“Ngkakid a mesiungek, . . . ng ngikel bla kngiltii el obotech a renguk er ngii.”​—ISAIA 42:1.

1. A rechedal a Jehovah te melisiich er tir el mo mekerang sel lolekeed a Chedaol el Blsoil, e ngera uchul?

 SEL bo lolekeed a taem el dongedaol er a kodellel a Kristus, e a rechedal a Dios a ungil a bo loltirakl a omellach er a Paulus el mo “melanges ra Jesus el uchelel e orekil a kloumera er kid.” A Paulus a dilechelii el kmo: “Molatk er ngikel uluutekangel choua ikal odechelakl rar mekngit, el kirel me lak bo mechitechut e le kekere rengmiu.” (Hebru 12:2, 3) A dekerekikl el omes er a blakerreng er a Kristus el blo el rekir el oeak a tengetengel a sebechel el dul ngosuterir a rengellitel el Kristiano me a rekuk bebil er a sib el obengterir el melemolem el mesiou er a Jehovah el oba blakerreng e ‘diak bo lemechitechut.’​—Momekesiu er a Galatia 6:9.

2. Ngera sebeched el suub el oeak a ulochel a Isaia el kirel a Ngelekel a Dios?

² Ngoeak a profet el Isaia, e a Jehovah a ulemekreng a kakerous el ulaoch el melutk er a Ngelekel. Aike el ulaoch a mo ngosukid el mo “melanges ra Jesus el uchelel e orekil a kloumera er kid.” a Ngulemeketakl a blekerdelel me a ringel el lechilarm me a klebkellel el ua King er kid e Osebeled. Ngmo melisiich a klemedengei er kid el kirel a Chedaol el Blsoil el bo dongedaol er ngii er a chelecha el rak er a Ongeua el Ureor el April 9, er a uriul er a ngeltel a sils.

A Mesiou a Obeketakl el Kmo Ngtechang

3, 4. (a) Ngar er a babier er a Isaia e a tekoi el “mesiou” ngmillutk er a ngerang? (b) Ngmekerang a Biblia a lebeketeklii el kmo ngtechang ngike el Mesiou el ngar er a Isaia 42, 49, 50, 52, me a 53 el bliongel?

³ Tia el tekoi el “mesiou” a betok el taem el debetik er ngii er a babier er a Isaia. A lebebil er a taem e ngmelutk er ngii el profet. (Isaia 20:3; 44:26) E a lebebil e ngmelutk er a cherrengelel a renged er a Israel me a lechub e ng Jakob. (Isaia 41:8, 9; 44:1, 2, 21) Engdi ngkuk mekerang aike el kmal merael a chisel el ulaoch el kirel a Mesiou el llechukl er a Isaia 42, 49, 50, 52, me a 53 el bliongel? A Beches el Renged a kmal ungil el meketeklii el kmo ngtechang ngika el Mesiungel a Jehovah el losaod er ngii aika el bliongel. El ua tiang, ngike el ngar er a bab el chad er a Ethiopia el lolekoi er ngii a babier er a Rellir er a Rechapostol a milenguiu er a ta er aikaikid el ulaoch er a lemodurech er a reng a Filipus el mo omes er ngii. Ngii el ngar er a bab el chad a milenguiu er a bades el dodengelii er a chelechang el ngar er a Isaia 53:7, 8, me nguleker er a Filipus el kmo: “Ak ulengit er kau mo msbedak el kmo, a profet ngmellekoi er tial tekoi el kirel techang, ngmellekoi ra di ngii alechub e ngmellekoi ra ngodech el chad?” A Filipus a di mle mereched el mesaod el kmo a Isaia a millekoi el kirel a Messias, el Jesus.​—Rellir 8:26-35.

