KAU ngsoam el mo dmeu a rengum e ungil el chad? A apostol el Petrus a mesaod er a rolel e ngsebeched el mo uaisei. Ngmeluches el kmo: “Ma Kristus el mlukringel el kiriu a milechere kerebai el momakes loltirakl a ultil chochil.” (1 Petrus 2:21) A Jesus a mle ileakl a rolel a klengar er ngii me ngsebechel el meskid a betok el ulekrael. Me a dosuub el kirel e derellii a klengar er kid el mo oltirakl er a kerebil, e kede ulterekokl el mo dmeu a rengud e ungil el chad. Ka me bo domes a bebil er a blekerdelel ngika el ileakl el chad e desa el kmo ngera el klungiaol a sebeched el ngmai er a kerebil.

A Jesus a mle tabesul a klengar er ngii. Me alta e a Jesus a dimlak a “bo lotilii a bdelul er ngii,” engdi ngdimlak lolisiich er a meringel el rolel a klengar. (Matteus 8:20) E le ngmle teloi a meklou el blengur. (Lukas 5:29) Me a kot el mengasireng el omerellel, el ulemult a ralm el mo bilong er a merengel a chebechiil, a ochotii el kmo ngdimlak loleakl er ngii er a rechad. (Johanes 2:1-11) Engdi, ngmileketeklii sel kot el klou a ultutelel el tekoi er a klengar er ngii. Ngdilu el kmo: “Sel kuruul a soal ngikel ulderchak e krekir a urerel, itiaikid a kelek.”​—Johanes 4:34.

□ Ke mla merriter er a klengar er kau e mesa el kmo ngtabesul a tekoi er a klechad me a klereng er kau?

Ngmle beot er a rechad el mo er a Jesus. A Biblia a olecholt el kmo a Jesus a mle ungil a rengul el chad. Ngdimlak bo el seselk a rengul er a rechad sel lebo er ngii e loker a ker e louchais a mondai er tir. A ta el taem e a seked a mle iliuekl er ngii, e a redil el mle smecher el 12 el rak a rirtechii a rsel a bilel, el millatk el mo ungil er a rektel. A Jesus a dimlak loungeroel er ngii el kirel tia el omerellel e bai dilu el kmo: “Rungalek, a kloumera er kau a ulemekungil er kau.” (Markus 5:25-34) A rengalek a dirrek el mle beot er tir el mo er ngii, e diak el medakt er ngii. (Markus 10:13-16) Me a redisaiplo a mle beot er tir el mengedecheduch el obengkel. E mle sebechir el mo kmeed er ngii.​—Markus 6:30-32.

□ Ngbeot er a rechad el mengedecheduch er kau?

Ngmle blechoel el melatk a rengrir a rechad e dirrek el chubechub. A ta er a klou el blekerdelel a Jesus a sel dechal el mle sebechel el melatk a rengrir a rebebil e olengeseu er tir. A apostol el Johanes a mesaod el kmo a Jesus er a lesa Maria el lmangel el kirel a kodellel a ochedal el Lazarus, “e ngkmal mlo meringel ra rengul el mekngit a rengul” me ng “lilangel.” A rechad a mle sebechir el mesa a bltkil a rengul el mo er sel telungalek e ngii a dimlak el merur el olecholt er ngii. Ngkmal klou el klechubechub a lulechotii er sera lokisii a sechelil er a kodall!​—Johanes 11:33-44.

A kuk ta er a taem, e a chad el chebedes, el rektel a uchul e ngmle kiei el cheroid er a rechad, a ullengit er a Jesus el kmo: “Rubak, a lungilbesul ra rengum e ngsebechem el kikidak.” A omerellel a Jesus a mera el mengelaod a reng e le ng “uldersii a chimal e rutechii, e dilu el kmo, ‘Ngsoak; me bo mklikiid.’ ” (Matteus 8:2, 3) A Jesus a dimlak di lomekungil el mo oltaut a ulaoch e ngbai mle soal me a bo lak a klengiterreng. A rokui el tekoi el lurruul a uleltirakl er sel merael a chisel el tekingel el kmo: “Ma ikel moureng el somiu a lruul ar chad lekor kemiu, cho mruul el mor tir.”​—Lukas 6:31.

 □ Ngsebechel a klechubechub er kau el meues er a omerellem el mo er a rebebil?

