“A le ngarngii a soal lokiuellek, e le chitii a klechad er ngii e le chelngii a kerus er ngii loltirakl er ngak ra bek el sils.”​—LUKAS 9:23.

1, 2. (a) Ngera el okedong a lullekoi er ngii a Jesus? (b) Ngera mle nger er kau el kirel tia el okedong?

 A JESUS a uleldingel er a Perea, el ngii a beluu el ngar er a mong er a Jordan el diluchesungos er a Judea er a mochu ulebengelel a omesiungel. Ngmlo duum er ngii a ta el kekerei el chad el uleker el kmo ngmekerang e mo nguu a diak a ulebengelel el klengar. Me a uriul er a bo lodengei el kmo ngika el chad a blak a rengul el loltirakl a Llach er a Moses, e ngmilsang a okedong. Ngdilu el kmo: “Me bo mrei mo moterau a ikel rokui el molab, e besterir ar mechebuul, me le borngii a mekreos el kloklem el ngara eanged; e sola e be moltirakl er ngak.” (Markus 10:21) Ka molatk er tia el okedong el mo oltirakl er a Jesus, el di ta el Ngelekel a Chimong el Kedidai el Dios!

² Ngika el kekerei el chad a ultngeklii tia el okedong, engdi a rebebil a kilengei er ngii. A uchei er tiang, e a Jesus a dilu er a Filipus el kmo: “Moltirakl er ngak.” (Johanes 1:43) Me a Filipus a kilengei er tia el okedong e a uriul e ngmlo apostol. A Jesus a dillii a osisiu el okedong el mo er a Matteus e ngdirrek el kilengei er ngii. (Matteus 9:9; 10:2-4) Nguaisei, a Jesus a dirrek el lomekedong er a rokui el betik a rengrir er a llemalt sel ledu el kmo: “A le ngarngii a soal lokiuellek, e le chitii a klechad er ngii e le chelngii a kerus er ngii loltirakl er ngak ra bek el sils.” (Lukas 9:23) Me ngsebechel a ngii di el chad el mo oltirakl er a Jesus a lsekum e ngsoal. Me kau ngsoam tia el tekoi? A rebetok er kid a mla kongei er tia el okedongel a Jesus, me ngngar er a omesiunged e kede ouchais er ngii el okedong el mo er a rebebil.

3. Ngmekerang e diak doberius el mo cheroid er a Jesus?

³ Ngklengiterreng, e le rebebil a dimlak lolemolem er a klemeriarreng er tir el kirel a klemerang er a Biblia. Te bai mlo mechitechut e “oberius el mo cheroid” e dikea loltirakl er a Jesus. (Hebru 2:1) Kede mekerang e diak derebet er tia el bedikl? Ngungil a di el kid el merriter er kid el kmo: ‘Ngak, ngera uchul me ak millilt el mo oltirakl er a Jesus er a kot el uchul? Ngera belkul a kultirakl er ngii?’ A dolebedebek a nger er aika el teblo el ker e ngsmisichid el mo melemolem el merael er a ungil el rael el kid a ngileltii. Ngdirrek el ngosukid el mo melisiich er a rebebil el mo oltirakl er a Jesus.

Ngera Uchul Me Kede Oltirakl er a Jesus?

4, 5. Ngera uchul me a Jesus a rredemelel a mo mengetekled?

⁴ A profet el Jeremia a kmo: “RUBAK, ak medengei el kmo ng diak a chad el medengelii a le bor ngii er a ngar medal, e diak a chad el sebechel el chodereder a blekeklel.” (Jeremia 10:23) A tekoi er a reksi a meketeklii a klemerang er a tekingel a Jeremia. Ngkmal mla obeketakl el kmo a rediak el mecherrungel el chad a diak el sebechir el di tir el mengedereder er tir. Kid a kilengei er a okedong el mo oltirakl er a Jesus e le kede silubii el kmo ngii a rredemelel a mo Mengetekled e diak a ngii di el chad el sebechel el mo ua ngii. Momtab a bebil er a tekoi el rullii a Jesus el mo rredemelel a mengedereder.

