1, 2. (a) Ngera me a tekoi el dolatk el kirel, a kuk ngodech er aike el lolatk a rebebil? (b) Ngera kede mo mesaod er tia el suobel?

 A JEHOVAH a mla meskid a betok el mengasireng el tekoi el doba omelatk el kirel. Ngmla tibir el kmo ngmo chemedolii a ngklel e mo otaut a soal er a eanged me a chutem. (Mt. 6:9, 10) Aikaikid a kot el meklou a ultutelel el tekoi el domes el beduluchei el kirel. Ngdirrek el mla tibir el mo meskid a omeksulled el mo kiei el mo cherechar el ngar er a chutem me a lechub a eanged. Me ka di molatk aike el klungiaol el bo dengai er sel taem! (Jn. 10:16; 2 Pe. 3:13) Kede dirrek el mera el semeriar el omes el beduluchei el mo mesa sel rolel er a Jehovah a lomekrael e lolengeseu er a rechedal er chelecha el taem er a uriul sils.

² A Biblia a mesaod er a klaumerang el kmo kede “ulterekokl oumera ikel tekoi el dolatk.” Me tiang a belkul a kmo tirke el oumerang a ulterekokl a rengrir el kmo aike el telbilel a Jehovah a mo tmaut. (Heb. 11:1, BT) Engdi a rebetok el chad er chelechang a ngar er ngii a omeltkir me a urungulir el kirel a tekoi, engdi ngdiak lodengei el kmo ngmo tmaut me a lechub e ngdiak. El ua tiang, a rebebil a melatk el kmo te mo win a lottery, engdi ngdiak lulterekokl a rengrir el kmo te mera el mo win me a lechub e ngdiak. Me ngar tia el suobel e kede mo mesa el kmo, ngmekerang e mo sebeched el lmuut el smisichii a klaumerang er kid er a  telbilel a Dios. Kede dirrek el mo mesaod er a rolel e ngsebechel a mesisiich el klaumerang er kid el ngosukid er chelechang.

3. Ngera me kede oumerang el kmo a telbilel a Dios a mo tmaut?

³ Ngdiak a ta er kid el di mechell e ngar er ngii a klaumerang er ngii. Me a lsoad el mo oumerang e ngkired el kongei er a chedaol reng er a Dios me ngomekrael er a rengud. (Gal. 5:22) A chedaol reng a sebechel el ngosukid el mo ungil medengelii a Jehovah. Me sel bo dodengei el kmo Ngii a ngike el kot el mesisiich e mellomes a rengul el Dios, e ngoterekokl a rengud el kmo ngar er ngii a klisichel el mo otaut a rokui el telbilel. Me sel losaod el kirel aike el telbilel e ngua dedu el kmo ngmla tmaut e le ngdmu el kmo: “Ng mla mo merek!” (Monguiu er a Ocholt 21:3-6.) Me kede medengei el kmo a Jehovah a di blechoel el oltaut a telbilel e le ngdi “ngii el tang a Dios, e ngii a blak a rengul.” Tiaikid a uchul me kede oumerang a rokui el tekoi el lolekoi el kirel a ngar medad.​—Dut. 7:9.

4. Ngera el klaumerang a luleba remesiungel a Dios er a irechar?

⁴ Ngar er a 11 el bliongel er a Hebru e ngomasech a ngklir a 16 el sechal me a redil el mle mesisiich a klaumerang er tir er a telbilel a Jehovah. Ngdirrek el mesaod el kirir a rebetok el uleldeu er a rengul a Jehovah el klaumerang er tir a uchul. (Heb. 11:39) Te rokui el milengiil er a ‘uldidellel a rasech’ el Jehovah a tilbir el kmo ngmei. Te mle medengei el kmo ngika el ‘uldidellel a rasech’ a mo okngemedeterir a rokui el cherrouel a Dios, e rullii tia el chutem el lmuut el mo baradis. (Gen. 3:15) Tirkang a kmal mle mesisiich a klaumerang er tir el kmo a Jehovah a lmuut el mo okiseterir er a kodall. E dimlak lolatk el kirel a okiis e bo lekiei er a eanged e le ngdirkak leketmeklii a rael a Jesus er seikid el taem. (Gal. 3:16) Te bai uleba omelatk el kmo kiei er tia el klebokel el baradis el chutem el mo cherechar.​—Psa. 37:11; Isa. 26:19; Hos. 13:14.

5, 6. A Abraham me a telungalek er ngii, te ulemes el beduluchei el kirel a ngerang? Te milekerang e melemolem el mesisiich a klaumerang er tir? (Momes er a siasing er a uchelel a suobel.)

