1-3. (a) Ngera bebil er a tekoi el mo meringel er kid el mengoit er a uriul er a demetecholb? (b) Ngera el ker a mo duubech, sel bo dolechesuar el kmo ngmeringel er kid el olengeriakl? (Momes a siasing er a uchelel a suobel.)

 A BETOK el rak er a uchei, e a Kevin a di millim a rrom e melamech a dekool e ousbech a mekngit el kar, e dirrek el di uluubakutsi. ^[1] A uriul e ngmilsuub el kirel a Jehovah e mlo soal el mo sechelil. Engdi ngmle kirel el melodech a betok el tekoi er a klengar er ngii. Ngmlo sebechel el melodech a blekerdelel el okiu a ngelsuil a Jehovah me a dirrek el Tekingel el Biblia.​—Heb. 4:12.

² Me a uriul er a lemetecholb a Kevin, e ngdirk mle kirel el mengoit a mekngit el blekerdelel me bo el sebechel el mo ungil Kristiano. (Efe. 4:31, 32) Ngkang a kmal mle bekongesengasech a rengul, me ngmle meringel er ngii el mtebechelii a ngesechel a rengul. Me ngmelekoi el kmo ngmle beot er ngii el chemoit a mekngit el tekoi el lurruul er a uchei er a lemetecholb, engdi tia el omeruul el omtebechel er a ngesechel a rengul a kmal mle meringel el tekoi! Engdi  ngokiu a ngelsuil a Jehovah me a dmolech el omesubel er a Biblia e ngmlo sebechel el melodech a blekerdelel.

³ Me a uchei er a bo demetecholb e ngbetok er kid a mle kired el melodech a betok el blekerdeled me bo el sebeched el kiei el oltirakl a ulekrael er a Biblia. Engdi chelechang e ngdirk kired el melodech a lmuut el bebil el tekoi er a klengar er kid me bo dungil el oukerebai er a Dios me a Kristus. (Efe. 5:1, 2; 1 Pe. 2:21) Kede locha mo melechesukid el di mengeremrum a lebebil er a taem, me a lechub e kede melaes, e dirrek el melekoi a mekngit el kirir a rebebil. Me a lechub e ngmo er ngii a taem e kede mo imis el melatk a uldesuir a rechad el bedul kid, me a lechub e te mesaod el kmo ngdiak lemelemalt a omerelled. Alta ngmla mo betok el rak el dolasem el melodech a blekerdeled engdi kede di mo remuul a osisiu el cheleuid el tekoi. Me kede locha mo omdasu el kmo: ‘Ngera uchul me ngkmal meringel er ngak el melodech aika el mekekerei el tekoi er a klengar er ngak? Ak mekerang e mo ungil el oltaut a ulekrael er a Biblia me bo el sebechek el melemolem el melodech a blekerdelek?’

4. Ngera me ngdiak el sebeched el mo cherrungel el odeuir a rengul a Jehovah?

⁴ Ngkmal betik a rengud er a Jehovah e soad el oldeu er a rengul. Engdi ngdiak demecherrungel me a lebebil er a taem e ngmo diak dodeuir a rengul. A lebebil er a taem e kede mo ua apostol el Paulus el dilu el kmo: A ‘lsoak el meruul a ungil, me ngii a di diak el sebechek.’​—Rom 7:18; Jak. 3:2.

5. Ngera el tekoi a mle kired el melodech er a uchei er a bo demetecholb, engdi ngera el chelitechetud a dirk omekringel er kid?

⁵ Ngmle kired el melodech a bek el mekngit el blekerdeled er a uchei me bo el sebeched el mo chedal a ongdibel er a Rekristiano. (1 Ko. 6:9, 10) Engdi ngdirrek el dirkak bo demecherrungel. (Kol. 3:9, 10) Me kede dirk mo remuul a cheleuid el tekoi alta e ngmla mo betok el rak er a demetecholb. A lebebil er a taem e kede mo oureng e omdasu a mekngit, me a lechub e ngmo meringel er kid el kilmeklii a rengud er aike el chelitechetud. E tia el omerelled a sebechel el melemolem el betok el rak.

