“[A Jesus] ngmlo ngmasech ra rois . . . mar Ubengkel a mocha kmeed er ngii. Me . . . [ng] olisechakl er tir.”​—MATTEUS 5:1, 2.

1, 2. (a) Ngoeak a ngera el blekeradel e a Jesus a ultebedii a Cheldechedechal el ngar er a Rois? (b) Ngmilekerang er a lomuchel er tia el cheldechedechal?

 NGAR er a rak er a 31 C.E., e a Jesus a ullengull er a omesiungel er a Galilea e mlo meruul er a Baskua el ngar er a Jerusalem. (Johanes 5:1) Sera luuturiul er ngii el mo er a Galilea e ngmilluluuch el ta el kesus el ullengit a ulekrael er a Dios el kirel a omelilt er a remo 12 el apostol er ngii. Me a bo el kukuk e a klou el seked a mlo kldibel er a Jesus e ulemes er ngii el omekungil er a resmecher. Ngmle dengchokl er a uchul a rois e ullisechakl er a redisaiplo er ngii me a rebebil er a rechad.​—Matteus 4:23–5:2; Lukas 6:12-19.

² A Jesus a ulemuchel er a osisecheklel​—sel Cheldechedechal el ngar er a Rois—​el ulechotii el kmo a deurreng a mo er ngii el oeak a ungil el deluill el obengkel a Dios. (Monguiu er a Matteus 5:1-12.) a A deurreng ‘a blekerdelel a chad el omuchel el ungil e merael el dmeu a rengul.’ A kltiu el rolel a deurreng el Jesus a milsaod a ochotii a uchul me a Rekristiano er a chelechang a ngmai a deurreng me a klungiolir el ua tirke el Kristiano er a 2,000 el rak er a mla me mong. Ka me bo dosaod a derta er aika el tekoi.

“Tirke el Kerekikl er a Lousbech a Tekoi er a Klereng”

3. Ngera belkul a dekerekikl a tekoi er a klereng er kid?

³ “Ngdmeu a rengrir tirke el kerekikl er a lousbech a tekoi er a klereng, e le rengedel a eanged a kloklir.” (Matteus 5:3) Tirke el kerekikl a tekoi er a klereng a melechesuar el kmo te ousbech a ulekrael me a klechubechub er a Dios.

4, 5. (a) Ngera uchul me tirke el kerekikl a tekoi er a klereng er tir a dmeu a rengrir? (b) Kede mekerang e meleketek a tekoi er a klereng er kid?

⁴ Tirke el kerekikl er a tekoi er a klereng er tir a dmeu a rengrir, “e le rengedel a eanged a kloklir.” Tirke el disaiplo er a Jesus er a lekengei el kmo ngii a Messias e te ngiluu a techellir el mo mengedereder er a Rengedel a Dios el ngar er a eanged. (Lukas 22:28-30) Me a debo er a eanged el obengekel a Kristus me a lechub e kede oba omelatk el mo kiei er a chutem el diak a ulebengelel el chederdall er a Rengedel, me kid a dirrek el sebeched el dmeu a rengud a lsekum kede kerekikl a tekoi er a klereng er kid, e dirrek el ultuil a omeltked er a Dios.

⁵ Ngdiak el rokui el chad a kerekikl er a tekoi er a klereng er tir, e le te betok a diak a klaumerang er tir, e dirrek el diak loba omereng el saul el kirel aika el chedaol el tekoi. (2 Thesalonika 3:1, 2; Hebru 12:16) A rolel a doleketek a tekoi er a klereng er kid a oeak sel leblak a rengud el mesuub er a Biblia, e teloi er a ureor el meruul er a disaiplo, e dirrek el mo er a bek el miting er a Rekristiano.​—Matteus 28:19, 20; Hebru 10:23-25.