⁵ A kot el uchul, e a Jehovah a ngileltii a Jesus el mo Mengetekled. Ngtechang a lmuut el ungil el melilt er a mo Mengetekled el ua Ngike el Ulemeob? Ongerung, a Jesus a ngar er ngii a blekerdelel el sebeched el oltirakl. (Monguiu er a Isaia 11:2, 3.) Ngii a kmal ungil el kerebai. (1 Petrus 2:21) Ongedei, ngkmal omekerreu er tirke el loltirakl er ngii e ulechotii er a bo letengetengii a klengar er ngii el kirir. (Monguiu er a Johanes 10:14, 15.) E dirrek el ochotii el kmo ngungil el klekar el lomekrael er kid el mo er a  klengar el mui er a deurreng er a chelechang me a ngar er a medad el klebesei. (Johanes 10:10, 11; Chocholt 7:16, 17) Ngoeak aikaikid me a lmuut el bebil el uchul, e kede ochotii el kmo kede mle ungil el melilt el mo oltirakl er ngii. Me a leuaisei, engdi ngera kired el meruul?

6. A doltirakl er a Jesus e ngera kired el meruul er ngii?

⁶ Me a doltirakl er a Kristus e ngdiak el belkul a kmo kede di okedongall el Kristiano e merekong. Ngbekord el eru el billiol el chad er a chelecha el sils a melekoi el kmo te Kristiano, engdi a omerellir a olecholt el kmo te “meruul a chelebirukel.” (Monguiu er a Matteus 7:21-23.) A lsekum a rechad a olecholt a klemeriarreng el sorir el loltirakl er a Jesus, e ngsebeched el ouchais er tir el kmo a mera el rolel a klengar er a Rekristiano a kirel el mo oltirakl er a osisecheklel me a kerebil a Jesus er a chelsel a klengar er tir. Me a domekesiu er tiang, e bo dolatk a bebil er a tekoi el dodengei el kirel a Jesus.

Moltirakl er a Kerebil a Jesus el kirel a Llomeserreng

7, 8. (a) Ngerang a llomeserreng, e ngera uchul me a Jesus a ulebang a klou el llomeserreng? (b) Ngmilekerang a Jesus er a lolecholt er a llomeserreng, e kede mekerang a doltirakl er ngii?

⁷ A Jesus a ullecholt a betok el ungil el blekerdelel, engdi kede di mo mesaod a euang er ngii: a llomeserreng me a klengareourreng me a blakerreng me a bltikerreng. A kot, e kede mo mesaod er a llemesel a rengul, sel dechal el lousbech a klemedengei me a utebengel a tekoi er a klengar er ngii. A apostol el Paulus a milluches el kmo: “A chelsel a Kristus a le berrotel er ngii a rokuil mekreos el tekoi, el llomeserreng ma klemedengei.” (Kolose 2:3) A Jesus ngngiluu tia el llomeserreng er ker? Ngdilu el kmo: “Ak di melekoi a ikel lulsisecheklak er ngii a Chedam.” (Johanes 8:28) A llomeserreng er ngii a mla er a Jehovah el mei me ngdiak el mechas a rengud er ngii er sel rolel a loruul a tekoi.

⁸ El di ua tiang, a Jesus a mle ungil el melilt er a mo rolel a klengar er ngii. Ngtilbir el mo omekbeot er a klengar er ngii el di ultaut a osengel er a ta el tekoi el mo meruul a soal a Dios. Ngmle mellomes a rengul el lousbech a temel me a klisichel el mo osiik er a Renged el kot. Kede oltirakl er a kerebai er a Jesus el mo diak a ‘rektel a medad’ me bo el sebeched el olechib er kid er aike el betok el diak a ultutelel el tekoi el mengesang a temed me a uldesued. (Matteus 6:22) Ngbetok el Kristiano er a chelechang a mla omekbeot a klengar er tir me bo el sebechir el chemoit a betok el temir el kirel a omesiou. A rebebil a mla mo sebechir el mo soiseb er a ureor er a klepioneer. Aki kmal chemat er kau a lsekum e ke ta er tir. Sel “momuchel losiik ra rengedel a Dios” e ngmo uchul a klou el deurreng.​—Matteus 6:33.

