1-2. (a) Ngua ngera osengel a Jehovah el kirir tirke el durengrir el meruul a klengit? (b) Ngera omeltkel a Jehovah el kirir tirke el ngar er a klengit?

 A JEHOVAH diak el kengei a rokui el omeruul. Ngouketui a klengit. (Psa. 5:​4-6) Ngmengerechir er kid el mo oltirakl a llechul el ngar er a Tekingel el Biblia. Me nguaisei a Jehovah diak el expect er a rechad el diak el mecherrungel el mo perfect. (Psa. 130:​3, 4) A osisiu el taem, e ngdiak lolemolem er a “re chad el diak lomekerreu er a Dios . . . e omult er a krasia er a Dios el mo rolir er omeruul el delengerenger.” (Jud. 4) A Biblia melekoi el kmo te mo “nguemed tirkel chad el diak lomekerreu er a Dios” er a mekemedil er a Armakedon.—2 Pe. 3:7; Och. 16:16.

² Me nguaisei, engdi a Jehovah diak el soal a ngii di el chad a lengemed. Ngua dulsaod er aike el uleak medal el suobel er tia el series, a Biblia kmo a Jehovah diak el “soal a ngii di le chad a leriid, e bai soal a rokui el chad a lobult el mo imikr a kngterir.” (2 Pe. 3:9) A remechuodel oukerebai er a Jehovah e oba kllourreng el lolengeseu er a rengar er a klengit el mo ngmodech omerellir e lmuut el nguu a kengei er a Jehovah. Me nguaisei engdi ngdiak el rokui el ngar er a klengit a mo obult. (Isa. 6:9) Alta remechuodel a betok el taem el lolasem el lolengeseu er tir el lobult, engdi a rebebil a di mo sorir el melemolem el ngar er a klengit. Ngera kirel meketmokl sel leduubech a chouaisei el blekeradel?

 “MCHERIDII ER A DELONGELIU NGIKEL CHAD EL NGAR A DELEBOES EL DELENGERENGER”

3. (a) A Biblia ngdmu el kmo ngera kirel meketmokl a lsekum a chad el ngar er a klengit a diak lekengei el lobult? (b) Ngera uchul me ngsebeched el melekoi el kmo a chad el ngar er a klengit a di ngii el melilt el mo mesuld a ngklel er a ongdibel?

³ A chad el ngar er a klengit sel lak lekengei el lobult e a remechuodel a kirir el mo oltirakl er a ulekrael el ngar er a 1 Korinth 5:13 el kmo: “Mcheridii er a delongeliu ngikel chad el ngar a deleboes el delengerenger.” A chad el ngar er a klengit a mla ngiltii tia el tekoi me ngduubech el mo er ngii, me ngmeridm a medal omerellel. (Gal. 6:7) Ngera uchul me ngsebeched el melekoi el uaisei? E le ngika dimlak lekengei a ngelsurir a remechuodel el mo melodech a rolel e obult. (2 Ki. 17:​12-15) A omerellel ochotii el kmo ngdiak el soal lolengesenges a llechul a Jehovah.—Dut. 30:​19, 20.

4. Ngera uchul me te oltobed er a subed el kmo ngmla mesuld a ngklel a chad er a ongdibel?

⁴ A chad el ngar er a klengit el diak lekengei el lobult sel lemesuld a ngklel er a ongdibel, e te mo mesubed er a ongdibel el kmo ngmla mo diak el ta er a Sioning er a Jehovah. A subed a diak lemoktek er ngii a omekrur er a chad ngbai medung me a ongdibel bo loltirakl er a ulekrael er a Bades el kmo “ng diak bo mobengkel” ngii el chad el “mo lmuut er a blengur me ng diak bo mobengkel.” (1 Ko. 5:​9-11) Ngngar ngii a ungil luchul me kede mla nguu tia el ulekrael. A apostol Paulus a kmo: “A telkib lomkukel a blauang a mkukii a rremotel el blauang el rokir.” (1 Ko. 5:​6, BT) Me a rechad el ngar er a klengit el diak lekengei lobult a sebechir el mo mengitechut er a rebebil el mo diak el loltirakl a llechul a Jehovah.—Osi. 13:20; 1 Ko. 15:33.

