1. Ngmekerang a dolengesenges er a Dios me a dirrek el kabelment?

 A BIBLIA a mengelechel er kid el mo olengesenges a kabelment er a rechad, engdi ngkired el blechoel el olengesenges er a Dios. (Rel. 5:29; Tit. 3:1) Me ngmekerang a doruul el uaisei? Ngar er ngii a omellach er a Biblia el sebechel el ngosukid. A Jesus a dilu el kmo: “Bsa merreder er a Rom a kloklel, ma kloklel a Dios, bsa Dios.” (Mt. 22:21) Me ngbelkul a kmo, ngkired el olengesenges a llach er a beluu el dekiei er ngii, e harau a tax er kid, e dirrek el olecholt a omengull el mo er tirke el olab a dereder er a kabelment. (Rom 13:7) Me nguaisei, engdi a lsekum a kabelment er a beluu a orrimel er kid el mo meruul a tekoi el omtok a llechul a Dios, e ngkired el mo ungil el smodii a uchul me ngdiak dekengei er tia el omeruul.

2. Kede mekerang e ochotii el kmo ngdiak domekbitang er a tekoi er a balatiks?

² A ta er a rolel a de ‘bsa Dios a kloklel,’ a sel lak domekbitang er a tekoi er a balatiks. (Isa. 2:4) A Jehovah a omechei aika el kabelment me ngmengedereder, me ngdiak domtok er tir. Engdi ngdiak deteloi er a ngii di el omeruul el melisiich a kabelment er a rechad. (Rom 13:1, 2) Ngdiak dolasem el melodech a kabelment er a beluu  me a lechub e nguldesuir a rechad er a balatiks, e dirrek el diak de sengkio me a lechub e bo dechad er a balatiks.

3. Ngera uchul me ngdiak el kired el mo teloi a tekoi er a balatiks?

³ Ngar er ngii a ungil el uchul me a Dios a mengelechel er kid el mo diak deteloi a tekoi er a balatiks. A tang a kmo, kede oukerebai er a Jesus el ngii a “diak le ua re chad er a beluulchad,” e dimlak lekengei el mo teloi er a tekoi er a balatiks me a lechub e ngmekemad er tia el beluulechad. (Jn. 6:15; 17:16) E a ta er a uchul a kmo, kid a melisiich er a Rengedel a Dios. Ngungil a ukltked sel douchais er a rechad el kmo ngdi ta el Rengedel a Dios a mo sumechokl a mondai er a klechad, e le ngdiak dolisiich a ngii di el kabelment er a rechad. Aike el klsuul klechelid a uchul a klekakeakl er a delongelir a rechad, e le ngchelsechusem er a tekoi er a balatiks. Engdi kid a kuk diak, me ngar er ngii a kltarreng er a delongeled kid me a rudam er kid er a beluulechad el rokir.​—1 Pe. 2:17.

4. (a) Kede mekerang e medengei el kmo a techall er a orimel a sebechel el lmuut el mo meringel? (b) Ngera me ngkired el kutmeklid er chelechang me lsebeched el melemolem el diak domekbitang er a tekoi er a balatiks?

⁴ A rebetok er kid a kiei er a beluu el rechad er ngii a diak longerechir er kid el mo teloi a tekoi er a balatiks. Engdi chelecha el lolekedang a ulebongel er tia el beluulechad er a Satan, e ngklou a techelled el mo morimel el mo teloi aika el tekoi. A rebetok el chad er chelechang a “mekngit a blekerdelir” e “belkuuk er a kldidairreng,” el uchul me a klekakebosech er a uldasu a di meleketek. (2 Ti. 3:3, 4) A rebebil el rudam er kid a chelebangel a omelsemai, e le blekeradel er a belurir a di mle mereched el mengodech. Me a leuaisei, e ngkired el mengetmokl er kid er chelechang me bo el sebeched el melemolem el blak a rengud el mo er a Dios er a chelsel a meringel el blekeradel. Me bo dosaod a eua el rolel e ngsebeched el mengetmokl er kid.

5. Ngua ngera uldesuel a Jehovah el kirel a kabelment er a rechad?

⁵ A ta er a rolel e kede kutmeklid a sel bo doba uldesuel a Jehovah el kirel a kabelment er a rechad. A Jehovah a dimlak lomeob er a rechad el mo mengedereder er a rekuk bebil. (Jer. 10:23) Ngomes er a rokui el chad el kmo te di ua ta el telungalek. Engdi a kabelment er a rechad a mla meleakl er a rechad, el okiu sel lolekoi el kmo a belurir a kot el ungil. Engdi ngmo lmuut er aike el kabelment el lomes a rechad el kmo ngungil, a diak el sebechel el sumechokl a rokui el mondai er a belurir. Me a lmuut el tang, sera lomuchel a Rengedel a Dios el mengedereder er a 1914, e aike el rokui el kabelment er a rechad a mlo cherrouel ngii el Renged. E di kmedung, e a Rengedel a Dios a mo okngemed aika el rokui el kabelment er a rechad.​—Monguiu er a Psalm 2:2, 7-9.