Tirke el Ngar er a Klengiterreng a “Dmeu a Rengrir”

6. Te ngera tirke el “ngar er a klengiterreng,” e ngera uchul me “ngdmeu a rengrir”?

⁶ “Ngdmeu a rengrir tirke el ngar er a klengiterreng, e le te mo mechelaod.” (Matteus 5:4) “Tirke el ngar er a klengiterreng” a di ua tirke el kerekikl er a tekoi er a klereng er tir. A kngtil a rengrir a kirel aika el mekngit el omeruul me a blekeradel e  le ngdiak el cherrungel el klechad a uchul. Engdi ngera uchul me tirkang a “dmeu a rengrir”? E le te olecholt er a klaumerang er tir er a Dios me a Kristus e ngar er ngii a ungil el deluill er tir me a Jehovah.​—Johanes 3:36.

7. Ngkirel mo ua ngerang a osenged el kirel a beluulechad er a Satan?

⁷ Me a derta er kid, ngmekngit a rengud el kirel tia el chebirukel el blekerdelel a beluulechad er a Satan? Ngua ngerang a uldesued el kirel aike el tekoi el lolisiich tia el beluulechad? A apostol el Johanes a milluches el kmo: “Ma ikel rokuil el ngara belulechad, el ngibes ra tech, ma ngibes ra mad, ma ilad er a keruul a dimlak le ngara Chedam el mei.” (1 Johanes 2:16) Engdi ngkuk mo ua ngerang a uldesued sel bo dolechesuar a tekoi er a klereng er kid el mocha oltirakl er a “reng ra belulechad,” el ngii a sel mesisiich el omengesuseu el sebechel el choitikikii a klechad el mo cheroid er a Dios? A leuaisei, e me dolemolem el diak demekimd el meluluuch, e dosuub er a Tekingel a Dios, e dirrek el olengit a ngeso er a remechuodel er a ongdibel. Alta e kede chelebangel a ringel, engdi sel dolekeed er kid er a Dios e kede mo mechelaod.​—1 Korinth 2:12; Psalm 119:52; Jakobus 5:14, 15.

“Ngdmeu a Rengrir a Remedemedemek a Rengrir”!

8, 9. Ngera belkul a bo el medemedemek a rengud, e ngera uchul me a remedemedemek a rengrir a dmeu a rengrir?

⁸ “Ngdmeu a rengrir a remedemedemek a rengrir, e le te mo oudiukes er a beluulechad.” (Matteus 5:5) A delemedemek el reng me a lechub a ngar er a eou el reng a diak el lolekoi el kirel a mechitechut me a lechub e ngbedektall. (1 Timoteus 6:11) A lsekum e ngmedemedemek a rengud e kede olecholt er a blekongesenges sel doltirakl a llechul a Jehovah e kongei a ulekrael er ngii. A delemedemek el reng a dirrek el mocholt sel doruul a tekoi el obengterir a rekldemed er a klaumerang me a rebebil, me a choua itia el delemedemek a oltirakl a omellach er a apostol el Paulus.​—Monguiu er a Rom 12:17-19.

⁹ Ngera uchul me a remedemedemek a rengrir a dmeu a rengrir? A Jesus a kmo, “Te mo oudiukes er a beluulechad.” E ngii a kot el rredemelel a mo oudiukes er a beluulechad. (Psalm 2:8; Matteus 11:29; Hebru 2:8, 9) Me nguaisei, e tirke el medemedemek a rengrir el “obengekel a Kristus” el ngar er a eanged a dirrek el mo oudiukes er tia el beluulechad. (Rom 8:16, 17) El ngar er a eungel a omengederederel a Rengedel a Jesus, e a rebetok el medemedemek a rengrir a mo kiei er tia el chutem el dmeu a rengrir el mo cherechar.​—Psalm 37:10, 11.

10. Ngmekerang e a delecherecher el reng a sebechel el mo uchul a telemellel a deluill, e dirrek el oriid a techelled er a ngerachel?

¹⁰ Me kid a kired el mo medemedemek a rengud el ua Jesus. Engdi ngkuk ua ngerang a lsekum e ngmedecherecher a rengud? Tia el delecherecher el reng a sebechel el rulleterir a rechad el mo chetirir el obengked. A lsekum kid a odam el soad el mo olab a ngerachel er a ongdibel, e tia el delecherecher el reng a sebechel el mo uchul e ngmo diak a techelled el ngmai a ngerachel er a ongdibel. (1 Timoteus 3:1, 3) A Paulus a dilu er a Titus me lomeklatk er a Rekristiano er a Krete me lak “longaititekangel, e bai le sorir a budech e dileblechoel lolecholt ra delemedemek el mora rokuil chad.” (Titus 3:1, 2) Me tia el delemedemek el reng a kmal sebechel el mo uchul a klengeltengat el mo er a rebebil!