A Jesus a mle sekutab e melemalt el melilt a tekoi. Me alta e ngmle cherrungel engdi a Jesus a dimlak lomdasu el kmo a rechad a kirir el mo cherrungel el ua ngii me a lechub e longedidai er ngii. Ngbai uleba sekutaberreng el meruul a tekoi. A ta el taem, e a redil el “ngara klengit” a ullecholt a klaumerang me a omereng el saul er a loriso a ochil a Jesus el lolab a iuechel a medal. A Jesus a kilengei er tia el omerellel el uchul me ngkilebetiekl ngike el chad el mle meringel el loukerekeriil er ngika el redil. A Jesus a mle medengei a ngar er a rengul ngika el redil a uchul me ngdimlak loukerrekeriil er ngii el kirel a kngtil. Ngbai dilu el kmo: “A kloumera er kau a ulsobelau; morael el ngara budech.” Tia el ungil el omerellel a Jesus a mlo uchul me ngika el redil a locha ngildechii a rolel a klengar er ngii.​—Lukas 7:37-50.

□ A rechad te medengelkau el mereched el chemat e meoud el oukerrekeriil?

Ngdimlak longetukel e ullecholt a omengull. A Jesus a mle ileakl a bltkil a rengul el mo er a disaiplo el Johanes e le tir el mle osisiu a blekerdelir e dirrek el locha mle kauchad. a Me nguaisei e ngmle tabesul a osengel el bedulngii me tirke el bebil er a disaiplo. (Johanes 13:23) Sei a uchul me a Johanes me a obekul er a Jakobus er a lolengit a techall er a Rengedel a Dios, e a Jesus a ulenger el kmo: “E ngdi mo dengchokl ra kidekmek ma katruk a diak le kirek el meskemiu.”​—Markus 10:35-40.

A Jesus a mle blechoel el ullecholt a omengull el mo er a rebebil e dimlak longetukel el ua rechad er a taem er ngii. El di ua tiang, a redil a mle ua lengar er a eou er a resechal. Engdi a Jesus a ullecholt a omengull el mo er tir. Sel taem er a lekot el melekoi el kmo ngii a Messias e ngmilengedecheduch er a redil er a Samaria, el rechad er a Judea a miltengel a osengir er tir e ka louetkeu er tir. (Johanes 4:7-26) E dirrek el milsterir a redil a techellir el mo kot el mesang el mekiis er a kodall.​—Matteus 28:9, 10.

□ Kau ngtabesul a omerellem el mo er a resechal me a redil el kakerous a bedengir me a omelekingir me a belurir?

Ngmle bekongerachel el ngalek e odam. Ngbleketakl el kmo a demal el Josef a mlad er a ledirk el ngeasek a Jesus. Ngulterekokl a Jesus el uluureor el daiksang e mesiou er a delal me a rebebil er ngii. (Markus 6:3) Sel ulebongel el sikang er a klengar er ngii e ngulterekeklii a delal er a chimal a disaiplo el Johanes.​—Johanes 19:26, 27.

□ Ngsebechem el oukerebai er a Jesus el meruul a ngerechelem er a chelsel a telungalek?

A Jesus a mle ungil el sechelei. Ngmilekerang a Jesus e kmal mle ungil el sechelei? Ngdimlak  loltngakl er a resechelil sel loruul a cheleuid el tekoi el mo lmuut er a lolemolem el meruul a osisiu el cheleuid el tekoi. Te mle blechoel el meruul a tekoi el dimlak el soal. Engdi ngii a mle ungil el sechelirir e le ngdi ulemes a ungil el blekerdelir er a bai lomtab a mekngit el blekerdelir. (Markus 9:33-35; Lukas 22:24-27) Ngdimlak el lorrimel er tir el mo omdasu el ua ngii, e bai milsterir a techellir el louchais a ngar er a rengrir.​—Matteus 16:13-15.

A ngar er a bab er ngii el rokui, e ngkmal mle betik a rengul er tir. (Johanes 13:1) El ua ngera telkelel? Ngdilu el kmo: “Ngdiak a chad el oba guk kloul bltikerreng er tial le bengkengkii a klengar er ngii a chad el bedul ar sechelil.” (Johanes 15:13) Ngsebechel a chad el msa sechelil a mekreos el klalo el kuk ngar er a uchei er a klengar er ngii?

