1, 2. (a) Ngera uldimukl er a “diak a mekesiur el sengk” er a Dios? (b) Ngera el ker a bo dosaod?

 A JEHOVAH a mla meskid a kot el ungil el sengk el olechotel a klou el bltkil a rengul er a loderechii a Ngelekel el Jesus el mei er a chutem! (Jn. 3:16; 1 Jn. 4:9, 10) Me a apostol el Paulus a milsaod er ngii el “diak a mekesiur el sengk er ngii el mer kid.” (2 Ko. 9:15) Ngera uchul me ngdilu el uaisei?

² A Paulus a mle medengei el kmo a olubet el tengetengel a Jesus a oterekeklii el kmo a rokui el telbilel a Dios a mo tmaut. (Monguiu er a 2 Korinth 1:20.) Me tia el “diak a mekesiur el sengk” er a Dios a dirrek el uldimukl er sel klou el bltkil a rengul, me aike el rokui el ungil el tekoi el loruul el kired el okiu a Jesus. Me a chouaika el mekreos el sengk a diak el sebechel a chad el mo cherrungel el smaod er chelechang. Me ngkirel el mo ua ngera uldesued el kirel ngii el sengk? E tia el sengk, ngrullid el mo mekerang er sel taem el dongetmokl er kid el kirel a Chedaol  Belsoil el mo er ngii er a Ongedei el Ureor er a March 23, 2016?

3, 4. (a) Ngmo ua ngera uldesuem a lsekum a chad a meskau a sengk? (b) Ngmekerang a ileakl el sengk e sebechel el ngodechii a klengar er kau?

³ Ngkmal ungil a rengud a lsekum a chad a meskid a sengk. Engdi ngar er ngii a bebil el sengk el kmal meklou a belkul er kid me ngsebechel el ngmodech a klengar er kid. Ka di molatk, oleko ke tilemellii a telemall, me ngmocha kirem el okodall. Engdi ngar er ngii a chad el diak modengelii el kongei el obals e mo mad el kirem. Ngmo ua ngera uldesuem el kirel tia el tekoi el bla lerellii el kirem?

⁴ A chouaitia el sengk a sebechel el rullau el mo ngmodech a bebil el tekoi er a klengar er kau. Ke locha lmuut el mo blak a rengum el merous, e oubltikerreng el mo er a rechad, e dirrek el mereched el ousubes er a rechad el mekngit a omerellir el bedul kau. Me seikid el taem, e ke mocha melemolem el soam el ochotii a omereng el saul el kirel a ungil el omerellel ngika el chad.

5. Ngokiu a ngera el rolel e a sengk er a Dios el olubet el tenget a lmuut el mekreos er a ngii di el sengk?

⁵ A sengk er a Dios a lmuut el klou er tia el okesiu el sengk. (1 Pe. 3:18) Ka di molatk, kid el rokui a mludiukes er a kngtil a Adam, e a belsel a klengit a kodall. (Rom 5:12) Engdi a bltkil a rengul a Jehovah a uchul me ngulderechii a Jesus el mei er a beluulechad el mo “mad el kirir a rokui el chad.” (Heb. 2:9) Me nguaisei, engdi a olubet el tengetengel a Jesus a mo remuul a lmuut el betok, e le ngmo okngemedii a kodall me ngmo diak. (Isa. 25:7, 8; 1 Ko. 15:22, 26) Me tirke el rokui el oumerang er a Jesus a mo dmeu a rengrir el ngar er a budech el diak a ulebengelel el ua king el obengkel a Kristus el ngar er a eanged, me a lechub e te mo kiei er tia el chutem el chederedall er a Rengedel a Dios. (Rom 6:23; Och. 20:6) Me ngera lmuut el bebil el klengeltengat el uldimukl er tia el sengk er a Jehovah?

6. (a) Ngera el klengeltengat el mei el okiu a sengk er a Jehovah a kmal soam? (b) Momasech a edei el tekoi el sengk er a Dios a rullau el mo meruul.

⁶ A bebil er a tekoi el uldimukl er a sengk er a Dios a chutem el mo baradis, me a resmecher a mo ungil, me a remlad a mo mekiis er a kodall. (Isa. 33:24; 35:5, 6; Jn. 5:28, 29) Me ngkmal betik a rengud er a Jehovah me a Ngelekel el milskid tia el “kmal diak a mekesiur el sengk.” Me ngera ngmo rullii er kid tia el sengk? Ngrullid el mo (1) ungil el oukerebai er a Kristus Jesus, (2) mo betik a rengud er a rudam er kid, (3) e mo ousubes er a rechad el mera el ngar er a rengud.

