“Itirikai tirikel obengkel a Ngelekel a sib el mor sel ngiidi le ker el le bor ngii.”​—CHOCHOLT 14:4.

1. Ngmle ua ngerang a osengir a remera el disaiplo el kirel a bo loltirakl er a Jesus?

 NGBEKORD el eru el rak me a tedobech er a omesiungel a Jesus e ‘ngullisechakl el ngara blil chongdibel ra Kapernaum.’ “Te betok rar Ubengkel a chilitii el dimlekea lluut lobengkel,” e le te ulemelechesiu a osisecheklel el mle meringel. Me a Jesus a uleker er a 12 el apostol er ngii el kmo ngdiak el sorir el merael, e a Simon Petrus a dilu el kmo: “Rubak, a ki mor techang? Kau cholab a tekoi ra diak a ullebengelel klengar; me kemam choumerang, e mla mo medengei el kmo, kau a ngiil Chedaol ra Dios.” (Johanes 6:48, 59, 60, 66-69) A remera el disaiplo er a Jesus a di millemolem el obengkel. Me a uriul er a lemucheluch er a chedaol el reng e te millemolem el olengesenges a ulekrael er a Jesus.​—Rellir 16:7-10.

2. (a) Ngtechang a “ngikel blak a rengul e mellomes a rengul mesiou” me a lechub a “tebechelel a blai”? (b) Ngmekerang e a remesiou a toketekii a ungil el chisir el “obengkel a Ngelekel a sib”?

² Ngera sebeched el dmung el kirir a rengellitel el Kristiano er a chelecha el taem? Ngar er sel ulaoch el kirel a “olangch a morngii kau sel mei, ma ullebongel ra taem ra belulechad,” e a Jesus a millekoi el kirel a chelechad er a rengellitel el loltirakl er ngii el ngar er tia el chutem el kmo “ngikel blak a rengul e mellomes a rengul mesiou” me a lechub a “tebechelel a blai.” (Matteus 24:3, 45; Lukas 12:42) El ua ta el cheldebechel, a chelechad el mesiou a mla toketekii a kmal ungil el chisir el “obengkel a Ngelekel a sib el mor sel ngiidi le ker el le bor ngii.” (Monguiu er a Chocholt 14:4, 5.) A rebek el chedal tia el cheldebechel a melemolem el klikiid er a klereng e diak el longidokl er tir er a osisecheklel me a omerellel a “Kloul Babilon,” el ngii a renged er a klsuul el klechelid er a beluulechad el rokir. (Chocholt 17:5) “Ngdimlak a blulak ra ngerir,” e millemolem el “diak a telemellir” er a chelsel tia el beluulechad er a Satan. (Johanes 15:19) Tirke el medechel el ngellitel er tia el chutem a mo “oltirakl” er a Ngelekel a Sib el mo er a eanged.​—Johanes 13:36.

3. Ngera uchul me ngklou a ultutelel a doumerang er ngike el mesiou?

³ A Jesus a mla tutkii a blak a rengul e mellomes a rengul el mesiou “er bebrir ar mesiungel,” el tir a derta el chedal tia el chelechad er a remesiou “el kirel dmu me le mekedmokl a kelir el mechii a blsechel.” E dirrek el mla tutkii a mesiou “el mo mengedereder a daisang er ngii el rokui.” (Matteus 24:45-47) Aika el “daisang er ngii” a uldimukl er ngii a “kloul seked” er a ‘ngodech el chermel el sib.’ (Chocholt 7:9; Johanes 10:16) A derta el ngellitel me a ‘ngodech el sib’ a kirir el oumerang er ngike el mesiou el miltutk el mo mengedereder er tir. Ngbetok a ungil el uchul e kede oumerang er tir, e a erung er ngii a (1) A Jehovah a oumerang er ngike el mesiou. (2) A Jesus a dirrek el loumerang er ngike el mesiou. Ka me bo dorriter aike el tekoi el lomeketakl el kmo a Jehovah el Dios me a Jesus a mui el oumerang er ngike el blak a rengul e mellomes a rengul el mesiou.

