1, 2. (a) Ngua ngera uldesuir a Resioning er a Jehovah el kirel a Biblia? (b) Ngera kot el soam el babier er a Biblia?

 KID el Sioning er a Jehovah a kot el soad a Biblia. Tiang a meskid a ongelaod me a omelatk e dirrek el meskid a ulekrael el sebeched el oumerang. (Rom 15:4) Tia el Biblia a babier el diak losaod a di uldesuir a rechad e ngbai “tekingel a Dios.”​—1 Th. 2:13.

² Ngbleketakl el kmo kede rokui el soad a kakerous el bliongel er a Biblia. A rebebil a kuk sorir aike el Ebangkelio e le ngmesaod a ungil blekerdelel a Jehovah el lullecholt a Jesus. (Jn. 14:9) E a rebebil a kuk sorir a tekoi er a ulaoch el uaike el ngar er a Ocholt el mesaod el kmo, “ng ngera mochu duubech.” (Och. 1:1) E a rebebil a kuk mo mechelaod a rengrir sel longuiu er a Psalm me a rebebil a dmeu a rengrir el menguiu er a babier er a Osisechakl. Me ngbleketakl el kmo a Biblia a mileketmokl el kirir a rokui el chad.

3, 4. (a) Ngua ngera uldesuem el kirel aika el babilenged? (b) Ngera el babier a dengai el ngii a mileketmokl el kuk kirel a ileakl el cheldellir a rechad?

³ Me kid el kmal soad a Biblia a uchul me ngsoad el menguiu aike el babilenged e le ngmengai a uchetemel er a Biblia. Me aike el rokui el babier me a brochure me a magazine me a lmuut el bebil, a  ileakl el sengk er a Jehovah. Aikang a melisiich er a klaumerang er kid me kede melemolem el kmeed er a Jehovah.​—Tit. 2:2.

⁴ A betok er aika el babier a milluches el kirir a Resioning er a Jehovah. Engdi ngar er ngii a bebil el milluches el ileakl el kirir a rengeasek me a lechub a ruungalek. E a oumesingd er aike el suobel me a video el ngar er a website er kid a mileketmokl el kirir a rechad el diak el Sioning er a Jehovah. Me a chouaika el kakerous el tekoi a ochotii el kmo a Jehovah a dirk melemolem er a telbilel el oltobed a betok el ulekrael el kirir a rokui el chad.​—Isa. 25:6.

5. A Jehovah, ngdmeu a rengul el kirel a ngerang?

⁵ Me a oumesingd er kid a kmal soad el klou a temed el menguiu er a Biblia me aika el babilenged. Engdi nglocha diak dongoit a osisiu el ildisel a taem el mesuub a bek el babier el dengai. Engdi kede ungil medengei el kmo a Jehovah a dmeu a rengul sel lomes er kid el ungil el ousbech a temed el menguiu e mesuub er a Biblia me aike el babilenged. (Efe. 5:15, 16) Me nguaisei, engdi ngar er ngii a ta er a tekoi el kired el mo kerekikl el oleiub er kid er ngii. E tiang ngerang?

6. Ngera sebechel el rullid me ngmo diak dengai a klungioled er a bebil el ungil tekoi el lomeskid a Jehovah?

⁶ A lsekum ngdiak dekerekikl e ngsebeched el mo omdasu el kmo a bebil el bades er a Biblia me a lechub a bebil el babier a diak a ngera lerellii er kid. El ua tiang, ngmo ua ngera uldesuem a lsekum ke omdasu el kmo tia el bades a diak a ngera el lengesuir er ngak? Me a lechub e tia el tekoi a diak lolutk el kirek? Kede di choiuii e obes er ngii, me a lechub e ngdiak donguiu er ngii? A bo leuaisei, e ngklou a techelled el mo diak denguu a klungioled er aika el meklou a ultutelel el tekoi. Me kede mekerang e oibngid er tia el tekoi? Ngkmal kired el blechoel el melatk el kmo a rokui el tekoi el medung a mla er a Jehovah el mei. A Biblia a kmo: “Ngak a RUBAK el Dios el olsisechakl er kemiu el mo ungilbesmiu” (Isa. 48:17) Me ngar tia el suobel e kede mo mesaod a edei el tekoi el sebechel el ngosukid me kede mo ngmai a klungioled er a rokui el ungil el tekoi el lomeskid a Jehovah.

