SEL LEDUUBECH A TELLEMALL, E KAU KE MO MELATK EL KMO, ‘NGMLA ER KER A DIOS?’ ME A LECHUB A MEKNGIT EL TEKOI EL DILUBECH ER A KLENGAR NGMLA RULLAU EL MO OUMEDEDENGER EL KMO A DIOS OMEKERREU ER KAU?

Ke locha di ua Sheila el ngii a kiei er a Merikel. Ngika mlukeroul er a telungalek el kmal mle mesisiich er a klechelid er tir. Ngdmu el kmo: “Ak di mle ngalek e soak a Dios le ngii a Ulemeob er kid. Engdi ngdimlak a kmes el deleuill er ngak me ngii. A kulemdasu el kmo ngsebechel mesekak engdi ngdi ngar cheroid e omes er ngak. Ngdimlak kumdasu el kmo ngouketui er ngak engdi ngdirrek el dimlak kuumerang el kmo ngbetik a rengul er ngak.” Ngera uchul me a Sheila a uluumededenger? Ngmelekoi el kmo: “Ngdi mle mekdekudem a ringel el duubech el mora telungalek er ngak, e dimlak olechotel a kmo a Dios olengeseu er kemam.”

Me ke locha di ua Sheila el oumerang el kmo ngngar ngii a Dios. Engdi ke locha melatk el kmo ngmera el omekerreu er kau. A melemalt el chad el Job el ngii a uluumerang er a klisichel me a llemesel a rengul a Ulemeob me ngdirrek el mlo oumededenger. (Job 2:3; 9:4) Ngika dirrek el mle mekdekudem a ringel el duubech el mo er ngii e dimlak a ngosuir me nguleker er a Dios el kmo: “Ng ngera me komart er a medam, e omasech er ngak el ua kcherrouem?”​—Job 13:24.

Ngngera ngmelekoi a Biblia? A Dios, ngngii a uchul a ringel? Ngngera olechotel a ulekerreuil a Dios el mora rechad me a dirrek el derta er kid? Kid, ngmera el sebeched el mo medengei el kmo ngmes a tekoi el dechebangel, medengelkid, chubkid, me a lechub e ngolengeseu er kid er a mondai er kid?

Ngar aike el ongingil suobel e kede mo mesaod a rolel e a blebelel a Dios a ochotii a ulekerreuil el mei er kid. (Rom 1:20) E a uriul e kede mo merriter a rolel e a Biblia ochotii a ulekerreuil a Dios. Sel bo mungil el “medengelii” loeak a blebelel me a Tekingel e ngmo ulterekokl a rengum el kmo “ng kerekikl el omekerreu er [kau].”​—1 Johanes 2:3; 1 Petrus 5:7.