1. Ngera uchul me a techolb a kmal klou a ultutelel el bakes? (Momes er a siasing er a uchelel a suobel.)

A BEK el rak, e te betok el telael el mesuub er a Biblia a mo metecholb. E a rebetok er tir a mekekerei el chad, me a rengeasek me a lechub e te kmal mekekerei. Te locha mlukeroul er a chelsel a klemerang. Me kau, ke ta er tir? A lsekum ke ta er tir, e ngar er ngii a ungil tekoi el bla mrellii. A rokui el Kristiano a kirir el mo metecholb. E a techolb a tekoi el usbechall me bo lsebechir el mo suobel, e dirrek el mo nguu a diak a ulebengelel klengar.​—Mateus 28:19, 20; 1 Petrus 3:21.

2. Ngera me ngdiak el kirem el medakt el meruul er a telbilel a rengum el mora Jehovah?

² Me sera cho bo metecholb, e a Jehovah a ulemuchel el omekngeltengat er kau el oeak a betok el rolel. Engdi ngmlo er ngii a beches el ngerechelem. El okiu a ngera el rolel? Sel sils er a cho bo metecholb, e a odam el uleltobed er a cheldecheduch el kirel a techolb, a uleker er kau el kmo: “Ngoeak a tengetengel a Jesus Kristus, e kau ke mla  obult er aike el kngtim e mla tibir er a rengum el mo meruul a soal a Jehovah?” Me ke ulenger el kmo, choi. Ke tilbir el mo betik a rengum er a Jehovah, e nguu a omesiungem el mo er ngii el mo kot el klou a ultutelel el tekoi er a klengar er kau. Me ngkirem louuchel er a rengum er tia el oberaod el telbiil? Ngkmal diak! Ngkmal diak a ta el bo mouuchel er a rengum e le kau el milecherei a Jehovah me ngomekrael er a klengar er kau. Tirke el diak lodengelii a Jehovah a chedal tia el beluulechad er a Satan. E a Diabelong a kmal diak lomekerreu er tir me a dirrek el kau. A mera er ngii, ngbai dmeu a rengul el mesekau el oridii a omeltkem el mo kiei el mo cherechar e le kau el mlo obengkel e otngeklii a Jehovah.

3. Ngmekerang a Jehovah e mla omekngeltengat er kau, e le kau el tilbir a rengum el mo mesiou er ngii?

³ Ka molatk er a rolel e a Jehovah a mla omekngeltengat er kau, e le kau el mla tilbir a rengum el mo mesiou er ngii e mlo metecholb. Ke tilengetengii a klengar er kau el mora Jehovah me lsebechel el mo ulterekokl a rengum el melekoi el kmo: “A RUBAK obengkek me ng diak bo kmedakt; ngera ng sebechir a re chad el remuul el mer ngak?” (Psalm 118:6) Ngkmal diak a lmuut el ngaruchei el odanges el ua sel mngar bita er a Dios, e modengei el kmo ngkmal dmeu a rengul er kau.

4, 5. (a) Ngera me ngsebeched el melekoi el kmo a telbilel a rengud a ngerechelel a derta er kid? (b) Ngera lomelsemai a bo lechelebangel a rokui el Kristiano?

⁴ Ngdiak el sebechem lomes er a deleuill er kau me a Jehovah el uaike el ‘family plan’ er a cell phone el rechad er a blim a harau e kau a ousbech er ngii. Mo lmuut er a taem el dirk mkiei lobengterir a rechad er a blim, me a deleuill er kau me a Jehovah a ileakl el ngerechelem. Ngera me ngklou a ultutelel el kirem el melatk er tia el tekoi? Ngdiak a ta er kid el kmal ungil medengelii a rolel, e ngmo measem a klaumerang er kid er a ngar medad el klebesei. El ua tiang, ke locha miltecholb er a uchei er a cho bo mngeasek. Engdi chelechang el bla bo mngeasek, e ngmla mo er ngii a beches el uldesuem me a beches el mondai er kau. A ta el ngeasek el redil a dilu el kmo: “A ngalek a diak bo lechetil el ta er a Sioning er a Jehovah e le ngii el dimlak longa cake er a tanziobi el mla er ngii er a skulel. Engdi sesei el rak er a uriul, e ngkmal kirel el mo ulterekokl a rengul el kmo, ngkot lungil lomelilt sel lengiltii el mo olengesenges a llechul a Jehovah er sel taem el lesal mo mesisiich a urungulel el soal meruul a tekoi er a durs.”