7. Ngera me ngkired el mo ungil melatk a tekoi sel donguiu er a Biblia?

⁷ Bo mungil melatk a tekoi el monguiu. Ngmera el tekoi, a bebil el bades er a Biblia a milluches el kirir a rederta el chad me a lechub e ngcheldebechel er a rechad. Me nguaisei, engdi a Biblia a bleketakl el kmo, “Ele chedaol Llechukl el rokui a melluches luleak a Reng ra Dios, me ngngarngii a blkul er chosisechakl.” (2 Ti. 3:16, BT) Sei a uchul me ngkmal kired el mo ungil melatk a tekoi el donguiu er a Biblia. A ta el odam a blechoel el melatk el kmo ngsebechel el suub a betok er a chelsel a ta el cheldecheduch er a Biblia. Tiang a ngosuir el omtab aike el tekoi el diak el sal bleketakl. Me a uchei er a donguiu er a Biblia e ngkmal kired el olengit er a Jehovah me lengesukid el mo ungil melatk a tekoi, e lebeskid a llomeserreng me bo dungil medengei a tekoi el soal a bo dodengei.​—Esr 7:10; monguiu er a Jakobus 1:5.

8, 9. (a) Sel donguiu er a Biblia, e ngungil el dolatk a ngera el ker? (b) Ngua ngera uldesuel a Jehovah el bedulkid el okiu a tekoi el kirir a remechuodel el oltaut?

⁸ Moker a ker. Sel monguiu er a Biblia, e molatk aika el ker el kmo: ‘Tiang ngouchais er ngak a ngerang el kirel a Jehovah? Ngmekera kuusbech er ngii er a klengar er ngak? Ngmekera kuusbech er ngii el ngosuterir a rebebil?’ Ngmo uchul a klungioled sel donguiu er a Biblia e bo dungil omtab aika el ker. Me bo dosaod er a ta er ngii. A Biblia a mesaod a bebil el tekoi el ileakl el di kirir a Rekristiano el  mechuodel er a ongdibel. (Monguiu er a 1 Timothy 3:2-7.) Me nguaisei, engdi oumesingd er kid a diak dosiou el mechuodel er a ongdibel, me kede locha mo omdasu el kmo tia el tekoi a diak a ngera lerellii er ngak. Engdi ka me dolatk aike el edei el ker el dulsaod er a uchei, e domtab el kmo ngmekerang aika el tekoi el medung er a bades e sebechel ngosukid el rokui.

⁹ “Tia ngouchais er ngak a ngerang el kirel a Jehovah?” A Jehovah a mla ouchais er kid er a tekoi el kirir a remechuodel el mo oltaut. Ngkmal oberaod a uldesuel el kirir tirke el chad el mo omekerreu a ongdibel er Ngii. Me tiang a ochotii el kmo a bek el ongdibel a kmal mekreos er a osengel. E a Biblia a mesaod el kmo a Jehovah a “rirellii el mo kloklel el okiu a kodellel a Ngelekel.” (Rel. 20:28) Me ngsoal a remechuodel a bo lungil kerebai, e le ngkirir el di tir el mo mesaod er tir el kirel a bek el omerellir el mo er a derta el chad er a ongdibel. Ngkmal soal a bo dolechesuar a ulekerreu el okiu tirka el mechuodel. (Isa. 32:1, 2) Me sel donguiu aika el bades e kede mo medengelii a delechel a ulekerreuil a Jehovah el bedulkid.

10, 11. (a) Sel donguiu el kirel aike el tekoi el kirir a remechuodel el oltaut, e ngmekera e mo sebeched el oltaut er a klengar er kid? (b) Ngmekera dousbech el ngosuterir a rebebil?

¹⁰ “Ngmekerang a kultaut aika el tekoi er a klengar er ngak?” A lsekum ke mla mo ta er a remechuodel er a ongdibel, e ngkirem el blechoel el melatk aika el tekoi e melasem el lmuut el mo ungil el meruul er a ngerechelem. Me a chad el “semeriar el mo mengeteklel a ikelesia,” a kirel el mo er aike el sebechel el oltaut aika el tekoi er a klengar er ngii. (1 Ti. 3:1) Engdi kid el rokui el Kristiano a sebeched el suub a betok er aika el tekoi. E le Jehovah a soal a rokui el chad a bo lungil el omtab a tekoi e bo lungil melilt a tekoi el loruul. (Fil. 4:5; 1 Pe. 4:7) Me a lsekum a remechuodel er a ongdibel a mo ungil “el ocholt el mor a delebechel el sib” e ngmo sebeched el “moltirakl er sel kloumera er tir.”​—1 Pe. 5:3; Heb. 13:7, BT.

