1. Ngera bebil er a meklou a ultutelel el llach el ngar er a Biblia? E ngera me ngmo klungioled a doltirakl?

 A JEHOVAH a mla meskid a Biblia el ngar er ngii a bleketakl el llechul el subedid er aike el soal a bo doruul. Ngouchais el kmo ngchetil a dongull a bleob, e dorechorech, e dolim a rrom el mo cheltelaol me a lechub e doruul a deleboes. (1 Ko. 6:9, 10) Me a Ngelekel el Jesus a dirrek el kmal mle bleketakl a tekingel el mo er a rultirakl er ngii el kmo: “Morael el mor a bek el bedengir a re chad er ker me ker e moruul er tir el mo obengkek, e molecholb er tir loba ngklel a Chedam, ma Ngalek, ma Chedaol Reng, e molisechakl er tir me bo loltirakl a ikel rokui el bla kdu er kemiu. E ngak a mo obengkemiu el di blechoel el mo lmuut er a ulebongel er a beluulchad.” (Mt. 28:19, 20) Me a rokui el tekoi el soal a Jehovah me a Jesus a doruul, a di mo uchul a klungioled. A llechul a Jehovah a osisecheklid el mo meduch el omekerreu er kid me a telungalek er kid, e dirrek el mo meduch el mengetmokl a bedenged me dolemolem el mesisiich e ledeu a rengud. Engdi sel kot el ngaruchei el klungiolel a dolengesenges a llechul a Jehovah el uldimukl er a bo domerk er a klumech, a rullii me ngmo  dmeu a rengul me ngmo omekngeltengat er kid.

2, 3. (a) Ngera me a Biblia a diak losaod a llach el kirel a bek el blekeradel er a klengar? (b) Ngera el ker a bo dosaod? (Momes er a siasing er a uchelel a suobel.)

² Osisiu el taem e a Biblia a diak lomeskid a llach el kirel a bek el tekoi er a klengar er kid. Ngdiak a omesodel a bail el kired el oubail. Me tiang a meketeklii el kmo a Jehovah a kmal mellomes a rengul el Dios. E le alta e a rechad a di mengedengodech a rolel a loubail me a merael a chisel el tekoi a mo mengodech, engdi a Biblia a kmal diak el sebechel el mengodech. Tia el Biblia a dirrek el diak a omesodel el kmo ngua ngera el lureor me a rolel a ongelaod a kired el meruul, me a lechub e losaod a betok el rolel e ngsebeched el melemolem el mesisiich a bedenged. A Jehovah a bai mesterir a rederta el chad me tirke el bdelul a delengchokl a techellir el di tir el melilt a tekoi el loruul.

³ Me sel bocha dolilt a meklou a ultutelel el tekoi er a klengar er kid e lak debetik a bleketakl el omesodel er a Biblia, e kede locha mo melatk el kmo: ‘A Jehovah, nglocha semeriar el mo medengei a omelilt el kuruul? Ngmo dmeu a rengul a lsekum ak mo meruul a tekoi el diak lolemall a llechul? Ak mekerang e mo medengei el kmo ngdmeu a rengul er a omelilt el kuruul?’

4, 5. Ngmekerang a omelilt el doruul e ngar er ngii a lerellii er kid me a rebebil?

⁴ A rebebil a omdasu el kmo ngdi sebechir el meruul a rokui el tekoi el sorir. Engdi kid a soad el oldeu er a rengul a Jehovah, a uchul me a uchei er a doruul a tekoi e ngkired el melatk aike el lolekoi a Biblia e mo oltirakl. El ua tiang, a Biblia a subedid er a uldesuel a Dios el kirel a usbechel a rasech, me ngkired el olengesenges er ngii. (Gen. 9:4; Rel. 15:28, 29) Me ngsebeched el meluluuch el olengit er a Jehovah me lengesukid el mo ungil el melilt a tekoi me bo dodeuir a rengul.

⁵ A omelilt el doruul a ngar er ngii a lerellii er kid. Me a ungil el omelilt a rullid me kede mo kmeed er a Jehovah, e a mekngit a sebechel el tomellii a deleuill er kid me Ngii. A omelilt er kid a dirrek el ngar er ngii a lerellii el mo er a rebebil. Me ngkmal diak el soad el meruul a ngii di el tekoi el mo melibas er a rudam er kid me a lechub e longitechut a klaumerang er tir. Ngdirrek el diak el soad el mo uchul a mondai er a delongelir a rudam er a ongdibel, a uchul me ngkmal klou a ultutelel el kired el mo ungil el melilt a tekoi el doruul.​—Monguiu Rom 14:19; Galatia 6:7.

