SERA lekelebus er a iungs er a Patmos, e a mla mo chuodel el apostol el Johanes a ngilai a 16 el kakerous el ues. Ngmiles er a chelsel ngii el ues aike el tekoi el bo loruul a Jehovah el Dios me a Jesus Kristus er a chelsel a sils er a Rubak​—el ngii a taem el ulemuchel er a oketmeklel a Rengedel a Dios er a 1914 e mo merekui er a ulebengelel a Ta el Telael el Rak er a Omengederederel a Kristus. A babier er a Chocholt el kirel aika el mengasireng el ues a lulluches er ngii a Johanes er a bekord el 96 C.E.

Ka me bo domes aike el meklou a ultutelel el tekoi el lolisiich a Chocholt 1:1–12:17 el kirel aika el kot el euid el ues el lengilai a Johanes. Kede semeriar er aika el ues e le ngolecholt aike el tekoi el ngar er ngii er a beluulechad er a chelecha el taem, e dirrek el lolecholt er a kmo ngerang mo meruul a Jehovah er a kesai el taem er a ngar er a medad. Tirke el menguiu aike el tekoi el ngar er aika el ues el oba klaumerang a ulterekokl el mo metik a ongelaod me a omelisiich.​—Hebru 4:12.

“A NGELEKEL A SIB” A KODOKED A KLLOLEM ER AIKE EL EUID EL OLANGCH EL SEMOSEM

(Chocholt 1:1–7:17)

A kot, e a Johanes a milsa a mla mukebkall el Jesus Kristus e ngilai a tekoi el kmo ngmle kirel el ‘meluches a ikel tekoi el omes el mora babier e odurokl el mora ikel euid el eklesia.’ (Chocholt 1:10, 11) Ongingil tiang e ngmilsa ues el kirel a kingall er a omengedereder el ngar er sel deruchellel er a eanged. Ngar er a kidekmel a chimal ngike el dengchokl er a kingall er a omengedereder e ngmla er ngii a iluil el babier el ngar er ngii a kleuid el semesemel. Ngdiak a ngodech el “redemelel a meketii ngiil iluil babier” e ngdi ta el “Laion ra kebliil ra Juda,” me a lechub e ng “Ngelekel a sib el dechor . . . e ngarngii cheuid lorsul ma kleuid el medal.”​—Chocholt 4:2; 5:1, 2, 5, 6.

Sel ongedei el ues a olecholt a tekoi el duubech er sel taem el “Ngelekel a sib” a ouderta aike el kot el elolem el olangch el semosem el mengedoked. Sera lekedekedii sel ongelolem el olangch el semosem, e ngmlo er ngii a klou el desiu me a klou el sils er a cheldechuderreng. (Chocholt 6:1, 12, 17) Sel ongingil el ues a olecholt “ra teual anghel el dechor ra ikel eual saus ra belulechad” el mo lmuut er sel lebo lemerekui a ureor el omelecha a olangch er a 144,000. “A kloul seked” el tirke el dimlak lengai a olangch a moues el “dechor er medal a kingall ma Ngelekel a sib.”​—Chocholt 7:1, 9.

Ker er a Biblia a Mlonger:

1:4; 3:1; 4:5; 5:6​—Ngera belkul a tekoi el “euid el reng”? A euid el ochur a omtechei a chelerrungel el ngar er a osengel a Dios. Seikid e a klumech el mo er a “euid el eklesia” a motaut el mo er a rokui el chedal a Dios el cheldull er a betok er a 100,000 el ongdibel er a beluulechad el rokir. (Chocholt 1:11, 20) A chedaol el reng er a Dios a motobed el kirel aike el tekoi el soal el mo mengetmokl, me seikid e tia el tekoi el “euid el reng” a omtechei er a cherrengelel a urerel a chedaol el reng el omesterir a klemedengei me a klengeltengat tirke el rokui el blak a rengrir el omtab a ulaoch. A babier er a Chocholt a mesaod a tekoi el ngar er a dersekleuid el bldeklel a tekoi. Me tia el euid el ochur a omtechei a chelerrungel, e uaisei tia el babier a mera el olecholt a orokiolel me a lechub a cherrengelel “a ikel bertelel a Dios.”​—Chocholt 10:7.