⁴ A Jesus er a ledirk tolechoi, e a melemalt el chad el Simeon a ngklel a milengedecheduch el oeak a klisichel a chedaol el reng el  kmo “ngiil ngalek el Jesus” a mo “llomes er chocholt el omekllomes rar Chisentail” el ua meldung er a ulaoch el ngar er a Isaia 42:6 me a 49:6. (Lukas 2:25-32) Ngdirrek aike el tekoi el lurruul el mo er a Jesus el ulemekrur er ngii er sel kesus er a lemukcharm a meldung er a ulaoch er a Isaia 50:6-9. (Matteus 26:67; Lukas 22:63) Uriul er a Pentekost 33 C.E., e a apostol el Petrus a mle ungil el meketeklii a Jesus el kmo ngii a ngike el “Mesiungel” a Jehovah. (Isaia 52:13; 53:11; monguiu er a Rellir 3:13, 26.) Ngera sebeched el suubii er aika el ulaoch el kirel a Messias?

A Jehovah a Olisechakl er a Mesiungel

5. Ngera el osisechakl a lengilai ngii el Mesiou?

⁵ A ta er aike el ulochel a Isaia el kirel ngii el Mesiungel a Dios a meketeklii sel kmes el deluill er a Jehovah me a Ngelekel er a uchei er a be el chad er tia el beluulechad. (Monguiu er a Isaia 50:4-9.) Ngii el Mesiou a di mle ngii el ochotii el kmo a Jehovah a millemolem el olisechakl er ngii er a ledu el kmo: “A bek el tutau e ng rullak el mo semeriar el orrenges er sel bo lolisechakl er ngii er ngak.” (Isaia 50:4) Ngar er tiakid el taem e ngii el Mesiungel a Jehovah a ullerenges er a Demal e milsuub er ngii el mo bekongesenges el disaiplo. Ngmera el mle ileakl a techellel el mlosisechakl er ngike el Ulemeob er a uldekial a eanged me a chutem!

6. Ngmilekerang ngii el Mesiou el olecholt er a cherrungel el otireklel er a Demal?

⁶ Ngar er tia el ulaoch e ngii el Mesiou a millekoi el kirel a Demal el kmo, “A Rubak el DIOS [el Jehovah].” Tiang a ochotii el kmo ngii el Mesiou a mla suub aike el uchetemel a klemerang el kirel a klisichel a omengederederel a Jehovah er a uldekial a eanged me a chutem. A lolecholt er a cherrungel el otireklel er a Demal e ngdilu el kmo: “A Rubak el DIOS a mla meskak a sekutaberreng, me ng dimlak kumtok ma lechub e kubult el mo cheroid er ngii.” (Isaia 50:5) Ng “mlar bita er ngii [el Jehovah] el di ua chad er omelib el blai” me ngulemeob er a bek el tekoi me a rechad. Ngika el “chad er omelib el blai” a mle ‘blechoel el dmeu a rengul el ngar medal [a Jehovah]. Ng ungil a rengul er a beluulchad e obotech a rengul er a rechad el ngar ngii.’​—Osisechakl 8:22-31.

7. Ngera ochotii el kmo ngii el Mesiou a uleba ulterekokl el reng el kirel a ngelsuil a Demal er a taem el lechelebangel a ringel?

⁷ Tia el osisechakl el lengiluu ngii el Mesiou me a deuil a rengul el kirir a rechad a kiltmeklii me a lemei er a beluulechad e ngmlo sebechel el chobangel a meringel el ultok. Alta e ngmlo chelebangel a meringel el oldechelakl, engdi ngmillemolem el dmeu a rengul el meruul a soal a Demal. (Psalm 40:8; Matteus 26:42; Johanes 6:38) Ngar er a chelsel aike el bek el ringel el lechilebangel el ngar er a chutem e a Jesus a mle blechoel el oba ulterekokl el reng el kirel a kengei me a ngelsuil a Demal el mo er ngii. Ngdi ua aike el meldung er a ulochel a Isaia, a Jesus a mle sebechel el melekoi el kmo: “[A] Dios a di kmeed, me ng mo ochotak el diak a telemellek. Ng kol ngar ngii a bekeu el oltutakl er ngak? . . . A Rubak el DIOS [el Jehovah] a di ngii a mo [ngosukak].” (Isaia 50:8, 9) A Jehovah a ulterekokl el mera el ullengeseu er ngii el blak a rengul el Mesiungel er a klemengetel a omesiungel el ngar er tia el beluulechad el ua lolecholt er ngii a ta er a ulochel a Isaia.

