NGERA uchul me a demak a kmal mle kesib a rengul? Chelechang e ak mo smodii. Ngak a milechell er a July 29, 1929, e mlukeroul er a beluu er a Bulacan el ta er a kekerei el beluu er a Huriping. Ngdimlak el betok a ududam, e mle beot a rolel a klengar er kemam. Sera dirk kekerei, e a resoldau er a Siabal a mle oumekemad er a Huriping me ngulemuchel a mekemad. Engdi a belumam a mle cheroid me ngdimlak lemetemall er a mekemad. Ngdimlak a razio me a TV me a lechub a simbung er a belumam, me aki di ulerrenges a chisel a mekemad el losaod a rechad.

Te ngar er ngii a reteuid el rudam me a rudos er ngak, e sera bo el eai a rekik, e a demak el rubak me a delak el mechas a ngilikak el mo kiei lobengterir. Alta tirkang a mle chad er a Katolik, engdi a demak el rubak a kilengei el mesaod a tekoi er a klechelid lobengterir a rebebil er a rechad, e dirrek el kilengei el melai a babier el lomsang a resechelil. Ak dirk melatk er a taem el lullecholt er ngak a mekekerei el babier el Protection, Safety, me a Uncovered el tekoi er a Tagalog, * (momes er a footnote) me a dirrek el Biblia. Ngkmal mle soak el menguiu er a Biblia, el ileakl aike el eua el Ebangkelio. Tiaikid a rirellak el mo soak loukerebai a blekerdelel a Jesus.​—Johanes 10:27.

A resoldau er a Siabal a mirrael er a beluu er a Huriping, er sera rak er a 1945. E ngar tiaikid el taem, e a demak me a delak a mlo sorir ak lluut el mo remei. Me a demak el rubak a dilu er ngak me ak merael, me ak mirrael.

Ngar a December 1945, e a Resioning er a Jehovah el mla er a beluu er a Angat a mle omerk er a klumech er a belumam. E a ta el chuodel el Sioning a mlei er a blimam e ouchais a omesodel a Biblia el kirel a “ulebongel er a beluulchad.” (2 Timothy 3:1-5) Ngmilengemedaol er kemam el mora omesubel a Biblia er a beluu el di kmeed er a belumam. Me ak mlong, alta e a rechad er a blik a dimlak lebong. Te mla er ngii a bekord el 20 el chad el mlong, e a rebebil er tir a uleker a ker el kirel a Biblia.

Ngdimlak ksal medengei el kmo ngera te mesaod me ak mirrael. Engdi te ulemuchel el mengitakl er a chelitakl er a Renged. Ngkmal mlo soak tia el chelitakl me ak liluut el kiei. E a uriul er a chelitakl me a nglunguuch, e te milengemedaol er kemam el rokui el mora miting el mo er ngii er a Angat er sel ongingil el Sandei.

 Tia el miting a mla er ngii er a blil a Cruz me a telungalek er ngii, e a rebebil er kemam a mirrael el bekord el eim el mael (eai el kilometer) el mo er tia el blai. Te mla er ngii a bekord el 50 el chad el mle kldibel e ngak a kmal mlo mechas a renguk er a rengalek el mle sebechir el onger a ker el kirel a dmolech el omesodel a Biblia. Me a cherengel aike el sesei el temek lomais el mora miting, e a chuodel el pioneer el odam el Damian Santos el mle ta el le mayor er a beluu, a ulemekedong er ngak el mo bad er a blil. Me sel kesus e aki di milsaod a betok el tekoi el kirel a Biblia.

Seikid el taem, e a rechad a di mereched el mo metecholb er a uriul er a lesuub a beot el osisecheklel a Biblia. Me a uriul er a kumais el mora miting el telkib el taem, e a rudam a uleker er ngak me a relmuut el bebil el kmo, “Ngsoam el mo metecholb?” Me ak dilu el kmo, “Choi, ngkmal soak.” E le ngmle soak el mo mesiou er a ‘meral merrederek’ el Kristus. (Kolose 3:24) Me aki mlo er a kmeed el omoachel, e ngak me a lmuut el ta er a chad a mlo metecholb, e tiang a mle February 15, 1946.