6. Ngkired el melatk a ngerang er a uchei er a doruul a omelilt er kid?

⁶ Ngmekerang e mo ungil a omelilt el doruul a lsekum ngdiak a bleketakl el omesodel a tekoi el ngar er a Biblia? Ngungil a dekerekikl me lak di dolab a uldesued. Ngbai kmal kired el melatk er a blekeradel el dechelebangel er ngii e mo ungil melilt aike el tekoi el ngii a odeuir a rengul a Jehovah. Seikid e ngmo ulterekokl a rengud el kmo ngmo ngosukid e omekngeltengat er kid.​—Monguiu er a Psalm 37:5.

7. A lsekum ngdiak a bleketakl el omesodel a Biblia, e kede mekerang e mo medengelii a soal a Jehovah?

⁷ Engdi kede mekerang e mo medengei a soal a Jehovah? A Efesus 5:17 a kmo: “Molasem el osiik el kmo ng ngera soal a Rubak.” Me a lsekum ngdiak a bleketakl el llach el ngar er a Biblia, e ngkired el mo ungil melatk me bo el sebeched el mo medengei a soal a Jehovah el kirel a tekoi el dechelebangel er ngii. Me  ngmekerang a doruul er tiang? Ngkired el meluluuch lolengit a ngeso, e mecherei a chedaol reng er ngii me ngomekrael er kid.

8. Ngmilekera Jesus e mo medengei a soal a Jehovah? Mosaod.

⁸ A Jesus a mle blechoel el melatk a soal a Jehovah. Me ngar er aike el eru el taem el ulemekang er a seked e ngmilluluuch el mo er a demal e ulemeka er tir el ulekiu a mengasireng el rolel. (Mt. 14:17-20; 15:34-37) Engdi sel taem er a lengar er a ked el kmal mle songerenger, e loldurech er ngii a Diabelong el mo omult a bad el mo blauang e ngdimlak lekengei er ngii. (Monguiu er a Mateus 4:2-4.) Ngmle ungil medengelii a Demal, me ngmedengei el kmo ngdiak el soal a lousbech er a chedaol reng er ngii el di kirel. Ngdirrek el mle medengei el kmo a Demal a mo omekrael er ngii e msa kelel sel bo lesengerenger.

9, 10. Ngera ngosukid el mo ungil el melilt a tekoi? Mosaod.

⁹ Me kid a ua Jesus el sebeched el ungil el melilt a tekoi el doruul a lsekum kede ultuil er a ulekrael er a Jehovah. A Biblia a kmo: “Moumeral ulsirs er a RUBAK el oba rengum el rokir. Lak mulsirs er a di llemesel a rengum. Mletkii a RUBAK er a ikel bek el moruul, e ngii a mo ochotii er kau a melemalt el rael. Lak di le kau el omdasu el kmo ng mellomes a rengum; di moluu er a RUBAK, e mokor el meruul a mekngit.” (Osi. 3:5-7) Me sel dosuub er a Biblia e bo dodengelii a uldesuel a Jehovah, e kede mo meduch el melilt a tekoi el soal a doruul er a chelsel a blekeradel el dechelebangel er ngii. Me a bek el taem el dosuub el mo medengelii a soal, e ngmo beot er kid el melilt a tekoi el mo odeuir a rengul. Tiaikid a rolel e kede ‘oltirakl er a uldesuel’ a Jehovah.​—Isa. 26:7, 8.

¹⁰ Ka molatk, a ta el bechiil redil a shopping e mes a kmal klebokel el oeacher, el kmal meringel a cheral. Alta e a bechil a dimlak lobengkel engdi ngmle medengei el kmo ngmo ua ngera uldesuel a lsekum ngmechar aika el oeacher. Ngmekerang e medengei? E le te mla bechiil el kemanget el taem me ngungil medengelii a uldesuel a bechil el kirel a omengitel a udoud. Me ngdi osisiu, sel dosuub el mo medengelii a uldesuel a Jehovah me a tekoi el lurruul er a uchei, e kede mo ungil medengelii a uldesuel el kirel a kakerous el blekeradel er a klengar.