6, 7. (a) Ngera sel rullid me ngsebeched el mo sechelil a Jehovah alta e ngdiak demecherrungel? (b) Ngera me ngdiak el kired el meterob el olengit a klausubes er a Jehovah?

⁶ Me alta e ngdirkak bo demecherrungel, engdi ngdirk sebeched el mo sechelil a Jehovah e mo mesiou er ngii. Bo blechoel el melatk er sel rolel e ke mlo sechelil a Jehovah. Ngii Ngike el ulemes a klungiolem me ngmlo soal a obo modengelii. (Jn. 6:44) Ngdirrek el mle medengei el kmo ngar er ngii a chelitechetum me a cheleuid el omerellem, e mle medengei el kmo ke mo remuul a cheleuid, engdi ngii el Jehovah a dirk mle soal a obo msechelil.

⁷ A Jehovah a kmal betik a rengul er kid a uchul me ngmilskid a kot el mekreos el sengk. Ngulderechii a Ngelekel er a Jesus el mei er a beluulechad el mo tongetengii a klengar er ngii el kirel a kngtid. (Jn. 3:16) Me sel derellii a klengit e ngsebeched el olengit er a Jehovah me ngousubes er kid. Me ngokiu a olubet el tenget e ngulterekokl a rengud el kmo ngmo ousubes a kngtid me kede melemolem el sechelil. (Rom 7:24, 25; 1 Jn. 2:1, 2) Me lak dobes, a Jesus a mlad el kirir tirke el obult er a kngterir. Me a lsekum kede dirk omdasu el kmo a tekoi el derirellii a kmal mekngit, e ngkmal kired el melemolem el meluluuch el mo er a Jehovah el kirel a klausubes. Me a lsekum ngdiak dolengit a klausubes er Ngii, engdi ua sel le dechudech a chimad e lechetid el mo melebal. Me kede kmal oba omereng el saul e le Jehovah el mla meskid a techelled el mo sechelil alta ngdiak demecherrungel!​—Monguiu er a 1 Timothy 1:15.

8. Ngera me ngdiak el kired el olechib a osenged er a chelitechetud?

 ⁸ Me ngdiak el kired el olechib a osenged er a chelitechetud me a lechub e di dolasem el mesaod er kid el kirel. A Jehovah a mla subedid el kmo te ua ngera el chad a lekengei er tir el mo sechelil. (Psa. 15:1-5) Me a lsekum ngsoad el mo kmeed er ngii e ngkmal kired el mo oukerebai er ngii me a Ngelekel. Me ngbelkul a kmo ngkmal kired el melodech aike el mekngit el uldesued me a urunguled, alta e ngmo sebeched el mo chemoit a bebil er ngii. Me ngkmal kired el melemolem el omeklemalt a omerelled el diak lultuil er a ildisel a rak er a demetecholb.​—2 Ko. 13:11.

9. Kede mekerang e medengei el kmo ngkired el melemolem el omekbeches a blekerdeled?

⁹ A apostol el Paulus a dilu er a Rekristiano el kmo: “Lak mkautingaol er a delongeliu, ele kom mla medebedii el mo mecherei sel di mla klengar er kemiu el obengkel a omerellel, e mla milemiu er a beches el klengar, el lomekbeches er ngii ngikel ulemeob er ngii, me ng merael el mo ua ingii, me ng rullemiu el mo ungil el medengelii ngiil Dios.” (Kol. 3:9, 10) Me ngbelkul a kmo ngkired el melemolem el melodech a blekerdeled e ‘omail er kid er a beches el klengar.’ Me a bla bo lebetok el rak el dosiou er a Jehovah me a lechub e ngkesai me kid a dirk sebeched el mesuub el kirel a betok el blekerdelel. E a Biblia a sebechel el ngosukid el ngodechii a klengar er kid el mo oltirakl er a Jehovah.