1:8, 17​—Aika el dui el “Alfa e Omega” me a “ngikel kot e ngikel uriul” ngmelutk er a techang? A dui el “Alfa e Omega” a melutk er a Jehovah el melisiich er a kmo ngdimlak a ngodech el mesisiich el Dios er a uchei er ngii e diak lebo er ngii a ngodech er a uriul er ngii. Ngii a ngike el “uchul e ullebongel.” (Chocholt 21:6; 22:13) Alta e a Jehovah a lolekoi el kirel el kmo “ngikel kot e ngikel uriul” el ngar er a Chocholt 22:13 el belkul a kmo ngdiak a ngodech el uleakuchei er ngii me a lechub e bo el oeakuriul er ngii, engdi a tekoi el ngar er a kot el bliongel er a Chocholt a olecholt el kmo “ngikel kot e ngikel uriul” a melutk el mo er a Jesus Kristus. E le ngii a ngike el kot el chad el mlokiis el mo oba diak lengemed el klengar el reng, e di ngii el tang a lullekiis er ngii a Jehovah.​—Kolose 1:18.

2:7​—Ngerang a “Baradis ra Dios”? Aika el tekoi a meldung el mo er a rengellitel el Kristiano a uchul me tia el paradis el ngar er tia el bades a ulterekokl  el melutk el kirel a paradis el ngar er a eanged​—el ngar er sel lengar er ngii a Dios. Tirke el blak a rengrir el ngellitel a mo mukngeltengat e mo sebechir el “menga ra rdechel a kerrekar ra klengar.” Te mo nguu a diak lengemed el klengar.​—1 Korinth 15:53.

3:7​—A Jesus ngngiluu a “kiis ra David” er oingerang, e ngmilekerang er a lousbech er ngii? Sera lemetecholb er a 29 C.E., e a Jesus a miltutk el mo King el ngar er a uldidellel a rasech er a David. Engdi a Jesus a dimlak el nguu a kiis er a David el mo lmuut er a 33 C.E. er a lemukebkall el mo er a kidekmel a chimal a Dios el ngar er a eanged. Ngar er isei e ngmludiukes a rokui el llemeltel a Rengedel a David. Ngar er seikid el taem el mei er a chelechang e a Jesus a melemolem el ousbech er tia el kiis el omkais a techall el kirel a tekoi er a Renged. Ngar er a 1919, e a Jesus a ulterekeklii tia el “kiis er a blil a David” er a “ngikel blak a rengul e mellomes a rengul mesiou” er sera lolilt er ngii el mesiou el “mo mengedereder a daisang er ngii el rokui.”​—Isaia 22:22; Matteus 24:45, 47.

3:12​—Ngerang a ‘beches el ngklel’ a Jesus? Tia el ngakl a ngar er ngii a lerellii el kirel a beches el deruchellel a Jesus me a techall el kirel. (Filipi 2:9-11) Alta e ngdiak a chad el mo medengelii ngii el ngakl el mo uaisei el klemedengei er a Jesus el kirel, engdi a Jesus a meluches er ngii er a reblak a rengrir el odam er ngii el ngar er a eanged el mengurs er tir el mo oba kmeed el deluill el obengkel. (Chocholt 19:12) A techall el kirel a dirrek el lebesterir a rudam er ngii.

Klubeled:

1:3. A “blsechel [a Dios el mo oukerrekeriil er tia el beluulechad er a Satan] a kmedang,” me ngkmal orechudel el bo el bleketakl er a rengud a klumech el ngar er a babier er a Chocholt e bo doltirakl.

3:17, 18. A bo demerau er a tekoi er a klereng e ngkmal kired el mo omechar a “kolt el mlekikiid ra ngau” el olab a Jesus. Tiang a belkul a kmo ngkired el mo er sel tkul er a bab el sebeched el melasem el mo merau er a ungil el ureor. (1 Timoteus 6:17-19) Ngdirrek el kired el mo oubail a “becheleleul mamed,” e ngii a mo olengcheled el kmo kede oltirakl er a Kristus, e ousbech a “kar ra mad,” el ngii aike el omellach el motobed el oeak a Ongkerongel el babier el mo olengeseu er kid el omes a tekoi er a klereng el oba sekutaberreng.​—Chocholt 19:8.