7, 8. Ngkirel el mo ua ngera uldesued el kirel a bltkil a rengul a Kristus, e tiang ngrullid el mo mekerang?

⁷ Me a kot e ngkired el mo ousbech er a klengar er kid el mengebkall er a Jesus. A apostol el Paulus a dilu el kmo: A “bltkil a rengul a Kristus el kired a mengedereder er kemam.” (Monguiu er a 2 Korinth 5:14, 15.) A Paulus a mle medengei el kmo a lsekum kede kongei er a klou el bltkil a rengul a Jesus, e ngrullid el mo betik a rengud e soad el mengebkall er ngii. Me sel bo dungil el medengei a tekoi el lekiltmokl a Jehovah el kired, e ngmo soad el kiei el blekerdelel a klengar er kid a ochotii a omengull er kid el mo er a Jesus. Me ngmekerang a doruul er tiang?

⁸ A bltkil a rengud el mo er a Jehovah a rullid el mo oukerebai er a Jesus e kerekikl el oltirakl er ngii. (1 Pe. 2:21; 1 Jn. 2:6) Me sel dolengesenges er tir el terung, e kede ochotii el kmo ngbetik a rengud er tir. A Jesus a dilu el  kmo: “Ngikel ngma llechuk e otirakl, ngikei a betik a rengul er ngak. A Demak a mo betik a rengul er ngii e mo ochotak er ngii.”​—Jn. 14:21; 1 Jn. 5:3.

9. Kid, kede chelebangel a ngera el orimel?

⁹ Me ngar sel taem er a Chedaol Belsoil e ngkmal ungil el dolatk er a rolel a klengar er kid. Di lekid el oker el kmo: ‘Ngera el kerebil a Jesus a kultirakl er ngii? Ngera sebechek el sumechokl el blekerdelek?’ Ngklou a ultutelel el dolatk aika el ker e le tia el beluulechad a di melasem el mengetikaik er kid er a bek el taem. (Rom 12:2) Me a lsekum ngdiak dekerekikl e ngsebeched el mo morimel el mo omdasu a tekoi el ua rechad er a beluulechad el leko ngmellomes a rengrir me tirke el merael a chisir me a rechad er a klekool. (Kol. 2:8; 1 Jn. 2:15-17) Me ngmekerang e mo sebeched el otngakl aika el orimel?

10. Ngera el ker a kired el melatk er a temel a Chedaol Belsoil, e a nger er kid, ngkirel el rullid el mo mekerang? (Momes er a siasing er a uchelel a suobel.)

¹⁰ A temel a Chedaol Belsoil a ungil el techall el bo dolatk er a rolel a doubail me a mubi el domes me a chelitakl el dorrenges, el uldimukl er aike el tekoi el ngar er a computer er kid me a dengua me a lechub a tablet er kid. Molatk el kmo: ‘Ak mo merur oleko Jesus a ngar tiang e mesekak el oubail el uaisei?’ (Monguiu er a 1 Timothy 2:9, 10.) ‘A bilek, ngochotii el kmo ak mera el Kristiano? A Jesus ngkongei el omes aika el mubi el kumes e orrenges a chelitakl el soak? Oleko nglongir a dengua me a lechub a tablet er ngak, e ak mo merur er a tekoi el leues? Ngmo meringel er ngak el mesaod er a uchul me ak kongei el ousekool aika el soak el video game?’ A bltkil a rengud el mo er a Jehovah a kirel el rullid el mo chemoit a ngii di el klalo el diak lungil el kirir a Rekristiano, el diak lultuil er a ringelel a cheral ngii el klalo. (Rel. 19:19, 20) Me sel detibir a rengud el mo er a Jehovah e kede tibir el mo ousbech er a klengar er kid el mengebkall er a Kristus. Me ngkmal diak el kired el orreked a ngii di el tekoi el sebechel el rullii el mo meringel er kid el oukerebai er a Jesus.​—Mt. 5:29, 30; Fil. 4:8.

11. (a) Ngmekerang a bltkil a rengud el mo er a Jehovah me a Jesus e rullid el mo menglou er a omesiunged? (b) Ngmekerang a bltkil a rengud e rullid el mo olengeseu er a rebebil el ngar er a ongdibel?

