1. Ngera soal a Jehovah el kirir a rokui el chad?

 A JEHOVAH milebeterir a rechad el ngar ngii a ilmeklir el melilt. Bek el taem el moruul omelilt e kousbech er tia el sengk. Sel kot el klou a ultutelel el omelilt el sebechel a chad el rullii a melilt el tibir a klengar er ngii el mora Jehovah e mo chedal a telungalek er ngii. Tiakid a soal a Jehovah el kirir a rokui el chad. E ngerang? Le ngii el betik a rengul er a rechad e soal sel kot lungil el kirir. Ngsoal a lebo er ngii a deleuill er tir el lobengkel e bo lekiei el mo cherechar.—Dut. 30:​19, 20; Gal. 6:​7, 8.

2. Ngera soal a Jehovah el kirir tirke el ngar er a klengit el dirkak lobult er a kngterir? (1 Johanes 2:​1, BT)

² Me nguaisei, a Jehovah diak lorrimel er a ngii di el chad el mo mesiou er ngii. Ngmecherei derta el chad me ngmelilt er a bo loruul er ngii. Ngera mo duubech a lsekum a telecholb el Kristiano tomellii a llechul a Dios e ruebet er oberaod el klengit? A lsekum e ngdiak lobult er a kngtil, e ngkirel mesuld a ngklel er a ongdibel. (1 Ko. 5:13) Me nguaisei a Jehovah diak el stob omeltkel el kmo a ta er a klebesei e ngika el chad el mlora klengit a lmuut el mei er Ngii. Tiakid a klou a ultutelel luchul me ngkiltmeklii olubet, me bo lsebechir a rechad el lobult er a kngterir el musubes. (Monguiu er a 1 Johanes 2:​1, BT. a)  A Dios er kid el betik a rengul er kid a mengelechel er tirke el ruebet er a oberaod el klengit me lobult.—Sek. 1:3; Rom 2:4; Jak. 4:8.

3. Ngera kede mo mesaod er tia el suobel?

³ A Jehovah soal a bo doba tia el uldesuel el kirel a klengit me a rechad el ruebet er oberaod el klengit. Tia el suobel a mo ngosukid el mo meruul er tiang. Sel monguiu er ngii e momes er a rolel e (1) te milsmechokl er a oberaod el klengit el dilubech er a chelsel a ongdibel er a Korinth er a irechar, (2) ulekrael el bilsterir a apostol Paulus er a lobult ngike el mlora klengit, me a (3) louchais er kid tia el cheldecheduch el kirel osengel a Jehovah el kirir a Rekristiano el ruebet er oberaod el klengit.

ROLEL E NGMILSMECHOKL A OBERAOD EL KLENGIT ER A TAEM ER A REKOT EL KRISTIANO

4. Ngera el blekeradel a dilubech er a ongdibel er a Korinth er a taem er a rekot el Kristiano? (1 Korinth 5:​1, 2)

⁴ Monguiu er a 1 Korinth 5:​1, 2. Ngar er a ongedei el omerollel a Paulus el missionari e ngrirenges a mekelemolem el chais el kirel a dirk milteketek el ongdibel er a Korinth. A odam a uluusechelei er a bechil a demal. Tia kmal mle mengas a reng e le ng “ka le ngar ngii [el teletael] er a delongelir a re chad el diak lodengelii a meral Dios”! A ongdibel a dimlak di lekengei er tia el blekeradel te locha dirrek el kmal mle chemat er ngii. A rebebil a locha ulemdasu el kmo ngochotii a klou el klechubechub er a Dios el mora rechad el ngar er a klengit. Me nguaisei engdi Jehovah kmal diak lolemolem a klengit. A omerellel ngika el chad a millemall er a ungil chisel a ongdibel. Ngmle sebechel dirrek el rulleterir a rebebil er a Rekristiano el mo mesuub er ngii. Me a Paulus ngulemekrael er a ongdibel el mo mekerang?

5. A Paulus ngdilu er a ongdibel me lokerang, e ngera mle belkul a tekingel? (1 Korinth 5:13) (Dirrek el momes er a siasing.)

⁵ Monguiu er a 1 Korinth 5:13. A Paulus a mlukreng el mo meluches el kmo lotebedii er a ongdibel ngika el odam el diak el kengei el lobult er a kngtil. Ngmle kirel uangerang omerellel ongdibel el bedul ngii? A Paulus a dilu er tir el kmo ‘lak bo lobengkel.’ Ngera mle belkul a tekingel? Ngsilodii el kmo tia el teletael a “mo lmuut er a blengur me ng diak bo [lobengkel].” (1 Ko. 5:11) Ngsebechel mo beot a dongoit er a lmuut el klou el taem el lobengkel a chad a lsekum kede mo dengchokl lomengur lobengkel. Me ngbleketakl el kmo a mle belkul a tekingel a Paulus a kmo, ngdiak dongoit a taem el lobengkel a  lsekum e ngdiak a ungil luchul. Tia mo mekerreuii ongdibel er a mekngit el influence er ngii. (1 Ko. 5:​5-7) Me a lmuut kung, sel lak lobengkel ngii el chad e nglocha mo rullii el mo mtebengii a berredel omerellel e mo ouuchel a rengul el kirel, e mo soal lobult.