⁵ Ngdiak di lemekekerei el chad a mo chelebangel a omelsemai. Mo lmuut er tirke el meklou el chad el mo metecholb, me ngdirrek el mo measem a klaumerang er tir er a tekoi el dimlak lomdasu el kmo ngmo uaisei. A omelsemai el mo er tir a sebechel lokiu a chebechiielir, me a klisichel a bedengir, me a lechub e ngurerir. Me ngdiak lultuil er a rekil a chad, a derta er kid a kired el mo mui loumerang er a Jehovah er a chelsel a ngii di el blekeradel.​—Jakobus 1:12-14.

6. (a) Ngera belkul a telbilem el mora a Jehovah el diak a telkelel? (b) Ngera el klubeled a denguu er a Filipi 4:11-13?

⁶ Lak mobes el kmo a telbilem el mora Jehovah a kirel diak a telkelel, e le tiaikid a rolel e ngsebechem el melemolem el blak a rengum. Tiang a belkul a kmo, ke tilbir er a rengum el mo mesiou er ngika el Kot el Ngarbab el Dios er a chelsel a ngii di el blekeradel er a klengar er kau, el mo lmuut er a taem el resechelim me a lechub a rechad er a blim a mo diak losiou er a Jehovah. (Psalm 27:10) Me ngar a chelsel a ngii di el blekeradel, e lak mobes lolengit er a Jehovah me lengesukau me molemolem el oltaut er a telbilem el mo er ngii.​—Monguiu er a Filipi 4:11-13.

7. Ngera belkul a doureor el kirel a osebeled el ‘omritel er a dakt’?

⁷ A Jehovah a soal a cho bo msechelil. Engdi tia el tekoi a ousbech er a blakerreng er kau el  melisiich er ngii e dirrek el oureor el kirel a osebelem. A Filipi 2:12 a mesaod el kmo: “Momritel er a dakt e moutekangel el mo mengerrungel a osebeliu.” Me ngbelkul a kmo ngkmal kired el mo kerekikl el melatk er a rolel e ngsebeched el melemolem el kmeed er a Jehovah, e blak a rengud el mo er ngii er a chelsel a ngii di el blekeradel. Ngkmal diak lsebeched el di omdasu el kmo ngdi mo ungilbesul. Lak mobes, te ngar er ngii a remilsiou er a Dios el betok el rak e mlo diak el blak a rengrir. Me ngera el tekoi a sebechel ngosukau el mo ungil loureor el kirel a osebelem?

8. Nguldimukl er a ngera el tekoi a omesubem er a Biblia? E ngera me tiang a kmal klou a ultutelel?

⁸ A lsoad el mo sechelil a Jehovah, e ngkired el mo orrenges er ngii e dirrek el kired el mengedecheduch er ngii. E sel kot el ngaruchei el rolel e kede orrenges er a Jehovah, a oeak sel dosuub er a Biblia. Tiang a uldimukl er sel donguiu e dolebedebek a Tekingel a Dios me aike el babilenged el mengai a uchetemel er a Biblia. Engdi a omesubed er a Biblia a diak el belkul a kmo ngdi sel dolatk aike el mera el tekoi el desuub el diak el ua blekeradel el moruul er ngii sel molai a test er a skuul. Ngbai ua kmal ungil lomerael el morael er ngii el mesarech e mesuub a betok el beches el tekoi el kirel a Jehovah. Ngrullau el lmuut el mo kmeed er a Dios, me ngii a mengal mo kmeed er kau.​—Jakobus 4:8.