11. Ngera el ker a kired el melatk sel donguiu me a lechub e kede mesuub er a Biblia er a bek el taem? (Momes er a baks el “ Sel Mosuub er a Biblia e Molatk el Kmo:”)

¹¹ Kede mekerang e mo medengelii a uldesuel a Jehovah? Sel kot el ngarbab el rolel a sel donguiu e dosuub er a Biblia er a bek el taem. Me sel doruul er tiang, e ngungil a dolatk el kmo: ‘Tia ngosisecheklak er a ngera el kirel a Jehovah? Ngera me ngmirruul el uaisei?’ Me kid a di ua David el kired el olengit er a Jehovah me lengesukid el lmuut el mo ungil medengelii. Ngmilluches el kmo: “Mocholt a rolem er ngak e RUBAK; mosisecheklak el merael er ngii. Morolak er a chelsel a klemerang er kau e mosisecheklak, ele kau ia Dios el osebelek; ak di ultuil er kau.” (Psa. 25:4, 5) Me a bek el taem el dosuub el kirel a Jehovah e ngsebeched el melatk el kmo aika el kusuub ngsebechek el ousbech er a chelsel a ua ngera el blekeradel. Ngchelsel a telungalek er ngak, me a lechub e ngurerek, ngskuul, me a lechub e ngsel taem el kuldingel obliil? Me sel bo dungil el melatk, e ngmo beot er kid el mo medengelii a soal a Jehovah e mo meduch el ousbech ngii el tekoi.

12. Ngmekerang a babilenged me a miting er kid e ngosukid el lmuut el mo ungil medengelii a uldesuel a Jehovah el kirel a kakerous el tekoi?

 ¹² A ta er a rolel e kede mo medengelii a uldesuel a Jehovah, a sel bo leblak a rengud el mesuub aike el tekoi el lolisechakl a cheldebechelel el okiu a Biblia. El ua tiang, sel dolilt a tekoi el doruul e ngar er ngii a the Watch Tower Publications Index me a the Research Guide for Jehovah’s Witnesses el kmal sebechel el ngosukid el mo medengelii a uldesuel a Jehovah. Ngdirrek el sebeched el ngmai a klungioled er aike el miting er a Rekristiano sel leblak a rengud el orrenges e donger e domtab ngii el osisechakl. Tiang a ngosukid el mo omdasu a tekoi el ua Jehovah. Seikid e ngmo sebeched el ungil el melilt a tekoi el odeuir a rengul me ngomekngeltengat er kid.

13. Ka msodii a rolel e ngsebeched el mo ungil melilt a tekoi el oltirakl er a uldesuel a Jehovah.

¹³ Me bo dosaod er a rolel e ngsebeched el mo ungil melilt a tekoi sel dolatk er a uldesuel a Jehovah. Ke locha melatk el mo pioneer. Me ke mla melodech a bebil tekoi er a klengar er kau me bo leklou a temem el mesiou er a Jehovah. Engdi ngdirkak el sal mo bleketakl er a rengum el kmo ke kongei el mo mesuk er a kesai el udoud e mo kesai a kloklem. Me a Biblia a diak losaod el kmo ngkirem el mo pioneer e mo mesiou er a Jehovah, e le ngsebeched el melemolem el mesiou er ngii el di publisher. Engdi a Jesus a dilu el kmo a Jehovah a mo omekngeltengat er tirke el tonget a klengar er tir el kirel a Renged. (Monguiu er a Lukas 18:29, 30.) A Biblia a dirrek el mesaod el kmo a Jehovah a dmeu a rengul sel doruul aike el sebeched el mo mengebkall er ngii, e dirrek el soal a ledeu a rengud el mesiou er ngii.(Psa. 119:108; 2 Ko. 9:7) Me sel doluluuch el kirel aika el tekoi e bo dungil el melatk e ngmo sebeched el ungil el melilt a tekoi el kirel a blekeradel el dengar er a chelsel, el ngii a sebechel a Jehovah el omekngeltengat er ngii.

14. Ke mekerang e mo medengei el kmo a Jehovah a kongei er tia el bail?

¹⁴ Tiakid a ta er a tekoi el ungil dolatk er ngii: Nglocha ngar er ngii a bilem el kmal soam a teletelel, engdi ke medengei el kmo ngsebechem el mo melibas er a rebebil el ngar er a ongdibel a lsekum ke oubail er ngii. Me a Biblia a diak a omesodel el kirel tia el teletelel a bilem. Me ke mekerang e mo medengelii a uldesuel a Jehovah el kirel? A Biblia a mesaod el kmo: “Ng dirrek el soak a redil a bo  lulengeasek a teletelel a bilir; lak lesal omesiich a bderrir, ma lechub e lomesiich er tir el olab a kolt ma ngisel a chesiuch, ma lechub e loubail a meringel a cheral el bail, e bai bo lomesiich er tir er a ungil el omerellir, ele tiaikid a ungil el blekerdelir a redil el oltirakl er a Dios.” (1 Ti. 2:9, 10) Nguaisei, a rokui el mesiungel a Jehovah el uldimukl er a resechal a sebechir el nguu a klubelir er aika el tekoi. Me kede melatk er a rebebil sel doubail a ungilbesul bail, e le ngbetik a rengud er a rudam er kid, me ngdiak el soad el meruul a tekoi el mo melibas er tir. (1 Ko. 10:23, 24; Fil. 3:17) Me a lsekum kede kerekikl el oltirakl a lolekoi a Biblia me a uldesuel a Jehovah, e kede mo ungil melilt a tekoi el mo odeuir a rengul.