A Jehovah a Oumerang er a Mesiungel

4. Ngera uchul me ngsebeched el oumerang er aike el okelel a reng el lomeskid a blak a rengul e mellomes a rengul el mesiou?

⁴ Ka molatk aike el tekoi el rullii a blak a rengul e mellomes a rengul el mesiou el mo kutmokl a ungil el okelel a reng. A Jehovah a kmo: “Ak mo osisecheklau er a rael el kirem el merael er ngii; ak mo osisecheklau e meskau a ngesou er a ungil  uldasu.” (Psalm 32:8) Chochoi, a Jehovah a omekrael er ngike el mesiou. Me kid a dirrek el sebeched el mui el oumerang a tekoi er a klereng me a ulekrael el lomeskid ngike el mesiou.

5. Ngerang a ochotii el kmo a reng er a Dios a omekrael er ngike el mesiou?

⁵ A Jehovah a omekngeltengat er ngike el mesiou el oeak a chedaol el reng. Alta e a reng er a Jehovah a diak lemeues, engdi a tekoi el longetmokl a bleketakl er a osengir a rechad. Ka momtab aike el bla leketmokl a blak a rengul e mellomes a rengul el mesiou el lolecholt er a Jehovah me a Ngelekel me a dirrek a Rengedel. A remengull er a Jehovah a blak a rengrir el omerk er a klumech er a Renged er a chelsel a kuk betok er a 230 el beluu. Me tiang a mla meskid a kmal klou el olechotel a kmo a reng er a Dios a omekrael er ngike el mesiou. (Monguiu er a Rellir 1:8.) Ngike el mesiou a kirel meruul a meklou el tekoi me bo el sebechel el kutmokl a kall er a klereng, el mechii a blsechel el kirir a rechedal a Dios el meliuekl er a beluulechad el rokir. Sel longetmokl e loltaut aikang, e a mesiou a olecholt er a bltikerreng me a delemedemek me a lmuut el bebil el rodech er a reng.​—Galatia 5:22, 23.

6, 7. Ngua ngerang a klungel a klaumerang er a Jehovah el mo er a blak a rengul el mesiou?

⁶ A bo dolechesuar a klungel a klaumerang er a Jehovah el mo er ngike el mesiou, e ngkired el omtab aike el telbilel el mo er a rechedal tia el cheldebechel. A apostol el Paulus a milluches el kmo: “Le ngmorngii a ngerel a trombetang, mar mla mad a mokiis el mo diak le ngemed, me kid a mengodech. Ele tial nguemed el blekeradel a diak le iit el mo oubail ra diak le ngemed, me tial mad el blekeradel a diak le iit el mo oubail ra diak le mad.” (1 Korinth 15:52, 53) A rengellitel el obengkel a Kristus el tir a blak a rengrir el mesiou er a Dios e mad, a mekiis el mo nguu a ileakl el chelechad el reng el diak a ulebengelel. Te mo nguu a diak lengemed el klengar, el bedengir a dikea lluut el mo mechut e di melemolem el mukbeches. A Chocholt 4:4 a mesaod er tirka el mla mekiis el ua ledengchokl er a kingall e telechull er a kolt el krone. A klebkall er a kleking a mo er tirka el ngellitel el Kristiano. Engdi ngar er ngii a lmuut el bebil el tekoi el mo er ngii.

⁷ A Chocholt 19:7, 8 a kmo: “Ngmocha merengel a chebechiil ra Ngelekel a sib, ma Hanayome er ngii a mla kudmeklii; me ngmlo subed er ngii loubail a ungil el becheleleul mamed, el mengeldoech, el klikiid​—tial ungil becheleleul mamed a melemalt lomerellir ar mechedaol.” A Jehovah a millilt er a rengellitel el Kristiano el mo bechil a Ngelekel. A diak lengemed el klengar me a ilteet me a “merengel a chebechiil ra Ngelekel a sib”​—a kmal meklou el  klengeltengat! Aikang a meklou el olechotel a klaumerang er a Dios el mo er a rengellitel el tir a “obengkel a Ngelekel a sib el mor sel ngiidi le ker el le bor ngii.”