5. Ngera kirel osenged el bedul a kldemed er a klemerang el mesuld a ngklel er a ongdibel, e ngerang?

⁵ Ngera kirel el osenged el bedul a kldemed er a klemerang el mesuld a ngklel er a ongdibel? Alta ngkmal diak bo dobengkel me nguaisei engdi ngkired el mo omes er ngii el kmo ngmla remiid el sib, el dirk ngar ngii omelatk el kirel. A sib el mla mo cheroid er a delebechel a dirk sebechel lmuut el mei. Lak mobes el kmo a mla remiid el sib a tilbir a klengar er ngii el mora Jehovah. Ngklengiterreng e le chelechang e ngmla mo diak lekiei el loltirakl er tia el telbilel, e tia kengaol. (Ese. 18:31) Me nguaisei, chelecha el ledirk ngar ngii a taem me a Jehovah dirk kongei el lolecholt er a klechubechub, e ngngar ngii omelatk el kmo ngsebechel lmuut el mei. Me ngmekera remechuodel e olengeseu er a chad el mla mesuld a ngklel er a ongdibel?

ROLEL E A REMECHUODEL OLENGESEU ER TIRKE EL MESULD A NGKLIR

6. Ngera te mo meruul a remechuodel el lolengeseu er a chad el mesuld a ngklel er a ongdibel?

⁶ A chad el mesuld a ngklel er a ongdibel, ngmla mechoit e kirel di ngii el metik er a rolel el lmuut el mei er a Jehovah? Ngkmal diak! A remechuodel sel louchais er a chad el kmo ngmo mesuld a ngklel er a ongdibel, e te ouchais er ngii aike el kirel meruul me bo lsebechel el lmuut el mei er a ongdibel. Me nguaisei a remechuodel a meruul a lmuut el betok er tiang. Ngar er a oumesingd el blekeradel e te mo ouchais er a chad el ngar er a klengit el kmo ngsorir el lmuut el mo meet er ngii er a chelsel a sesei el buil el mo mesa el kmo, ngmla mengodech a uldesuel. A lsekum a chelsel a sesei el buil e ngkongei el lmuut el mo meet er a remechuodel, e a remechuodel a mo melisiich er ngii me lobult. Mo lmuut me a le dirkak el mengodech a uldesuel, a remechuodel a dirk melasem el lmuut el mo meet er ngii er a ngar medad e melisiich er ngii me lobult.

7. Te mekera remechuodel e olecholt er a klechubechub er a Jehovah sel lemesuld a ngklel a chad er a ongdibel? (Jeremia 3:12)

 ⁷ A remechuodel a mora tkurrebab el sebechir el lolecholt er a klechubechub er a Jehovah el mora remesuld a ngklir er a ongdibel. El ua tiang, a Jehovah dimlak longiil er a rechedal er a rechad er a Israel el mo obult e mochu melasem el lolengeseu er tir. Ngbai uleldurech er a reprofet er ngii el mo er tir er a ledirk ngar er a klengit. Ngua losaod er ngii sel ongeru el suobel er tia el series, a Jehovah ulechotii a klungel a klechubechub er ngii er a lousbech er a profet Hosea el lmuut el mo mesumech er a delongelel ngii me a bechil el dirk mirruul a klengit. (Hos. 3:1; Mal. 3:7) Me a remechuodel a kmal oukerebai er a Jehovah e kmal sorir a chad el ngar er a klengit a lobult e lluut el mei er a ongdibel, e kmal diak el sorir el rullii el mo meringel er ngii a lmuut el mei.—Monguiu er a Jeremia 3:12.

8. Ngmekera okesiu er a Jesus el kirel a ririid el ngalek e ngosukid el lmuut el mo dmolech a klemedengei er kid er a klechubechub er a Jehovah? (Lukas 15:7)

⁸ Molatk er a okesiu er a Jesus el kirel a ririid el ngalek, el dulsaod er ngii er a ongeru el suobel er tia el series. A chedam er a lesa ngelekel e “ng rirurt el mong el mechulii ngiil ngelekel e turengur a medal.” (Lk. 15:20) Mutebengii el kmo a chedam a dimlak longiil er a ngelekel el me olengit a klausubes. Ngbai rirurt el mong e le ngbetik a rengul er ngii. A remechuodel a mora tkurrebab el sebechir el lolecholt er a osisiu el teletael el mo er tirke el mo cheroid. Ngsorir tirka el ririid el sib a lluut el me remei. (Lk. 15:​22-24, 32) Ngklou a deurreng er a eanged sel lluut el mei a chad el ngar er a klengit, e dirrek el klou a deurreng er a chutem!—Monguiu er a Lukas 15:7.