Ak mlo mtebengii el kmo a remla metecholb el Kristiano a kirir el blechoel el omerk er a klumech el ua lurruul er ngii a Jesus. A demak a ulemdasu el kmo ngak a kmal dirk kekerei me ngdirkak bo lsebechek el olisechakl, e dirrek alta e ak mla nguu a techolb, engdi tiang a diak lerellak el mo ua chad el olisechakl. Me ak milsaod el mo er ngii el kmo, a Dios a soal a domerk er a klumech er a ungil chais el kirel a Rengedel a Dios. (Mateus 24:14) Ak dirrek el dilu er ngii el kmo ngkirek el melemolem loltaut er a telbilek el bla krellii el mora Dios. Tiaikid a mlo uchul me a demak a dilu aike el kmal mesisiich el tekingel el kulsaod er a uchei. Ngkmal mle blak a rengul el merrob er ngak me lak kulisechakl er a rechad. Seikid el taem e ngmle ketengek el mo mechei a rokui el tekoi e mo mesiou er a Jehovah.

A telungalek er a Cruz a ulemekedong er ngak el mo kiei lobengterir er a Angat. Te dirrek el millisiich er ngak me ngike el kot el kekerei el ngelekir el redil el Nora el mo omuchel el mesiou el pioneer. Me aki di dul ulemuchel el pioneer er sera November 1, 1947. A Nora a mlo pioneer er a ta er a basio, engdi ngak a di milsiou el ngar a Angat.

A uriul er a eru el rak el kusiou el pioneer, e a odam el mla er a Bethel el Earl Stewart, a ultebedii a cheldecheduch el mora rekuk betok er a 500 el chad er sel town square er a beluu er a Angat. Ngika el odam a di millekoi a tekoi er a Merikel, e a uriul e ak di mlo mesaod er tia el cheldechedechal el ngar a tekoi er a Tagalog. E tiang a mlo ta er aike el betok el cheldecheduch el kuliuid er a chelsel aika el mereko el betok el rak. Ngmilekerang e mo sebechek rullii tia el tekoi? Alta engdi mle euid el rak el kngar a skuul, engdi a resensei er ngak a mle blechoel el melekoi a tekoi er a Merikel. E ak dirrek el milsuub a betok el babilenged el di tekoi er a Merikel e le ngdi mle kesai el babier el mengai a uchetemel er a Biblia a mla moiuid el mo tekoi er a Tagalog. Me aikaikid el tekoi a ngilsukak el mo medengei a tekoi er a Merikel el mlo uchul e ngmle sebechek loliuid a cheldecheduch.

A Brother Stewart a milsubed er a ongdibel el kmo a re missionari a kirir el mo merael el mo er sel 1950 Theocracy’s  Increase Assembly er a beluu er a New York, U.S.A. Me a obis er a Resioning er a Jehovah a osiik er a tang me a lechub e te terung el pioneer el mo olengeseu loureor er a Bethel. Me ngak a ta er tirke el odam el milengilt. Me ngoeak tiang, e ak liluut el mo mechei a rokui el tekoi el kurruul e mlo mesiou el ngar a Bethel.

Me ak mlo soiseb er a Bethel er sera June 19, 1950. A Bethel a mle klou e mechut el blai el betok a kerrekar el meliuekl er ngii, e tiang a ngar a chelsel a 2.5 acre a klungel el chutem. E te mla er ngii a rekmeed el 12 el odam el di mesobil el uluureor er ngii. A kumkokl a letutau el mo olengeseu el oureor er a uum. E sel ngar a bekord el etiu el klok, e ak mo iron a bail er a laundry. Me sel bo el chodochosong e ak lmuut el mo meruul a osisiu lureor. E sera lluut el me remei tirke el missionari el mla er a international assembly, e ak di millemolem el ngar a Bethel. Ak riruul aike el rokui el tekoi el mle sorir a rudam a kuruul. Ak ulemail a babier el kirel mo modurokl, e uluureor el meruul a subscriptions, e dirrek el uluureor el ua receptionist.

Sera rak er a 1952, e a retelolem el odam er a beluu er a Huriping el uldimukl er ngak a mlokedong el mora sel 20th class er a Skuul er a Gilead. Me ak kmal mle imis el semeriar! Me sel taem el kim ngar a beluu er a Merikel, e aki miles e chilarm a kmal betok el beches el tekoi. Ngkmal mle ngodech a blekerdelel a klengar el diak leua blekeradel er sel kekerei el beluu el kim kiliei er ngii er a uchei.