9. Ngera el dongu a mla ngosukau er a temel a omesubem er a Biblia?

⁹ A cheldebechelel a Jehovah a mla kutmokl a betok el dongu el sebechel ngosukau er a temel a omesubem er a Biblia. El ua tiang, ngar er ngii  aike el babier el okedongall el “Bible Study Activities” el ngar sel “Teenagers” section er a jw.org el sebechel ngosukau el mo oltaut aike el tekoi el cho msuub er a cheldecheduch el ngar a Biblia. Ngdirrek el ngar a jw.org, e ngsebechem el metik a study guides er a babier el “Ngerang Mera el Lolisechakl a Biblia?” Aikang a sebechel ngosukau el smisichii a klaumerang er kau e dirrek el mo sebechem el smodii a klaumerang er kau el mora rechad. Ngsebechem el metik a lmuut el bebil er sel temel a omesubem el ngar a suobel el “Young People Ask . . . How Can I Make Bible Reading Enjoyable?” el ngar a April 2009 el Awake! A omesubem me a omelebedebekem a kmal meklou a ultutelel el kirel blakerreng er kau el oureor el mo uchul a osebelem.​—Monguiu er a Psalm 119:105.

10. Ngera me ngkirel a mla metecholb el Kristiano el meluluuch?

¹⁰ Me sel dosuub er a Biblia, e kede orrenges er a Jehovah, e dirrek sel doluluuch e kede mengedecheduch er ngii. Ngdiak el kired lomdasu el kmo a nglunguuch a di beot el ua di lsoad el meruul er ngii el tekoi me a lechub e ngua tekoi el lomeskid a ungil chung er kid. A nglunguuch a mera el rolel a cheldecheduch er a delongeled kid me ngika el Ulemeob er kid. Ka di molatk er tiang: A Jehovah a kmal soal lorrenges er kau el melekoi a tekingem er ngii! (Monguiu er a Filipi 4:6.) Me sel taem el bo bekikl el kirel a ngii di el tekoi, e a Biblia a kmo, “Bsa RUBAK a berredem.” (Psalm 55:22) Me a rebetok el miliol el rudam me a rudos a sebechir el subedau el kmo tia el ulekrael a mla ngosuterir. Me ngdirrek el sebechel ngosukau!

11. Ngera me ngkirem el blechoel mereng a sulel a Jehovah?

¹¹ Me nguaisei, engdi ngdiak el kired el di meluluuch el mora Jehovah er sel taem el soad a lengesukid. A Biblia a omeklatk er kid el kmo: “Lak mobes a sulel a Dios.” (Kolose 3:15) A lebebil er a taem e ngkmal di mo suebek a rengud el kirel a mondai er kid me ngmo diak lsebeched el mes aike el rokui el ungil tekoi el ngar er ngii er kid. Me molasem er tiang: Molatk a kesengil e ngedei el ungil tekoi er a bek el sils e moureng a sulel a Jehovah el kirel. A ta el ngeasek el redil el Abigail, el miltecholb er a dirk el 12 a rekil a dilu el kmo: “Ak kuumerang el kmo a Jehovah a rredemelel a omereng el saul er kid el kuk ngaruchei er a ngii di el chad. Me ngkmal kired el mereng a sulel er a bek el taem el kirel aike el ungil tekoi el bla lebeskid.” A lebebil er a taem e a Abigail a mo melatk er a ker el mla ta el rengesii el kmo: “A lsekum ak mekiis er a klukuk el di ngar er ngii er ngak aike el tekoi el kuluureng a sulel a Jehovah el kirel er chelecha el sils, e ngera mo er ngii er ngak?” * (Momes er a footnote.)

12, 13. Ngoeak a ngera el rolel e ke mla mo medengei el kmo a Jehovah a kot lungil? E ngera me ngklou a ultutelel el bo molatk er a rolel e a Jehovah a mla ngosukau?