9. A Jehovah ngera ngolengit er ngii er a rechad el ngar er a klengit?

⁹ Me kede mla suubii el kmo a Jehovah diak lolemolem er tirke el diak el sorir el lobult er a kngterir. Me nguaisei engdi ngdirk melasem el lolengeseu er tir. Ngsoal tir a lluut el mei. Kede mesa uldesuel a Jehovah el kirir tirke el lobult er a kngterir er a Hosea 14:4: “Ak mo oluuteterir a re chedak el mer ngak. Ng mo betik a renguk er tir el oba renguk el rokir; ele ng dikea lolengasech a renguk er tir.” Tia mesisiich el luchul me a remechuodel osiik aike el lochotii el kmo a chad olecholt er a bulterreng. Ngdirrek el mesisiich luchul me tirke el mla choitii a Jehovah lemereched el lmuut el mei er ngii.

10-11. Te mekera remechuodel e mo melasem el lolengeseu er tirke el milsuld a ngklir er a ngar er a mong?

¹⁰ E kuk mekerang tirke el milsuld a ngklir er a ngar er a mong, el locha mla mo betok el rak er a mla me mong? Tirka el chad a locha mla mo diak loruul er a klengit el lemilsuld a ngklir el kirel. Ngar er a bebil el blekeradel e a rebebil er tir a locha dikea lodengelii a uchul me ngmilsuld a ngklir. Me a bla bo leseluld a ngklir el kemanget el taem me a lak me a remechuodel a mo melasem losiik er tir e oldingel er tir. Sel loldingel er a chad el seluld a ngklel e te mo meluluuch lobengkel e melisiich er ngii el lmuut el mei er a ongdibel. E uaisei el lsekum a chad a mla mo cheroid el betok el rak e ngulterekokl el kmal mechitechut er a klereng. Me a lsekum e ngochotii el kmo ngsoal lmuut el mei, e a remechuodel a mo oterekeklii a chad el mo mesuub a Biblia el lobengkel alta ngdirkak le reinstate. E uaisei el ngar er a chelsel a ngii di el blekeradel e te remechuodel tir tirke el mo arrange er a omesubel er a Biblia.

¹¹ Me a remechuodel el melasem loukerebai er a klechubechub er a Jehovah a uchul me te melasem losiik er tirke el rokui el mla choitii a Jehovah, e melisiich er tir el lmuut el mei er  ngii. Sel rechedel a chad el lochotii el kmo ngmla obult e mla mo diak el ngar er a klengit e ngsebechel lmuut el reinstate.—2 Ko. 2:​6-8.

12. (a) Ngera el blekeradel a kirir a remechuodel el kmal mo kerekikl er ngii? (b) Ngera uchul me ngdiak el kired el mo feel el kmo ngngar ngii a bedengel a klengit el diak el sebechel el nguu a klechubechub er a Jehovah? (Dirrek el momes er a footnote.)

¹² Ngar er a ileakl el blekeradel e a remechuodel a kirir el kmal mo kerekikl er a uchei er a le reinstate er a chad. El ua tiang, a lsekum a chad a millemall er a rengalek me a lechub e ngmlo omtok a mera el osisechakl, me a lechub e ngmillib er a rolel e ngsebechel el tuobed er a chebechiielel, e a remechuodel a kirir el kmal mo ulterekokl a rengrir el kmo ngmera el mla obult. (Mal. 2:14; 2 Ti. 3:6) Ngkirir el mekerreuii a delebechel. A osisiu el taem e ngkired el mo medengei el kmo a  Jehovah mo kongei er a ngii di el chad el ngar er a klengit el lochotii el kmo, ngmera el mla obult e stob el ngar er a klengit el lmuut el mei er ngii. Me alta remechuodel a kmal mo kerekikl el lomes el kmo a chad el rirellii a kmal mekngit el mora rebebil a mera el mla obult, ngdiak el kirir el mo omdasu el kmo ngngar ngii a bedengel a klengit el diak el sebechel el nguu a klechubechub er a Jehovah. a—1 Pe. 2:10.

A SEBECHEL A ONGDIBEL EL MERUUL ER NGII

13. Ngera klekakerous er a omerelled el mora chad el mla reprove me a chad el mla mesuld a ngklel?

¹³ Ngua dulsaod er ngii er a uleak uchei el suobel, a lebebil e ngtuobed a subed el kmo a chad a mla reproved. Sel bo leuaisei e ngsebeched el melemolem lobengkel e le kede medengei el kmo ngmla obult e mla mo diak el ngar er a klengit. (1 Ti. 5:​20, BT) Ngdirk chedal ongdibel e ousbech er a omelisiich er a rudam me a rudos er ngii el mo meruul a llemalt. (Heb. 10:​24, 25) Me nguaisei a teletael a kmal ngodech a lsekum a chad a mesuld a ngklel er a ongdibel. “Ng diak bo [dobengkel]” “el mo lmuut er a blengur me ng diak bo [dobengkel].”—1 Ko. 5:11.