A Omesiungel Ngii el Mesiou er a Chutem

8. Ngera ochotii el kmo a Jesus a mle ‘ngike el bla lengiltii’ a Jehovah el ua medung er a ulaoch er a Isaia 42:1?

⁸ A Biblia a ouchais er kid el kmo ngera dilubech er a lemetecholb a Jesus er a 29 C.E. el kmo: “A Chedaol Reng a . . . mlo metengel er bebul, e mlarngii a ngor el tilobed ra eanged el kmo, ‘Kau a betik ra renguk el Ngelekek; el odeuir a renguk.’ ” (Lukas 3:21, 22) A Jehovah a bleketakl el olecholt er ‘ngike el bla lengiltii,’ el ua lolekoi a ulochel a Isaia. (Monguiu er a Isaia 42:1-7.) Ngar er a omesiungel er a lengar er tia el beluulechad, e a Jesus a uleltaut er tia el ulaoch er a kmal ileakl el rolel. Ngar er a Evangkelio er a Matteus, e ngmillekoi a tekoi el debetik er a Isaia 42:1-4 e uleltaut er ngii el tekoi el mo er a Jesus.​—Matteus 12:15-21.

9, 10. (a) Ngmilekerang a Jesus er a loltaut er a Isaia 42:3 er a chelsel a omesiungel? (b) Ngmilekerang a Jesus e ochotii a llemalt er a lengar er a beluulechad, e oingerang e ngmo “toketekii a llemalt er a beluulchad”?

⁹ A remengeteklel a klechelid er a Judea a uluuketui er a redi chad er a beluu. (Johanes 7:47-49) Ngmle mekngit a omerellir el mo er tir me te mlo  ua “mechitechut” el “ousbech a ngesou.” Engdi Jesus a bai ullecholt a klechubechub er ngii el mo er a remechebuul. (Matteus 9:35, 36) Ngmilengemedaol er tir el kmo: “Mer ngak, kemiu el rokui el merengela ra ureor el mengol er choberaod el chellungel, me kungellemiu.” (Matteus 11:28) A Jesus a dirrek el ngiluu a llemalt el mo er a rokui el chad el oeak a lolisechakl er tir el kirel a osengel a Jehovah el kirel a ungil me a mekngit. (Isaia 42:3) Ngdirrek el ulechotii el kmo ngkired el oltaut a Llechul a Dios el oba tabesul el uldasu me a klechubechub. (Matteus 23:23) A Jesus a dirrek el ullecholt a llemalt el oeak a dimlak a omengetukel er ngii el ureor er a berkel a klumech el mo er a remerau me a remechebuul.​—Matteus 11:5; Lukas 18:18-23.

¹⁰ A ulochel a Isaia a dirrek el omeketakl el kmo ‘ngike el lengiltii’ a Jehovah a ‘mo meleketek er a llemalt er a beluulchad.’ (Isaia 42:4) Tiang a bo loruul er ngii er a kesai el taem er a ngar er a medad el ua King er a Rengedel a Messias, e bo lolekngemed a rokui el kabelment e lutechei er a melemalt el omengederederel. Ngmo kutmeklii a beches el beluulechad el “bo le kiei er ngii a llemalt.”​—2 Petrus 3:13; Daniel 2:44.

“A Llomes” me “a Telbiil”

11. Ngoeak a ngera el rolel e a Jesus a mle “llomes el mor a ikel beluu” er a chelsel a kot el dart el rak, e mekerang e uaisei el me lmuut er a chelecha el taem?

¹¹ A loltaut er a Isaia 42:6, e a Jesus a mera el milketeklii el kmo ng “llomes el mor a ikel beluu.” Ngar er a omesiungel el ngar er tia el beluulechad, e ngulemuchel el omesterir a Rechijudea a llomes er a klereng. (Matteus 15:24; Rellir 3:26) Engdi a Jesus a dilu el kmo: “Ngak a llomes ra belulechad.” (Johanes 8:12) Ngmlo llomes el dul kirir a Rechijudea me aika el renged er a beluulechad el dimlak di lomesterir a klemedengei er a tekoi er a klereng e lemerekong, e ngdirrek el mlo odersii a cherrungel el klengar er ngii el mo olubet el kirir a rokui el chad. (Matteus 20:28) A uriul er a okisel, e nguleldurech er a redisaiplo er ngii el mo ochotel el mo “ra bek lullebongel ra belulechad.” (Rellir 1:8) Ngar er a urerir er a berkel a klumech, e a Paulus me a Barnabas a millekoi el kirel a “llomes el mor a ikel beluu” e uleltaut er ngii er a ureor er a berkel a klumech el lurruul er ngii er a delongelir a redimlak el chad er a Judea. (Rellir 13:46-48; momekesiu er a Isaia 49:6.) Sel ureor a dirk lolemolem el merruul er ngii a rengellitel el odam er a Jesus el ngar er tia el chutem me a rekldemir el omerk er a llomes er a klereng el mo olengeseu er a rechad el mo oumerang er a Jesus el ngii a “llomes el mor a ikel beluu.”