El ua tiang, ngmle kiram el mesuub el mo meduch el ousbech a beches el klekedall, el dirkak a ta el ki mues. E a eltel a beluu a kmal mle ngodech! A ta el tutau, e ak milekiis e omes er rikl, e ngdi becheleleu a rokui el tekoi. Tiang a mle ketengek el mes a snow. Ngkmal mle klebokel, engdi ak di mle mereched el mo melechesuar el kmo ngkmal imis el mekelekolt!

Aika el betok el beches el tekoi a dimlak lerellii el mo meringel er ngak, e le ngkmal mle dmeu a renguk el ngar a skuul er a Gilead. Tirke el ullisechakl a kmal mle ungil sensei, e te dirrek el ulsisecheklemam er a rolel aki mosuub e ki morriter a suobel. Me tia el osisechakl er a Gilead a kmal ngilsukak el mo melisiich er a deleuill er ngak lobengkel a Jehovah.

Me a uriul er a ktobed er a skuul, e ak mlodurech el mo mesiou el temporary special pioneer er a Bronx er a New York City. Me sera July 1953, e ngmlo er ngii a techellek el mo er sel New World Society Assembly, el mla er ngii er a Bronx. E a uriul er tia el assembly, e ak liluut el mo mesiou er a beluu er a Huriping.

A rudam er a Bethel a milskak a ngerechelek el mo ta er a odam el oldingel a ongdibel. E tiang a mlo techellek el lmuut el mo oukerebai er a Jesus, el ngii a mirrael a beluu me a mats el olengeseu er a rechedal a Jehovah. (1 Petrus 2:21) Me tia el urerek a merekui er a klou el basio er a beluu er a central Luzon, el ngii a kot el klou el iungs er a Huriping. E tiang a uldimukl er ngii a beluu er a Bulacan, Nueva Ecija, Tarlac, me a Zambales. Me sel kbo kuldingel aike el bebil er a beluu, e ngkirek el mo melibechakl er a  bedbeduul el rois er a Sierra Madre Mountains. Ngdimlak a bas me a lechub a train el mora ika el basio, me ngmle kirek el olengit er tirke el omekall a torak me lekengei er ngak el dengchokl er bebul aike el kerrekar el loltak. Me ngmle betok el taem el lekengei er ngak, engdi tiang a metacherbesul el rolel a omerael.

Oumesingd er a ongdibel a mle beches e di mekekerei. Me a rudam a kmal mle ungil a rengrir sel kulengeseu er tir el mo ungil kutmokl a miting me a dirrek el tekoi er a odingel a obliil.

A uriul e ak mlodurech el mo mesiou el ngar aike el rokui el basio er a beluu er a Bicol. E ngar tia el basio, e ngkmal betok a mekekerei el cheldellir a re special pioneer el olisechakl er aike el basio el dirkak a ta el Sioning el mo er ngii. Me ngar a ta el blai e a benjo er ngii a di kliokl el ngar er ngii a eru el kerrekar el kldoel er bebul. Me sera bok dechor er bebul aika el kerrekar e ngmleuitech el ruebet er a chelsel tia el kliokl, me ak dirrek el rirebet er a chelsel. Me ak uluusbech er a kmal kemanget el taem el mengetmokl er ngak me bo lsebechek el mo kltmokl el kirel a blengur er sel tutau!

Me ngar tia el taem er a omesiungek, e ak mlo melatk er a Nora el kim dilak el mo soiseb er a omesiou el pioneer. E seikid el taem e ngmla mo mesiou el special pioneer er a Dumaguete City, me ak mlo oldingel er ngii. E a uriul, e aki mle keluches el telkib el taem, e sera 1956, e aki mlo bechiil. Me ngar aike el kot el sandei er a uriul er a ki bo bechiil e aki mlo oldingel er a ongdibel er a iungs er a Rapu Rapu. Ngmle kiram el melemiakl a rois e merael er a kemanget lomerael el mong, engdi ngkmal mle dmeu a rengmam el dmak el terung, e dirrek lolengeseu er a rudam el ngar a kmal cheroid el basio.