A Jesus a Oumerang er a Mesiou

8. Ngmekerang a Jesus e olecholt el kmo ngoumerang er a rengellitel?

⁸ Ngera el tekoi a ochotii el kmo a Jesus a oumerang er a rengellitel? Sel ulebongel el kesus er ngii er tia el chutem, e a Jesus a rirellii a telbilel el mo er tirke el 11 el apostol er ngii el kmo: “Kemiu tirikel dimleblechoel lobengkek era ikel ongarm el mer ngak; misei a ak mo oterekeklii er kemiu chomengedereder ra renged, el ua Demak el ulterekeklii er ngak, ko mo dengchokl ra tebel ra blengur ra rengedek e menga e melim, e mo dengchokl era kingall er chomerreder el oukerrekeriil a ikel truich ma cherul klebliil ra Israel.” (Lukas 22:28-30) Tia el telbiil el Jesus a rirellii el obengterir tirke el 11 a rirelleterir el mo uldimukl er tirke el 144,000 el ngellitel el Kristiano. (Lukas 12:32; Chocholt 5:9, 10; 14:1) A Jesus a rirellii tia el telbiil er a Renged el mo er tirke el ngellitel el mo obengkel el mengedereder e le ngii el uluumerang er tir.

9. Ngerang a uldimukl er a “daisang er [a Kristus]”?

⁹ Me nguaisei e a Jesus Kristus a mla ngiltii a blak a rengul e mellomes a rengul el mesiou “el mo mengedereder a daisang er ngii el rokui”​—aike el rokui el tekoi el kirel a Renged el ngar tia el chutem. (Matteus 24:47) Nguldimukl er aikang, aike el obis el ngar er a headquarter er a Resioning er a Jehovah, me a obis er a Branch er a kakerous el beluu, me a Assembly Hall me a Kingdom Hall el meliuekl er a beluulechad, me a ureor er a berkel a klumech me a omeruul er a redisaiplo. Ngsebechel a chad el oterekokl a mekreos el kloklel er a chad el diak loumerang er ngii?

10. Ngera ochotii el kmo a Jesus a teloi er a rengellitel?

¹⁰ Telkib el taem er a uchei er a lengasech el mo er a eanged, e a mla mekiis er a kodall el Jesus a mlo duum er a reblak a rengrir el disaiplo er ngii e rirellii a telbilel el mo er tir el kmo: “Mesang, ak diblechoel lobengkemiu el mo lmuut era ullebongel ra belulechad.” (Matteus 28:20) A Jesus ngmla otutii a telbilel? Ngar er aika el mereko el 15 el rak e a ildisel a ongdibel er a Resioning er a Jehovah el meliuekl er a beluulechad a ngilasech er a 70,000 el mo betok er a 100,000​—e tiang a ngilsechekl er a betok er a 40 el basent. Me ngtela ildisir a rebeches el disaiplo? Ngbekord el 4.5 el milliol el disaiplo a miltecholb er aika el mereko el 15 el rak​—el kesengil e  ng 800 a ildisir er a bek el sils. Me aika el meklou el ngesecheklel a ureor a olechotel a kmo a Kristus a omekrael er a rengellitel el ngar er aike el miting er a ongdibel, e dirrek el olengeseu er tir er a ureor el meruul er a redisaiplo.

Ngike el Mesiou a Blak a Rengul e Mellomes a Rengul

11, 12. Ngmekerang a mesiou e ochotii el kmo ngblak a rengul e mellomes a rengul?

¹¹ A lsekum a Jehovah el Dios me a Jesus Kristus a mui el loumerang er a blak a rengul el mesiou, e kid me ngkired el mo ua itir. E le a mesiou a mla ochotii el kmo ngblak a rengul el meruul er a mla moterekokl er ngii el ureor. El ua tiang, a babier el Watchtower a bla lorous er ngii el mla mo bekord el 130 el rak. Aike el miting me a assembly me a convention er a Resioning er a Jehovah a melemolem el meleketek a klereng er kid.