6. Ngkirel el mo ua ngera uldesued el bedul a dereder er a kabelment?

⁶ A Dios a omechei a kabelment er a rechad me ngmengedereder, e le lsekum ngdiak a ngii di el dereder, e ngmengal mo klou a uldikel er a beluu. Tiang a uchul me ngbeot er kid el omerk er a ungil chais el kirel a Rengedel a Dios. (Rom 13:3, 4) A Dios a dirrek el mengelechel er kid el mo meluluuch el kirir a rulab a dereder, me ngmo sebeched el ngar er a budech e mengull er a Dios. (1 Ti. 2:1, 2) Me a lsekum kede mo chuarm er a chelebirukel el omeruul, e kede olengit a ngeso er a kabelment, el di ua lurruul er ngii a Paulus. (Rel. 25:11) Me alta e a Biblia a meketeklii el kmo a Satan a mengedereder er a beluulechad, engdi ngdiak losaod el kmo ngmengedereder er a rederta el chad er aika el kabelment. (Lk. 4:5, 6) Me a leuaisei e ngdiak el kired el mesaod er a ngii di el chad er a balatiks el kmo, a Diabelong a mengedereder er ngii. Ngdiak el kired el ‘melekoi a mekngit el tekoi el kirel a ngii di le chad.’​—Tit. 3:1, 2.

7. Ngkired el mo kerekikl me lak domdasu er a ngerang?

 ⁷ A lsoad el olengesenges er a Dios e ngdiak el kired el olab el mo er a ngii di el chad me a lechub e domekbitang er a tekoi er a balatiks, alta e a uldasu el lolisiich a sebechel el mo uchul a klungioled. A lebebil er a taem e tiang a diak el beot el tekoi. Ka di molatk, oleko a rebebil a mocha omtok er a kabelment el ngii a omekcharm er a rechad el uldimukl er a Resioning er a Jehovah. Ngbleketakl el kmo ngdiak bo mteloi er tir el omtok er a kabelment, engdi kau ke mo kongei a tekoi el losaod e oureng me lenguu a klisichel a dereder? (Efe. 2:2) Sel lak domekbitang er a tekoi er a balatiks, e ngbelkul a kmo ngdiak domdasu el kmo a tang a kuk melemalt er a tang. Me a uldesued a mo chemolt el oeak a tekinged me a omerelled.

8. Kede mekerang e “mo kerekikl el ua bersoech e medemedemek el ua belochel”?

⁸ A ongeru el rolel e ngdiak bo dechelsechusem er a tekoi er a balatiks a sel bo de “kerekikl el ua bersoech e medemedemek el ua belochel.” (Monguiu er a Mateus 10:16, 17.) Me ngkired el mo “kerekikl” el melatk a orimel el sebeched el mo chelebangel. Ngdirrek el kired el mo “medemedemek el ua belochel” el belkul a kmo ngdiak dekengei el mo teloi aika el tekoi. Me bo dosaod a bebil el orimel el sebeched el mo chelebangel, me a rolel a dolemolem el blak a rengud el mo er a Jehovah.

9. Ngera uchul me ngkired el mo kerekikl a cheldechedechad?

⁹ A cheldechedechad. Ngkired el mo kerekikl a lsekum a rechad el dongedecheduch er tir a sorir el mesaod a tekoi er a balatiks. El ua tiang, a lsekum kede omerk er a klumech el mo er a chad, e ngdiak el kired el mesaod aike el soad me a chetid el uldesuir a rechad me a lechub e ngcheldebechel er a balatiks. Ngbai ungil a dousbech er a Biblia el ochotii a rolel e a Rengedel a Dios a mo sumechokl a mondai er a beluu, e diak dosaod a uldesuir a rechad el kirel a semecheklel aika el mondai. Me a lsekum a chad a kuk soal el mengaititekangel el kirel a tekoi el ua remengolchotaor el mo bechiil, me a lechub e ngomelecheb er a rengalek, e ngungil a douchais er tir a tekoi el losaod a Biblia el kirel ngii el tekoi, me a rolel a doltirakl er ngii er a klengar er kid. E a lsekum ngmesaod a llach el soal a bo el metib me a lechub e ngmesuld, e ngdiak el kired el kongei me a lechub e doltngakl er a uldesuel me a lechub e dorrimel er ngii el mo ngodechii a uldesuel.