Me a uriul er aki moruul er tia el omesiungam el bekord el eua el rak, e a rudam a ulemekedong er kemam el mora obis er a resioning er a Jehovah. Me aki ulemuchel el oureor er a Bethel er sera January 1960. Me ngar a chelsel aika el mereko el betok el rak el ki mngar a Bethel, e ak mla suub a lmuut el betok el tekoi loeak sel kuureor lobengterir a rudam el meruul a meklou, e oberaod el ngerachel er a chelsel a cheldebechelel a Jehovah. E a Nora a dirrek el kmal dmeu a rengul el mla oureor el meruul a betok el kakerous el ureor er a Bethel.

Ngmera el klou el klengeltengat el mlo er ngii a techellek el mesterir a relmuut el betok el chad el mo mesiou er a Jehovah er a beluu er a Huriping. Sera bo ksiseb er a Bethel er a dirk kekerei el chad e dirkak bo kbechiil, e te mla er ngii a bekord el 10,000 el publisher er tia el rokir el beluu. E chelechang e te ngar er ngii a kuk betok er a 200,000 el publisher er a beluu er a Huriping, e a betok el dart el rudam me a rudos a oureor el ngar er a Bethel el olengeseu el kirel a ureor er a berkel a klumech.

A cherengel a taem, e a ureor er a Bethel a mlo ousbech er a klou el basio. Seikid e a Chelechad er a Ruungerachel a ullengit er kemam el mo osiik er a chutem el sebechel mo dechor er ngii a lmuut el klou el obis er a Resioning er a Jehovah. Me ngak me ngike el odam el oungerachel er a printery, a mlo er a bek el obliil er bita er tia el obis er a Resioning er a Jehovah e oker er a rechad el sorir lolterau a chetemir. Ngdimlak a ta el chad el soal lolterau er a chetemel. Ngbai mla er ngii a ta el chad el dilu er kemam el kmo: “A rechad er a Sina a diak lolterau. Te bai omechar.”

Me nguaisei, engdi ngdi mle mereched el mengodech a tekoi. A ta er tirke el tonari er kemam a mlo kirel melukl el mora Merikel, me ngmlo soal lolterau er a chetemel el mei er kemam. E a kuk tang a mlo kongei el lolterau er a chetemel, e dirrek el mlo melisiich er a rebebil el ngar bita er ngii me lekengei loterau a chetemir. Ngdirrek el mlo sebecham el mecherar a chetemel ngike el chad el dilu el kmo “A rechad er a Sina a diak lolterau.” Me ngdi mle chelsel a telkib el taem e a chetemel a branch a mlo edei el chachisois a klungel. Me ngkmal ulterekokl a renguk el kmo a Jehovah a mle soal a lemeketmokl tia el tekoi.

Sera rak er a 1950, e ngak a mle kot el kekerei el chad loureor er a Bethel. E chelechang, e ngak me a bechik a kot el meklou el chad el ngar a chelsel. Ngkmal diak kuuchel er a renguk e le ngak el mlo oltirakl er a Jesus el meruul aike el rokui el soal a kuruul. Me alta e a rechad er a blik a uldikak, engdi a Jehovah a mla meskak a kmal klou el telungalek er ngak el tir a rechad el betik a rengrir er Ngii. Me ak kmal oumerang el kmo a Jehovah a meskid a rokui el dousbech, el diak lultuil er a kmo ngua ngera el rolel a omesiou a omoruul er ngii. A Nora me ngak a kmal oba klou el omereng el saul el mora Jehovah el kirel aika el rokui el ungil tekoi, e aki dirrek el kmal melisiich er a rebebil el mo chormii a Jehovah.​—Malakai 3:10.

A Jesus a ulemekedong er ngike el chad er omelai el tax el Mateus Levi el mo oltirakl er ngii. Me ngmilekerang a Mateus? Ng “milekiis e mechei a rokui el tekoi, e mlo oltirakl er a Jesus.” (Lukas 5:27, 28) Me ngak a dirrek el mlo er ngii a techellek el mechei a rokui el tekoi me bo lsebechek loltirakl er a Jesus, e ak dirrek el melisiich er a rebebil el mo meruul er a osisiu el tekoi me bo lsebechir el mo mengarm a betok el klengeltengat er a Jehovah.