¹¹ “Ngmekera kuusbech aika el tekoi el ngosuterir a rechad?” Ngdirrek el sebeched lousbech aika el tekoi el melutk el kirir a Rekristiano el mechuodel, el ngosuterir a rechad el dosuub a Biblia lobengterir me tirke el semeriar, el mo medengelii a klekakerous er a remechuodel  me a remengeteklel a klsuul klechelid. Aika el tekoi a dirrek el omeklatk er kid el kmo a remechuodel a kmal meringel el oureor el mesiou er a ongdibel er kid. Ngoeak tiang e ngmo sebeched el oba klou el omengull el bedul tirka el odam er kid. (1 Th. 5:12) Me sel deblechoel el olecholt er a omengull el mo er tir, e ngkmal mo dmeu a rengrir el meruul a ngerechelir.​—Heb. 13:17.

12, 13. (a) Ngera sebeched el metik sel dousbech a klekedall el mla mo er ngii el merriter a suobel? (b) Mosaod er a ta er a okesiu el diak el sal bleketakl a omesodel.

¹² Morriter a suobel. Me sel dosuub er a Biblia e ngsebeched el osiik a nger er aika el ker:

•   Ngtecha milluches er tia el babier er a Biblia?

•   Ngmilluches er ker er oingerang?

•   Ngera el meklou el tekoi a dilubech er sera lemeluches tia el babier?

 Chouaika el tekoi a sebechel ngosukid el mo ungil el omtab a tekoi el diak el sal bleketakl er a uldesued.

¹³ Sel donguiu er a Esekiel 14:13, 14 e ngkmo: “A lsekum a beluu a meruul a mekngit e diak le blak a rengul er ngak, e a chimak a mo omtok er ngii. Ak mo tomall a rolel a kall er ngii. Ak mo odureklii a bosech el mor ngii el beluu el mo mekodeterir a re chad ma charm er ngii.” A Rubak el DIOS a kmo, “Ng mo lmuut ma lsekum tirkal tedel chad el Noah, ma Daniel, ma Job a mlo kiei er ngii el beluu, e a llemeltir a di osobel a klengar er tir e merekong.” Me sel bo dungil merriter er ngii e kede mo medengei el kmo a Esekiel a lilechesii tiang er a bekord el 612 el rak er a uchei er a Kristus. E sel taem, e a Noah me a Job a mla mo betok el rak er a lemad, engdi a Jehovah a dirk melatk er a blakerreng er tir. Engdi a Daniel a dirk mle chad el bekord el 20 a rekil, me a Jehovah a ulemasech er ngii el kmo ngblak a rengul el di ua Noah me a Job. Me ngera kede suubii er tiang? Ngochotii el kmo a Jehovah a kmal dmeu a rengul er a blakerreng er a remesiungel el uldimukl er a rengeasek.​—Psa. 148:12-14.

14. Ngmekerang a babier me a suobel el motobed el kirir a rengeasek e ngosuterir, e ngmekerang e mo uchul a klungiolir a rebebil? (Momes er a siasing er a uchelel a suobel.)

¹⁴ A babier el kirir a rengeasek. Kede mla suubii el kmo ngsebeched el ngmai a klungioled er a rokui el babier er a Biblia. Me ngdi osisiu, ngsebeched el ngmai a klungioled er a rokui el babilenged. Me bo dosaod a bebil er ngii. Ngar er aika el mereko el betok el rak, e a Jehovah a mla otobed a betok el ungil babier me a suobel el kirir a rengeasek. ^[1] E aikang a ngosuterir me ngsebechir el outekangel a orimel er a skuul me a omelsemai er a klengar er tir. Engdi ngmekerang e sebeched el rokui el ngmai a klungioled er aika el tekoi? Sel donguiu e domtab e ngsebeched el mo medengei a mondai el lechelebangel a rengeasek me ngmo sebeched el ngosuterir e melisiich er tir.