6. Ngmilekera ongdibel er a babilengel a Paulus, e ngera ngrirellii el mo er ngika el chad el mlara klengit?

⁶ Uriul er a lodureklii a babilengel a Paulus el mora Rekristiano el ngar er a Korinth e ngmle soal el mo medengei el kmo te milekerang. Me ngmle ungil chais a lengilai a Titus el mora Paulus. A ongdibel a ultireklii a ulekrael el mlara babilengel a Paulus e ultebedii er a delongelir ngii el chad el dimlak lekengei el lobult. (2 Ko. 7:​6, 7) Me a lmuut kung, ngdimlak el meketeket el taem el uriul er a lodureklii a babilengel a Paulus e ngika el chad a ulebult er a kngtil! Ngmla ngodechii a uldesuel me a rengul e liluut el mo oltirakl a melemalt el llechul a Jehovah. (2 Ko. 7:​8-11) Me a Paulus ngera ngmo omekrael er  a ongdibel el mo meruul er ngii er chelechang?

OMERELLEL ONGDIBEL EL BEDUL NGII EL CHAD EL MLA OBULT ER A KNGTIL

7. Ngera el ungil a dilubech er a lotebedii er a ongdibel ngike el chad el mlara klengit? (2 Korinth 2:​5-8)

⁷ Monguiu er a 2 Korinth 2:​5-8. A Paulus a dilu el kmo, ng “ungiabesul el bla lobals ingikal chad er a ruumesingd er kemiu.” A belkul a tekingel a kmo ngmla meketmokl a moktek er tia el omesmechokl. Ngera mle moktek er ngii? Ngomekrael er ngii el mora bult.—Heb. 12:11.

8. Ngera ongingil el tekoi el ledilu Paulus er a ongdibel?

⁸ Me a Paulus a ulemekrael er a ongdibel el kmo: “Ng kiriu er chelechal bai ousubes er ngii e omekebek er a medal,” ngii el odam el mlora klengit e “mochotii er ngii el kmo ng meral betik a rengmiu er ngii.” Mutebengii el kmo a Paulus a dimlak di ledu er tir me lluut ngika el chad el mei er a ongdibel. Ngmle soal a ongdibel a lolterekokl er a rengul ngika el chad el mla obult loeak a tekingir, omerellir, me a blekerdelir el kmo, te mera el mla ousubes er ngii e mera el betik a rengrir er ngii. Me ngmo bleketakl el mora odam el kmo ngmera el dmeu a rengrir er ngii el mla lmuut el mei er a ongdibel.

9. Ngera uchul me nglocha mle meringel er a rebebil ousubes er ngika el odam el mla obult?

⁹ A rebebil er a ongdibel nglocha mle meringel er tir outkeu er ngii el lmuut el mei er a ongdibel? A Bades a diak louchais engdi ngsebechel uaisei. A omerellel a mlo uchul a mondai el mora ongdibel e locha mlo uchul a rur el mora rebebil. A rebebil a locha mlo omdasu el kmo ng diak el fair a lsekum tir a mla meringel loureor el mo melemolem el klikiid e chelecha te kmal outkeu er ngii. (Momekesiu er a Lukas 15:​28-30.) Engdi ngera uchul me ngkmal klou a ultutelel a ongdibel a lochotii a bliochel el bltikerreng el mo er ngika el odam el mla lmuut el mei?

10-11. Ngera sebechel duubech okmo remechuodel a diak lekengei lousubes er a chad el mla obult er a kngtil?

¹⁰ Ka di molatk er a sebechel duubech okmo a remechuodel a diak lekengei er a chad el mla obult el lmuut el mei er a ongdibel, me a lechub a uriul er a lluut el mei e a ongdibel a diak lochotii a bltikerreng er ngii? Ngsebechel meeleb er a “klou el klengiterreng.” Ngsebechel el di beot er ngii a mo feel el kmo ngdiak el sebechel el lmuut el mo chedal ongdibel. Nglocha mo give up el meruul er a deleuill er ngii me a Dios.

¹¹ E a lmuut el mekngit er ngii, a lsekum a rudam me a rudos a diak lekengei el lousubes er a chad el mla obult er a kngtil e ngsebechir el tomellii a deleuill er tir me a Jehovah. E ngerang? E le te diak lolecholt er a blekerdelel a Jehovah el soal lousubes er a rengar er a klengit, e bai mo ua Satan el mekngit omerellel e diak el chubechub. Te mo dongu er a Diabelong el mengitechut er ngii el chad er a klereng.—2 Ko. 2:​10, 11; Efe. 4:27.