10. Ngera uchul me ngkired el mo kerekikl sel dorrenges a chais er a beluu?

¹⁰ A chais er a beluu. A lebebil er a taem e tirke el oltobed a chais a diak el melemalt a omesodir er a tekoi. Me ngar er a bebil el beluu, e a chais a blechoel el melisiich er a moktek er a kabelment er sel beluu. Me a lsekum a simbung me a lechub a rechad el oltobed a chais a melisiich a uldesuir el kirel a tekoi er a balatiks, e ngkired el mo kerekikl me ngdiak bo domdasu el uai tir. Me ngungil a di lekid el oker el kmo: ‘Ngak ngkmal soak el orrenges er a ta er a chad el oltobed a chais e le ak kongei er a uldesuel el kirel a balatiks?’ A lsekum ngsoad el melemolem el blak a rengud el mo er a Dios, e ngdiak el kired el blechoel el orrenges me a lechub e donguiu a chais el melisiich a uldesuir a rechad el kirel a balatiks. Ngbai kired el osiik a chais el melemalt a omesodel. Ngdirrek el kired el omekesiu a tekoi el derenges el mo er sel “melemalt el osisecheklel” a Biblia.​—2 Ti. 1:13.

11. Ngera uchul me ngkirel el mo tabesul a uldesued el kirel aike el mekreos el klokled?

¹¹ A tekoi er a kerruul. A lsekum ngdiak el tabesul a uldesued el kirel a kerruul me a udoud, e ngsebechel el mo uchul a omelsemai el me er kid. Telkib el taem er a uriul er a 1970 e a rebetok el Sioning el ngar er a Malawi a urriid a rokui el kloklir e le ngdimlak lekengei el mo chedal a cheldebechel er a balatiks. Engdi ngklengiterreng e le  rebebil er tir a dimlak lekengei el chemoit a kloklir. A ta er a odos er kid el Ruth a kmo, “A rebebil a ki mdilak er sera ki modik er a belumam, engdi a uriul e te kilengei el mo chedal a cheldebechel er a balatiks e liluut el mo remei e le ngdimlak el sebechir el outekangel er a klengar el ngar er a refugee camp.” Me nguaisei, engdi a ruumesingd el chedal a Dios a diak leuaisei. Ngdiak lekengei el mo chelsechusem er a tekoi er a balatiks, alta e te mo obals me a lechub e te oriid a rokui el kloklir.​—Heb. 10:34.

12, 13. (a) Ngera uldesuel a Jehovah el kirir a rechad? (b) Ngmekerang e mo tabesul a uldesued el kirel a beluad?

¹² Kldidairreng. A rebetok el chad a mekedidai a rengrir e omdasu el kmo a kleblillir me a belurir me a siukang er tir a kot el ungil. Engdi a Jehovah a diak lomdasu el uaisei. Ngbai omes er a rokui el chad el di osisiu, el diak a tang el kuk ungil er a tang. Me nguaisei, engdi ngdmeu a rengud e le ngmilebid el kakerous a blekerdeled me a teleteled. Ngdirrek el diak el longerechir er kid el mo mengoit a siukang er kid. Engdi ngdiak el soal a bo domdasu el kmo kede kuk ungil er a rebebil er a rechad.​—Rom 10:12.

¹³ Me ngdiak el kired el omdasu el kmo a beluad a kuk ungil er a bebil er a beluu. A lsekum nguaisei a uldesued, e ngklou a techelled el mo diak dolengesenges er a Dios. Tia el tekoi a dilubech er a irechar e le rebebil el Kristiano el millekoi a tekoi er a Hebru a mle mekngit a omerellir el mo er a remelakl el dil el melekoi a tekoi er a Grik. (Rel. 6:1) Me kede mekerang e di kid el merriter er a uldesued? Ka di molatk, ke mo mekerang oleko a odam me a lechub e ngodos er a ta er a beluu a ouchais er a uldesuel e le ngsoal el ngosukau? Ke mo omdasu el kmo, ‘kemam a kuk meduch er kemiu,’ me ngdiak mkengei er a uldesuel? A leuaisei, e lak mobes er a uleklatk el kmo: “Moba klengariourreng el di blechoel el omdasu er a re bebil er a re chad el kmo te kuk ungil er kemiu.”​—Fil. 2:3.

14. Ngmekerang a nglunguuch e ngosukid? E ngera dilubech er a irechar el meketeklii tia el tekoi?

¹⁴ A ongedei el tekoi el ngosukid me ngdiak bo dechelsechusem er a tekoi er a balatiks a sel dultuil er a Jehovah el kirel a ngeso. A lsekum ke kiei er a beluu el kabelment er ngii a di meruul a chelebirukel, e moluluuch el olengit er a chedaol reng er a Dios me lengesukau el mo klou a rengum. Ngdirrek el kirem el olengit er Ngii me lengesukau el mo medengei e oibngau er a omengesuseu el mo teloi a tekoi er a balatiks. (Jak. 1:5) Me a lsekum e ke obals me a lechub e ke mekelebus el blakerreng er kau el mo er a Jehovah a uchul, e moluluuch me bo el sebechem el oba blekeu e mo ungil el smodii a klaumerang er kau. A Jehovah a ulterekokl el mo ngosukau me ngmo sebechem el outekangel.​—Monguiu er a Rellir 4:27-31.