 Te Songerenger el kirel a “Llemalt”

11-13. (a) Ngera belkul a klengerenger me a chederreng el kirel a llemalt? (b) Te mekerang e mo “medinges” tirke el songerenger e meched a rengrir el kirel a llemalt?

¹¹ “Ngdmeu a rengrir tirke el songerenger e meched a rengrir er a llemalt, e le te mo medinges.” (Matteus 5:6) A “llemalt” el lulsaod er ngii a Jesus a blekeradel el mo meruul a tekoi el oltirakl a soal a Dios me a llechul. Ngike el milluches er a Psalm a kmo “a renguk a chormang el di oureng” el kirel a melemalt el kerrekerilel a Dios. (Psalm 119:20) Kid kede oureng el soad el nguu a llemalt e le kede omes er ngii el klou a ultutelel?

¹² A Jesus a millekoi el kirir tirke el songerenger e meched a rengrir er a llemalt el kmo te mo dmeu a rengrir e le te mo “medinges.” E tiang a dilubech er a uriul er a Pentekost er a 33 C.E. er a lemetengel a chedaol el reng er a Jehovah el omuchel el “mok a mederir ar chad ra belulechad el kirel . . . a llemalt.” (Johanes 16:8) Ngoeak a chedaol el reng, e a Dios a ulemekrael er a rechad el mo meluches aike el Bades el ngar er a Beches el Renged el ngii a kmal klou a ultutelel el kirel el “chomekrael el mora llemalt.” (2 Timoteus 3:16) A reng er a Dios a dirrek el ngosukid el “moubail er ngikel beches el chad, el ulebeob el okesiul a Dios ra meral llemalt ma cheledaol.” (Efesus 4:24) Ngkmal mengelaod a rengud sel dodengei el kmo tirke el losiik a klausubes el kirel a kngterir el oeak a olubet el tengetengel a Jesus a sebechir el rullii a ungil el deluill er tir me a Dios.​—Monguiu er a Rom 3:23, 24.

¹³ Kid el oba omelatk el mo kiei er tia el chutem el songerenger e meched a rengud el kirel a llemalt a mo medinges. Engdi chelechang, e me doutekangel el kiei el oltirakl a llechul a Jehovah. A Jesus a dilu el kmo: “Mo momuchel losiik ra rengedel a Dios ma llemeltel.” (Matteus 6:33) A doruul el uaisei el mo mechesang el meruul er a urerel a Dios e a rengud a mo mui er a deurreng.​—1 Korinth 15:58.

A Uchul me a “Rechubechubechad” a Dmeu a Rengrir

14, 15. Ngmekerang a dolecholt er a klechubechub, e ngera uchul me a “rechubechubechad” a dmeu a rengrir?

¹⁴ “Ngdmeu a rengrir a rechubechubechad, e le ngmo er tir a klechubechub.” (Matteus 5:7) Tirke el chubechubechad a olecholt er a klechubechub el mo er a rebebil. Nguleak a mengasireng el rolel e a Jesus a ngilsuterir a rebetok el chormang, e le ngklechubechub er ngii a uchul. (Matteus 14:14) A klechubechub a mo er ngii sel lsekum a chad a ousubes er tirke el tilemellii a rengul, el ua Jehovah el ousubes er tirke el mla obult er a kngterir. (Exodus 34:6, 7; Psalm 103:10) Ngsebeched el ochotii a klechubechub el oeak a ungil el cheldechedechad me a ungil el omerelled el mo uchul a klungiolir a rebebil. A kot el ungil el rolel  e kede olecholt er a klechubechub a sel douchais er a klemerang er a Biblia el mo er a rechad. Me a Jesus a mlo chubur a seked me “ngulemuchel lolisechakl er tir a betok el tekoi.”​—Markus 6:34.

