“Ngii a mlechetechat el kngtid a uchul, ng mlechelebed el mekngit el de riruul a uchul. . . . A chelebed el le ngilai omekungil er kid.”​—ISAIA 53:5.

1. Ngera kired el melatk er ngii er a blsechel a Chedaol el Blsoil, e ngera el ulaoch a sebechel el ngosukid el kirel tiang?

 A BLSECHEL a Chedaol el Blsoil e kede mo mengedaol er a kodellel a Kristus e melatk aike el tekoi el mleketmokl el oeak a kodellel me a okisel. A Chedaol el Blsoil a omeklatk er kid er a osebecheklel a omengederederel a Jehovah me a omengedolel a ngklel me a otutel a moktek er ngii, el uldimukl er a osebelel a klechad. Me nguaisei engdi ngdiak a ngii di el ulaoch er a Biblia el lmuut el mo ungil el smodii tia el tengetengel a Kristus me aike el tekoi el leriruul el ua sel meldung er a Isaia 53:3-12. A Isaia a ulemlaoch el kirel a Mesiou el mo mukringel e dirrek el meskid a dmolech el omesodel a kodellel a Kristus me aike el klengeltengat el mo er a rengellitel el odam er ngii me a ‘ngodech el chermel el sib’ el oeak a kodellel.​—Johanes 10:16.

2. A ulochel a Isaia ngolecholt er a ngerang, e ngerang rullii el kired?

² A euid el dart el rak er a uchei er a lemechell a Jesus er tia el chutem, e a Isaia a mlukreng er a Jehovah el mo omlaoch el kirel a ngellitel el Mesiungel el ngii a mo blak a rengul el mo lmuut er a bo locherur a kodall. Tia el tekoi a mera el olechotel a klaumerang er a Jehovah el kirel a blakerreng er a Ngelekel. Me sel bo dungil el merriter er tia el ulaoch, e ngmera el melisiich er a rengud me a klaumerang er kid.

 Te “Ultubii” e “Ulekor er Ngii el Di ua Lak le Chad”

3. Ngera uchul me a Rechijudea a mle kirir el louetkeu er a Jesus, engdi ngmle ua ngerang a omerellir el bedulngii?

³ Monguiu er a Isaia 53:3. Ka di molatk er sel omerellel a di ta el Ngelekel a Dios el mle kirel el choitii a delengcheklel er a eanged er a bita er a Demal, e mlei er tia el chutem el mo tongetengii a klengar er ngii el kirel a osebelel a klechad er a klengit me a kodall! (Filipi 2:5-8) Sel omeruul el melenget a charm el ngar er a eungel a Llach er a Moses a di mle chungel a mera el mei el tengetengel a Jesus el ngii a mlo uchul a mera el klausubes er a klengit. (Hebru 10:1-4) Me a Rechijudea a kmal mle kirir el louetkeu e mengull er ngika el telbiil el Messias. (Johanes 6:14) Me nguaisei engdi a Kristus a ‘mlotuub’ er a Rechijudea, e te dirrek el “ulekor er ngii el di ua lak le chad,” el ua lulemlaoch a Isaia. A apostol el Johanes a milluches el kmo: “Ngii a mlei ra belulechad er ngii, e ar chedal a dimlak le nguu.” (Johanes 1:11) A apostol el Petrus a uluuchais er a Rechijudea el kmo: “[A] Dios rar mla mad el demad a kilebkellii a mesiungel el Jesus, e kemiu a ulterekeklii e okor a tikingel a Pilatus er medal ra bo lsoal melubet er ngii. E kemiu a dimlak mnguu ngiil Chedaol e Melemalt.”​—Rellir 3:13, 14.

4. Ngmilekerang e sebechel a Jesus el medengei a secher?

⁴ A Isaia a dirrek el ulemlaoch el kmo a Jesus a mle sebechel el medengei a secher. Ngar er a omesiungel, e a Jesus alta e ngmlo mesaul a bedengel, engdi ngdiak a olechotel el kmo ngmlo smecher. (Johanes 4:6) Me nguaisei engdi ngii a mle sebechel el melechesuar a ringelir tirke el smecher el lulisechakl er tir. Ngkmal mlo chubteterir e ulemekungil er tir. (Markus 1:32-34) Misei, e ngultutii a ulaoch el kmo: “Ngdi ngii a miltekengelii a rengul el chuarm er a mle kired el chuarm er ngii; ma ringel el mle kired el oltekau er ngii.”​—Isaia 53:4a; Matteus 8:16, 17.