15. Ngmekera Biblia e ngosukid el mo diak domekbitang er a tekoi er a balatiks? (Dirrek el momes er a baks el “A Tekingel a Dios a Millisiich a Rengrir.”)

¹⁵ A Jehovah a dirrek el smisichid el okiu a Biblia. Me ngungil a cho molatk aike el bades el ngosukau me ngmo diak momekbitang er a tekoi er a balatiks. Molasem el mo medengei aika el bades, e le ngsebechel el ngosukau er sel taem el diak a Biblia el mobang. A Biblia a dirrek el smisichii a klaumerang er kau er a telbilel a Dios el kirel a ngar medad el klebesei. Tia el omelatk a klou a ultutelel e le ngmo ngosukau el outekangel a meringel el odechelakl. (Rom 8:25) Molilt a bebil er a bades el mesaod el kirel a beches el beluulechad, e molebedebek er sel taem el kau a kiei er a chelsel.

16, 17. Ngera kede suubii er a blakerreng er a remesiungel a Dios? (Momes er a siasing er a uchelel a suobel.)

¹⁶ A ongeua el tekoi el ngosukid me ngdiak bo dechelsechusem er a tekoi er a balatiks a sel doukerebai er a reblak a rengrir el mesiungel a Jehovah.  A rebetok el mesiungel er a irechar a uleba blekeu me a llomeserreng. Ka di molatk er a omerellel a Sadrak me a Mesak me a Abednego el dimlak lekengei el mengull er a bleob el chaus el ulemtechei er a kabelment er a Babilon. (Monguiu er a Daniel 3:16-18.) Me a omerellir a mla ngosuterir a rebetok el Sioning el mo oba blekeu e mo diak lekengei el osus er a banderang er a beluu el lekiei er ngii. A Jesus a dimlak lekengei el mo teloi a tekoi er a balatiks me a lmuut el bebil el klaititekangel er a beluu. Ngmle medengei el kmo a omerellel a mo ngosuterir a redisaiplo er ngii me ngdilu el kmo: “Lak kom medakt, e ak mla mo mesisiich er a beluulchad!”​—Jn. 16:33.

¹⁷ A rebetok el Sioning er chelechang a dirrek el diak lekengei el mo teloi a tekoi er a balatiks. A rebebil er tir a mlo chuarm, e mlekelebus me a remlad e le tir el ullengesenges er a Jehovah. Me a omerellir a sebechel el ngosukid el mo oba blekeu. A ta er a odam er kid er a beluu er a Turkey a dilu el kmo: “Ngmla er ngii a ngeasek el odam el Franz Reiter el dimlak lekengei el mo soldau er a Hitler me te milekodir. Me a babilengel el mo er a delal el lulluches er ngii er sel kesus er a uchei er a lemad a ulechotii a klou el klaumerang er ngii er a Jehovah. Me ngmle soak el oukerebai er ngii a lsekum ak mo chelebangel a chouaisei el ongarm.” ^[1]

18, 19. (a) Te mekerang a rudam me a rudos er a ongdibel er kau e ngosukau? (b) Me kau, ke mla tibir er a rengum el mo mekerang?

¹⁸ A rudam me a rudos er a ongdibel er kau a sebechir el ngosukau el mo melemolem el blak a rengum. A lsekum ke chelebangel a orimel el mo teloi a tekoi er a balatiks, e mongedecheduch er a remechuodel e molengit er tir me lomekrael er kau el oba Biblia. Me a lsekum a relmuut el bebil el rudam me a rudos a medengelii a tekoi el cho mchelebangel er ngii, e ngdirrek el mo sebechir el ngosukau. Molengit er tir me loluluuch el kirem. E kid me ngdirrek el kired el meluluuch el kirir a rudam er kid. (Mt. 7:12) A lsekum ke mo er a jw.org, e ngsebechem el omes a list er tirke el rokui el odam el kelebus. ^[2] Molilt a bebil el ngakl, e molengit er a Jehovah me lengesuterir el mo oba blekeu e lolemolem el blak a rengrir el mo er Ngii.​—Efe. 6:19, 20.

¹⁹ Chelecha el lolekedang a ulebongel er tia el beluulechad, e nglmuut el mo mesisiich a orimel el mo teloi a tekoi er a balatiks. Sei a uchul me ngkmal kired el kutmeklid er chelechang, me ngdiak bo dolab el mo er a ngii di el kabelment er tia el beluulechad!