesuem lak lerellau el mo tomellii a deleuill er kau me a Jehovah!

(2) A udoud a mo uchul a ulekerreu.

A udoud a ngar er ngii a belkul e le ngsebeched el ousbech el omechar aike el dousbech er a klengar er kid. Engdi a bo domdasu el kmo a udoud a uchul a mera el deurreng me a ulekerreu, e kede mo ouuchel a rengud er a uriul. A Salomon el kmal mle mellomes a rengul a dilu el kmo: “A meteet el chad a  kuk omdasu el kmo a kerruul er ngii a mesebechakl er ngii el ua kedidai e mesisiich el cheuatel el meliuekl er a beluu.” (Osi. 18:11) Engdi ngdiak leuaisei. El ua tiang, sera September 2009, e a 80% er a beluu er a Manila el ngar er a Huriping a mleeleb e le ngkmal mle klou a chull. Me a ker a kmo, tirke el betok a ududir, te dimlak lemekesakl? A ta el chad el urriid a betok el kloklel a dilu el kmo, “A ieleb a milengebuul er a rokui el chad. Me a remerau me a remechebuul a di diul mlo chuarm.” Me alta e a rebetok a omdasu el kmo a udoud a mo uchul a ulekerreu, engdi a mera er ngii e ngdiak leuaisei.

(3) Kede di bekikl er a bek el taem.

A Jesus a dilu el kmo, ngdiak el kirel el mo ‘suebek a rengud el kirel a klukuk.’ (Mt. 6:34) A rechad el di bekikl er a bek el taem a mengoit a klou el temir el melatk a mondai el dirkak lebo er ngii me a lechub e nglocha diak a ta el bo ledubech. Me ngkired el mo kerekikl er a uldesued, e le Biblia a ochotii el kmo a sebekreng a sebechel el rullii a chad el kmal mo mechitechut a rengul. (Osi. 12:25) Me ngklou a ultutelel a doltirakl er a uleklatk er a Jesus, e dosmechokl aike el mondai el dechelebangel er chelechang e lak di lesebek a rengud er a mondai el dirkak lebo er ngii.

(1) Mesa tellemall a le mei e oibngid er ngii.

A Biblia a melisiich er kid el mo oba sekutaberreng e mo ungil el melatk a tekoi el bo doruul. (Osi. 22:3) El ua tiang, a lsekum a chad a soal a omdak el milil er a kmung ker, e ngungil a cho molatk er a ngera el tekoi? Ngungil el molatk el kmo, te rua techang a mo er tia el kldibel? Te tela el chad a mong? Tia el tekoi ngmo er ngii er ker er oingerang? Ngdirrek el kirem el melatk el kmo: ‘Ngera el tekoi a sebechel el mo duubech?’ Tiang, ngmo meketmokl el oltirakl a omellach er a Biblia e mo uchul a omelisiich el kirir a rebek el chad? A chouaika el ker a ngosukau el mo ungil el melatk el kirel a omililem, me ngmo sebechem el oibngau er a ngii di el tekoi el mo tomellii a deleuill er kau me a Jehovah.

(2) Molatk er a rolel e ke sumechokl a mondai.

Ka di molatk, oleko ngar ngii a mondai er a delongelem kau me a ta er a odam me a lechub e ngodos er a chelsel a ongdibel. Ke mekerang e mengedecheduch er ngii e meruul a budech? Ngbetok a tekoi el kirem el melatk er ngii. Ngika el chad, ngua ngera blekerdelel? Ngoingerang a ungil el taem el bo mongedecheduch er ngii? Ngera ke mo dmung? Ngkirel el mo ua ngera delecherul a  ngerem? Sel bo mungil el melatk a tekoi el sebechel el mo duubech, e ngmo sebechem el ngiltii a ungil el rolel a bo msemecheklii ngii el mondai. (Osi. 15:28) Tia el omeruul a dirrek el mo smisichii a budech er a chelsel a ongdibel.

