Ngdiak lebeot el tekoi a dosiik er a ungil sengk el mora chad. E le klungel a ultutelel a sengk a di mo ultuil er a uldesuel a chad el nguu ngii el sengk. E a uldesuel a ta er a chad el kirel a ungil sengk a locha kuk mo ngodech er a uldesuel a tang.

El ua tiang, a ngeasek a locha omdasu el kmo a beches el klekedall er a electronic a kot lungil sengk. E a klou el chad a locha kuk oba omereng el saul el kirel a klalo el ngar er ngii a belkul el ua mekreos el kloklel a telungalek. E a siukang er a bebil beluu, e a rechad a ousengk el mora remeklou me a remekekerei el chad a udoud me bo lsebechir el mo mechar a sorir el klalo.

Me alta e tiang a meringel tekoi, engdi a rebetok el ungil a uldesuir a melemolem el osiik a ungil sengk el mora rechad el lolatk er tir. E dirrek alta e ngdiak deblechoel metik er a kot lungil sengk, engdi ngungil a dolatk a tekoi el sebechel mo uchul a klungiaol. Mada me bo dosaod a eua el rolel e ngsebeched el remuul a tekoi el mo uchul a deurreng er ngike el nguu a sengk er kid.

A urungulel ngike el nguu a sengk. A ta el chad er a beluu er a Belfast el ngar a Northern Ireland, a dilu el kmo, a rrat er ngii er a race a kot el mle ungil sengk el lengiluu er a dirk el 10 me a lechub e 11 a rekil. E ngera uchul? Ngdmu el kmo: “E le ngkot el mle soak el klalo.” Me tiang a ochotii el kmo a urungulel a chad a dirrek el kmal klou a lerellii er a uldesuel el ochotii el kmo ngkmal soal a sengk me a lechub e ngdiak. Me ka molatk er a chad el soam lomsa sengk. Bo mungil lomtab el kmo ngerang a meklou a ultutelel er ngii, e seikid e ke mo medengei el kmo ngera soal. El ua tiang, a redemerir me a rederrir a ruungalek a blechoel sorir el mengoit a taem el obengkel a telungalek er tir. Ngsorir lomes er a rengelekir me a rengelekir a rengelekir er a bek el techall. Me nglocha kmal ungil el sengk el mo er tirka el mechudelang a lsekum te ngmai a ulengellir el telungalek e ngoititerir el mo milil e mesarech a beluu.

A ungil rolel e kede mo medengei a soal a chad, a sel bo dekerekikl el rongesii. A Biblia a mengelechel er kid el mo ‘mereched el orrenges, e meoud el mengedecheduch.’ (Jakobus 1:19) Me a bek el taem el mongedecheduch er a resechelim me a lechub e te chedam, e bo mkerekikl lorrenges me bo lsebechem el mo medengei aike el sorir me a dirrek el chetirir. Seikid  e ngmo sebechem el ungil smiik a sengk el modengei el kmo ngmo sorir.

Aike el lousbech ngike el melai er a sengk. Ngike el melai er a sengk a locha kmal mo mereng a saul el kirel a di kekerei el tekoi el ngii a lesal lousbech er ngii. Engdi ke mekera e sebechem el mo medengei el kmo ngera ngmera lousbech er ngii a chad?

Ngkora ua lebeot el tekoi a di doker er a chad el kmo ngera ngousbech er sel taem me a lechub e ngera soal. Me nguaisei, engdi a rebetok el sorir el merous a sengk a dmeu a rengrir el mesa chad el kibetiekl, e kmal mo dmeu a rengul er a sengk er ngii. Me a lmuut el tang, alta e a rebebil a locha di bleketakl louchais a sorir me a chetirir, engdi oumesingd el taem e ngdiak el sorir a bo dodengei aike el tekoi el lousbech.

Me ngungil a bo dekerekikl lomtab a tekoi el kirel a blekerdelel a klengar er a chad. Ngika el chad, ngkekerei el chad, ngchudelang, ngmesobil, ngbechiil, ngmla mo diak el bechiil, ngmelakl dil, ngoureor, me a lechub e ngmla retire? Bo mungil melatk el kmo ngua ngera el sengk a leblechoel a rechad lousbech.

Me a llomeserreng a duch el mo sebeched el omes el engelakl er a ikrel a tekoi, e omes el engelakl er a di bleketakl el tekoi. Me a lsoad el mo ungil medengei aike el lousbech a chad, e ngungil a doker er a rebebil el kirel ngii el tekoi. Tirkang a locha mo sebechir el subedau er a ileakl el tekoi el lousbech er ngii, el diak a rechad el medengelii. Me ngokiu aika el tekoi e ngmo sebechem el sikii a sengk el lousbech er ngii el dimlak a rechad el mdesuii.