⁵ Me a Hebru 11:13, a mesaod el kirir a reblak a rengrir el mesiungel a Jehovah el kmo: “Tirkal rokui el chad a mlad el uluumerang. Te dimlak lengai a ikel telbilel a Dios, e ngdi te miles me ng dirk cheroid e toutkeu.” Me te ulemes el beduluchei el kirel a beches el beluulechad e millatk el leko te mla mo kiei er a chelsel. E a ta er tir a Abraham. A Jesus a milsaod el kirel a Abraham el kmo, ‘ngmle dmeu a rengul el mo mesa’ tiaikid el taem. (Jn. 8:56) A Sara me a Isak me a Jakob me a relmuut el bebil a dirrek el ulemes el beduluchei el kirel sel taem el Renged “el luldesuii a Dios e toketekii” a mo mengedereder er tia el beluulechad.​—Heb. 11:8-11.

⁶ Ngmilekerang a Abraham me a telungalek er ngii e melemolem el mesisiich a klaumerang er tir? Ngdimlak lemeterob el mesuub el kirel a Jehovah. E a lebebil er a taem, e a Dios a mengedecheduch er tir el okiu a rechanghel me a ues me a dirrek el berrous. Te dirrek el locha siluub a betok er tirke el mle meklou el chad el uluumerang me a dirrek el ike el mle llechukl el tekingel a Dios. Ngii me a telungalek er ngii a dimlak lobes a telbilel a Dios, e mle blechoel el melebedebek el kirel. Tiaikid a uchul me ngmle ulterekokl a rengrir el kmo a Jehovah a mo otaut a telbilel, me te millemolem el blak a rengrir el mo lmuut er a taem el blo lechelebangel a ringel me a odechelakl.

7. Ngera ngmla meskid a Jehovah el melisiich er a klaumerang er kid? E ngera kired el meruul?

⁷ Me ngera mo ngosukid el melemolem el melisiich er a klaumerang er kid? A Jehovah a mla meskid a Biblia el mo olisechakl er kid el kirel a telbilel er a ngar medad. Me ngar tia el Biblia e ngmesaod el kmo ngkirel el mo dmeu a rengud. Sei a uchul me ngmo ngklungioled sel donguiu er a Biblia er a bek el sils e doltirakl a ulekrael el lomeskid. (Psa. 1:1-3; monguiu er a Rellir 17:11.) A Jehovah a dirrek el ousbech er a “blak a rengul e  mellomes a rengul el mesiou” el ‘meskid a keled er sel belsechel.’ (Mt. 24:45) Me kede di ua rechedal a Dios er a irechar el kired el menguiu el kirel a telbilel er a bek el sils, e mo dmolech el melebedebek. E tiang a mo ngosukid el melemolem el blak a rengud el mo er a Dios, e omes el beduluchei el kirel sel taem el Rengedel a mo mengedereder er tia el chutem.

8. Ngmekera nglunguuch el lmuut el smisichii a klaumerang er kid?

⁸ Ngera lmuut el bebil er a tekoi el ngilsuterir a rechedal a Dios er a irechar el mo mesisiich a klaumerang er tir? Te milluluuch el olengit a ngeso er a Jehovah, e sel longer a nglunguchir e nglmuut el smisichii a klaumerang er tir. (Neh. 1:4, 11; Psa. 34:4, 15, 17; Dan. 9:19-21) Me ngdi osisiu, sel desang el kmo a Jehovah a remenges a nglunguched e ngosukid er sel taem el dousbech a ngeso, e nglmuut el smisichii a klaumerang er kid. (Monguiu er a 1 Johanes 5:14, 15.) Ngdirrek el kired el melemolem el ‘olengit me denguu’ a chedaol reng er a Jehovah me lluut el smisichii a klaumerang er kid.​—Lk. 11:9, 13.

9. Ngera bebil tekoi el kired el meluluuch el kirel?

⁹ Me sel doluluuch el mo er a Jehovah, e ngdiak di dolengit aike el dousbech e lemerekong. Ngdirrek el kired el mereng a sulel e oldanges er ngii er a bek el sils, e le ngmla remuul a kmal betok el ungil el tekoi el kired! (Psa. 40:5) Kede dirrek el meluluuch el kirir a rudam er kid el meliuekl er a beluulechad. E melatk er tirke el “ngar a kelebus,” e dirrek el meluluuch el kirir a ‘remengetekled.’ Me sel desa chimal a Jehovah el onger a nglunguched, e nglmuut el smisichii a klaumerang er kid e dirrek el okesengii a deleuill er kid lobengkel.​—Heb. 13:3, 7.