12. Ngmekera ongdibel e sebechel loukerebai er a Jehovah?

¹² Me ngmekera ongdibel er a Korinth e mo oukerebai er a Jehovah el diak el Satan? Loeak sel losuub omerellel a Jehovah el mora rechad el lobult er a kngterir. Momtab a bebil er aike el lullekoi a remilluches er a Biblia el kirel a Jehovah. A David a dilu el kmo: “Kau a ungil, e ousubes a tellemall.” (Psa. 86:5) Me a Mika milluches el kmo: “Ng diak a tar a chelid el mo ua ikau e RUBAK; kousubes a kngterir tirkel chedam.” (Mik. 7:18) E a Isaia dilu el kmo: “A re dengerenger le chitii a blekerdelel a klengar er tir e le ngedechii a rolel a uldesuir. Bo lobult el mor a RUBAK el Dios er  kid; ng chubechub e mereched el ousubes a klengit.”—Isa. 55:7.

13. Ngera uchul me ngika el lulebult a lebilecherei me nglmuut el mei er a ongdibel? (Momes er a baks el “ Oingerang e Te Mle Reinstate er Ngke el Chad er a Korinth?”)

¹³ A ongdibel er a Korinth a bo loukerebai er a Jehovah e ngkirir el loutkeu er ngii el chad el mla obult e olterekokl er a bltkil a rengrir el mo er ngii. A bo loltirakl er a ulekrael er a Paulus e loutkeu er ngii e te ochotii el kmo te “bekongesenges ra bek el tekoi.” (2 Ko. 2:​9, BT) Ngklemerang el kmo ngdirk sesei el buil er a lemesuld a ngklel er a ongdibel, me nguaisei a omesmechokl milekrolii el mora bult. Me ngdiak a ultutelel el lomekmeoud er ngii el reinstate.

ROLEL E NGSEBECHED LOUKEREBAI ER A LLEMALT ME A KLECHUBECHUB ER A JEHOVAH

14-15. Ngera kede mla suub er a tekoi el dilubech er a Korinth? (2 Petrus 3:9) (Dirrek el momes er a siasing.)

¹⁴ Tia el tekoi el dilubech er a Korinth er a irechar a melluches er a Biblia el “chosisechakl el mer kid.” (Rom 15:​4, BT) Kede suubii er ngii el kmo a Jehovah a diak lolemolem oberaod el klengit er a delongelir a rechedal. A rebebil a locha mo omdasu el kmo a Jehovah chubechub me ngmecherei a chad el diak lekengei lobult me ngmelemolem el ngar er a ongdibel, engdi tia diak rolel a lolecholt a klechubechub. Alta Jehovah chubechub, me nguaisei ngika diak lekengei a rokui el omeruul. A llechul el kirel a ungil me a mekngit a diak el change. (Jud. 4) A Jehovah lebecherei  a chad el ngar er a klengit me lolemolem el ngar ongdibel e ngdiak lolechotel a klechubechub e le ngmo tomellii ongdibel.—Osi. 13:20; 1 Ko. 15:33.

¹⁵ Me nguaisei engdi kede suubii el kmo a Jehovah a diak el soal a ngii di el chad a lengemed. Ngsoal lolsobel er tirke el rokui el sebechel. Ngochotii a klechubechub el mo er tirke el ngmodech a uldesuir me a omerellir e sorir el lmuut el sumechii a deleuill er tir lobengkel. (Ese. 33:11; monguiu er a 2 Petrus 3:9.) Me sera lobult ngika el chad er a Korinth e lengedechii a uldesuel me a omerellel, e a Jehovah uluusbech er a Paulus el mo smodii el mora ongdibel el kmo ngkirir lousubes er ngii e outkeu er ngii el lmuut el mei er a ongdibel.

16. Ngua ngera uldesuem er chelechang el bla mosuub er a tekoi el mileketmokl er a Korinth?

¹⁶ A review er kid er tia el tekoi el mileketmokl er a Korinth a ngosukid el mo mesa el kmo a Jehovah chubechub e melemalt a omerellel. (Psa. 33:5) Tiang, ngdiak lodbechau el lmuut el mo oldanges er a Jehovah? Kede kmal oba omereng el saul lengii a chubechub e le kede rokui el ngar er a klengit e ousbech er a klausubes er ngii. A rederta er kid a ngar ngii a ungil luchul me kede oba omereng el saul el mora Jehovah el kirel olubet le ngsebechel lousubes a kngtid. Tia kmal mengelaod e olterekokl er a rengud sel dodengei el kmo a Jehovah a kmal betik a rengul er a rechedal e soal a kot lungil el kirir!

17. Ngera kede mo mesaod er aika el merael el mei el suobel?

¹⁷ E kuk mekerang er chelecha el taem? Ngmekera remechuodel e sebechir el lolecholt er a urungulel a Jehovah el omekrael er a rengar er a klengit el mora bult? Ngkirel a ongdibel el mekerang a lsekum a remechuodel a suldii a ngklel a chad me a lechub e te reinstate er ngii er a ongdibel? Aika el ker a bo dosaod er aika el merael el mei el suobel.