Ngua ‘Blo Lecharm el Kerrekeriil el Mlar a Dios el Mor Ngii’ a Uchul

5. Ngmle ua ngerang a osengir a rebetok el Chijudea el kirel a kodellel a Jesus, e ngera uchul me tiang a dirrek el rirellii el mo chuarm a uldesuel?

⁵ Monguiu er a Isaia 53:4b. Ngbetok el chad er a taem er a Jesus a dimlak lodengelii a uchul e ngmlukringel e mlad. Te uluumerang el kmo a Dios a ulemlals er ngii. (Matteus 27:38-44) A Rechijudea a ultelecheklii el kmo nguleltuub er a Dios. (Markus 14:61-64; Johanes 10:33) Me nguaisei, engdi a Jesus a dimlak el mekngit me a ka luleltuub er a Dios. Engdi sel klou el bltkil a rengul el mo er a Demal a rullii ngii el Mesiungel a Jehovah el mo chuarm a uldesuel sel lolatk el kmo ngmo mad el ua luleltuub er a Dios. Me nguaisei, engdi ngii a kilengei el rullii tia el soal a Dios el tekoi.​—Matteus 26:39.

6, 7. Ngoeak a ngera el rolel e a Jehovah a kilengei er a blak a rengul el Mesiungel el mo “chuarm,” e ngera me ngmle ‘uldesuel a rengul’ a Dios?

⁶ Ngta er a tekoi el kirel a ulochel a Isaia el melekoi el kmo a rebebil a mo omes er a Kristus el ua ‘blo lecharm el kerrekeriil el mlar a Dios el mor ngii’ a uchul, engdi tia el ulaoch a dirrek el lomlaoch el kirel a kuk tang el kmo: “Tia mle uldesuel a renguk [el Jehovah] el kmo ng kirel mo chuarm.” (Isaia 53:10) A Jehovah a dirrek el dilu el kmo: “Ngkakid a mesiungek, . . . ng ngikel bla kngiltii el obotech a renguk er ngii.” Ngera me a Jehovah a kilengei er a Jesus el mo chuarm? (Isaia 42:1) Ngoeak a ngera el rolel e tia mlo uchul a deuil a rengul a Jehovah?

 ⁷ A bo dodengelii a belkul tia el ulaoch, e ngkired el melatk er sel taem el Satan a milekedbechii a rraurreng er a reblak a rengrir el mesiungel a Dios el ngar er a eanged me a chutem el kirel a ultok er a omengederederel a Jehovah. (Job 1:9-11; 2:3-5) A Jesus a ulechotii a melemalt el nger er a ultekengel a Satan er a llemelemii a blakerreng er ngii el mo lmuut er a kodall. Me alta e a Jehovah a kilengei er a recheraro me lokodir a Kristus engdi ngulterekokl a rengud el kmo ngmle meringel er ngii el lomes er a ngellitel el Mesiungel el mo okodall. Me nguaisei, ngkmal mlo uchul a deuil a rengul a Jehovah er a lomes er a cherrungel el blakerreng er a Ngelekel. (Osisechakl 27:11) Me a lmuut el tang, a Jehovah a dmeu a rengul sel lodengei el kmo a kodellel a Ngelekel a mo uchul a klungiolir a rechad el mla obult er a kngterir.​—Lukas 15:7.

“Mlechetechat el Kngtid a Uchul”

8, 9. (a) Ngmekerang a Jesus e “mlechetechat el kngtid a uchul”? (b) A Petrus ngmekerang er a loterekeklii tia el tekoi?

⁸ Monguiu er a Isaia 53:6. A rediak el mecherrungel el chad a ua meleuaoch el mla remiid el sib el losiik a osobel er a secher me a kodall el mla er a Adam el mei. (1 Petrus 2:25) Kid el diak demecherrungel a uchul me ngdiak a ta er kid el sebechel el mecherar sel tekoi el lurridii a Adam. (Psalm 49:7) Engdi, ngoeak a klou el bltkil a rengul e “a RUBAK a ngiluu a blals el loia er ngii, el ngii el blals el kmal kired el rokui.” Me ngika el Ngelekel e ngellitel el Mesiungel el Jesus er a lekengei el “mlechetechat el kngtid a uchul” e dirrek el “mlechelebed el mekngit el de riruul a uchul” a mlad er a teluo el kerrekar el kirel a kngtid.