Bo el Ngar er a Eou a Rengum el Ua Jesus

9, 10. Ngmilekerang a Jesus a lochotii a klengareourreng er ngii?

⁹ A ongeru el blekerdelel a Jesus el bo dosaod er ngii a klengareourreng. A lsekum a diak el cherrungel el chad a mo nguu a ngar er a bab el deruchall, e ngblechoel el mo uchul e ngobkuuk er a kldidairreng. E tiang a kmal kakerous er a blekerdelel a Jesus! Me alta e ngmle klou a ultutelel a ngerchelel el loltaut er a moktek er a Jehovah, engdi ngdimlak a ta el bo el kedidai a rengul. Kede muchelechel el mo oukerebai er ngii. A apostol el Paulus a milluches el kmo: “Mnguu a Reng ra Kristus Jesus el mo rengmiu, ngmle teletelel a Dios, e dimlak lomdasu el  kmo, ‘Kungreos er ngak me di kua Dios,’ e bai di mle ngii el mechachongii e nguu a teletelel a mesiou me ngmlo ua teletelel a chad, ma blekerdelel a diak le ngodech ra chad.” (Filipi 2:5-7) Tiang nguldimukl er a ngerang?

¹⁰ A Jesus a uleldeu er a rengul el kiei el obengkel a Demal el ngar er a eanged engdi ng “bai di mle ngii el mechachongii.” A klengar er ngii a mloiuid el mo er a delel a klikiid el ekebil er a Judea e ngar er a diil el etiu el buil e sola mechell el ngelekel a chebuul el daiksang. Ngar er a blil a Josef, e a kekerei el buik el Jesus a mlukeroul el mo ngeasek. E dimlak a kngtil. A klteketel a klengeasek er ngii e ngdi millemolem el chederdall er a diak el cherrungel el demal me a delal. (Lukas 2:51, 52) Ngmera el klou el olechotel a klengareourreng!

11. Ngoeak a ngera el rolel e ngsebeched el oukerebai er a klengareourreng er a Jesus?

¹¹ Kede oukerebai er a klengareourreng er a Jesus sel dekengei el meruul a kora ua lengar er a eou el ureor. El ua tiang, ka molatk er a ureor er a berkel a klumech. A choua isei el ureor a ua lak a ultutelel e le a rechad a diak el semeriar e melenguul e omtok er kid a uchul. Engdi a lsekum e kede outekangel el meruul er tia el ureor, e kede ngosuterir a rebebil el mo kongei er a okedong er a Jesus el mo oltirakl er ngii. E seikid e kede olengeseu el olsobel a klengar. (Monguiu er a 2 Timoteus 4:1-5.) A ta er a okesiu a oketmeklel a Kingdom Hall er kid. E tia uldimukl er a dongoit a komi me a omelemed el ulaol me a omelatech el benjo, el rokui el di ngar er a eou el ureor! Kede medengei el kmo a oketmeklel a Kingdom Hall er kid​—el ngii a blil a bliochel el omengull er a beluad—​a tedebechel a chedaol el omesiunged. Me a dekengei el meruul a ngar er a eou el ureor e kede olecholt a klengareourreng el oltirakl a ultil a ochil a Kristus.

Bo el Blak a Rengud el Ua Jesus

12, 13. (a) Ngmilekerang a Jesus er a lochotii a blakerreng, e ngera silsichii el mo meruul el uaisei? (b) Ngerang a smisichid el mo blak a rengud er a omesiunged?