12. A Jehovah ngmilekerang e mesterir a rechad a Mesiungel el ua “telbiil el obengterir a rokui el chad”?

¹² Ngar er sel osisiu el ulaoch e a Jehovah a dilu er a ngellitel el Mesiungel el kmo: “Ng okiu kau e ak mo rullii a telbiil el obengterir a rokui el chad.” (Isaia 42:6) A Satan a millemolem el blak a rengul el melemall er a Jesus el merrob er ngii me lak el cherrengelii a omesiungel el ngar er tia el chutem, engdi a Jehovah a ulemekerreu er ngii el mo lmuut er a kodellel. (Matteus 2:13; Johanes 7:30) A Jehovah a ulekisii a Jesus er a kodall e ngiluu el mesterir a rechad el ua “telbiil.” Ngii el telbiil a ulelterekokl er a kmo a blak a rengul el Mesiungel a Dios a mo melemolem el ua “llomes el mor a ikel beluu,” e mo oltobed er a rechad er a ilkolk er a klereng.​—Monguiu er a Isaia 49:8, 9. b

13. Ngoeak a ngera el rolel e a Jesus a uleltobed er “tirkel dengchokl er a chelsel a milkolk” el ngar er a omesiungel er tia el beluulechad, e mekerang e melemolem el meruul el uaisei?

 ¹³ A loltirakl er tia el telbiil e ngii el ngellitel el Mesiungel a Jehovah a mo “omok a mederir a re meiko,” e “rulleterir el mo mimokl tirkel dengchokl er a chelsel a milkolk el kelebus.” (Isaia 42:7) Ngar er a omesiungel er tia el beluulechad e a Jesus a mirruul er tiang er a lolecholt a siukang er a klsuul el klechelid e omerk a ungil el chais el kirel a Renged. (Matteus 15:3; Lukas 8:1) Ngrirelleterir a rechad er a Judea el mo mimokl er a klsuul el omengull me te mlo disaiplo er ngii. (Johanes 8:31, 32) Ngar er a osisiu el rolel e a Jesus a mla mesterir a rebetok el milliol el diak el chad er a Judea a ilmokl er a tekoi er a klereng. Nguleldurech er a rultirakl er ngii el mo ‘merael el mora rokuil renged el rulleterir ar chad el mo Obengkel,’ e tilbir el mo obengterir a rulebengkel “el mo lmuut era ullebongel ra belulechad.” (Matteus 28:19, 20) Me ngngar er a deruchellel el ngar er eanged e a Jesus Kristus a omtebechel er a berkel a klumech er a beluulechad el rokir.

A Jehovah a Mengebkall er Ngii el “Mesiou”

14, 15. Ngera uchul, e milekerang a Jehovah er a lekebkellii ngii el Mesiungel?

¹⁴ Ngar er a lmuut el ta er a ulaoch el kirel ngii el Ngellitel el Mesiou e a Jehovah a dilu el kmo: “A mesiungek a di mo ungil er a urerel; ng mo chetengakl e kmal mo kuoll.” (Isaia 52:13) A Jehovah a kilebkellii e le ngmle blak a rengul el olengesenges er a klisichel a omengederederel me a blakerreng er ngii el outekangel a kmal meringel el omelsemai.