10. Ngera ngilsuterir a rebetok el mo bekeu e melemolem el blak a rengrir el mo er a Dios?

¹⁰ Ngar er a Hebru er a 11 el bliongel, e a apostol el Paulus a dilu el kmo: “Mar dil a mlokiis ar chederir el mlad. E ar bebil a lulemekringel er tir el mora kodall, e dimlak el sorir a le mengubet, le ngkirel bo le nguu sel lmuut el ngarbab lokiis.” (Heb. 11:35, BT) Me te betok a uluutekangel a ringel e millemolem el blak a rengrir el mo er a Dios, e le ngmle mesisiich a klaumerang er tir el kirel a okiis el bla letibir a Dios. Te ungil medengei el kmo a ngar medad el taem e a Jehovah a mo olekiis er tir er a kodall, me ngmo sebechir el kiei el mo cherechar el ngar tia el chutem. Ka di molatk er a Naboth me a Sekaria. Ngblekongesenges er tir el mo er a Dios a uchul me te ulebetech er a bad e mlad. (1 Ki. 21:3, 15; 2 Kr. 24:20, 21) E a Daniel a ulebidokl er a blil a laion me tirke el sechelil a dirrek el ulebidokl er a chelsel a melilial el ngau. Te kilengei el mo mad er a bai bo longull a klsuul chelid. Te kmal uluumerang el kmo, a Jehovah a mo mesterir a chedaol reng er ngii el ngosuterir el outekangel a ringel el blo lechelebangel.​—Heb. 11:33, 34; Dan. 3:16-18, 20, 28; 6:13, 16, 21-23.

11. Ngera el ringel a blo lechelebangel a rebebil profet el klaumerang er tir a uchul?

¹¹ A rebetok el profet a ua Mikaia me a Jeremia el mlucheracheb e mlekelebus. Me a Elias a dirrek el “di mirrorael a ked ma rois, e kilie chelsel a ii ma kliokl el chutem.” Me tirka el rokui a uluutekangel e millemolem el blak a rengrir el mo er a Dios e le te mle ‘ulterekokl oumera ikel tekoi el lolatk.’​—Heb. 11:1, BT, 36-38; 1 Ki. 18:13; 22:24-27; Jer. 20:1, 2; 28:10, 11; 32:2.

12. Ngtecha ngike el kot el ungil el kerebai el kired? E ngera ngilsuir el mo sebechel el outekangel?

¹² A Jesus Kristus a uluutekangel er a chelsel a kmal meringel el blekeradel, e millemolem el blak a rengul el mo er a Jehovah. Me ngera ngilsuir el outekangel? A Paulus a dilu el kmo: “Sel deurreng el dirk merael el mei a uchul me ng dimlak a belkul er ngii a rrengel a mo mad er a kerus, me chelechang e ng mla mo nguu a kingellel er a kadikm er a kingellel a Dios.” (Heb. 12:2) Me a Paulus a millisiich er a Rekristiano el mo “melatk” er a kerebil a Jesus. (Monguiu er a Hebru 12:3.) Me te betok el Kristiano er a irechar a ua Jesus el mlad el blakerreng er tir el mo er a Jehovah a uchul. E a ta er tir a Antipas. (Och. 2:13) Chouaitirka el Kristiano a mla  ngmai a omeksullir, el diak leua tirke el bebil el mesiungel a Dios er a uchei el tir a oba omelatk el mo kiei er tia el chutem. (Heb. 11:35) Sesei el taem er a uriul er a bo le King a Jesus er a rak er a 1914, e a rengellitel el Kristiano el mlad a milekiis er a kodall e mo er a eanged, e ngar isei e te mo obengkel el mengedereder er a klechad.​—Och. 20:4.

13, 14. Ngera el ringel a lechilarm er ngii a Rudolf Graichen? E ngera ngilsuir me ngmelemolem el blak a rengul el mo er a Dios?

¹³ Te betok el miliol el mesiungel a Dios a oukerebai er a Jesus. Te melatk er a telbilel a Dios e melemolem el blak a rengrir er a chelsel a taem er a ringel. E a ta er tir a Rudolf Graichen, el milechell er a Dois er sera 1925. Sera lekekerei, e a rechad er a blil a millecherakl a siasing er a cheldecheduch er a Biblia er a kboub er a blirir. Me ngdmu el kmo: “A ta er ngii a siasing er a lbolb me a ngelekel a sib me a ngelekel a kaming me a leopard me a ngelekel a kerbou me a laion, el dmak el ngar er a budech e a kekerei el buik a omekrael.” (Isa. 11:6-9) Tiang a ngilsuir a Rudolf el mo blechoel el melatk er a baradis el chutem e dirrek el millisiich er a klaumerang er ngii er tia el tekoi. Tiaikid a mlo uchul me ngmillemolem el blak a rengul el mo er  a Jehovah, alta e ngkmal chilarm er a odechelakl er a Nazi Gestapo el betok el rak, e dirrek el mlo chuarm er a rechedal sel Communist Stasi er a East Germany.