¹¹ A bltkil a rengud el mo er a Jesus a rullid me ngblak a rengud el omerk er a klumech e olisechakl. (Mt. 28:19, 20; Lk. 4:43) Me sel temel a Chedaol Belsoil e molasem el mo auxilliary pioneer me bo el sebechem el ousbech a 30 me a lechub a 50 el sikang el oldingel a obliil. A ta el 84 a rekil el odam el mla mad a bechil a ulemdasu el kmo ngdikea el sebechel el pioneer e le ngchudelang e dirrek el mechitechetong. Engdi tirke el pioneer er a belual a mle sorir el olengeseu er ngii, me te uleltak er ngii e millilt aike el basio el sebechel ngii el odam el oureor er ngii. Me ngmlo sebechel el chemoit a 30 el sikang el oldingel. Me kau, ngsebechem el ngosuir a tang er a chelsel a ongdibel er kau el mo auxilliary pioneer er a March me a lechub a April? Ngmera el tekoi, ngdiak el sebeched el rokui el di mo pioneer, engdi ngsebeched el ousbech a temed me a klisiched el kilungii a omesiunged el mo er a Jehovah. Me a lsekum kede meruul el uaisei, e kede mo ua Paulus el ochotii a omereng el saul er kid el kirel a bltkil a rengul a Jesus. Ngera lmuut el bebil er a tekoi el bltkil a rengul a Dios a rullid el mo meruul?

12. A bltkil a rengul a Dios, ngrullid el mo mekerang?

¹² Ongerung, a bltkil a rengul a Dios a kirel el rullid el mo betik a rengud er a rudam er  kid. A apostol el Johanes a milluches el kmo: “Kemiu el betik er a renguk, a lsekum a Dios a kmal mle betik a rengul er kid, e ng dirrek el kired el mo kaubltikerreng.” (1 Jn. 4:7-11) Me a lsekum ngsoad el ngmai a klungioled er a bltkil a rengul a Dios, e ngkired el mo betik a rengud er a rudam er kid. (1 Jn. 3:16) Me kede mekerang e ochotii el kmo ngbetik a rengud er tir?

13. Ngmilekerang a Jesus er a loubltikerreng el mo er a rechad?

¹³ A omerellel a Jesus a ochotii a rolel e ngsebeched el oubltikerreng el mo er a rechad. Sera dirk lengar er a chutem e ngullengeseu er a rechad el ileakl tirke el mechebuul. Ngulemekungil er a resmecher me a rechitechut me a remeiko me a remechad me a rebengong. (Mt. 11:4, 5) A Jesus a kuk mle ngodech a omerellel er tirke el mengeteklel a klechelid, e le ngmle dmeu a rengul el olisechakl er tirke el chad el mle semeriar er a tekingel a Dios. (Jn. 7:49) Ngkmal mle betik a rengul er tir me ngmle blak a rengul el olengeseu er tir.​—Mt. 20:28.

14. Ngera el rolel a bltikerreng a sebechem el olecholt er ngii?

¹⁴ A temel a Chedaol Belsoil a dirrek el ungil el taem el dolatk el kmo, kede mekerang e ngosuterir a rudam me a rudos er a ongdibel er kid el ileakl tirke el mechudelang. Me kau, ngsebechem el mo oldingel er tir? Ngsebechem el meruul a kelir, e ngosuterir el kutmokl a blirir, e oltak er tir el mo er a miting me a lechub e ke mo oldingel el obengterir? (Monguiu er a Lukas 14:12-14.) A bltkil a rengul a Dios, bo lerellid el mo oubltikerreng el mo er a rudam er kid!

15. Ngera el tekoi a kired el melatk er ngii?

¹⁵ Ongedei, a bltkil a rengul a Jehovah a rullid el mo ousubes er a rudam me a rudos er kid. Kid el rokui a uldiukes er a klengit me a kodall el mla er a Adam el mei, me ngdiak a chad el sebechel el melekoi el kmo, “Ngdiak kuusbech er a olubet el tenget.” Ngmo lmuut er tirke el kmal blak a rengrir el mesiungel a Dios me te dirrek el ousbech er tia el olubet el tenget, e le kede rokui el mla mengubet er a klou el blals! Me ngera me ngklou a ultutelel el dolatk er tia el tekoi? A nger er tiang a ngar er a ta er a okesiu er a Jesus.