¹² A blak a rengul el mesiou a mellomes a rengul e diak el kedidai a rengul el bedul a Jehovah e mereched el oltaut a ulekrael er ngii. El ua tiang, a remengeteklel a klsuul el klechelid a kongei a rechorecherreng me a mekngit el omerellir a rechad er a beluulechad, engdi ngike el mesiou a meskid a uleklatk el kirel a telemellel a beluulechad er a Satan. Ngike el mesiou a meskid a melemalt el uleklatk e le Jehovah el Dios me a Jesus Kristus a omekngeltengat er ngii. Me ngkmal rredemelel a nguu a mui el klaumerang er kid. Me kede mekerang e ochotii el kmo kede ultuil a klaumerang er kid er a blak a rengul e mellomes a rengul el mesiou?

‘Mobengterir’ a Rengellitel sel Loltirakl er a Ngelekel a Sib

13. A doltirakl er a ulochel a Sekaria, e kede mekerang a dochotii a klaumerang er kid el mo er a blak a rengul e mellomes a rengul el mesiou?

¹³ A babier er a Sekaria a ouchais er a “re truich el chad” el mlo duum er a “tal chad er a Judea” e kmo: “Aki obengkem el mor sel bor ngii.” (Monguiu er a Sekaria 8:23.) Me ngike el “tal chad er a Judea” a melutk el kirel a cheldellir a rechad el lomtechei er a remedechel el ngellitel el Kristiano​—el chedal a “Israel ra Dios.” (Galatia 6:16) Tirke el “truich el chad er a ngodech el beluu” a omtechei er a klou el seked er a ngodech el sib. El ua rengellitel el Kristiano el oltirakl er a Jesus el mo er aike el bek el lebo er ngii, me a klou el seked a “obengkel” a blak a rengul e mellomes a rengul el mesiou. Tia el klou el seked a kmal diak el kirir el merur el lolecholt el kmo te obengkel ngike el “mlokedong er chokedong ra eanged.” (Hebru 3:1) A Jesus a diak lemerur el lomekedong er a rengellitel el kmo te “chodam” er ngii.​—Hebru 2:11.

14. Ngmekerang e sebeched el ngosuterir a rudam er a Kristus?

¹⁴ A Jesus Kristus a omes er sel ngelsuid el mo er a rudam er ngii el ua ngeso el mo er ngii. (Monguiu er a Matteus 25:40.) Ngoeak a ngera el rolel e tirke el oba omelatk el mo kiei er tia el chutem a sebechir el ngosuterir a rengellitel el odam er a Kristus? A kot el ungil el rolel a oeak a ureor er a berkel a klumech er a Renged. (Matteus 24:14; Johanes 14:12) Me alta e a ildisir a rengellitel el ngar er tia el chutem a merael el mo kesai, engdi tirke el ngodech el sib a merael el mo betok a ildisir. Me tirke el oba omelatk el  mo kiei er tia el chutem sel leteloi er tia el ureor er a odingel el mesiou el mui el taem, e te dirrek el olengeseu er tirka el ngellitel el churrengelii a ureor er a omeruul el disaiplo. (Matteus 28:19, 20) Me a dirrek el diak dobes el melenget el oeak a kakerous el rolel el olengeseu er tia el ureor er a bek el techall.

15. Ngkirel el mo ua ngera osengir a rederta el Kristiano el kirel a okelel a reng me a tekoi el meltib er a chelsel a cheldebechel el mla er ngike el mesiou?

¹⁵ A derta er kid el Kristiano, ngua ngera osenged el kirel a okelel a reng el lomeskid a blak a rengul el mesiou el oeak a babier el mengai a uchetemel er a Biblia me aike el miting er a Rekristiano? Kid ngdmeu a rengud el melai aikang, e mereched el oltaut a tekoi el desuub? Ngua ngerang a osenged el kirel aike el tekoi el meltib er a chelsel a cheldebechel el mla er ngike el mesiou? A blekongesenges er kid el kirel a ulekrael a ochotii a klaumerang er kid el kirel a tekoi el longetmokl a Jehovah.​—Jakobus 3:17.