¹⁴ Ngdirrek el chilarm a lmuut el bebil er a ringel. A delal a mlad er a rakt el typhus er a dirk lekelebus er a Ravensbrück concentration camp. E a demal a mle saing er a babier el mo diak el ta er a Sioning er a Jehovah. Engdi a Rudolf a millemolem el melisiich er a klaumerang er ngii. Me sera letobed er a kelebus e ngmlo mesiou el odam el oldingel a ongdibel. E a uriul e ngmlokedong el mo er a Skuul er a Gileadl, e mlodurech el mo mesiou er a beluu er a Chile. Me ngar isei e ngmillemolem el mesiou el odam el oldingel a ongdibel. Ngmlo bechil a odos el missionari el Patsy. Engdi a ta el rak er a uriul e a ngelekir el redil a mlad, e a sesei el rak er a uriul e a Patsy a dirrek el mlad, el dirk mle 43 a rekil. Me ngar er a chelsel aika el ringel e a Rudolf a millemolem el mesiou er a Jehovah. Me ngmo lmuut er sel taem el lechudelang e lemechitechetong me ngii a di millemolem el regular pioneer e mesiou el ta er a remechuodel er a ongdibel. Ngsebeched el menguiu er a chisel a klengar er ngii el ngar er a August 1, 1997, el The Watchtower, er a 20-25 el llel. ^[1]

15. Mosaod a bebil el kerebai er a rudam me a rudos er kid er chelechang el dmeu a rengrir el mesiou er a Jehovah alta e te chuarm er a odechelakl.

¹⁵ Chelecha el taem, e a rebetok el rudam me a rudos er kid a dmeu a rengrir el mesiou er a Jehovah alta e te chuarm a meringel el odechelakl. A betok el dart er tir a kelebus er a beluu er a Eritrea me a Singapore me a South Korea e le tir el diak lekengei el mo er a mekemad. (Mt. 26:52) A Isaac me a Negede me a Paulos a mla mo betok er a 20 el rak el lekelebus er a beluu er a Eritrea! E kmal mekngit a omeruul el mo er tir. Me ngar er a chelsel aika el rak e ngdiak a techellir el mo bechiil me a lechub e bo lomekerreu er a rechad er a blirir. Engdi te melemolem el blak a rengrir el mo er a Jehovah e dirrek el di meleketek a klaumerang er tir. Me tirke el mengkar er a blil a kelebus a kmal oba omengull el bedul tir er chelechang. Ngar er ngii a siasing er tirka el odam er kid el ngar er a jw.org el website er kid. Te kmal klikmechur alta e te chuarm er a ringel.

16. Ngmekerang a mesisiich el klaumerang er kau e ngosukau?

¹⁶ Me a ruumesingd er a rechedal a Jehovah a dirkak a ta el bo lekelebus, me a lechub e bo lechelebangel a mekngit el omeruul el ua tirka el lodam er kid el dirk dulsaod er tir. Engdi a rebetok a chuarm el ngelsengesel a kall me a telemellel a beluu me a dirrek el mekemad er a beluu. E a rebebil a kuk oukerebai er a Abraham me a Isak me a Jakob me a Moses, e mla chemoit a chetengakl me a kerruul e mo mesiou er a Jehovah. Me ngera sel rulleterir tirka el odam me ngmelemolem el dmeu a rengrir e mesiou er a Jehovah? Ngsel klou el bltkil a rengrir el mo er Ngii me a mesisiich el klaumerang er tir el kirel a telbilel. Te ungil medengei el kmo, ngmo mesterir a omeksullir a reblak a rengrir el mesiungel sel diak a ulebengelel el klengar er a chelsel a beches el beluulechad, el diak a chelebirukel er a chelsel.​—Monguiu er a Psalm 37:5, 7, 9, 29.

17. Ke mekerang e melemolem el melisiich er a klaumerang er kau? E ngera kede mo mesaod er a ongingil el suobel?

¹⁷ Me ngar tia el suobel e kede mla suubii a rolel e a klaumerang a “sel bo dulterekokl oumera ikel tekoi el dolatk.” Me a lsoad el mo uaisei a klaumerang er kid, e ngkired el blechoel el meluluuch el mo er a Jehovah e melemolem el melatk aike el telbilel. Tiaikid a rolel e ngmo sebeched el outekangel a ngii di el ringel. Me a ongingil el suobel e kede mo mesaod er a belkul a klaumerang er kid.