¹⁵ Ngar er ngii a ungil el uchul e kede kongei er sel tekingel a Jesus el kmo: “Ngdmeu a rengrir a rechubechubechad, e le ngmo er tir a klechubechub.” A lsekum e kede olecholt er a klechubechub el mo er a rebebil e te ulterekokl el mo meruul er a osisiu el tekoi el me er kid. Ngsebeched el mo melechesuar el kmo a klechubechub el dulechotii el mo er a rebebil a sebechel el mo uchul e ngdiak demukerrekeriil er a Dios. (Jakobus 2:13) A klausubes er a klengit me a diak a ulebengelel el klengar a di kirir a rechubechubechad.​—Matteus 6:15.

A Uchul me a “Reklikiid a Rengrir” a Dmeu a Rengrir

16. Ngera belkul a bo el ‘klikiid a rengud,’ e te mekerang e mo mesa Dios tirke el klikiid a rengrir?

¹⁶ “Ngdmeu a rengrir a reklikiid a rengrir, e le te mo mesa Dios.” (Matteus 5:8) A lsekum e ngklikiid a rengud e tiang a mocholt er a omerelled me a urunguled me a moktek er kid. Kede mo olecholt er a “bltikerreng.” (1 Timoteus 1:5) Me a leklikiid a rengud, e kede mo “mesa Dios.” Tiang a diak el belkul a kmo kede mo mesang er a medad, “ele ng diak a chad el mesa [Dios] e di chad.” (Exodus 33:20) A Jesus a mle cherrungel el olecholt er a blekerdelel a Dios a uchul me ngmle sebechel el melekoi el kmo: “Ngikel mla mesekak a mla mesa Chedam.” (Johanes 14:7-9) Me kid el mesiungel a Jehovah el ngar er tia el chutem a sebeched el “mesa Dios” el oeak sel domtab a omerellel el me er kid. (Job 42:5) A rengellitel a mo mesa Demerir el ngar er a eanged sel bo lebekiis el mo nguu a chelechad el reng.​—1 Johanes 3:2.

17. Ngerang mo rullii er kid a bo leklikiid a rengud?

¹⁷ A klikiid el reng a bliochel e melemalt, me ngdiak loruul a tekoi el mekngit er a osengel a Jehovah. (1 Kronika 28:9; Isaia 52:11) A lsekum e ngklikiid a rengud, e a tekinged me a omerelled a ochotii el kmo a omesiunged el mo er a Jehovah a bliochel.

“A Remeruul a Budech” a Mo Ngelekel a Dios

18, 19. Ngua ngerang a blekerdelir a “remeruul a budech”?

¹⁸ “Ngdmeu a rengrir a remeruul a budech, e le te mo okedongall el kmo ‘ngelekel a Dios.’” (Matteus 5:9) “A remeruul a budech” a medangch el oeak a omerellir. A lsekum e kede ua tirke el chad el Jesus a millatk er tir e kede meruul a budech e diak ‘doba mekngit el omtechei a mekngit.’ Kede bai ‘diblechoel kaiuetoir a ungil.’​—1 Thesalonika 5:15.

¹⁹ A tekoi er a Griik el “meruul a budech” el ngar er a Matteus 5:9 a belkul a kmo “chad er a budech.” A bo deteloi er a remeruul a budech, e ngkired el melisiich er a budech. A rechad er a budech a diak loruul a ngii di el ngerang el “melemall a klausechelei.” (Osisechakl 16:28) A lsekum kede meruul a budech, e ngkired el omuchel el ‘blak a rengud me bo le budech a delongeled kid ma rokuil chad.’​—Hebru 12:14.