16. Ngera uchul me a rokui el Kristiano a kirir el orrenges er a rudam er a Kristus?

¹⁶ A Jesus a dilu el kmo: “A sib er ngak chorrenges ra ngerek, me ngak a medengei, me ngoltirakl er ngak.” (Johanes 10:27) E tiang a klemerang el kirir a rengellitel el Kristiano. E kuk ua ngerang el kirir tirke el ‘obengterir’? Tirkang a kmal kirir el orrenges er a Jesus me a rudam er ngii. E le sel kot el klou el ngerechelel a omekerreu er a tekoi er a klereng er a rechedal a Dios el mla moterekokl er tir tia el ngerachel. Ngerang a uldimukl er sel dorrenges a ngerir a rudam er a Kristus?

17. Nguldimukl er a ngerang a dolengesenges er a mesiou?

¹⁷ A Chelechad er a Ruungerachel a omtechei er a blak a rengul e mellomes a rengul el mesiou er a chelecha el taem, me a uchul e ngomekrael e oungerachel er a ureor er a berkel a klumech er a beluulechad el rokir. A rechedal a Chelechad er a Ruungerachel a ulsemuul e ngellitel el mechuodel er a cheldebechelel a Jehovah. Tirkang a sebeched el omes er tir el ‘mengetekled.’ (Hebru 13:7) E te omekerreu er a bekord el 7,000,000 a ildisir el chad el omerk er a klumech er a Renged er a kuk betok er a 100,000 el ongdibel el meliuekl er a beluulechad. Me tirka el ngellitel el mechuodel a ‘blak a rengrir er a urerel a Rubak.’ (1 Korinth 15:58) Me a dolengesenges er ngike el mesiou e ngbelkul a kmo kede msang a Chelechad er a Ruungerachel a mui el klaingeseu er kid.

Tirke el Orrenges er a Mesiou a Mukngeltengat

18, 19. (a) Te mekerang tirke el lorrenges er a blak a rengul e mellomes a rengul el mesiou e mukngeltengat? (b) Ngerang a kirel el mo turrekong er kid?

¹⁸ Ngar er a uchelel a urerir el me lmuut er a chelechang, e a blak a rengul e mellomes a rengul el mesiou a “ullisechakl er a re betok el chad el meruul a melemalt.” (Daniel 12:3) Tirkang a uldimukl er tirke el mo suobel er a telemellel tia el mekngit el blekeradel. Ngkmal klou el klengeltengat el sebechel el mo er ngii a ungil el deluill er kid me a Dios!

¹⁹ Ngera te mo melechesuar tirke el ullerrenges er a ngerel a blak a rengul el mesiou er sel taem el “chedaol mats, el beches el Jerusalem [tirke el 144,000] el tilobed ra Dios e metengel ra eanged, el mle ua blsiochel hanayome el kldmokl el kirel a bechil”? A Biblia a kmo: “A Dios a di ngii el mo obenterir; e mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.” (Chocholt 21:2-4) Me a leuaisei, e kid el rokui bo dolengesenges er a Kristus me a rengellitel el rudam er ngii.

Ngera Ke Siluub?

• Ngera ochotii el kmo a Jehovah a oumerang er a blak a rengul e mellomes a rengul el mesiou?

• Ngera ochotii el kmo a Jesus a mui el oumerang er ngike el mesiou?

• Ngera uchul me ngsebeched el oumerang er ngike el blak a rengul el “tebechelel a blai”?

• Kede mekerang a dochotii el kmo kede oumerang er ngike el mesiou?

[Aike el Ker er a Suobel]

[Siasing er a 25 el llel]

Ke medengei el kmo ngtechang a bla lengiltii a Jehovah el mo bechiil a Ngelekel?

[Siasing er a 26 el llel]

A Jesus Kristus a mla oterekokl a “daisang er ngii” er a blak a rengul e mellomes a rengul el mesiou

[Siasing er a 27 el llel]

Sel domerk er a klumech, e kede dirrek el olengeseu er a rengellitel