¹² A Jehovah a ngilsuir a King el David el mo outekangel a betok el meringel el blekeradel. Me ngokiu a tekoi el dilubech er a klengar er a David e ngmelekoi el kmo: “Di le kau el osiik el kmo ng ua ngeral ungil a RUBAK! Ngeltengat ngikel chad el metik er osebechakl el ngar ingii  el RUBAK!” (Psalm 34:8.) Tia el bades a ochotii el kmo ngkired el mo chormii a ungil omerellel a Jehovah el bedulkid. Me sel monguiu er a Biblia me aike el babilenged, e bo er aike el miting er kid, e ke suubii a rolel e a Dios a mla ngosuterir a rebebil el mo melemolem el blak a rengrir. Engdi a cherengel a taem el lorael el mo mesisiich a deleuill er kau lobengkel a Jehovah, e ngmo sebechem el mesa rolel e a Jehovah a olengeseu er kau. Me ngar er ngii a tekoi el mla duubech el kirem, e ke mlo mtebengii el kmo a Jehovah a kot lungil?

¹³ A rokui el Kristiano a mla chormii a ungilreng er a Jehovah el okiu a chimong el ileakl el rolel. Ngii a omekedong er a derta er kid el mo kmeed er ngii me a Ngelekel. A Jesus a dilu el kmo: “Ng diak a chad el sebechel el mer ngak a lak le Chedam el ngikel ulderchak a mekrolii el mer ngak.” (Johanes 6:44) Me kau, ke melechesuar el kmo a Jehovah a mla olekeed er kau er ngii? Me a lechub e ke melatk el kmo, ‘A Jehovah a ullekeed er a rechad er a blik er ngii e ngak a di okiuellir’? Lak mobes el kmo sera cho mtibir er a rengum el mora Jehovah e bo metecholb, e ngmlo er ngii a ileakl el deleuill er kau lobengkel. E a Biblia a subedid el kmo: “E ngdi lsekum a chad a betik a rengul er a Dios, e ngii el chad a lodengelii a Dios.” (1 Korinth 8:3) Me bo blechoel el mengreos er sel deruchellem el bla lebeskau a Jehovah er a chelsel a cheldebechelel.

14, 15. Ngmekerang a odingel a obliil e ngosukau el lmuut el mo mesisiich a klaumerang er kau?

¹⁴ Ke dirrek el mla chormii a ungilreng er a Jehovah er a taem el lebilskau a blekengem el mo smodii a klaumerang er kau el mora rechad, el ngar a odingel a obliil me a lechub e ngskuul. Ngdiak lebeot el tekoi el momerk er a klumech el mora rengalek er a skulem. Ngsebechem el mo bekikl el kmo ngmo uangera omerellir el bedulkau. Ngdirrek el sebechel mengal mo meringel a lsekum ke mesaod er a klaumerang er kau el mora rebetok el chad el kldibel. Me ngera sebechel ngosukau?

¹⁵ Molatk er a uchul me ke oumerang a tekoi el moumerang. Mousbech aike el study guides el ngar a jw.org, a lsekum e ngar er ngii er a omelekingem. Aikang a sebechel ngosukau el mo melebedebek a tekoi el moumerang, me sel uchul me ke oumerang, me a dirrek el rolel e ngsebechem el smodii a klaumerang er kau el mora rechad. Me sel bo lulterekokl a rengum e dirrek el bo mungil kltmokl, e ngmo soam el mo sioning el kirel a Jehovah.​—Jeremia 20:8, 9.