10. Ngera me ngkmal kired el melemolem el melodech a blekerdeled el ousbech er a Biblia? E ngera el ker a mo duubech?

¹⁰ Kede rokui el soad el olengesenges a ulekrael er a Biblia. Engdi ngkirel el mo blak a rengud el oltaut a lsekum ngsoad el melemolem el melodech a blekerdeled. E ngera uchul? Ngera me a Jehovah a dimlak lerellii el mo beot er kid el meruul a llemalt?

11-13. Ngera me a Jehovah a mengerechir er kid el mo mesisiich er aike el chelitechetud?

¹¹ Me sel dolatk er tia el klou el melidiul me aike el rokui el ngar er a chelsel, e ngkmal mo ulterekokl a rengud el kmo a Jehovah a ngar er ngii a klisichel el meruul a rokui el tekoi. Ngmla mebii a kot el klou e mesisiich el sils. Tia el sils a oltobed er a kot el mesisiich el kleald me a llomes er a chelsel a bek el bio er a klok. Engdi a beluulechad a di ousbech er a telkib er ngii el kutmeklii me ngsebechel el mo er ngii a klengar er a chelsel. (Psa. 74:16; Isa. 40:26) Ngdirrek el mesterir a klisichir a remesiungel el ngar er a chutem er sel taem el tir a ousbech er ngii. (Isa. 40:29) Me ngbleketakl el kmo a lsekum ngmo soal e ngsebechel el rullii el mo beot er kid el melodech a blekerdeled e mo diak domdasu a mekngit. Engdi ngera uchul me ngdiak loruul el uaisei?

¹² A Jehovah a mla meskid a ilmekled el melilt a tekoi. Ngmeskid a techelled el melilt el mo mesiou er ngii me a lechub e ngdiak. Me sel dekengei el mo olengesenges er ngii e le blak a rengud el meruul a soal e kede ochotii el kmo ngbetik a rengud er ngii e soad el oldeu er a rengul. A Satan a melekoi el kmo ngdiak a llemeltel a Jehovah el mengedereder. Engdi sel dolengesenges er a Jehovah e ngolechotel a kmo ngsoad el mo chederedall er Ngii. Me ngulterekokl a rengud el kmo ngika el betik a rengul el Demad a kmal dmeu a rengul er kid sel leblak a rengud el olengesenges er ngii. (Job 2:3-5; Osi. 27:11) Me alta e ngmeringel er kid el melodech a blekerdeled engdi sel leblak a rengud el melasem e ngolechotel a kmo ngblak a rengud el mo er a Jehovah e kongei er ngii me ngmo Merredeled.

¹³ A Jehovah a soal a bo leblak a rengud el oukerebai er ngii. (Monguiu er a 2 Petrus 1:5-7; Kol. 3:12) Ngdirrek el soal a bo leblak a rengud el mengikiid a uldesued me a rengud. (Rom 8:5; 12:9) Me sel bo leblak a rengud el melodech a  blekerdeled e dechoit aike el kired el mengoit e ngkmal mo dmeu a rengud.

14, 15. Ngmekerang e mo sebeched el mekeroul a blekeradel el soal a Jehovah? (Momes er a baks el “ A Biblia me a Nglunguuch a Ngildechii a Klengar er Tir”)

¹⁴ Me kede mekera e mekeroul a blekeradel el soal a Jehovah? Ngungil a debecherei a Dios me lomekrael er kid er a bai di lekid el melilt a tekoi el bo doruul. A Rom 12:2 a kmo: “Lak di moltirakl a blekerdelel a tekoi er tia el beluulchad, e bai bsa techellel a Dios me lukbeches a rengmiu e le ngodech a blekerdeliu. E seikid e kom mo medengelii a rengul a Dios er a kmo ng ngera ungil, ma ngera odeuir a rengul, ma ngera kmal cherrungel el ungil.” Me ngbelkul a kmo ngkired el ultuil er a ngelsuil a Jehovah a lsekum kede kongei el mo meruul a soal. Me ngkmal kired el menguiu er a Biblia er a bek el sils, e melatk a tekoi el donguiu e meluluuch el olengit er a chedaol reng er a Jehovah. (Lk. 11:13; Gal. 5:22, 23) Tiaikid a rolel e ngsebechel a Jehovah el ngosukid el mo medengei a soal e mo omdasu a tekoi el uai ngii. A bo deuaisei, e a uldesued me a tekinged me a omerelled a mo odeuir a rengul, me kede mo mesisiich er aike el chelitechetud. Engdi lak dobes el kmo, ngdirk kired el melemolem el mengoit aika el mekngit el blekerdeled.​—Osi. 4:23.