⁹ A apostol el Petrus a milluches el kmo: “Kemiu a kmal mlokedong el mo uaisei, ma Kristus el mlukringel el kiriu a milechere kerebai el momakes loltirakl a ultil chochil. E ngila bedengel lotour a kngtid e mo kltekotel ra kerrekar, el kirel me de mengubet ra klengit e bo de ngar el kirel a llemalt.” E millekoi a tekoi el ngar er a ulochel a Isaia el kmo: “Ma chetechetil a ulemekungil er kemiu.” (1 Petrus 2:21, 24; Isaia 53:5) Ngoeak tiang, e a rengar er a klengit el chad a mlo sebechir el mo er ngii a ungil el deleuill er tir me a Dios el ua lolekoi a Petrus el kmo: “Ele Kristus a mle soal lolekeed er kid ra Dios, me ngmelemalt e di mle tal le mad, el klengit a uchul, el kirir ar diak le melemalt.”​—1 Petrus 3:18.

“Ng ua Ngelekel a Sib el Kmedul mo Mokoad”

10. (a) Ngmekerang a Johanes el Techolb a losaod er a Jesus? (b) Ngera uchul me a tekingel a Johanes a kmal rredemelel a ulaoch?

¹⁰ Monguiu er a Isaia 53:7, 8. Me a Johanes el Techolb er a lomes er a Jesus el mermang, e ngdilu el kmo: “Mesa Ngelekel a sib ra Dios, el melai a kngtil a belulechad el mengeroid!” (Johanes 1:29) Me a lolekoi er a Jesus el ua Ngelekel a Sib, e ngmillatk a tekingel a Isaia el kmo: “Ng ua ngelekel a sib el kmedul mo mokoad.” (Isaia 53:7) A Isaia a ulemlaoch el kmo: “Ng di mle ungil er a rengul el odersii a klengar er ngii.” (Isaia 53:12) Me nguaisei, ngar er sel kesus er a longetmokl er a Chedaol el Blsoil er a kodellel, e a Jesus a milsterir tirke el 11 el blak a rengrir el apostol er ngii a kob er a bilong e dilu el kmo: “Tia rsechek, el rasech era beches el telbiil, el mo moitel el kirir ar betok el kirel a chitel a klengit.”​—Matteus 26:28.

11, 12. (a) Sel blekerdelel a Isak el kilengei el mo tenget ngolecholt er a ngerang el kirel a tengetengel a Kristus? (b) Sel dongedaol er a Chedaol el Blsoil, e ngera kired el melatk er ngii el kirel ngike el Klou el Abraham, el Jehovah?

¹¹ El ua Isak er a irechar, a Jesus a kilengei el mo mad el tenget. (Genesis 22:1, 2, 9-13; Hebru 10:5-10) Me alta e a Isak a kilengei el mo modars el tenget engdi ng Abraham a ulemuchel el kutmeklii tia el tenget. (Hebru 11:17) Me ngdi osisiu, a Jesus a kilengei el mo mad, engdi a Jehovah a Ngike el Uchul e ngmileketmokl tia el olubet el tenget. A dmolech el bltkil a rengul a Dios el mo er a klechad a mocholt er tia el tengetengel a Ngelekel.

¹² A Jesus a dilu el kmo: “A kllungel a bltkil a rengul a Dios era belulechad a uchul me ngmilsa dital Ngelekel, me tirkel rokui loumera er ngii a diak bo lriid, e bai mo oba diak a ullebengelel klengar.” (Johanes 3:16) A apostol el Paulus a milluches el kmo: “Ngdi Dios a ulechotii a bltikerreng er ngii el bedul kid luleak a kodellel a  Kristus el kired er sera dirke doruul a klengit.” (Rom 5:8) Me sel dongedaol er a kodellel a Kristus, e ngungil a lak dobes el kmo ngmlo sebechel el meketmokl tia el tekoi el oeak ngike el Klou el Abraham, el Jehovah. Kede mo mengedaol er a Chedaol el Blsoil el mo mengebkall er ngii.