7:13, 14. Tirke el 24 el mechuodel a omtechei er a 144,000 el ngar er a klebkellir er a eanged, e lengar er isei e ngdiak di losiou el ua reking e lemerekong e te dirrek el mesiou el ua repriist. Te mloues el ua repriist er a Israel er a irechar el lulemii er tir a King el David el ngar er a 24 el bliongel. A ta er tirke el mechuodel a ullecholt er a Johanes el kmo te rua techang a klou el seked. Me seikid e a okiis el kirir a rengellitel el Kristiano a ulterekokl el ulemuchel er a uchei er a 1935. E ngera uchul? E le seikid el rak e sel mera el klemedengei el kirel a klou el seked a ulebeketakl el mo er a rengellitel el mesiungel a Dios el ngar er tia el chutem.​—Lukas 22:28-​30; Chocholt 4:4; 7:9.

A OMENGEDOKED ER A ONGEUID EL OLANGCH EL SEMOSEM A MLO UCHUL A DEKEUEL A KLEUID EL TROMBETANG

(Chocholt 8:1–12:17)

A Ngelekel a sib a kodekedii a ongeuid el semosem. A reteuid el anghel a ngmai a kleuid el trombetang. Telolem er tir el anghel a dilokou a trombetang er tir, el louchais er a kerrekeriil el mo er a ta er a “chedeitiud” er a klechad​—el ngii a Klsuul el Klekristiano. (Chocholt 8:1, 2, 7-​12; 9:15, 18) Tiang a lulsang a Johanes el ngar er sel ongeim el ues. A Johanes a mlo uldimukl er tia el ongingil el ues er a lekelii sel kekerei el iluil el babier e loluk er a klungel a templo. Uriul er a ledekeuii a ongeuid el trombetang e a meklou el ngor a milsubed el kmo: “A rengedel tial belulechad a mocha rengedel a Rubak er kid ma Kristus er ngii.”​—Chocholt 10:10; 11:1, 15.

Sel ongeuid el ues a mlo melisiich a tekoi el lolekoi a Chocholt 11:15, 17. A klou el olangch a mloues er a eanged. A redil el ngar er a eanged a milechellii a ngalek el sechal. A Diabelong a mlodik er a eanged. Ngmlo kesib a rengul er ngii el redil er a eanged, me ngmirrael el “mo oumekemad er tirikel medechel el ngelekel ngikal redil.”​—Chocholt 12:1, 5, 9, 17.

Ker er a Biblia a Mlonger:

8:1-5​—Ngera uchul me “ngmlo kellechakl a eanged,” e a ongingil e ngera ulebidokl el mo er a beluulechad? Ngmlo ua lekellechakl a eanged me bo el sebechel a “nglunguchir ar mechedaol” el ngar er tia el beluulechad el morenges. Tiang a dilubech er a ulebengelel a kot el mekemedil a beluulechad. A rengellitel el Kristiano a dimlak lengasech el mo er a eanged er a ulebengelel a Taem er a Rechisentael, el ua lulemdasu a rebetok er tir. Te chilebangel a ringel er a lengar er ngii a mekemad. Me a chelechang e ngmocha blak a rengrir el  meluluuch el kirel a ulekrael. Me a longer a nglunguchir, e a anghel a mildeklii a okesiu el ngau el me er a chutem el rirelleterir a rengellitel el Kristiano el mo kmard er a klereng. Me alta e te di mle mekesai, engdi te milechelii a ureor er a berkel a klumech el meliuekl er a beluulechad el rokir el rirellii a Rengedel a Dios el mo ua kmard el klumech el meleseb er a Klsuul el Klekristiano. A uleklatk el ua derrumk el mla er a Biblia a luleltobed, me a klemerang er a Bades a lulemeketakl el ua bisebusech, me a cheldellel a klsuul el klechelid a milsmesim er a omekedecheraol er ngii, el di ua blai a lemesmesim er a desiu.