14. Ngmekera sebechir a Rekristiano el lousbech er a ukltkir el mla mosisechakl er a Biblia el kirel a chad el seluld a ngklel? (Dirrek el momes er a siasing.)

¹⁴ Tia ngbelkul a kmo ngdiak el sebeched el invite er a chad el mla mesuld a ngklel el mei er a miting me a lechub e kede outkeu er ngii er a blil a ongdibel? Ngdiak el uaisei. Ngkmal diak bo de associate lobengkel, me nguaisei a Kristiano sebechel lousbech er a ukltkel el mla mosisechakl er a Biblia el melilt el kmo ngmo invite er a chad el seluld a ngklel el mei er a miting, el locha chedal me a lechub e ngmle kmeed el sechelil er a uchei er a lemesuld a ngklel. E a lsekum ngmei er a miting? A ngar er a mong e ngkmal dimlak bo dongedecheduch er a chad el seluld a ngklel. Me nguaisei engdi chelechang e a rederta er kid a mo kirel lousbech er a ukltkel el mla mosisechakl er a Biblia el kirel tia el tekoi. A rebebil a locha mo melilt el outkeu er ngii. Me nguaisei engdi  ngkmal diak bo dongemanget er a cheldechedechad me a lechub e de associate el lobengkel.

15. Te ngera el chad el ngar er a klengit a losaod er tir a 2 Johanes 9-11? (Dirrek el momes er a baks el “ A Johanes me a Paulus Te Milsaod er a Osisiu el Bedengel a Klengit?”)

¹⁵ A rebebil a locha mo melatk el kmo, ‘A Biblia ngkora kmo a Kristiano el loutkeu er a chouaisei el chad a mo kldemel er aike el mekngit el loruul?’ (Monguiu er a 2 Johanes 9-11.) A cherrengelel tia el babier ochotii el kmo tia el ulekrael a mesaod er a rechad el mo omtok a mera el osisechakl me a rechad el melisiich er kid el mo meruul aike el lolekoi a Biblia el kmo ngmekngit. (Och. 2:20) Me a lsekum a chad a blak a rengul el melisiich a osisecheklir a rumtok a mera el osisechakl me a lechub e ngmekngit el lomeruul el lolekoi a Biblia, e a remechuodel a diak bo lolasem el loldingel er ngii. Me nguaisei ngdirk ngar ngii omelatk el kmo ngsebechel lobult. Engdi a lsekum ngdirkak el duubech tia el tekoi e ngkmal diak bo doutkeu er chouaisei el chad me a lechub e de invite er ngii el mei er a miting er a ongdibel.

MOUKEREBAI ER A KLECHUBECHUB ER A JEHOVAH

16-17. (a) A Jehovah ngsoal a lokerang a rechad el ngar er a klengit? (Esekiel 18:32) (b) Ngmekera remechuodel e sebechir el lochotii el kmo te kldemel a Jehovah er a ureor sel lolasem lolengeseu er tirke el ngar er a klengit?

¹⁶ Ngera kede mla suub er tia el series el eim a suobel er ngii? A Jehovah a diak el soal a ngii di el chad a lengemed! (Monguiu er a Esekiel 18:32.) Ngsoal a lemesumech a deleuill er ngii me tirke el ngar er a klengit. (2 Ko. 5:20) Tiakid a uchul me a chelsel a reksi e ngmla mo betok el taem el lolisiich er a rechedal me a dirrek el rederta el chad el mlora klengit me lobult e lluut el mei er ngii. A remechuodel er a ongdibel a ngar ngii a ileakl el techellir loureor el kldemel a Jehovah lolengeseu er tirke el ngar er a klengit el mora bult.—Rom 2:​4, BT; 1 Ko. 3:9.

¹⁷ Ka molatk er a deurreng er a eanged sel lobult a chad el ngar er a klengit! A Demad el Jehovah omelechesiu er tiakid el deurreng er a bek el taem el lluut a ririid el sib er ngii el mei er a ongdibel. A bltkil a rengud el mora Jehovah a lmuut el mo dmolech sel dolebedebek er a blekokuii, klechubechub, me a krasia er ngii.—Lk. 1:78.