¹² Ka molatk er a blakerreng er a Jesus el ngar er a omesiungel. Ngriruul a betok el tekoi er sera lengar er tia el chutem. A Jesus a uluureor el obengkel a demal er a Josef el daiksang er sera lekekerei el chad. Ngar er a omesiungel, e a Jesus a mirruul a ongasireng el ureor el lomekungil er a resmecher e olekiis er a rulekoad. Engdi a klou el urerel a ulemerk er a ungil el chais e olisechakl er tirke el semeriar. (Matteus 4:23) Kid el oltirakl er ngii a meruul er a osisiu el ureor. Kede mekerang a doltirakl er a kerebil? Ngoeak sel doruul er tia el ureor el obang a osisiu el moktek el ua Jesus.

¹³ A ngar er a uchei er ngii el rokui, e a bltkil a rengul a Jesus el mo er a Dios a rirellii el mo omerk er a klumech e olisechakl. A Jesus a dirrek el mle betik a rengul er aike el klemerang el tekoi el lullisechakl. Ngulemes aike el tekoi el ua el mekreos el klalo, e mle soal el louchais er a rechad el kirel. Kid el sensei a oba choua iseikid el uldasu. Ka di molebedebek a bebil er aike el mekreos el klemerang el tekoi el bla desuub er a Tekingel a Dios! Kede medengei a tekoi el kirel a omengedereder er a uldekial a eanged me a chutem me a semecheklel. Kede medengei a osisechakl er a Bades el kirir a rulekoad me a klengeltengat el mo er ngii er a beches el beluulechad er a Dios. Me aika el klemerang el tekoi, a lemechut me a lebeches me a dirk blo dodengei me a lechub e ngmeketeketang, me ngii a diak el lengemed a klungiolel e di melemolem el mekreos a belkul. (Monguiu er a Matteus 13:52.) A bltkil a rengud el kirel aika el rokui el lulsisecheklid er ngii a Jehovah a uchul me kede oba klemeriarreng el olisechakl er a rechad.

14. Ngmekerang a doukerebai er a rolel a lolisechakl a Jesus?

¹⁴ Momtab er a rolel a lolisechakl a Jesus. Ngmle blechoel el lomekrael er a rulerrenges er ngii el lousbech a Bades. E dirrek el lullecholt a meklou a ultutelel el tekoi er a lolekoi el kmo: “Ngellechukl el kmo.” (Matteus 4:4; 21:13) Ngar er a llechukl el tekingel, e ngmelekoi a llechukl el tekoi me a lechub e ngtekoi el mlengai er aike el babier er a Chuodel el Renged. Me kid a ua Jesus el mui el ultuil er a Biblia el ngar er a omesiunged e dirrek el  melasem el ousbech er a Bades er a bek el techall. Ngoeak tiaikid el rolel, e ngsebeched el ngosuterir a remelemalt a rengrir el mo mesang el kmo kede ouchais a uldesuel a Dios, el diak el uldesued. Ngmo uchul a deurreng sel desa chad el mo kongei el menguiu er a Biblia e dirrek el mesaod er a klungel a ultutelel me a belkul a Tekingel a Dios! Ngkmal mo dmeu a rengud sel desterir el kongei er tia el okedong el mo oltirakl er a Jesus.

A Doltirakl er a Jesus a Belkul a Kmo Ngbetik a Rengud er a Rechad

15. Ngera sel ngar er a uchei el blekerdelel a Jesus, e ngerang rullii er kid?

¹⁵ Sel ulebongel el blekerdelel a Jesus el bo dosaod er ngii a bltkil a rengul el mo er a rechad. A apostol el Paulus a milluches el kmo: “Le ngmisisiich el mengedereder er kemam a bltikerreng ra Kristus.” (2 Korinth 5:14) Sel domelechesiu er a bltkil a rengul a Jesus el kirir a rokui el chad me a derta er kid, e ngkmal mo dmeu a rengud e mo semeriar el oltirakl er a kerebil.

16, 17. Ngoeak a ngera el rolel e a Jesus a ullecholt er a bltikerreng el mo er a rechad?