20. Te rua techang a “ngelekel a Dios” er a chelechang, e rua techang a di kmedung e te mo ngelekel a Dios?

²⁰ A remeruul a budech a dmeu a rengrir e le “te mo okedongall el kmo ‘ngelekel a Dios.’” A reblak a rengrir el ngellitel el Kristiano a bla lorodel er tir a Jehovah el mo “ngelekel.” Ngmla mo er ngii a mekreos el deluill er tir el obengkel a Jehovah el ua lengelekel e le te olecholt a klaumera er tir er a Kristus e mengull er “a Dios ra bltikerreng ma budech.” (2 Korinth 13:11; Johanes 1:12) E kuk mekerang el kirir tirke el chedal a Jesus el chad er a budech el “kuk ngodech el sib”? Te mo ngelekel a Jesus el ngii a ua “Chedam er a Cherechar” er a  chelsel a Ta el Telael el Rak er a Omengederederel, engdi ngar er a ulebengelel e ngmo olluut er tir el mo er a Jehovah me te mo ngelekel el ngar er a cherrungel el rolel, me ngii el Jesus a dirrek el mo chederdall er a Dios.​—Johanes 10:16; Isaia 9:6; Rom 8:21; 1 Korinth 15:27, 28.

21. Ngkirel el mo ua ngerang a omerelled a lsekum kede “ngar era Reng”?

²¹ A lsekum kede “ngar era Reng,” e a omerelled el meruul a budech a sebechel el meues er a rechad, me ngdiak “de kaiuengasechereng.” (Galatia 5:22-26) Kede bai mo blak a rengud el mo ‘budech kid ma rokuil chad.’​—Rom 12:18.

Ngdmeu a Rengrir Alta e Te Modechelakl!

22-24. (a) Ngera uchul me tirke el modechelakl el kirel a llemalt a dmeu a rengrir? (b) Ngera kede mo mesaod er aike el ongingil el eru el suobel?

²² “Ngdmeu a rengrir tirke el modechelakl el kirel a llemalt, e le rengedel a eanged a kloklir.” (Matteus 5:10) A Jesus a liluut el dochelii tiang el kmo: “Ngdmeu a rengmiu a loltuub er kemiu a rechad el kirek, el oldechelakl er kemiu e lolekoi a bek el blekeradel el mekngit el bedul kemiu el di klsuul. Moldeu, e lodeu a rengmiu, e ngklou el omeksaul el bo mnguu er a eanged, a reprofet el di mla chad er kemiu a dirrek el mlodechelakl.”​—Matteus 5:11, 12.

²³ A Rekristiano a medengei el kmo te mo chelebangel a ultok e mukringel el kirel a “llemalt,” el ua reprofet er a Dios er a irechar. Me a bo leblak a rengud el outekangel aikang e ngmo uchul e kede oldeu er a rengul a Jehovah e mengebkall er ngii. (1 Petrus 2:19-21) Ngdiak el sebechel a ngii di el ringel el tomellii a deurreng er kid el mesiou er a Jehovah er a chelechang me a ngar er a medad el klebesei. Ngkmal diak el sebechel el ngosengesii a deurreng er tirke el mo mengedereder er a Rengedel a eanged el obengekel a Kristus, me a lechub e ngsel deurreng el mo er tirke el oba omelatk el mo kiei er tia el chutem el mo cherechar el ngar er a eungel sel kabelment. Choua ika el klengeltengat a mera el olechotel a klungiolel a rengul me a blekerurau er a Dios.

²⁴ Ngkmal dirk betok a sebeched el suub er sel Cheldecheduch el Ngar er a Rois. Ngbetok el kakerous el suobel a bo dosuub er aike el ongingil el eru el suobel. Ka me bo desang el kmo ngmekerang a doltaut aika el tekingel a Jesus Kristus.

Ngmekerang a Omonger?

• Ngera uchul me ‘tirke el kerekikl a tekoi er a klereng’ a dmeu a rengrir?

• Ngera uchul me a “remedemedemek a rengrir” a dmeu a rengrir?

• Ngera uchul me a Rekristiano el modechelakl a dmeu a rengrir?

• Ngera el deurreng el lulsaod er ngii a Jesus a kmal millisiich er kau?

[Aike el Ker er a Suobel]

[Siasing er a 11 el llel]

Aike el kltiu el rolel a deurreng el lulsaod a Jesus a kmal meklou a ultutelel er a chelechang el di ua ngar er a mong

[Siasing er a 12 el llel]

A kot el ungil el rolel e kede olecholt er a klechubechub a oeak a douchais er a klemerang er a Biblia el mo er a rechad

[Footnote]