8:6-12; 9:1, 13; 11:15​—Ngoingerang e tirke el teuid el anghel a milengetmokl er tir el meloko a trombetang er tir, e oingerang e milekerang e aika el trombetang a mildoko? A omengetmokl el mo meloko aike el euid el trombetang a mle uldimukl er a lomesterir a ulekrael tirke el mla mo mesisiich el ngellitel el ua Johanes el ngar er tia el beluulechad er a 1919 el mo er a 1922. Me seikid e tirka el ngellitel a mlo mechesang e liluut el mengetmokl a ureor er a berkel a klumech me a okedecherul a blai el kirel a otebedel a babier. (Chocholt 12:13, 14) A omelekeuel aika el trombetang a omtechei er a blekeu el lobang a rechedal a Dios el oeak a ulengesuir a rechangel, e te omerk er a kerrekerilel a Jehovah el omtok er a beluulechad er a Diabelong. Tiang a ulemuchel er sel convention er a 1922 el mla er a Cedar Point, Ohio, e melemolem el ngar er ngii el mo lmuut er a klou el ringel.

8:13; 9:12; 11:14​—Ngoeak a ngera el rolel e aike el ulebongel el edei el omelekeuel a trombetang a “chelebuul”? Alta e aike el kot el eua el omelekeuel a trombetang a ulemeketakl er a blekerdelel a Klsuul el Klekristiano el ulekoad er a klereng, engdi aike el ulebongel el edei a chelebuul el melutk el kirel a ulterekokl el tekoi el dilubech. A ongeim el omelekeuel a trombetang a melutk el kirel a otobedir a rechedal a Dios er a 1919 er a “diak a btil deliobech” el ble lechelsimer er a chelsel, me a dirrek el diak el meterob el urerir er a berkel a klumech el ngii a mlo ua meringel el rakt el lomekcharm er a Klsuul el Klekristiano. (Chocholt 9:1) Sel ongelolem a kirel sel kot el mesisiich el urrurt er a klsoldau el mla moues er a reksi er a klechad me a ureor er a berkel a klumech er a beluulechad el rokir el ulemuchel er a 1922. Sel ulebongel el omelekeuel a trombetang a kirel a cherellel a Rengedel a Messias.

Klubeled:

9:10, 19. A ngar er ngii a klisichel el tekoi el mlengai er a Biblia el ngar er aike el babier el loltobed “ngikel blak a rengul e mellomes a rengul mesiou” a ngar er ngii a kmal meringel el klumech er a chelsel. (Matteus 24:45) Tia el klumech a mokesiu er a kemril a chebud el merus el ua “iusbeluu” me a uos er a mekemad el “kemril choua bersoech.” E ngera uchul? E le aika el babier a mengelechel er a sils er a omelaitechei er a Jehovah. (Isaia 61:2) Me bo doba blekeu me a blakerreng el merous er ngii el babier.

9:20, 21. A betok el medemdemek a rengrir el chad el kiei er aike el leko ngdiak el Kristiano el beluu a mla kongei er tia el klumech el domerk er ngii. Engdi kid a diak dolatk el kmo ngmo er ngii a rebetok el chad el mo obult el mla er a ikrel a cheldellel a Klsuul el Klekristiano, el tir a lolekoi el kirir el kmo “tirikal mlo medechel el chad.” Me nguaisei, engdi kede melemolem el outekangel e blak a rengud er a omesiunged.

12:15, 16. “A chutem”​—el ngii a klekedall el ngar er tia el blekeradel er a Satan, el ngii aike el klisichel a dereder el ngar er a kakerous el beluu​—a milengeluolu er a ilmokl el kirel a omengull. Me ngulemuchel er aike el rak er a 1940 el mei, e aika el klisichel a dereder a “ngilelmii tial omoachel [er a odechelakl] el le dilsbar ra ngerel ngiil dragon.” Me ngulterekokl a lsekum a Jehovah a ngiltii el mo meruul el uaisei e ngsebechel el omekrael a klisichel a dereder er a kabelment el mo meruul aike el soal. Me ngkmal di ua lolekoi a Osisechakl 21:1 el kmo: “A rengul a king a omoachel el longedereder er ngii a RUBAK, ng orrael er ngii el mor sel soal.” Tiang a kmal kirel el melisiich a klaumerang er kid er a Dios.