¹⁶ Ngmilekerang a Jesus er a lolecholt er a bltkil a rengul el mo er a rechad? Ngii el kilengei el mo tongetengii a klengar er ngii el kirel a klechad a kmal klou el olechotel a bltkil a rengul. (Johanes 15:13) Me nguaisei, ngar er a chelsel a omesiungel e ngullecholt er a bltikerreng er a betok el rolel. El ua tiang, ngmillatk a chelebulir tirke el chormang er a klengiterreng. Sera lesang a Maria me a rebebil el lmangel el kirel a kodellel a Lazarus e ngkmal mlo chubteterir. Me alta ngkmedu el mo olekiis er a Lazarus, engdi ngdirrek el “lilangel.”​—Johanes 11:32-35.

¹⁷ Ngar er a uchelel a omesiungel a Jesus, e a ta el chebedes a mlo kmeed er ngii e dilu el kmo: “A lungilbesul ra rengum, e ngsebechem el kikidak.” Me ngmilekerang a Jesus? A cheldecheduch a kmo: “Ma Jesus a chubrang.” E rirellii a ileakl el tekoi. “Me nguldersii a chimal el rutechii, e dilu er ngii el kmo, ‘Ngsoak; me bo mklikiid.’ Me ngdimlemereched a kemkom el mo diak er ngii, me ngmlo klikiid.” Ngoeak a Llach er a Moses, e a rechebedes a dimlak el klikiid me ngmle sebechel a Jesus el di cheroid e omekungil er ngii. Engdi a Jesus a kilengei el mo rutechii me bo el sebechel el lomekungil er ngika el chebedes el ngii a meketeketang el diak a chad el mo kmeed er ngii. Ngmera el klou el olechotel a klechubechub!​—Markus 1:40-42.

18. Ngmekerang a ‘dekelatk a chelebuul’?

¹⁸ Me kid el oltirakl er a Kristus a uchul me ngkired el olecholt er a bltikerreng el oeak a ‘dekelatk a chelebuul.’ (1 Petrus 3:8) Ngulterekokl el diak el beot el bo dolechesuar a meringel el secher me a lechub e ngsecherel a  uldasu el lechelebangel er ngii a rekldemed er a klaumerang a lsekum e ngdirkak a ta el bo dechermii. A Jesus a mle medengelii a rengelel a secher alta e ngdimlak a ta el bo el secher. Kede mekerang e olecholt er a osisiu el uldasu? Ngsebeched el meruul er tiang el oeak sel dorrenges er tirke el socherang a louchais a mondai er tir er kid. Ngsebeched el di kid el oker el kmo, ‘Oleko ak mlo uaisei, e ngua ngera uldesuek?’ A dekerekikl el melatk a rengrir a rebebil, e ngmo sebeched el ‘melisiich rar mechitechut a rengrir.’ (1 Thesalonika 5:14) E tiaikid a rolel e kede oltirakl er a Jesus.

19. Ngerang rullii er kid a kerebil a Jesus?

¹⁹ Ngsebeched el suub a betok er a tekingel me a omerellel a Jesus Kristus! A deblechoel el mesuub el kirel e ngrullid el mo soad el mo ua ngii e dirrek el mo soad el olengeseu er a rechad el mo meruul er a osisiu el tekoi. Me a leuaisei, e bo el deu a rengud el oltirakl er a Messias el King er a chelechang el mo cherechar!

Ngsebechem el Mesaod?

• Ngmekerang a dolecholt er a llomeserreng el ua Jesus?

• Ngoeak a ngera el rolel e kede ochotii a klengareourreng?

• Ngmekerang a domekeroul er a blakerreng el kirel a omesiunged?

• Ngoeak a ngera el rolel e kede oltirakl er a Jesus er a olechotel a bltikerreng el mo er a rechad?

[Aike el Ker er a Suobel]

[Siasing er a 8 el llel]

A Jesus a kilengei el mei er a beluulechad el mo mechell el tolechoi. Ngera el blekeradel a mle usbechall el kirel tia el tekoi?

[Siasing er a 10 el llel]

Ngera rullid el mo blak a rengud el kirel a omesiunged?