¹⁵ Ngkired el mesuub er a Biblia er a bek el sils el uldimukl er a babilenged el ua Ongkerongel me a Awake! Ngbetok el suobel el ngar er aika el babier a osisecheklid er a rolel e ngsebeched el mo oukerebai a blekerdelel a Jehovah me a dirrek el rolel e kede mo mesisiich er a chelitechetud. Ngsebeched el metik a suobel me a bades el ngii a ileakl el ngosukid. Me ngungil a deluches e deketmokl aike el bades me a suobel el debetik me bo el sebeched el menguiu er sel taem el bo dousbech.

16. Ngera me ngdiak el kirel el mo mechitechut a rengud a lsekum ngtelkib el meringel er kid el melodech a blekerdeled?

¹⁶ Kede ousbech er a klou el taem el mesuub el mo oukerebai a blekerdelel a Jehovah. Me bo el klou a rengum, e lak momdasu el kmo ngkmal diak el sebechem el melodech a blekerdelem. Ngar er a uchelel e nglocha mo telkib el meringel er kau el oltirakl a ulekrael er a Biblia. Engdi sel bo blechoel el melatk aika el tekoi, e moltirakl er a rolel el soal a Jehovah, e ngmo beot er kau el omdasu e meruul a tekoi el uai ngii e dirrek el mo sebechem el meruul a melemalt el tekoi.​—Psa. 37:31; Osi. 23:12; Gal. 5:16, 17.

17. Ngera el ungil tekoi er a ngar medad a sebeched el melatk a lsekum kede melemolem el blak a rengud?

¹⁷ Kede rokui el omes el beduluchei el kirel sel  taem el bo demecherrungel e dedak el mesiou er a Jehovah el mo cherechar. Seikid e kede mla mo mecherrungel me ngbeot er kid el oukerebai er Ngii. Engdi chelechang e ngdirk sebeched el mengull er Ngii e le ngmla meskid a sengk er ngii el olubet el tenget. Me alta e ngdirkak bo demecherrungel engdi ngsebeched el odeuir a rengul a lsekum kede melemolem el blak a rengud el melodech a blekerdeled e olengesenges a llechul el ngar er a Biblia.

18, 19. Ngmekerang e mo ulterekokl a rengud el kmo a Biblia a ngar er ngii a klisichel el melodech a klengar er kid?

¹⁸ A Kevin a millasem er a tkurrebab el sebechel el mengoit er a ngesechel a rengul. Ngmillebedebek a tekoi el lulenguiu er a Biblia e mle blak a rengul el melodech er a klengar er ngii. Ngdirrek el kilengei el olengesenges a ulekrael er a rekldemel el Kristiano. Me alta ngmlo betok el rak el lolasem engdi a cherengel a taem e ngmlo sebechel el mo ta er a remesiou er a ongdibel. E ngar er a chelsel aika el mereko el 20 el rak e ngmesiou el ta er a remechuodel. Me nguaisei, engdi ngungil medengei el kmo ngdirk kirel el melemolem el oureor el kirel a chelitechetul.

¹⁹ Me kid a di ua Kevin el sebeched el melemolem el oureor el kirel a blekerdeled. E sel doruul el uaisei e ngmo uchul e kede olekeed er kid er a Jehovah. (Psa. 25:14) Me a lsekum kede mo er a tkurrebab el sebeched el melodech a blekerdeled me bo dodeuir a rengul, e ngmo ngosukid. Ngdirrek el mo ulterekokl a rengud el kmo ngokiu a ulekrael er a Biblia e ngsebeched el melemolem el melodech a blekerdelel a klengar er kid.​—Psa. 34:8.