16. Ngera sebechel ngosukau el mo bekeu el mesaod er a klaumerang er kau?

¹⁶ Me alta e ke mla mo ungil kltmokl, engdi ke locha dirk mo bekikl el mesaod er a klaumerang er kau. A ta el 18 a rekil el odos, el miltecholb er a dirk el 13 a rekil a kmo: “Ak ungil medengei a tekoi el kuumerang, engdi a lebebil er a taem e ngmo meringel er ngak el smodii a uldesuek.” Me ngmelasem el mo chelellakl a rengul sel losaod el kirel a klemerang. Ngdmu el kmo: “A rengalek er a skulek a kmal beot er tir el mesaod a tekoi el loruul. Me ngkirek el mo uai tir. Me ngkirek lomuchel el mesaod er a tekoi el bla krellii el ua tiang, ‘Ak ullisechakl er a chad lousbech er a Biblia er a ta er a sils, . . . ’ e sola e lomelemii a cheldechedechak. Me alta e a tekoi e kulsaod er ngii a diak losaod el kirel a Biblia, engdi te blechoel a rechad el mo semeriar a tekoi el kurruul sel kulisechakl el kirel a Biblia. Me a lebebil e te  oker a ker. Me a cherengel a taem el kuruul uaisei, e ngmengal mo beot, e a uriul e ngkmal mo dmeu a renguk!”

17. Ngera lmuut el bebil er a tekoi el sebechel ngosukid sel dongedecheduch er a rechad?

¹⁷ A rechad sel bo lolechesuar el kmo ke omekerreu e olecholt a omengull el bedultir, e ngmo beot er tir el olecholt a omengull el bedulkau me a klaumerang er kau. A Olivia el 17 a rekil e miltecholb er a dirk el kekerei a kmo: “Ak di mle blechoel bekikl el kmo a lsekum ak mo mesaod er a Biblia e a rechad a mo omes er ngak el ua kebelung el chad.” Engdi ngulemuchel el mo omes a tekoi el ngar a kuk ngodech el rolel. Ngmlo diak di lomdasu er a dektel, e bai mlo melatk el kmo: “A rebetok el mekekerei el chad a diak ngera el lodengei el kirir a Resioning er a Jehovah. E di kid el tang a Sioning el lodengelterir. Me a blekerdeled a sebechel mo oterekeklii a uldesuir el bedulkid. Me a lsekum kede merur me a lechub e ngmeringel er kid el mesaod er a klaumerang er kid, me a lechub e kede kora mo medakt el mesaod er kid e ngmo uangera uldesuir? Te locha mo omdasu el kmo ngdiak doumerang er tia el deruchelled el Sioning. Te locha mo mekngit a tekingir el bedulkid e le te mesang el kmo ngdiak lulterekokl a rengud er a tekoi el doruul er ngii. Me nguaisei, engdi a lsekum ngmo chelellakl a rengud e oba ulterekokl el reng el kirel a klaumerang er kid, e rullii a cheldecheduch el mo beot, e te ulterekokl el mo olecholt a omengull el bedulkid.”

18. Ngkirem el mekerang e mo sebechem loureor el kirel a osebelem?

¹⁸ Me kede mla mesang el kmo, ngoberaod el tekoi a ngerecheled el mo oureor el kirel a osebeled. Ngmo sebechem el meruul er tiang sel monguiu e molebedebek a Tekingel a Dios, e moluluuch el mora Jehovah, e mo dmolech el melatk aike el rokui el rolel e ngolengeseu er kau. Sel moruul aika el tekoi, e ngmo ngosukau me ngmengal mo ulterekokl a rengum el kmo a Jehovah a Sechelim. E tiang a rullau me ngmengal mo soam louchais er a rechad el kirel a klaumerang er kau.​—Monguiu er a Psalm 73:28.

19. Ngera me a dolemolem el oureor el kirel a osebeled a tekoi el diak a mo mekesiur?

¹⁹ A Jesus a dilu el kmo: “A le ngar ngii a chad el soal el obengkek, e ng kirel el obes er a klechad er ngii, e nguu a kerus er ngii e mo oltirakl er ngak.” (Mateus 16:24) Nguaisei, a lsoad el oltirakl er a Jesus, e a derta er kid a kmal kirel tibir a rengul el mora Jehovah e mo metecholb. Engdi tiang a di uchelel a kot lungil klengar er chelechang, e dirrek el rael el mora diak a ulebengelel klengar er a chelsel a beches el beluulechad er a Dios. Mada bo er a tkurrebab el sebechem el melemolem loureor el kirel a osebelem!