Ngii el Mesiou a “Rulleterir [a Rechad] Me Ng Mo Blak a Rengrir”

13, 14. Ngmilekerang ngii el Mesiungel a Jehovah e ‘rulleterir [a rechad] me ng mo blak a rengrir el chedal’ a Dios?

¹³ Monguiu er a Isaia 53:​11, 12. A Jehovah a millekoi el kirel ngii el ngellitel el Mesiungel el kmo: “Ingii a melemalt el mesiungek; . . . [ng] rulleterir me ng mo blak a rengrir el chedak.” El oeak a ngera el rolel? A ulebongel er a bades er a 12 a meskid a omesodel. Ngii el Mesiou a “ulumtechei er a re betok el mekngit el chad.” A rokui el ngelekel a Adam a di mechell e ngar er a klengit, el “mekngit” el chad, me te mo nguu a “uduudel ra klengit” el ngii a kodall. (Rom 5:12; 6:23) A smechel a deleuill er a rediak lemecherrungel el chad me a Jehovah a klou a ultutelel. A ulaoch el ngar er a 53 el bliongel er a Isaia a kmal ungil el smodii a Jesus el ngii a ‘ulemtechei’ er a klechad el ngar er a klengit, el kmo: “A blals el le chilarm er ngii a mla rullid el mo mimokl, a chelebed el le ngilai omekungil er kid.”​—Isaia 53:5.

¹⁴ Me a Kristus el ultour a kngterir a rechad e mlad el kirir a uchul e ngmlo sebechel el ‘rulleterir me ng mo blak a rengrir el chedal’ a Dios. A Paulus a milluches el kmo: “A Dios chomekingar a rokuil chelerrungel ra chelsel a Ngalek loltirakl a uldesuel a rengul, e rirellii a budech loeak a rasech ra kerus, el uleak a Ngalek el rullii a deleongel er ngii ma rokuil tekoi, el ikel ngara belulechad ma ngara eanged el rokui.”​—Kolose 1:19, 20.

15. (a) Ngerang aike el tekoi el “ngara eanged” el losaod a Paulus? (b) Te rua techang a rredemelel a melai aike el klekedall er a Chedaol el Blsoil, e ngera uchul?

¹⁵ Aike el tekoi el “ngara eanged” el melsumech a deleuill er tir me a Jehovah el oeak a mloitel el rsechel a Kristus, a rengellitel el Kristiano el tir a mlokedong el mo mengedereder el obengkel a Kristus el ngar er a eanged. A Rekristiano el tir a “mlokedong er chokedong ra eanged” a okedongall el “melemalt.” (Hebru 3:1; Rom 5:1, 18) A Jehovah a ngoititerir el mo ngelekel er a klereng. A chedaol el reng a ocholt el kirir el kmo te “mo obengkel [a Kristus ] loudiukes” e mokedong el mo king e prist er a Rengedel el ngar er a eanged. (Rom 8:15-17; Chocholt 5:9, 10) Te mo chedal a Israel er a klereng, el “Israel ra Dios” e mo soiseb er a “beches el telbiil.” (Jeremia 31:31-34; Galatia 6:16) Me tir el chedal sel beches el telbiil a uchul me te kmal rredemelel a mo melai aike el klekedall er a Chedaol el Blsoil, el uldimukl er a kob er a bekerekard el bilong, el lulsaod er ngii a Jesus el kmo: “Tial kob a beches el telbiil el krellii el oeak a rsechek, el mo moitel el kiriu.”​—Lukas 22:20.

16. Ngerang aike el tekoi el “ngara belulechad,” e oeak a ngera el rolel e te mo blak a rengrir el chedal a Jehovah?

¹⁶ Aike el tekoi el “ngara belulechad” a tirke el kuk ngodech el chermel a Kristus el sib, el omeltkir a mo kiei er tia el chutem el mo cherechar. Ngii el ngellitel el Mesiungel a Jehovah a dirrek el rulleterir tirkang el mo blak a rengrir el chedal a Dios. Te olecholt a klaumerang er tir el ngar er a olubet el tengetengel a Kristus a uchul me te “sililek  a bilir ra rsechel a Ngelekel a sib el mo becheleleu” me a Jehovah a omes er tir el melemalt, el diak el ua el ngelekel er a klereng, e te bai sechelil me ngmesterir a ungil el omelatk el mo suobel er “sel kloul ringel.” (Chocholt 7:9, 10, 14; Jakobus 2:23) Me tirka el kuk bebil er a sib el diak el chedal tia el beches el telbiil e diak a omeltkir el mo kiei er a eanged, a diak bo lolai aike el klekedall er a Chedaol el Blsoil, engdi te teloi er tia el Blsoil el lolecholt er a klou el omengull.