16, 17. (a) Ngera kede suubii er a okesiu er a Jesus el kirel a king me a remesiungel? (b) Sel bo mungil el melatk er tia el tekoi e ngrullau el mo soam el mekerang?

 ¹⁶ A Jesus a milsaod er a okesiu el kirel a king el uluusubes er a mesiungel el mle belsel er a 10,000 el talent me a lechub e ng 60 el miliol el denarius. Engdi uriul e ngika el mesiou a dimlak lekengei el ousubes er a chad el mle belsel er a di 100 el denarius. Me a klechubechub er a king el mlocholt el mo er ngii a mle kirel el rullii el mo ousubes er ngike el mle blsel. Me a king a kmal mlo kesib a rengul er a bo lodengei, me ngdilu el kmo: “Dengerenger el mesiou! Kau a ullengit er ngak ma uchul a ikel blsem el rokui a kchiloit; ngdiak el dilerrek el kirem el mo chubur ngiil mdak el mesiou, el ua ngak el mlo chubkau?” (Mt. 18:23-35, BT) Me a Jehovah a di ua ngika el king el mla ousubes er a kmal klou el belsed. Me a bltkil a rengul me a klechubechub er Ngii, ngkirel el rullid el mo mekerang?

¹⁷ Sel dongetmokl er kid el kirel a Chedaol Belsoil e ngungil a dolatk el kmo: ‘A ta er a odam ngmla tomellii a renguk? Ngmeringel er ngak el ousubes er ngii?’ A lsekum e nguaisei, e tiang a kmal ungil el taem el bo moukerebai er a Jehovah, el ngii a kltmokl el “ousubes a klengit.” (Neh. 9:17; Psa. 86:5) Me a omereng el saul er kid el kirel a klou el klechubechub er a Jehovah, a rullid el mo chubechubechad e ousubes el mera el ngar er a rengud. E le lsekum ngdiak doubltikerreng e dousubes er a rudam er kid, e ngdiak el sebeched el omdasu el kmo a Jehovah a mo betik a rengul e ousubes er kid. (Mt. 6:14, 15) Me sel dousubes er a rebebil e ngdiak lebelkul a kmo ngdimlak lemetemall a rengud, engdi ngsebechel el ngosukid el mo dmeu a rengud er a uriul.

18. Ngmilekerang a bltkil a rengul a Dios e ngosuir a ta el odos el mo outekangel a mekngit el omerellel a ta er a odos?

¹⁸ Ngsebechel el mo meringel er kid el olengeseu er a rediak el mecherrungel el rudam me a rudos er kid. (Monguiu er a Efesus 4:32; Kolose 3:13, 14.) Ka molatk er a odos er kid el Lily. Ngika el odos a ullengeseu er a melakl dil el Carol. ^[1] Me ngoltak er ngii el meruul a chelsengul e oba el mo shopping, e meruul a betok el tekoi el olengeseu er ngii. Me nguaisei, engdi a Carol a di mle blechoel el mekngit a tekingel, me ngrullii el kmal mo meringel er a Lily el olengeseu er ngii. Engdi a Lily a di ulemes a ungil el blekerdelel a Carol, e millemolem el olengeseu er ngii el mo lmuut er a taem el lesal socherang e lemedei. Me ngdmu el kmo: “Ak kmal semeriar el mengiil er a taem el bo lebekiis a Carol, e le ngsoak el mo omes er ngii sel bla bo lecherrungel.” Me ngbleketakl el kmo a bltkil a rengul a Dios a sebechel el rullid el mo outekangel a blekerdelir a rudam me a rudos er kid, e omes el beduluchei el kirel sel taem el rokui el chad a mo cherrungel.

19. Tia el sengk er a Jehovah ngrullau el mo soam el mekerang?

¹⁹ Me a Jehovah a mla meskid a “kmal diak a mekesiur el sengk” er ngii, me ngkmal kired el mereng a sulel el kirel! Me a temel a Chedaol Belsoil a kmal ungil el taem el dolatk aike el rokui el bla leruul a Jehovah me a Jesus el kired. Mada, bo lsebechel a bltkil a rengrir el rullid el mo oukerebai er a Jesus e doubltikerreng el mo er a rudam er kid e dousubes er tir el mera el ngar er a rengud.