¹⁵ A apostol el Petrus a milluches el kirel a Jesus el kmo: “Ngikel mlo ngmasech ra eanged e dengchokl ra kidekmel a Dios; mar anghel, ma ikel klisichel chomerreder, ma klisiich a chederdall er ngii.” (1 Petrus 3:22) Ngar er a osisiu el rolel, e a apostol el Paulus a milluches el kmo: “Ngmle bekongesenges el mo lmuut ra kodall, el sel kodall ra kerus. Misei a uchul ma Dios a mlengididai er ngii e milsa ngakl el ngarbab ra bek el ngakl, el kirel ma ikel bek el bkul a uach ra ikel ngara eanged ma chutem ma ngar cheungel a chutem bo le medeu ra ngklel a Jesus, ma bek el ngor bo lochotii el kmo, ‘A Jesus Kristus a Rubak,’ e le kebkellii a Dios el Chedam.”​—Filipi 2:8-11.

16. Ngmilekerang a Jesus a le “chetengakl e kmal mo kuoll” er sera 1914, e ngera ngmirruul el me lmuut er a chelechang?

¹⁶ Sera 1914 e a Jehovah a liluut el menga el kobkellii a Jesus. Ngmlo “chetengakl e kmal mo kuoll” er sera taem el Jehovah a mildengcheklii el ua King er a Rengedel a Messias. (Psalm 2:6;  Daniel 7:13, 14) Seikid el taem el mei, e a Kristus a mlo ‘mengedereder er a [delongelir a] re cherrouel.’ (Psalm 110:2) A kot e ngmiltebechelii a Satan me a remekngit el reng er ngii, e mildekelterir el mei er a beluulechad. (Chocholt 12:7-12) E seikid e ngii el Jesus a mlo ua Klou el Sairus el uleltobed er a rengellitel el odam er ngii er tia el beluulechad er a eungel a klisichel a “kloul Babilon.” (Chocholt 18:2; Isaia 44:28) Ngomekrael er a ureor er a berkel a klumech el mlo uchul e te mechudel a rengellitel el odam er ngii me a rebetok el milliol el kuk bebil er a sib, el tir a blak a rengrir el kldemir a “kekerel delebechel.”​—Chocholt 12:17; Johanes 10:16; Lukas 12:32.

17. Ngera kede mla suubii el me lmuut er a chelechang er a ulochel a Isaia el kirel a “mesiou”?

¹⁷ A omesubel aika el kmal ungil el ulaoch er a babier er a Isaia a ulterekokl el kilungii a omereng el saul er kid el kirel a King er kid e Osebeled el Jesus Kristus. A blekongesenges er ngii er a chelsel a omesiungel el ngar er tia el beluulechad a olecholt a osisechakl el lengiluu er a Demal er a uchei er a lemei er a beluulechad. Ngmileketeklii el kmo ngii a mera el “llomes el mor a ikel beluu” el oeak a omesiungel me a dirrek el ulekrael el lurruul er ngii el kirel a ureor er a berkel a klumech el me lmuut er a chelecha el sils. Ngdi ua aike el bo domes er a ongingil el suobel, a lmuut el ta er a ulaoch el kirel ngii el ngellitel el mesiou a olecholt el kmo ngmo chuarm e mo odersii a klengar er ngii el kirel a klungioled. E ngii el tekoi a kmal kired el ‘melatk’ sel bo lekeed a blsechel a Chedaol el Blsoil el kirel a kodellel.​—Hebru 12:2, 3.

[Footnote]

Rolel a Domelekl a Suobel

• Ngtecha ngii el “mesiou” el lullekoi er ngii a Isaia, e kede mekerang e medengelii tiang?

• Ngera el osisechakl a lengilai ngii el Mesiou er a Jehovah?

• Ngmekerang a Jesus e “llomes el mor a ikel beluu”?

• Ngmilekerang ngii el Mesiou e mukebkall?

[Aike el Ker er a Suobel]

[Siasing er a 21 el llel]

A Filipus a mileketeklii a “mesiou” el losaod er ngii a Isaia el kmo ng Jesus el Messias

[Siasing er a 23 el llel]

Ngua ngellitel el Mesiungel a Jehovah, e a Jesus a ulechotii a klechubechub er ngii el mo er a remechebuul

[Siasing er a 24 el llel]

A Jesus a mlukebkall er a Demal er sera bo el King er a Rengedel a Messias