□ Ngsebechem el melemolem el sechelil a chad el mo lmuut er aike el taem el longesechii a rengum me a lechub e ngsoibesengau?

Ngmle bekeu e mesisiich. A Jesus a kmal mle ngodech er aike el sunga el lolecholt er ngii el ua mechitechut e chebuul el chad. A Evangkelio a olecholt er ngii el kmo ngmesisiich e bekeu el chad. A Jesus a mle eru el taem el oldik er a rulterau a kloklir er a templo. (Markus 11:15-17; Johanes 2:14-17) A seked er a be lomdechem er a “Jesus ra Nazareth” e ngmle bekeu el di ngii el lochotii me bo lomekerreu er a redisaiplo, e dilu el kmo: “Ngak ingii; a lsekum ko mosiik er ngak e bechiiteterir tirikal chad me lorael.” (Johanes 18:4-9) Sei a uchul me ngdiak el mechas a rengud er a tekingel a Pontius Pilatus er a lesa blekengel a Jesus er a taem er a ludechemii e lomekcharm er ngii, e ngdilu el kmo: “Mesang, ngkakid el chad!”​—Johanes 19:4, 5.

□ Kau ke bekeu el meruul er a tekoi sel bo el kirem el meruul er ngii?

Aikang me a kuk bebil er a blekerdelel a Jesus a uchul me ngii a cherrungel el kerebai el kired. A lsekum e kede kongei el mo oltirakl a blekerdelel, e kede mo dmeu a rengud e ungil el chad. Ngoeak tiaikid el rolel e a apostol el Petrus a milengelechel er a Rekristiano el mo oltirakl a blekeklel a Jesus. Kau ke melasem el oltirakl a blekeklel a Jesus?

Nglmuut el Klou a Belkul er a Di Kerebai

A omerellel a Jesus a lmuut el klou a belkul er a di kerebai el doltirakl er ngii. Ngdilu el kmo: “Ngak a rael, e klemerang, e klengar; me ngdiak a chad el mora Chedam a lak lokiu ngak.” (Johanes 14:6) Ngulechotii a klemerang el kirel a Dios el mekengii a rolel e kede mo kmeed er Ngii, e dirrek el milsterir a reblak a rengrir a techall el mo nguu a diak a ulebengelel el klengar.​—Johanes 3:16.

A Jesus er a losaod er a uchul e ngmlei er tia el chutem, e ngdilu el kmo: “El ua Ngelekel a chad el mlei el diak el kirel siungel, e ngbai kirel mesiou, e mengkengkii a klengar er ngii el ngbetir ar betok.” (Matteus 20:28) Me sera letengetengii a klengar er ngii, e ngmiluchelii a uchetemel a techall er a diak a ulebengelel el klengar el kirel a klechad. Me a derta er kid ngera kired el meruul me bo dengai a klungioled er tia el techall? A Jesus a milsaod el kmo: “A diak a ullebengelel klengar tiakid el bo lodengelkau el dital meral Dios, ma Jesus Kristus el ngikel mulderchii.”​—Johanes 17:3.

Nguaisei, a bo dodengelii a Jesus e doltirakl er a rolel a klengar er ngii e dolecholt a klaumerang er kid er a tengetengel a di bebil er a rolel e kede nguu a diak a ulebengelel el klengar. Aki olengit er kau me mongoit a taem el mesuub er a Biblia, el ngii a meskid tia el klemedengei e molasem el oltaut aike el lolekoi, el ua lurruul er ngii a Jesus.

A blekerdelel a klengar er a Jesus a osisecheklid el kmo ngkired el mo ua ngera el chad. A kodellel a sebechel el kikidid er a klengit me a blsel el ngii a kodall. (Rom 6:23) Ngkmal klou el chelebuul a lsekum e ngdiak dodengelii a klungiolel a kerebil a Jesus Kristus! Me nguaisei, e me lak dekengei a ngii di el chelsengud me a sebekreng er a klengar el mo uchul e kede oridii tia el techelled el mo merael el oltirakl er a kerebai er ngike el kot el mesisiich el chad el mla kiei er a chutem​​—el Jesus Kristus.

[Footnote]

[Siasing er a 5 el llel]

A Jesus a mle tabesul a klengar er ngii . . .

e mle beot er a rechad el mo er ngii . . .

e mle chubechub