A Rokui el Omereng el Saul a Mo er a Jehovah me a Ngike el Ngellitel el Mesiungel!

17. Ngmekerang a dorriter aike el ulaoch er a Isaia el mesaod er ngike el Mesiou a ngosukid el kutmokl a uldesued el kirel a Chedaol el Blsoil?

¹⁷ A dorriter aike el ulochel a Isaia el mesaod el kirel ngike el Mesiou a kot el ungil el rolel a dongetmokl a uldesued el kirel a Chedaol el Blsoil er a kodellel a Kristus. E tiang a ngosukid el mo “melanges ra Jesus el uchelel e orekil a kloumera er kid.” (Hebru 12:2) Kede mla suubii el kmo a Ngelekel a Dios a diak lomtok er ngii. Ngdiak el ua Satan, e ngbai dmeu a rengul el melai a osisechakl er a Jehovah e le ngmedengei el kmo ngii a Ngike el Chimong el Kedidai el Rubak. Kede mla mesang el oeak a omesiungel a Jesus el ngar er tia el beluulechad el kmo ngullecholt a klechubechub el mo er tirke el lullisechakl er tir e ulemekungil a reng me a bedengir a rebetok. Me ngoeak tiang, e ngullecholt aike el bo loruul sel bo el King er a beches el blekeradel e bo le ‘teketekii a llemalt er a beluulchad.’ (Isaia 42:4) Sel blakerreng el lullecholt er ngii el ua “llomes el mor a ikel beluu” er a lomerk el kirel a Renged, a omeklatk er a rultirakl er ngii el mo blak a rengrir el lomerk er a ungil el chais er a beluulechad el rokir.​—Isaia 42:6.

18. Ngmekerang a ulochel a Isaia e rullid el mo oba omereng el saul el mo er a Jehovah me a blak a rengul el Mesiungel?

¹⁸ A ulochel a Isaia a dirrek el kilungii a klemedengei er kid el kirel tia el klou el tenget el Jehovah a uldureklii a Ngelekel el mei er a beluulechad el mo chuarm e mad el kired. A Jehovah a dileu a rengul el lomes er a Ngelekel el blak a rengul el mo lmuut er a kodellel er a bai lomes er ngii el chuarm. Ngsebeched el mo dmeu a rengud el ua Jehovah e le kede medengei el kmo a Jesus a ulechotii a Satan el kmo ngcheblad e dirrek el milengebkall er a ngklel a Jehovah e mesebechakl er a llemeltel a omengederederel. Nguldimukl er tiang, e a Kristus a ultour a kngtid e mlo mad el kired. Me ngoeak tia el rolel, e ngmlo er ngii a techellel a kekerei el delebechel el ngellitel el odam er ngii me a dirrek el kuk bebil er a chermel el sib el mo blak a rengrir el chedal a Jehovah. Me a bo dekldibel er a blsechel a Chedaol el Blsoil, e ngungil a doba omereng el saul el mo er a Jehovah me a ngike el blak a rengul el Mesiungel.

Rolel a Domelekl a Suobel

• Ngoeak a ngera el rolel e ngmle ‘uldesuel a rengul’ a Jehovah el kirel a Ngelekel el “mo chuarm”?

• Ngmekerang a Jesus e “mlechetechat el kngtid a uchul”?

• Ngmilekerang a Mesiou e ‘rulleterir [a rechad] me ng mo blak a rengrir el chedal’ a Dios?

• Ngmekerang a dorriter aike el ulaoch el kirel a Mesiou a ngosukid el mo kutmokl a rengud me a uldesued el kirel a Chedaol el Blsoil?

[Aike el Ker er a Suobel]

[Siasing er a 26 el llel]

Te “ultubii” e “ulekor er ngii el di ua lak le chad”

[Siasing er a 28 el llel]

“Ngdi mle ungil er a rengul el odersii a klengar er ngii”

[Siasing er a 29 el llel]

A ‘ngodech el chermel el sib’ a teloi er a Chedaol el Blsoil el loba klou el omengull