15, 16. (a) Ngmo uangera uldesuel a Jehovah a lsekum kede di melemolem el melatk a tekoi er a deleboes? (b) Ngmekerang a bo dodengei el kmo a tekoi er a ongelaod el dolilt a odeuir a rengul a Jehovah? (c) Ngmekerang e mo ungil a omelilt er kid el kirel a oberaod el tekoi?

¹⁵ Me ngar er a Biblia e kede suubii el kmo ngmo mekngit a rengul a Jehovah sel lomes er rechad el meruul e lomdasu a mekngit. (Monguiu er a Genesis 6:5, 6.) Me ngbleketakl el kmo ngchetil a dombeberrous a tekoi er a deleboes. Me a lsekum kede melemolem el melatk aika el tekoi e ngmo uchul e kede mo meruul. Engdi a Jehovah a bai soal a dolatk a ungil e bliochel el tekoi. A disaiplo el Jakobus a milluches el kirel a llemesel a rengul a Jehovah el kmo: “A kot e ng klikiid, e sola e chelellakl, e medemedemek, e ungil er a re chad, e mui er a klechubechub, e meruul a bek bedengel a ungil, e ultebechel, e diak a cheleblad er ngii.” (Jak. 3:17) Me a Biblia a osisecheklid el kmo ngkmal kired el mengeroid er kid er a ngii di el rolel a ongelaod el sebechel rullid el mo omdasu e oureng a mekngit el tekoi. Me sel bo dungil el medengei a soal me a chetil a Jehovah e ngmo beot er kid el melilt a babier me a mubi me a klekool el dousekool, me ngdiak bo doker er a rebebil el kirel a omelilt el doruul.

¹⁶ Ngbetok a ungil rolel e kede melilt a tekoi el doruul el mo uchul a deuil a rengul a Jehovah. Engdi sel taem el doruul a meklou el omelilt er a klengar er kid, e ngungil a dolengit er a ta er a remechuodel me a lechub a odam me a lechub a odos el klou a klemedengei er ngii me lengesukid. (Tit. 2:3-5; Jak. 5:13-15) Engdi tiang a diak lebelkul a kmo kede olengit er a rebebil me lolilt a tekoi el bo doruul. Ngbai kired el mo kerekikl el melatk aike el tekoi el bla desuub er a Biblia, e di mo kid el melilt. (Heb. 5:14) A apostol el Paulus a dilu el kmo: “Ele re bek el chad a di chemur oberaod el telechellir.”​—Gal. 6:5.

17. Ngera el klungiaol a bo dengai sel dolilt a tekoi el odeuir a rengul a Jehovah?

¹⁷ Sel dolilt a tekoi el odeuir a rengul a Jehovah e kede nguu a kengei er ngii e lmuut el mo kmeed er ngii. (Jak. 4:8) Seikid e a klaumerang er kid a lmuut el mo mesisiich. Mada dolemolem el melebedebek a tekoi el desuub er a Biblia me bo el sebeched el lmuut el mo ungil el medengelii a uldesuel a Jehovah. Ngmera el tekoi, kede blechoel el suub a beches el tekoi el kirel a Jehovah er a bek el taem. (Job 26:14) Engdi a lsekum nglmuut el mo blak a rengud el mesuub el kirel er chelechang, e ngmo mellomes a rengud e mo ungil a omelilt el doruul. (Osi. 2:1-5) A uldesuir me a moktek er a rechad a mo mengodech, engdi a Jehovah a kmal diak bo lemengodech. A ta er a milluches er a Psalm a dilu el kmo: “E ngdi telbilel a RUBAK a medechel el mo cherechar, ma uldesuel a rengul a di ngar ngii el mo cherechar.” (Psa. 33:11) Me ngbleketakl el kmo ngsebeched el mo ungil melilt a tekoi sel dosuub el mo omdasu el ua Jehovah, e doruul a tekoi el odeuir a rengul.