15. Ngera me a remeklou el Kristiano a dirrek el kirir el mesuub aike el suobel el melutk el kirir a rengeasek?

¹⁵ A remeklou el Kristiano a diak el kirir el omdasu el kmo aika el tekoi a kuk di mo er a remekekerei el chad. E le oumesingd el mondai el losaod aika el suobel a melutk el kirir a rokui el Kristiano. El ua tiang, kid el rokui a kmal kired el mesebechakl er a klaumerang er kid, e omtebechel a uldesued, e oltngakl a orimel, e dirrek el mengeroid er kid er a remekngit el sechelei me a mekngit el rolel a ongelaod. Me alta e aika el tekoi a melutk el kirir a rengeasek, engdi a uleklatk el ngar er ngii a mengai er a Biblia me ngsebechel el mo uchul a klungiolir a rokui el Kristiano.

16. Ngera lmuut el bebil er a tekoi el ngar er a babilenged el ngosuterir er a rengeasek?

¹⁶ Me a babier el milluches el kirir a  remekekerei el chad a ngosuterir el melisiich er a deleuill er tir me a Jehovah. (Monguiu er a Olisechakl 12:1, 13.) E a remeklou el chad a dirrek el sebechir el ngmai a klungiolir er ngii. El ua tiang, sel April 2009 el Awake! a ngar er ngii a suobel er a chelsel el “Young People Ask . . . How Can I Make Bible Reading Enjoyable?” Tia el suobel a mesaod a bebil el ulekrael el uldimukl er a baks el sebeched el kutmokl el kirel a omesubed er a uriul. Me tiang ngmlo uchul a klungiolir a remeklou el chad? A ta el chedil a kmo ngmle meringel er ngii el menguiu er a Biblia er a uchei. Engdi nguluusbech a ulekrael er tia el suobel me chelechang e ngkmal semeriar el menguiu er a Biblia. Ngdmu el kmo ngkmal lungil a rengul el mo medengelii a rolel e a babier er a Biblia a kaukuak e sebechel el meob a klebokel el siasing er a uldesued. Ngdirrek el dilu el kmo: “Chelechang e ak kmal semeriar el menguiu er a Biblia.”

17, 18. Kede mekerang e ngmai a klungioled er aike el babier el mileketmokl el mo er a buai? Mosaod.

¹⁷ A suobel el mileketmokl el mo er a buai. Ngulemuchel er sera rak er a 2008 el mei e ngmlo er ngii a The Watchtower el kltmokl el di kired a Resioning er a Jehovah. Engdi ngdirrek el ngar er ngii a babier el dorous el mo er a rechad. Me kede mekerang e ngmai a klungioled er aika el babier? Me bo dosaod. Sel mongemedaol er a chad el mei er a Blil a Ongdibel e bo el sebechel el mei, e ngkmal mo dmeu a rengum. Me sel taem el longedecheduch a odam e ke di melatk er ngika el okiak er kau. Ke melatk el kmo ngua ngera uldesuel el kirel a tekoi el lorrenges, e mekera aika el tekoi e sebechel el ngodechii a klengar er ngii. Ngoeak tiang e ngkmal mo soam a suobel el tilobed e mo oba omereng el saul el kirel.

¹⁸ Ngdirrek el sebeched el ngmai a klungioled sel donguiu aike el babier el mileketmokl el mo er a buai. El ua sel The Watchtower me a dirrek el suobel el ngar er a website er kid el jw.org, el mesaod er a Biblia el ousbech a tekoi el beot er kid el mo medengei. Sel donguiu aika el babier e nglmuut el dochelii a klemedengei er kid er a tekingel a Dios e lmuut el smisichii a bltkil a rengud el mo er a klemerang el tekoi el ngar er a Biblia el bla bo dodengei. Ngdirrek el osisecheklid er a beches el rolel e kede smodii a klaumerang er kid el mo er a rechad el doldingel er tir. Me ngdi osisiu, aike el Awake! a sebechel el lmuut el smisichii a klaumerang er kid el kirel ngika el Ulemeob, e dirrek el osisecheklid el mo meduch el mesebechakl er a klaumerang er kid.​—Monguiu er a 1 Petrus 3:15.

19. Kede mekerang e ochotii a omereng el saul er kid el mo er a Jehovah el kirel aike el ungil tekoi el lomeskid?

¹⁹ Me ngbleketakl el kmo a Jehovah a mla meskid a kmal betok el ulekrael me a osisechakl el di mo uchul a klungioled. (Mt. 5:3) Mada dolemolem el menguiu e doltaut er a klengar er kid. Ngmo uchul a klungioled a doruul el uaisei, e kede dirrek el mo ochotii er a Jehovah el kmo kede kmal oba omereng el saul el kirel aika el rokui el ungil tekoi el lomeskid.​—Isa. 48:17.