A ungil temel. A Biblia a kmo: “A ungil tekoi odesebii a rengul a chad, me ng ungil a le medung er sel kirel el belsechel.” (Osisechakl 15:23) Tia el bades a ochotii el kmo a temel a tekoi el dolekoi a kmal klou a lerellii. Me ngdi osisiu er a omeruul el doruul. A tekoi el medung er a ungil blsechel a kmal mo ungil er a oderengesel ngike el orrenges. Me a sengk el meketmokl er a ungil blsechel a mo uchul a klou el deurreng er ngike el nguu.

A sechelim a mochu bechiil. Me a ngalek er a skuul a kmedu el tuobed er a skuul. A rubekel a kmedu el mo oungalek. Aikang a di bebil er a tekoi el rechad a blechoel el meruul a sengk el kirel. A rebebil a mla metik er ngii el kmo ngungil sel loluches aika el ileakl el tekoi er a list er tir el kirel a merael mei el rak, me bo lsebechir el melatk er uchei el kirel a ungil sengk el kirel a derta er ngii el tekoi. Tiaikid a rolel e ngmo sebechir el kutmokl a ungil sengk el kirel a derta er ngii. *

Nguaisei, engdi tiang a diak lebelkul a kmo me ngkirem el mo diak morous er a temel a ileakl el sils. A deurreng er omerous a sebechel meketmokl er a ngii di el taem. Engdi a rokui el tekoi a ngar er ngii a telkelel. El ua tiang, a lsekum a sechal a omsang a redil a sengk el di diak a ungil luchul, e ngsebechel a redil el mo omes er tia el sengk el ua lolechotel a kmo ngika el chad a semeriar el mo ungil medengelii. Me a lsekum a moktek er a chad a diak el mera el tekoi, e tiang a sebechel mo uchul a rraurreng me a chetituokel el tekoi. Me tiaikid a uchul me ngklou a ultutelel el bo dolatk er a ta el tekoi, el ngii a moktek er ngike el merous er a sengk.

A moktek er ngike el merous. Ngungil a lsekum a chad el ngiluu a sengk a mo kerekikl e le ngsebechel mo cheleuid a uldesuel el kirel moktek er ngike el milsa sengk. Me ngike el mirrous a dirrek el kirel el mo merriter er sel moktek er ngii a uchul me ngmirrous. Alta e a rebetok el chad a omdasu el kmo ngrolel a chetengakl a lomesterir a rechad a sengk, engdi a mera er ngii a rebetok a morimel er a ileakl el taem er a rak el mo meruul a sengk er tir el mora rechad. E ngar er ngii a rekuk bebil el merous a sengk e le ngsorir a rechad a bo loldanges er tir me a lechub, e kuk bo loruul a kmung ngerang el mo er tir er a uriul.

Ngmekerang e mo sebechel lulterekokl a rengum el kmo ngungil a moktek er kau e merous a sengk? A Biblia a kmo: “A ikel rokui el cho moruul, moruul el oba bltikerreng.” (1 Korinth 16:14) A lsekum ke merous loba bliochel bltikerreng me a omelatk el kirir a rechad el morous el mo er tir, e te mera el mo dmeu a rengrir el nguu a sengk, me kau a dirrek el mo chormii a klou el deurreng el mei lokiu a mera el blekururau. Me sel morous el mera el ngar a rengum, e ke dirrek el rullii a Demad el ngar a eanged el kmal mo dmeu a rengul. A apostol el Paulus a chilat er a Rekristiano er a Korinth er a irechar el kirel a omerellir el kmal mle bekururau e dirrek el mle dmeu a rengrir lolengeseu el kirel a urerir a rekldemir el Kristiano er a  Judea. Me a Paulus a dilu er tir el kmo: A “Dios a soal ngikel ungil a rengul e olengeseu.”​—2 Korinth 9:7.   

A bo dekerekikl el melatk aika el tekoi el bla desaod e ngsebechel ngosukid el mo meduch el merous a sengk el ngii a mo uchul a deuil a rengrir a rechad. Aika el tekoi me a lmuut el bebil a ngar er ngii a leketmeklii er a tekoi el bla leketmokl a Dios el kirel a klechad me bo lsebechir el nguu a kot el ngarbab el sengk. Aki mengemedaol er kau el mo obengkemam el mesaod er tia el kot el ngarbab el sengk er a ongingil el suobel.