“A Jesus er a Nazareth . . . a merael a chisel el chad el ngar er a reksi.”​—H. G. Wells, el chad er a England el meluches a reksi.

“A Kristus . . . a ileakl el ngar er a uchei er a rebek el merael a chisir el chad er a klteketel a reksi er a klechad.”​—Philip Schaff, el chad er a Switzerland el mesuub a klechelid me a reksi.

NGTECHANG a rredemelel a okedongall el kot el mesisiich el chad el mla kiei er tia el chutem? Kede mekerang e dobedebii a klisichel a chad? Ngoeak a klsoldau er ngii? Ngklisichel a bedengel? Ngllemesel a rengul? Me a lechub e ngtekingel me a omerellel me a kerebai el lolecholt er ngii el mo er a rechad?

Momtab a tekingir a remelluches a reksi me a rehakase me a remellomes a rengrir me a rechad er a omeluches me a remengeteklel a politiks me a lmuut el bebil​—er a irechar el me er a chelechang⁠—el bla ledung el kirel a chad er a Nazareth el Jesus Kristus:

“Ngsebeched el oumerang el kmo ngike el kot el mesisiich el chad er a reksi er a beluulechad a Jesus er a Nazareth, el diak di lolekoi el kirel aika el eru el telael el rak, e ngbai kirel a cherrengelel a reksi er a klechad.”​—Reynolds Price, el chad er a Merikel el meluches e dirrek el merriter a tekoi er a Biblia.

“A chad el mle cherrungel a di mle ngii el lodersii el tenget el mlo uchul a klungiolir a rebebil, el uldimukl er a recherrouel e dirrek el mlo olbatel er a beluulechad. Ngkmal mle cherrungel el omeruul.”​—Mohandas K. Gandhi, el mengeteklel a politiks me a klechelid er a beluu er a India.

“Sera kngalek, e ak milsuub er a Biblia me a Talmud. Ak chad er a Judea, engdi ngkmal mechas a renguk er ngika el chad er a Nazareth.”​—Albert Einstein, el hakase el mlechell er a beluu er a Dois.

“A osengek er a Jesus a kmo ngii a ngike el kot el merael a chisel el chad er aika el mereko el reksi er a klechad, el ngii a Ngelekel a Dios e dirrek el Ngelekel a Chad. A rokui el tekingel me a omerellel a meklou a ultutelel el kired er a chelechang, e tiang a tekoi el diak a chad el mla kiei me a lechub e ngmla mad el sebechel el mekesiur.”​—Tekingel a Sholem Asch, el chad er a omeluches el mlechell er a Poland. A llechukl er a italics a ngar er a Christian Herald.

“A chelsel a okedei me a eim el rak er a klengar er ngak, e ngdimlak kuumerang a ngii di el ngerang. E a eim el rak er a mla me mong, e ngmlo er ngii a klaumerang er ngak. Ak mlo oumerang a osisecheklel a Jesus me a klengar er ngak el rokir a mlengodech.”​—Count Leo Tolstoy, el chad er a Rosia el meluches e merriter a uldasu.

“A klengar er a [Jesus] a kot el klou a klisichel el lomekrael a klengar er a rechad er tia el chutem el melemolem er a uchelel el mo lmuut er a ngar er a medad el klebesei.”​—Kenneth Scott Latourette, el chad er a Merikel el meluches a reksi me a babier.

“Kede omes er a cheldechedechal a Jesus el ua cheldecheduch el chelid e lemerekong? Ngkmal diak, e le tiang a mera el cheldecheduch. El mo lmuut er a chisel a Socrates me ngdirrek el diak el sebechel el mo mekesiur a chisel a Jesus Kristus.”​—Jean-Jacques Rousseau, el chad er a Furans el merriter a uldasu.

Me ngbleketakl el ngike el chad el rredemelel a ungil el kerebai er a klengar er kid a Jesus Kristus. A Paulus, el mellomes a rengul el chad er a kot el dart el rak e mlengilt er a Jesus el mo oltirakl er ngii e mo ouchais a chisel el mo er a bek el renged, a mengelechel er kid el mo “melanges” er a Jesus. (Hebru 12:2; Rellir 9:3) Ngera ngosisecheklid er ngii a Jesus el kirel a klengar? Ngmekera blekerdelel a klengar er ngii e mo uchul a klungioled?