(3) Monguiu er a Biblia e mosuub el di kau el tang.

Ngkmal klou a ultutelel a donguiu er a Biblia er a bek el sils. Engdi ngdiak el kired el di menguiu er ngii e lemerekong. Ngdirrek el kired el mo ungil el omtab a tekoi el donguiu, me ngmo sebeched el oltaut er a chelsel a klengar er kid. A omengiued er a Biblia a dirrek el ngosukid el mo oba klou el omereng el saul el kirel aike el bla leruul a Jehovah el me er kid. Me ngmekerang a bo dungil el ousbech a duch er kid el melatk a tekoi sel donguiu er a Biblia? Molatk er sel babier el Imitate Their Faith. Tia el babier a mesaod er a cheldecheduch er a Biblia e ngosukid el mo ungil el melatk a blekerdelel a klengar er tirke el chad el ngar er a Biblia me a beluu el lekiliei er ngii. Ngdirrek el ngosukid el mo melatk a uldesuir, me aike el tekoi el lulemes e ulerrenges, me aike el bau el lullungel. Aika el tekoi a ngosukid el ngmai a klubeled me a omelisiich er a cheldecheduch el locha mla mo betok el taem el dechuiu. Me a lsekum kede mo ungil el melatk a tekoi sel donguiu er a Biblia e dosuub el di kid el tang, e nglmuut el mo klou a belkul a omesubed.

(4) Molatk a uldesuir a rechad.

Sel dolatk a uldesuir a rechad e ngbelkul a kmo kede melasem el mo medengei a ringelel a uldesuir. A Jehovah me a Jesus a uaisei, me ngungil a doukerebai er tir. (Exo. 3:7; Psa. 72:13) Me ngmekerang a bo dolatk a uldesuir a rechad? A ta er a rolel a okiu sel bo dungil el melatk a tekoi el lechelebangel. Me alta e ngdirkak dechebangel a tekoi el lechelebangel er ngii a odam me a lechub e ngodos er kid, engdi ngsebeched el melatk el kmo: ‘Ngmo ua ngera uldesuek oleko ak mo chelebangel er a osisiu el blekeradel? Ngera el tekoi a kuusbech er ngii?’ Sel dungil el melatk aika el tekoi, e ngosukid el mo medengei a uldesuir a rechad. Me a lsekum e ngmo blekerdeled el blechoel el melatk a uldesuir a rechad, e nglmuut el mo ungil a omesiunged me a dirrek el deleuill er kid el obengterir a rudam me a rudos er kid.

(5) Molatk er a klengar er a chelsel a beches el beluulechad.

A Biblia a blechoel el mesaod el kirel a klengar er a chelsel a beches el beluulechad el bla letibir a Dios. (Isa. 35:5-7; 65:21-25; Och. 21:3, 4) E a babilenged a blechoel el ngar er ngii a klebokel el siasing er a chelsel el olecholt a otutel aika el telbiil. E ngera uchul? Aika el siasing a ngosukid el mo melatk er kid el leko kede kiei er sel taem el bla lemotaut aika el telbiil. Me a Jehovah a milskid tia el duch er kid el melatk a tekoi, me ngmedengei el kmo, ngsebechel el mo uchul a klungioled. Sel dolatk a otutel a telbilel e ngsmisichii a klaumerang er kid e ngosukid el mo melemolem el blak a rengud, alta e kede chelebangel a betok el mondai er a klengar er kid er chelechang.

Ngokiu a klou el bltkil a rengul, e a Jehovah a milskid tia el duch er kid el melatk a tekoi. Me a bo dungil el ousbech er ngii, e ngsebechel el ngosukid el mo melemolem el blak a rengud el mo er Ngii. Mada, dochotii a omereng el saul er kid el kirel tia el sengk el okiu sel dolatk a ungil el tekoi er a bek el sils.